„მგონია, რომ 2023 წლის გაზაფხული, ეს არის მმართველი ძალის მიერ კონსტიტუციის უხეშად დარღვევის დრო. მარტში, როცა „რუსული კანონის“ მიღება გადაწყვიტეთ, თქვენ, ფაქტობრივად, უარი თქვით საქართველოს კონსტიტუციის ერთ-ერთ უმნიშვნელოვანეს ჩანაწერზე. ახლა, როცა ოპოზიციას გვეუბნებით უარს, რომ შევქმნათ საგამოძიებო კომისია, თქვენ ეწინააღმდეგებით კონსტიტუციას“, – ამის შესახებ პარლამენტის პლენარულ სხდომაზე უფრაქციო პარლამენტის წევრმა, არმაზ ახვლედიანმა განაცხადა.
მისი თქმით, როცა მმართველი ძალა ეწინააღმდეგება კონსტიტუციას ის ამით ანგრევს სახელმწიფოს საფუძველს. როგორც არმაზ ახვლედიანმა აღნიშნა, ხელისუფლების მიზანია, რომ 2024წელს უხეში ძალის გამოყენებით დარჩეს ხელისუფლებაში.
„ამის მიღმა, თქვენ ჩადიხართ, აგრეთვე, სხვა დანაშაულებს. მაგალითად, უკვე რა ხანია პატიმარია უდანაშაულო ნიკა გვარამია და ის განაგრძობს პატიმრობაში ყოფნას. ვიცით, რომ ამ კვირის განმავლობაში თქვენ აპირებთ კენჭი უყაროთ ბათუმში უკანონო მშენებლობების ე.წ ამნისტიას. გადაეფარეთ მოსამართლეთა კლანს. ყველაფერს აკეთებთ იმისათვის, რომ 12- პუნქტიანი გეგმა შესრულებული იყოს მხოლოდ ფორმალურად. ცხადია, ეს კეთდება იმისთვის, რომ ქვეყანამ ვერ მიიღოს კანდიდატის სტატუსი.
რა მიზანს ისახავს თქვენი ეს განზრახვა?! ერთადერთს, რომ შეძლოთ 2024 არჩევნების ისე ჩატარება, როგორც ეს ჩაატარეთ, სხვა შორის, ბოლო არჩევნები, რომლითაც ამაყობთ. არც დარღვევაა, არც შენიშვნაა, ერთი პარტიაა და გამარჯვებულიც ერთია. თქვენი ამოცანაა, რომ 2024 წელს უხეში ძალის გამოყენებით, კანონის და კონსტიტუციის ჩაწიხვლით დარჩეთ ხელისუფლებაში“, – აღნიშნა არმაზ ახვლედიანმა.
