“საერთაშორისო გამოძიება ე.წ. თაღლითური „ქოლცენტრების“ დანაშაულების საქმესთან დაკავშირებით, უახლოეს მომავალში, კონკრეტულ შედეგებამდე მივა და ამ დანაშაულის დადასტურების შემთხვევაში, ქვეყანას ძალიან მძიმე პოლიტიკური შედეგები ელოდება”, – ამის შესახებ პარტია „საქართველოსთვის” წევრმა, შალვა კერესელიძემ პარლამენტის პლენარულ სხდომაზე განაცხადა.

მისი თქმით, მოსამართლეების დასანქცირება, არის ამერიკის შეერთებული შტატების მხრიდან გზავნილი, რომელიც მხოლოდ დასაწყისია.

„ვერავინ წარმოვიდგენდით, რომ „ქართულმა ოცნებამ“, რომელმაც საქართველოს მოსახლეობის მხრიდან, ძალიან დიდი მხარდაჭერა და ლეგიტიმაცია მიიღო, ძალაუფლების შენარჩუნების მიზნით, 10 წლის შემდგომ თავად დაიწყებდა იმ მეთოდების გამოყენებას, რასაც თავად ებრძოდა. თავად დაიწყებდა განსხვავებული პოლიტიკური აზრის დევნას, უფრო მეტად დაინტერესდებოდა უკანონო მოსმენებითა და მიყურადებით, კოჰაბიტაციის შედეგად, შეისისხლხორცებდა მუტაციაგანცდილ ადამიანებს, სახელმწიფოს მთავარი ინსტიტუციებს საკუთარი პარტიის სტრუქტურულ ქვედანაყოფებად აქცევდა, გაჭირვების და სიდუხჭირის გამო აიძულებდა ასი ათასობით მოქალაქე საზღვარგარეთ წასულიყო სამუშაოდ, ჩვენს პარტნიორ მეგობრებს მოღალატეებად და მტრებად შერაცხავდა და რაც ყველაზე მნიშვნელოვანია, ქართველი ხალხის თანხმობის გარეშე, დამოუკიდებლად მიიღებდა გადაწყვეტილებას კურსის ცვლილებაზე.

საერთაშორისო გამოძიება ე.წ. თაღლითური „ქოლცენტრების“ დანაშაულების საქმესთან დაკავშირებით, უახლოეს მომავალში, კონკრეტულ შედეგებამდე მივა და ამ დანაშაულის დადასტურების შემთხვევაში, ქვეყანას ძალიან მძიმე პოლიტიკური შედეგები ელოდება. სწორედ ამიტომ, ჩვენი გუნდი, „პარტია საქართველოსთვის“ შემოვიდა ინიციატივით, რომ პარლამენტში შექმნილიყო დროებითი საგამოძიებო კომისია, რომელიც შეისწავლის საქართველოს ტერიტორიაზე ჩადენილი ტრანსნაციონალური დანაშაულის ე.წ. „ქოლ-ცენტრების“ საქმეს, გამოავლენს ამ დანაშაულების ორგანიზატორებს და ხელისუფლებასთან დაკავშირებულ გავლენიან მფარველებს, სახელმწიფო ინსტიტუციების უმოქმედობის მიზეზებს, ქვეყნისთვის მიყენებულ ზიანს და ამით გამოწვეულ მძიმე პოლიტიკურ შედეგებს“, – განაცხადა შალვა კერესელიძემ.

მისი თქმით, სამწუხაროა, როდესაც საპარლამენტო მმართველობის დროს პარლამენტი თავის ფუნქციას კარგავს, კანონის აღსრულება მხოლოდ ქაღალდზე რჩება და ფორმალურ ხასიათს ატარებს, ხოლო რეალური გადაწყვეტილებები „ღამის ზარებით“ და კანონის გვერდის ავლით მიიღება.

