„ნაციონალური მოძრაობის“ თავმჯდომარეს „ლევან ხაბეიშვილს კასპში მოსახლეობასთან შეხვედრისას, „ქართული ოცნების“ აქტივისტები და საკრებულოს წევრები დაუპირისპირდნენ და ამ ფორმით შეხვედრის ჩაშლა სცადეს, – აღნიშნულის შესახებ ინფორმაციას „ნაციონალური მოძრაობა“ ავრცელებს.

პარტიის პრესსამსახურის ცნობით, დაპირისპირების დროს ლევან ხაბეიშვილს დაუზიანეს პირადი ავტომობილი, ასევე მიაყენეს სიტყვიერი შეურაცხყოფა.

„კასპში, სადაც ვხვდებოდით მოქალაქეებს, მოგვიქსიეს საკრებულოს წევრები, „ქართული ოცნების“ აქტივისტები, სსიპ-ების და ა(ა)იპ-ების თანამშრომლები, ილანძღებიან, იგინებიან. ცხადაია, ეს ყველაფერი არის ორგანიზებული. სადაც არ უნდა წავიდე მომყვებიან, ეს იქნება კასპი, გარდაბანი, თუ სადაც ვიქნები, დამყვებიან და ჰგონიათ, რომ ამით შეგვაშინებენ”, – განაცხადა ლევან ხაბეიშვილმა.

საზოგადოების გასაგონად მინდა ვთქვა, რომ მე ჩემს წილ პასუხისმგებლობას ნამდვილად ვგრძნობ, ეს ადამიანი რომ საქართველოს პრემიერ-მინისტრია, – ამის შესახებ ოპოზიციონერმა დეპუტატმა ხატია დეკანოიძემ პარლამენტის პლენარულ სხდომაზე, საქართველოს პრემიერ-მინისტრ ირაკლი ღარიბაშვილზე განაცხადა.

დეკანოიძის თქმით, ის პრემიერის დღევანდელი მოხსენებიდან ახალს არაფერს ელოდა, თუმცა მიიჩნევს, რომ მთავრობის მეთაურმა თავისი დღევანდელი გამოსვლით საკუთარ თავსაც გადააჭარბა.

„საზოგადოების გასაგონად მინდა ვთქვა, რომ მე ჩემს წილ პასუხისმგებლობას ნამდვილად ვგრძნობ, ეს ადამიანი რომ საქართველოს პრემიერ-მინისტრია და ეს არის ოპოზიციის პასუხისმგებლობა, რომ დღემდე ეს გუნდი, ეს პარტია და ეს ადამიანი არის საქართველოს პრემიერ-მინისტრი. ის შეურაცხყოფა, რომელიც ახლა მან ტრიბუნიდან გააჟღერა, ეს არის ნამდვილად ჩემი და ოპოზიციის ყველა წარმომადგენლის პასუხისმგებლობა და ეს მინდა თამამად ვთქვა“, – განაცხადა დეკანოიძემ.

მან პრემიერს კითხვით მიმართა, რატომ არ მიდის ნატო-ს ვილნიუსის სამიტზე.

„ბატონო ირაკლი, თქვენ საუბრობდით სტატუსზე და რაღაც კამპანიურად ამბობთ, რომ სტატუსი მნიშვნელოვანია და ა.შ. თქვენი გუნდის წარმომადგენელი, კახა კალაძე, ამბობს, რომელიც, თუ არ ვცდები, რაღაც თანამდებობას იკავებს „ქართლ ოცნებაში“, რომ სტატუსს თუ არ მოგვცემენ, ესეც არ არის პრობლემა და მე მაინტერესებს, იზიარებთ თუ არა თქვენ მის ამ განცხადებას, რომ თუ სტატუსს არ მოგვცემენ, ესეც პრობლემა არ არის?

მეორე, რაც მაინტერესებს, ეს არის, რატომ არ მიდიხართ ვილნიუსის სამიტზე და ხომ არ უკავშირდება ეს „გლობსეკზე“ თქვენს განცხადებებს, როდესაც ნატო-ს ასპირანტმა ქვეყანამ პირდაპირ დაადანაშაულა ნატო, თქვენს განცხადებას ვციტირებ, იმაში, რომ უკრაინაში რუსეთის აგრესია მოხდა და რატომ არ ესწრებით იმ ძალიან მნიშვნელოვან სამიტს?

