ყველა გონიერი და პატრიოტი ხელისუფალი მოიქცეოდა ასე – გამოიჩენდა სტრატეგიულ მოთმინებას და გონიერებას, რომ ქვეყნისთვის აერიდებინა დამანგრეველი მორიგი ომი და ოკუპაცია, – ამის შესახებ პრემიერ-მინისტრმა, ირაკლი ღარიბაშვილმა პარლამენტში, ყოველწლიური მოხსნებისას განაცხადა.

როგორც ირაკლი ღარიბაშვილმა აღნიშნა, გაუგებარია ეს აჟიოტაჟი, რაც უკრაინაში მიმდინარე ომთან და საქართველოს ხელისუფლების პოლიტიკასთან დაკავშირებით არის.

„გაუგებარია ეს აჟიოტაჟი, თუმცა, სხვა თემა რომ არ დარჩენიათ, რაღაცაზე ხომ უნდა ეხმაურათ. შემდეგ გარედან ვიღაცები დაიხმარეს და არაფრისგან აჟიოტაჟი შექმნეს. მე რაიმე ახალი გითხარით, რაც არ იცით? დღეს ქვეყანას უსაფრთხოების არავითარი გარანტიები არ გააჩნია, ნულია. ჩვენ გვეკუთვნის და განვკარგავთ ჩვენი ქვეყნის ბედს და მათ შორის უსაფრთხოებასაც, ყოველგვარი გარანტიების გარეშე. დღეს, რაც ვიცით, ერთადერთი, გარანტიების მიმცემი ორგანიზაცია არის ნატო, რომლის წევრი არ ვართ და არც ევროკავშირის წევრი არ ვართ ჯერჯერობით. ჩვენი ერთ-ერთი მთავარი გამოწვევა რაც არის, ეს არის ქვეყნის შიგნით არსებული უცხო ქვეყნის საოკუპაციო ჯარები. მეგობრებო, ჩვენი ქვეყნის 20% ოკუპირებულია. ეს არის დიდი გამოწვევა. ამ ვითარებაში მთავრობამ რა უნდა გააკეთოს, მითუმეტეს იმ ფონზე, რაც უკრაინაში ხდება. მთელი ტერიტორიის დაახლოებით 20% მთლიანად მიწასთან გასწორებული და ოკუპირებულია. ომი არ ჩერდება. ყველა გონიერი და პატრიოტი ხელისუფალი მოიქცეოდა ისე, რომ გამოიჩინოს სტრატეგიული მოთმინებაც და გონიერება, რათა ქვეყანას აარიდოს დამანგრეველი მორიგი ომი და ოკუპაცია. ჩვენ არაერთხელ გვითქვამს, რომ ვირჩევთ სტრატეგიული მოთმინების გზას და პოლიტიკას, რომელსაც თანმიმდევრულად მივყვებით. ნახეთ, რომ ბოლო 10 წელია, ამ პრაგმატულ, ინტერესებზე გათვლილმა პოლიტიკამ კონკრეტული შედეგები მოიტანა. ერთადერთი შემთხვევა ჩვენი მმართველობის დროს, როდესაც ქვეყანას არ ჰქონია ომი და არავითარი სერიოზული კონფლიქტი. ამას ხომ უნდა გაფრთხილება, შენარჩუნება და კიდევ უფრო მეტად გამყარება? მოახლოებულ ნატო-ს სამიტზე საქართველო წარმოდგენილი იქნება საგარეო საქმეთა მინისტრის სახით“, – განაცხადა ღარიბაშვილმა.

ოპოზიციის წარმომადგენლებმა ბოდიში უნდა მოიხადონ ყოველ დღე ჩვენი ქვეყნის იმიჯის დაზიანებისთვის, არაერთი ბინძური სტატია შეუკვეთეს მთელს ევროპაში, მათ შორის იმ ქვეყნებში, სადაც ხდებოდა სწორედაც სანქციების დარღვევა, -ამის შესახებ საქართველოს პრემიერ-მინისტრმა ირაკლი ღარიბაშვილმა პარლამენტში განაცხადა.

მთავრობის მეთაურის თქმით, საკუთარი ქვეყნის მტრობა და მავნებლობაა, როცა ყოველგვარი ფაქტების და საფუძვლის გარეშე, საკუთარ ქვეყანას ბრალს სდებენ, ცილს სწამებენ, რომ თურმე აქ ხდება სანქციების გვერდის ავლა და საქართველო გადაქცეულია, „შავ ხვრელად”.