„როდესაც სახელმწიფო ინსტიტუციები დაკისრებულ მოვალეობას ვერ ასრულებენ, ხელისუფლება ძალაუფლების შენარჩუნების მიზნით, დღის წესრიგში აყენებს, რომ ყველა სახელმწიფო ინსტიტუცია მმართველი პარტიის სპეციალურ, სტრუქტურულ ქვედანაყოფებად აქციოს. სწორედ, ამას ჰქვია ხელისუფლების პოლიტიკური აგონია. არადემოკრატიული და მანკიერი მხარეების შეცვლა შესაძლებელია მხოლოდ და მხოლოდ სახელმწიფო სისტემის შეცვლით და ამ ფასის გადახდა ხელისუფლებას 2024 წლის საპარლამენტო არჩევნებში მოუწევს“, – განაცხადა შალვა კერესელიძემ.

„გირჩის“ ერთ-ერთი ლიდერის, დეპუტატ იაგო ხვიჩიას განცხადებით, „ქართული ოცნების“ მმართველობის ფორმა „მაფიოზურია“ და მისი მიზანია, „მოიგონოს იდეალური ტყუილი, რათა დიდი ხნის განმავლობაში შეძლოს კონკრეტული ტერიტორიის მართვა“.

როგორც ხვიჩიამ პარლამენტის პლენარულ სხდომაზე სიტყვით გამოსვლისას განაცხადა, „ქართული ოცნების“ დევიზად ჩამოყალიბდა – „მოატყუე და იბატონე“.

„კონსტიტუციაში გვიწერია, რომ ეს იმდენად პრიორიტეტული საკითხია, რომ როგორც კი ბიუროზე მოხვდება, უახლოეს სხდომაზე უნდა წარედგინოს პარლამენტს. თავის დროზე „ქართულმა ოცნებამ“ დიდი ზარ-ზეიმით წარმოადგინა ინსტიტუციური ცვლილება, რომ 50 კაცს შეეძლო საგამოძიებო კომისიის შექმნა. დღეს, ფაქტობრივად, პარლამენტმა თქვა, რომ უმრავლესობას თუ არ უნდა, საგამოძიებო კომისია არ შეიქმნება, ანუ დაირღვა პარლამენტის ის ნორმა, რომელიც „ქართულმა ოცნებამ“ თვითონ მიიღო. დიდი ხანი ვფიქრობდი, როგორ უნდა ამეხსნა, რა ტიპის მმართველობაა ეს. ყველაზე მეტად ეს არის მაფიოზური მმართველობა. მაფიოზური წესებით ვიმართებით, ქართველო ხალხო! რით განსხვავდება ეს მმართველობა სახელმწიფო მმართველობისგან – თუ პოლიტიკური მმართველობის მიზანი ქვეყნის აღმშენებლობა და უკეთესი ქვეყნის მიღწევაა, ჩვენი ხელისუფლების და ზოგადად, მაფიოზური ხელისუფლების მიზანია, მოიგონოს იდეალური ტყუილი, რათა დიდი ხნის განმავლობაში შეძლოს კონკრეტული ტერიტორიის მართვა. „ქართული ოცნების“ დევიზად ჩამოყალიბდა – „მოატყუე და იბატონე“. სინამდვილეში გვინდა, რომ ამ საყოველთაო ტყუილში იცხოვროს ქართველმა ხალხმა. კიდევ რა არის დამახასიათებელი მაფიოზური მმართველობის – ის, რომ არ უნდა არსებობდეს არცერთი ინსტიტუცია, რომელსაც პატივს სცემ; არ უნდა არსებობდეს არცერთი დაწერილი კანონი; არ უნდა შექმნა ისეთი კანონი, რომელიც შენივე საწინააღმდეგოდ შეიძლება იქნეს გამოყენებული. ანუ, ზოგადად, მაფიოზური მმართველობის დამახასიათებელი ისაა, რომ კანონები ქაღალდზე არ უნდა ეწეროს. ეს კანონები სადღაც უნდა იყოს, რამდენიმე ადამიანმა უნდა იცოდეს და ისინი კანონს ხან ასე ამოქმედებდნენ, ხან – ისე. რა შედეგი მოაქვს ამ მმართველობას – მხოლოდ ასეთი მმართველობის პირობებშია, რომ ულაპარაკოდ მიიღოს სამხედრო კოდექსი, ულაპარაკოდ მიიღოს 78-მა ადამიანმა რუსული კანონი და ასევე ულაპარაკოდ გააუქმოს იმიტომ, რომ ეს მიღებულია არა პოლიტიკური, არამედ მაფიოზური პროცესის შედეგად, სადაც ყველა ინსტიტუციას ძალა უნდა გამოაცალო, კონსტიტუციას მნიშვნელობა არ უნდა ჰქონდეს; კანონი კი არ გჭირდებოდეს ვიღაცის საწინააღმდეგოდ, არამედ ძალა. სწორედ ამ ძალით ხართ გათამამებულები და ის არ იცით, რომ ამ მაფიოზური მმართველობის გამო თქვენ სინამდვილეში მიიღეთ ისეთი ტიპის ძალაუფლება, რომელიც პოლიტიკური ძალაუფლება არაა. ამ ძალაუფლების შედეგად ცდილობთ ქვეყნის პროდასავლური კურსი შეცვალოთ, ცდილობთ, ცივილიზაციის საწინააღმდეგო მიმართულებით წახვიდეთ და ყველაფერი, რასაც აკეთებთ, გააკეთოთ არა ქართველი ხალხის მიზნის, არამედ თქვენი მმართველობითი მიზნების განსახორციელებლად. მაგრამ, ერთი რაღაც გავიწყდებათ – ის, რომ კანონით და პოლიტიკურად იმართებოდეს ქვეყანა, ყველაზე მეტად, თქვენ გჭირდებათ, მმართველი ძალის დაცვას სჭირდება ის, რომ მას მართული ჰქონდეს წესების შესაბამისად და სხვასაც მოუწოდოს წესების დასაცავად. თორემ, თქვენ რომ მალე დასრულდებით და ქართველი ხალხი რომ დიდი ხანი არ იცურებს ცივილიზაციის საწინააღმდეგოდ, ეს ხომ ფაქტია?!“- განაცხადა იაგო ხვიჩიამ.