თქვენ ხართ ის ადამიანი, რომელიც ჩვენს ახალგაზრდებს, ვინც აქ რუსულ კანონს აპროტესტებდა, სატანისტებს უწოდებდით. ამიტომ მე მართლა მაინტერესებს, ასე ფიქრობთ, თუ ყველა, ვინც დასავლეთში მიდის განათლების მისაღებად, მართლა სატანისტია? და მათ შორის ძალიან ბევრი თქვენი შვილებიც მიდიან. ახალს არაფერს არ ველოდებოდი აქ თქვენგან, მაგრამ მე ვფიქრობ, რომ დღეს თქვენს თავსაც გადააჭარბეთ“, – განაცხადა ღარიბაშვილმა.

ზეპირ გამოსვლაში ამ წერილობით ტექსტს სიცრუეში გაასწარით, – ამ სიტყვებით პარლამენტის ოპოზიციონერმა დეპუტატმა საქართველოს პრემიერ-მინისტრ ირაკლი ღარიბაშვილს მიმართა, რომელმაც დღეს პლენარულ სხდომაზე ყოველწლიური ანგარიში წარადგინა.

როგორც რომან გოცირიძემ სიტყვით გამოსვლისას აღნიშნა, პრემიერის ანგარიშში ერთი გვერდიც კი არ მოიძებნება, რომელიც სიმართლეს შეესაბამება.

„პრემიერის ანგარიში წინასწარ გამომიგზავნეს და წავიკითხე. ეს მთლიანად სიცრუესა და მანიპულაციაზეა აგებული. ერთ გვერდსაც კი ვერ მოძებნი, სიმართლეს რომ შეესაბამებოდეს. ზეპირ გამოსვლაში ამ წერილობით ტექსტს სიცრუეში გაასწარით. აქ გიწერიათ, რომ დასაქმებულთა რაოდენობა 66,3 ათასით გაიზარდა, თუმცა ტრიბუნიდან თქვით, რომ 250 ათასით გაიზარდა. შთაბეჭდილება შემექმნა, რომ იტყოდით, გუშინდელ რაგბის თამაშზე, სადაც ქართველებმა არგენტინელებს მოუგეს, თქვენ თამაშობდით. „ბედნიერების ინდექსით“ საქართველო მსოფლიოს 153 ქვეყნიდან 117-ე ადგილზეა. ყველაზე უბედური ქვეყნების რიგშია. ამას იმიტომ არ ვამბობ, რომ თქვენი ხელისუფლების ნაკლებს გავუსვა ხაზი. არის რაღაცები, რაც რაოდენობრივად არ იზომება, მაგრამ ქვეყნის მდგომარეობას აჩვენებს“, – განაცხადა რომან გოცირიძემ.

დღეს, საპარლამენტო ტრიბუნაზე, თქვენი სახით, ბატონო ირაკლი, ქვეყნის მოღალატე დგას, რომელიც საქართველოს ევროპულ მომავალს მიზანმიმართულად ართმევს, – ამ სიტყვებით „ერთიანი ნაციონალური მოძრაობის“ წევრმა თინა ბოკუჩავამ პრემიერ-მინისტრს, ირაკლი ღარიბაშვილს სიტყვით გამოსვლისას მიმართა.

ბოკუჩავას თქმით, ხელისუფლება რუსულ საქმეს აკეთებს, თუმცა, ისინი „დამარცხდებიან, რადგან ქართველი ხალხის ნება ურყევია“.