„მე მინდა შევუტრიალო ეს კითხვა ჩვენს უპასუხისმგებლო, მავნებელ ოპოზიციას. თქვენ გახსოვთ, რომ ერთ წელზე მეტია სწორედ მავნებელი ოპოზიცია, ეს არის მავნებლობა, როცა ყოველგვარი ფაქტების გარეშე, ყოველგვარი საფუძვლის გარეშე, საკუთარ ქვეყანას ბრალს სდებ, ცილს სწამებ, რომ თურმე აქ ხდება სანქციების გვერდის ავლა და საქართველო გადაქცეულია, როგორც ისინი იტყოდნენ, „შავ ხვრელად” და აშ.., ამას ჰქვია საკუთარი ქვეყნის მტრობა და საკუთარი ქვეყნის წინააღმდეგ მავნებლობა. აი, ამას სჩადიოდნენ ეს ადამიანები. დღეს რომ აღარ არიან და ვერ მოისმენენ სიმართლეს. სიმართლის მოსმენა უჭირთ, ისე არიან გაუბედურებულები, კიდევ გავიმეორებ. ამიტომ,

ბოდიში უნდა მოიხადონ ყოველ დღე ჩვენი ქვეყნის იმიჯის დაზიანებისთვის. არაერთი ბინძური სტატია შეუკვეთეს მათ და მათმა ლობისტებმა მთელს ევროპაში, მათ შორის იმ ქვეყნებში, სადაც ხდებოდა სწორედაც სანქციების დარღვევა.

მე არ მინდა შეგნებულად ჩამოვთვალო. ამ სიტუაციაში მე არ ვთვლი მიზანშეწონილად, რომ ჩამოვთვალო ის ქვეყნები. იმ ქვეყნებში ხდებოდა სანქციების დარღვევა, ჩვენ აქეთ დავეხმარეთ, 1300 შემთხვევა გამოვუვლინეთ, ამაზე ღიად არ ვსაუბრობდით შეგნებულად, მაგრამ ყველაფერს აქვს თავისი საზღვარი და აი ეს მავნებელი ოპოზიცია აგრძელებდა მტრულ საქმიანობას და ჩვენი ქვეყნის წინააღმდეგ უკვეთავდა ათეულობით სტატიას ყოველკვირა, ევროპის თითქმის ყველა დედაქალაქში, სადაც საუბარი იყო იმაზე, რომ თითქოს ჩვენ სანქციების გვერდის ავლის მთავარი ცენტრი გავხდით, ჰაბი გავხდით და აშ.. ნული ფაქტი, მეგობრებო, არც ერთი ფაქტი არ იქნა წარმოდგენილი. ამას გეუბნებით მე, როგორც მთავრობის მეთაური და ამას ამბობს ევროკავშირი, ამერიკის შეერთებული შტატები, დიდი ბრიტანეთი. თქვენ გახსოვთ, თვეების წინ გამოვიდა სახელმწიფო დეპარტამენტის ანგარიში, სადაც მკაფიოდ და ხმამაღლა ითქვა შემდეგი, რომ ქართული საფინანსო ინსტიტუტები, მთელი ფინანსური სისტემა მუშაობს ეფექტურად და არ ხდება სანქციების გვერდის ავლა და დარღვევა. ამაზე მკაფიო განცხადება არ ვიცი რა შეიძლება ყოფილიყო. ახლა ჩამოვიდა ბატონი ო ბრაიენი და სხვა ბატონები, სალივანი და დიდი ბრიტანეთის წარმომადგენელი. მათაც მკაფიოდ, კიდევ ერთხელ საჯაროდ განმარტეს, რომ ისინი მადლიერნი არიან ჩვენთან თანამშრომლობით, ჩვენ შევთანხმდით, ძალიან ბევრი ღია საუბარი გვქონდა. ვისაუბრეთ რისკებზეც, მათ შორის შევთანხმდით კიდევ რა თქმა უნდა, ამ თანამშრომლობის გაგრძელებაზე და საჯაროდ თქვეს, რომ კითხვები არ არსებობს და მთავრობას აქვს შექმნილი მონიტორინგის და კონტროლის ეფექტური სისტემა. ჩვენ ვართ კეთილსინდისიერი პარტნიორები და ვიცავთ ჩვენს წესებს. რასაც ვამბობთ, იმას ვასრულებთ ჩვენი საქმით და ქმედებით”,- განაცხადა პრემიერ-მინისტრმა.