რომელ სახელმწიფოზე ლაპარაკობდით, როდესაც 2020 წლის არჩევნების შედეგების უაპელაციოდ და დანაშაულებრივად დეზავუირება გინდოდათ და ქვეყნის დემოკრატიულ არჩევანს პირდაპირ საბოტაჟს უწევდით მხოლოდ იმიტომ, რომ არჩევნები ვერ მოიგეთ, – ასე მიმართა საპარლამენტო უმრავლესობის წევრმა ირაკლი ქადაგიშვილმა საპარლამენტო ოპოზიციას.

საპარლამენტო უმრავლესობის წევრის შეფასებით, დეპუტატებმა პლენარულ სხდომათა დარბაზში კრებსითი დემაგოგია მოისმინეს, რომელიც კოლექტიურმა ნაციონალურმა მოძრაობამ შეძლებისდაგვარად მოაგროვა.

„რომელ საგამოძიებო კომისიებზე ლაპარაკობთ, როცა დაგჭირდებათ გარკვეული პოლიტიკური მიზნების მისაღწევად, პიარის ასაწევად და თქვენს მიერვე შექმნილი ნარატივების გასამართლებლად რაღაც საგამოძიებო კომისიების შექმნა? ეს არის თქვენი ფარისევლობის მთელი სიღრმე და ამას გრძნობს ქართველი ხალხი. გრძნობს ხალხი იმ სიძულვილს, რომელიც აქ უხვად იფრქვეოდა მომიტინგეების მიმართ. სიძულვილით სავსე სიტყვებით მიმართავთ იმ ადამიანებს, ვინც თქვენ ხელისუფლებაში ყოფნას მხარს არ უჭერს. ეს არის ნათელი და მერე გიკვირთ ხალხი მხარს რატომ არ გვიჭერსო? რატომ ხართ დამოკიდებული მარტო იქნებ უცხოეთიდან ვინმემ რამე თქვას და ამით ხალხი გაღიზიანდეს და ჩვენ რამე შანსი მოგვეცესო. არც ეს არ მოსწონს ქართველ კაცს! როდესაც შენი დღის წესრიგი არა შენი შესადგენია, არამედ უცხოეთიდან ნათქვამი პროვოკაციულ სიტყვაზე აგებულ პოლიტიკაზე უნდა იყოს. გაიგეთ და შეიგნეთ ეს! ქართველ ხალხს, რომ უნდა ევროპაში ინტეგრაცია და რომ სჯერა ამ ხელისუფლების, რომ ეს ხელისუფლება ნაბიჯ-ნაბიჯ ამ მიზნისკენ მიდის, იმასაც ხედავს რომ თქვენს სიტყვების იქით ყველა ნაბიჯი, ყველა განცხადება მიმართულია, რომ ეს იქნეს ტორპედირებული და ხალხმა იცის რატომ გინდათ ეს.