„განადგურებული, დეგრადირებული, გაუბედურებული – რას არ გვიწოდებთ, მაგრამ გწყინთ, როცა ჩვენ ქვეყნის რუსიფიკაციის მცდელობაში გამხელთ, გახსენებთ, რომ თქვენ რუსულ საქმეს აკეთებთ და ფიზიკური ანგარიშსწორებით იმუქრებით. დღეს, საპარლამენტო ტრიბუნაზე, თქვენი სახით, ბატონო ირაკლი, ქვეყნის მოღალატე დგას, რომელიც საქართველოს მიზანმიმართულად ართმევს ევროპულ მომავალს, ეს ქვეყნის ეროვნული ინტერესების ღალატია, რადგან ქვეყნის ერთადერთი ეროვნული ინტერესი დღეს, ევროპული ინტერესია. ქვეყნის ღალატია, რომ პირადად თქვენ, ომს ნატო-ს აბრალებთ და ახლა უკვე ქვეყნის ღალატია ჩვენი ეკონომიკის ტერორისტ რუსეთზე ჩამოკიდება, ქვეყნის ღალატია ჩვენი ტერიტორიის რუსეთზე დაკისრებული სანქციების თავის არიდების დერეფნად გამოყენება, ქვეყნის ღალატია რუსეთის მოქალაქეების უკონტროლო შემოდინების დაშვება, ქვეყნის ღალატია, მალული მოლაპარაკების გზით, საჰაერო, საზღვაო და სარკინიგზო მიმოსვლის აღდგენა, ქვეყნის ღალატია რუსული კანონის მიღების მცდელობა, ქვეყნის ღალატია მეორე ფრონტის მითის მოგონება, ქვეყნის ღალატია ევრორეკომენდაციების მიზანმიმართული უგულებელყოფა, ქვეყნის ღალატია საქართველოს მესამე პრეზიდენტის ციხეში გამომწყვდევა პუტინის საამებლად, როცა მთელი თავისუფალი სამყარო მისი გათავისუფლებისკენ მოგიწოდებთ, მაგრამ მიშა სააკაშვილის ყველგან და ყოველთვის ეშინოდა ბიძინა ივანიშვილს და ეშინია დღესაც, ციხეშიც, თავისუფლებაზეც, უკრაინაშიც, საქართველოშიც, ჯანმრთელიც და ფიზიკურად დასუსტებულიც, რადგან იცით, რომ თანაბარი თამაშის წესებით მასთან დამარცხდებით. პოლონელი ექიმების მასთან შეშვების სამარცხვინო ბიუროკრატიული ხრიკებით გაჭიანურება კი, მისი მოწამვლის კვალის დამალვას ემსახურება, რადგან აქაც გეშინიათ, სიმართლის გეშინიათ და ამიტომ გეშინიათ ხალხისაც, გეშინიათ ახალგაზრდების, თავად მონურ მორჩილებაში გეშინიათ მათი თავისუფლების, ბატონო ირაკლი, თავად რუსული საქმის მკეთებელს გეშინიათ მათი ევროპულობის, გეშინიათ მათი სიტყვების და უსიტყვობის და მზად ხართ, თეთრი ფურცლის გამო დააპატიმროთ. თეთრი ფურცლითაც, სიტყვითაც, პარლამენტშიც, ქუჩაშიც, ყველგან და ყოველთვის შეგახსენებთ, რომ ივანიშვილის დავალებით, თქვენ, ბატონო ირაკლი და თქვენი ბანდიტოკრატიული მთავრობა რუსულ საქმეს აკეთებს, მაგრამ აქვე გეტყვით, რომ დამარცხდებით, რადგან ქართველი ხალხის ურყევი ნება გაიმარჯვებს“, – განაცხადა ბოკუჩავამ.

დღეს რომ ჩვენი მოქალაქეები უვიზოდ გადაადგილდებიან ევროპის ქვეყნებში, ჩვენი დამსახურებაა, 2012 წლამდე მხოლოდ ელიტა მოგზაურობდა ევროპაში, ჩვეულებრივ მოქალაქეებს არ ჰქონდათ ამის საშუალება, საკონსულოებში რიგებში დგომა უწევდათ და ხშირ შემთხვევაში, პასუხი იყო უარი-ამის შესახებ საქართველოს პრემიერ-მინისტრმა ირაკლი ღარიბაშვილმა პარლამენტში სიტყვით გამოსვლისას განაცხადა.

პრემიერ-მინისტრის თქმით, „ქართული ოცნების” დამსახურებაა, რომ ქვეყანამ მოაწერა ხელი ასოცირების შეთანხმების ხელშეკრულებას, თავისუფალ ვაჭრობას, უვიზო რეჟიმს და ახლა უკვე ევროპული პერსპექტივა მოგვენიჭა.

„ჩვენ, ჩვენმა ხელისუფლებამ ბოლო 10 წელში გავაკეთეთ მაქსიმუმი. თუ რაიმე გააკეთა ვინმემ ოდესმე, ბოლო 30 წლის განმავლობაში, ეს არის ჩვენი ხელისუფლება, როცა მოვაწერეთ ასოცირების შეთანხმების ხელშეკრულებას ხელი, თავისუფალ ვაჭრობას, უვიზო რეჟიმს. დღეს რომ ჩვენი მოქალაქეები გადაადგილდებიან ევროპის ქვეყნებში უვიზოდ, ეს არის ჩვენი დამსახურება, მეგობრებო, ეს არის „ქართული ოცნების” დამსახურება. ეს რა თქმა უნდა, იყო მიუღწეველი ოცნება, გახსოვთ და ალბათ დამეთანხმებით ყველანი, 2012 წლამდე მხოლოდ, ვთქვათ პირდაპირ, მხოლოდ ელიტა მოგზაურობდა, გადაადგილდებოდა ევროპის მიმართულებით შეუფერხებლად. ჩვეულებრივ მოქალაქეებს არ ჰქონდათ ამის საშუალება იმიტომ, რომ უწევდათ რიგებში დგომა, საკონსულოებში და ხშირ შემთხვევაში, ვიცით კარგად, რომ ეს პასუხი იყო უარი.