ხელისუფლებას ახლა იმასაც დააბრალებთ, რომ თუ ირაკლი ღარიბაშვილი კონსერვატიულ კონფერენციაში მონაწილეობას მიიღებს, ეს თურმე ევროპული ფასეულობების დანგრევა იქნება. უკაცრავად და სად წერია, რომ დანგრევაა და უკაცრავად, როგორ წარმოგიდგენიათ თქვენ, რომ აღსარების თავისუფლება, ოჯახის ფასეულობა, ყველა ერის და სახელმწიფოს ტრადიციების დაცვა და განვითარება რამენაირად ეწინააღმდეგება ვინმეს უფლებების დაცვას? – არავითარ შემთხვევაში! ჩვენ ჩვენი ფასეულობებით მივდივართ ევროპისკენ და ის მოძრაობა, რომელმაც დაიწყო საქართველოს დამოუკიდებლობისათვის ბრძოლა და თავიდანვე ცივილიზაციური არჩევანი იყო, დღევანდელი ხელისუფლებაც ამ არჩევანს მიყვება“, – განაცხადა ირაკლი ქადაგიშვილმა.

სირცხვილია, როდესაც რომან გოცირიძე გვეძახის წინა საუკუნის ხალხს და თვითონ მიიჩნევს თავს მომავლად, სინათლედ – კაცი, რომელმაც ჩვენს საზოგადოებას თავი დაამახსოვრა, როგორც „კუპონის მამა“ დღეს სამარცხვინო რაღაცებს ბედავს,- ასე გამოეხმაურა საპარლამენტო უმრავლესობის წევრი ალუდა ღუდუშაური პლენარულ სხდომაზე ოპოზიციონერი დეპუტატის რომან გოცირიძის მიერ გაკეთებულ განცხადებებს.

როგორც ღუდუშაურმა აღნიშნა, რომან გოცირიძე „ნაციონალური მოძრაობიდან“ გააგდეს.

„მართლაც სირცხვილია, როდესაც გოცირიძე გვეძახის წინა საუკუნის ხალხს, წარსულებს და თვითონ მიიჩნევს თავს მომავლად, სინათლედ… პირი, რომელიც „ნაციონალურ მოძრაობაშიც“ გააგდეს. ხაბეიშვილი რომ გაგაგდებს და ზოგადად, თავს, რომ თუნდაც კაცად მიიჩნევ წარმოუდგენელი უტიფრობაა. ეს ადამიანი ჩვენს თანამოქალაქეებს, ღირსეულ ქართველებს, ვაჟკაცებს, დებს, ძმებს, შვილებს შეურაცხყოფას აყენებს და სულელებს ეძახის. როგორ ბედავთ ასეთ რაღაცებს?! კაცი, რომელმაც ჩვენს საზოგადოებას თავი დაამახსოვრა, როგორც „კუპონის მამა“, დღეს ასეთ სამარცხვინო რაღაცებს ბედავს.

დარწმუნებული ვარ, საზოგადოება ამას კარგად ხედავს. მის ამ განცხადებაზე გვერდზე მოღიმარი მისი ყოფილი კოლეგები „ნაციონალური მოძრაობიდან“ აჟიტირებულები ქირქილებდნენ და უხაროდათ, მაგიტომ ხართ 3-5%-იანები, მაგიტომ ხართ მაგ უბედურ დღეში, თავმჯდომარედ ცირკის მასხარა ხაბეიშვილი გყავთ.

არჩევნები მოვა და მიიღებთ ამ ქმედებებზე პასუხებზე. ხატია დეკანოიძე გვეუბნებოდა ანტიდასავლური ძალა ხართო, ჩვენ გვეუბნებით, რომ თურმე კონსტიტუციას და რეგლამენტს ვარღვევთ. 8 თვის განმავლობაში საკუთარი ამომრჩევლის გადაწყვეტილება ფეხებზე დაიკიდეთ, არ შეასრულეთ. მანდატები მამათქვენის და ბებიათქვენის გადმოცემული სუვენირი გგონიათ. ასე, რომ ექცევით ამ გადაწყვეტილებას, იმიტომ ხართ „ფარჩაკები“ და ტურები. როგორ ბედავთ ხალხის შეურაცხყოფას?! ვინ არის ანტიდასავლური ძალა?! როდესაც დემოკრატიაზე საუბრობთ, მართლმსაჯულებაზე, კონსტიტუციასა და ბიზნესზე, დაასახელეთ რა გააკეთეთ ქვეყნისთვის. რა ეკონომიკა, რა დასავლური კურსი?!

როგორ წარმოგიდგენიათ რა რეკომენდაციებს შეასრულებდით მაგალითად, მეგის ქარდავას თაოსნობით, ნაწამები, გაუპატიურებული, პატივაყრილი საკუთარი მოქალაქეებით. საზოგადოება გეკითხებათ და გაეცით პასუხი! უამრავი გამოწვევის და სირთულის ხარჯზე ჩვენ ამ გზასაც გავივლით, ამ გამოწვევებს ქართველ ხალხთან ერთად გადავლახავთ. ამ სამარცხვინო წარსულს საკუთარ ადგილს მივუჩენთ. მიუხედავად შეცდომებისა, ერთად გავაკეთებთ იმას, რომ ჩვენი ქვეყანა იყოს უფრო ძლიერი, დასავლური დიდი ოჯახის ღირსეული წევრი. ქართველ ხალთან ერთად და არანაირი პატივაყრილი და ღირსებაშელახული. დაანებეთ თავი სიცრუეზე საუბარს! ნუ ბედავთ! მე ხელში მიჭირავს ფიცი, რომელიც ყველა დეპუტატმა დადეთ და ხელი მოაწერეთ. აქ წერია – „საქართველოს სიძლიერისთვის“ „ქართველი ხალხის ერთობისთვის“ და არა კეკლუცობისთვის და “ფარჩაკობისთვის”, – აღნიშნა ღუდუშაურმა.

ცნობისთვის, ოპოზიციონერმა დეპუტატმა რომან გოცირიძემ პარლამენტის პლენარულ სხდომაზე ხელისუფლების წარმომადგენლებს მიმართა და აღნიშნა, რომ „მათი ადგილი პოლიტიკურ სანაგვეშია“. კერძოდ, რომან გოცირიძემ 30 აპრილს გამართულ აქციაზე ისაუბრა და აღნიშნა, რომ აქციის ნამდვილი სახელი, რომელსაც სიმბოლურად ერქვა „მოვდივართ“, იყო „მივდივართ“. მისივე თქმით, „ამ აქციით გამოჩნდა, რომ მმართველი გუნდი „პოლიტიკურ მოუსავლეთში მიდის“.

„ფეიკ კამპანიაში“, თითქოსდა საქართველო ევროპის საბჭოს საპარლამენტო ასამბლეაში არ შეუერთდა უკრაინის მხარდამჭერ რეზოლუციას, ჩაერთენ ისეთი პირები, როგორიც არის ბატონი გონჩარენკო, რომელიც თურმე იცლის საქართველოსთვის, ამ დროს, მისი ოჯახის უახლოესი წევრების მიმართ გუშინ ვნახეთ კონკრეტული ბრალდება იმ ფინანსურ მაქინაციებზე და მითვისებულ თანხებთან დაკავშირებით, რომელიც საჯარო გახდა. აღარ მაქვს საუბარი ოპოზიციაზე, რომელიც მაქსიმალურად ცდილობს, ჩვენი ქვეყნის ინტერესები დააზიანოს – ამის შესახებ პარლამენტის პლენარულ სხდომაზე უმრავლესობის წევრმა გივი მიქანაძემ განაცხადა.