ამიტომ, რა თქმა უნდა, ეს იყო გარღვევა, შეიძლება ასე ითქვას. ეს არის დამსახურება ჩვენი ხელისუფლების, კიდევ ვიტყვი. თუ ვინმემ გააკეთა რაიმე ევროინტეგრაციის გზაზე, ეს არის „ქართული ოცნება” კონკრეტული შედეგებით: ასოცირების შეთანხმება, თავისუფალი ვაჭრობა, უვიზო რეჟიმი და ევროპული პერსპექტივა”,- განაცხადა ირაკლი ღარიბაშვილმა.

ძალიან დიდი შეცდომა იქნა დაშვებული შარშან, ჩვენი ევროპელი მეგობრების მხრიდან, როცა საქართველოს არ მიეცა სტატუსი და მიენიჭა მოლდოვას და უკრაინას ბონუსად, ანუ ავანსად, იმის მიუხედავად, რომ ჩვენ ყველა პარამეტრით, ყველა მონაცემით წინ ვუსწრებდით და ვუსწრებთ დღესაც მოლდოვას, უკრაინას, ამის შესახებ საქართველოს პრემიერ-მინისტრმა ირაკლი ღარიბაშვილმა პარლამენტში, წლიური ანგარიშის წარდგენისას განაცხადა.

მთავრობის მეთაურის თქმით, ისტორიული გადაწყვეტილება იყო საქართველოსთვის ევროპული პერსპექტივის მინიჭება, რაზეც წინა ხელისუფლების დროს ოცნებაც კი არ შეიძლებოდა.

„რაც შეეხება საგარეო პოლიტიკას და ამ მიმართულებით არსებულ ვითარებას. მინდა აღვნიშნო, რომ საკმაოდ აქტიურ პოლიტიკას ვაწარმოებ პირადად მე და საგარეო საქმეთა მინისტრი. ბოლო პერიოდი მოგეხსენებათ, საკმაოდ დატვირთული იყო. ჩვენ არაერთი შეხვედრა გავმართეთ ჩვენს პარტნიორებთან მთავარი პრიორიტეტი რაც მთავარია, ჩვენი ქვეყნისთვის ევროკავშირის კანდიდატის სტატუსის მიღებაა. მთავრობამ, პარლამენტთან ერთად მაქსიმუმი გააკეთა პრიორიტეტების შესრულების ნაწილში. ჩვენ სრულად ჩართულები ვიყავით ამ პროცესში. ძალიან დიდი შეცდომა იქნა დაშვებული შარშან, ჩვენი ევროპელი მეგობრების მხრიდან, როცა საქართველოს არ მიეცა სტატუსი და მიენიჭა მოლდოვას და უკრაინას ბონუსად, ანუ ავანსად, იმის მიუხედავად, რომ ჩვენ ყველა პარამეტრით, ყველა მონაცემით წინ ვუსწრებდით და ვუსწრებთ დღესაც მოლდოვას, უკრაინას. ამის დასტურია დაახლოებით ორი თვის წინ გამოქვეყნებული ანგარიში, სადაც ჩანს, რომ საქართველო უსწრებს დღესაც ორივე ხსენებულ ქვეყანას. მაგრამ ჩვენთვის მთავარი, ვიტყოდი, ისტორიული გადაწყვეტილება იყო და ასე შეაფასეს ჩვენმა ევროპელმა კოლეგებმა, ევროპული პერსპექტივის მინიჭება, რაზეც შეიძლება ითქვას, რომ წინა ხელისუფლების დროს ამაზე ოცნებაც კი არ შეიძლებოდა, იმიტომ, რომ ეს იყო აბსოლუტურად აბსტრაქტული, მიუღწეველი მიზანი და ოცნება”, – განაცხადა პრემიერმა.