მისი თქმით, რადიკალურმა ოპოზიციამ ხელოვნურად ააგორა ბინძური „ფეიკ კამპანია“, თითქოსდა, მმართველი გუნდის წარმომადგენლები არ შეუერთდნენ უკრაინის მხარდამჭერ რეზოლუციას.

აქვე გივი მიქანაძე გამოეხმაურა ე.წ. „ფაქტჩეკის“ განმახორციელებელი არასამთავრობო ორგანიზაციების საქმიანობას და აღნიშნა, რომ არ ახსენდება მათი მხრიდან ქვეყნის საზიანოდ აწეული აბსოლუტურად ხელოვნური, უსაფუძვლო და არანაირი მტკიცებულებით გამყარებული „ფეიკ კამპანია“.

„პირველი და უმთავრესი – საზოგადოებამ უნდა იცოდეს, რომ ნებისმიერი სესიის წინ ხდება კონკრეტული დაგეგმარება, სადაც დელეგაციას აქვს თავისი კონკრეტული გეგმა, რომლის მიხედვითაც განსაზღვრავს იმ ორმხრივ თუ მრავალმხრივ შეხვედრებს, ასევე სხვადასხვა საკომიტეტო მუშაობაში ჩართულობის ფორმატებს. როგორც აქამდე, ამჯერადაც მმართველმა გუნდმა სრულფასოვნად დაუჭირა მხარი ყველა იმ საკითხს, რომელიც დაკავშირებულია უკრაინასთან.

ჩვენ მტკიცედ ვდგავართ იმ პოლიტიკურ პოზიციაზე, რომელიც ფაქტებით ამტკიცებს, რომ უკვე ასეულობით რეზოლუციას თუ კონკრეტულ დეკლარაციას შეუერთდა საქართველო, ინიციატორიც, სპონსორიც იყო ამ დეკლარაციების, რომ დაცული და მხარდაჭერილი ყოფილიყო უკრაინის სუვერენიტეტი და ტერიტორიული მთლიანობა.

უფრო მეტიც, დელეგაციის წარმომადგენლებმა უმრავლესობის მხრიდან მონიტორინგის კომიტეტის საკომიტეტო მოსმენაზე, კომიტეტზე, მხარი დაუჭირეს იმ რეზოლუციას, რომელიც სწორედ ამ „ფეიკ ნიუსის“ მთავარი ნაწილი გახდა“ – განაცხადა გივი მიქანაძემ. მისივე თქმით, დელეგაციამ თავისი ვიზიტი დაასრულა ოთხშაბათს და დატოვა სტრასბურგი, ხოლო კენჭისყრა კონკრეტულ რეზოლუციასთან მიმართებაში წარიმართებოდა ხუთშაბათს, რის გამოც, ფიზიკურად დელეგაცია იქ ვერ იქნებოდა. „მიუხედავად ამისა, ჩვენ ჩვენი პოლიტიკური პოზიცია დავაფიქსირეთ. უფრო მეტს ვიტყვი, მოახლოებულ რეიკიავიკის სამიტზე, რომელიც მაისის შუა რიცხვებში ჩატარდება, სადაც მთავრობის პირველი პირები იქნებიან წარმოდგენილი 46 სახელმწიფოდან, გადის დეკლარაცია, რომლის ერთ-ერთი დანართი სწორედ ამ საკითხს ეხება და ჩვენ წინასწარ გაცხადებული გვაქვს ამ დეკლარაციის მიმართ პოლიტიკური მხარდაჭერა. ასევე მინდა გამოვეხმაურო ე.წ. „ფაქტჩეკის“ განმახორციელებელი არასამთავრობო ორგანიზაციების საქმიანობას. ჩვენ ვერ დავინახეთ ვერცერთი შემთხვევა, როდესაც ამ ორგანიზაციებს გაეპროტესტებინათ ქვეყნის საზიანოდ აწეული აბსოლუტურად ხელოვნური, უსაფუძვლო და არანაირი მტკიცებულებით გამყარებული „ფეიკ კამპანია“- განაცხადა გივი მიქანაძემ.

უკრაინის პარლამენტის დეპუტატის, ალექსეი გონჩარენკოს ახლო ნათესავები დიდი ოდენობით სახელმწიფო ქონების მითვისების გამო დააკავეს.