შემატყობინეს, რომ ჩვენი ოპოზიცია გაიქცა პარლამენტის დარბაზიდან, რომ ბატონ „ქურქუმალ ვაითს“ მიეხმარონ – სამწუხარო და საწყენია, რომ ოპოზიცია კითხვებზე პასუხების მოსასმენად დარბაზში აღარ დაგვხვდა, – ამის შესახებ საქართველოს პრემიერ-მინისტრმა ირაკლი ღარიბაშვილმა პარლამენტის პლენარულ სხდომაზე ყოველწლიური მოხსენებისას განაცხადა.

მისი თქმით, იტოვებს უფლებას, რომ ოპოზიციის „ზოგიერთ აბსურდულ კითხვასა და შეურაცხყოფას“ არ უპასუხოს.

„შემატყობინეს, რომ ჩვენი ოპოზიცია გაიქცა პარლამენტის დარბაზიდან, რომ ბატონ “ქურქუმალ ვაითს” მიეხმარონ, როგორც იგი თავის თავს უწოდებს. სამწუხარო და საწყენია, რომ დღეს არ გვყავს წარმოდგენილი ოპოზიცია, რომელმაც ბევრი კითხვა დამისვა და კითხვებზე პასუხების მოსასმენად დარბაზში აღარ დაგვხვდა. შესაბამისად, ვიტოვებ უფლებას, რომ მათ აბსურდულ კითხვებს და შეურაცხყოფას არ ვუპასუხო. საზოგადოებისთვის მაინც შეიძლება მოვახდინო მათ რამდენიმე გამონათქვამზე რეაგირება, რათა არ დარჩეს განცდა, რომ რაიმე კითხვას გავურბივართ“, – განაცხადა ირაკლი ღარიბაშვილმა.

შეგახსენებთ, რომ „ნაციონალური მოძრაობის“ დეპუტატებმა პარლამენტში, პრემიერის მოხსენებისა და კითხვების დასმის შემდეგ ბრიფინგი გამართეს, სადაც განაცხადეს, რომ „რუსი პრემიერის მოსმენას არ აპირებენ“. დეპუტატების განცხადებით, წავლენ კასპში, სადაც, მათი თქმით, „რუსული ოცნების“ მხრიდან ორგანიზებულ ბიუროკრატიული ბანდიტებს ჰქონდათ მცდელობა, რომ ჩაშალონ „ერთიანი ნაციონალური მოძრაობის“ თავმჯდომარის, ლევან ხაბეიშვილის შეხვედრა პენსიონერებთან“.

მინდა კულტურის მიმართულებით აღვნიშნო, რომ ჩვენ დავიწყეთ კამპანია Starring Georgia – ამის თაობაზე გახსოვთ რომ თავიდან იყო, რომ გარკვეული კრიტიკა გამოითქვა, რომ რატომ აკეთებენ, მაშინ როცა თვითონ აკეთებდნენ გაუაზრებელ კონცერტებს,-ამის შესახებ საქართველოს პრემიერ-მინისტრმა ირაკლი ღარიბაშვილმა პარლამენტში განაცხადა.

პრემიერის თქმით, ბლექ სი არენამ დაიწყო მასშტაბური ორწლიანი კამპანია, ამისთვის სავარაუდო ბიუჯეტი არის 70 მილიონი ლარი.

“ჩვენ დავიწყეთ შემდეგნაირად: ბლექ სი არენამ დაიწყო მასშტაბური ორწლიანი კამპანია, ამისთვის ჩვენი სავარაუდო ბიუჯეტი არის 70 მილიონი ლარი, მაგრამ აქვე მინდა ახლა ჩაშლილად მოგახსენოთ: წელს დაახლოებით 28 მილიონ ლარამდე დაიხარჯება, ამ ღონისძიებებზე ველოდებით 100 000-მდე სტუმარს, ბილეთები მინდა აღვნიშნო, რომ რეკორდული სისწრაფით გაიყიდა და აქაც ჩანს, რომ ეს სწორი პროგრამა იყო და არსებობს საზოგადოებაში ამაზე კონსენსუსი და პოზიტიური მოლოდინები არსებობს. შემოსავლები რაც მიღებულია, დღეის მდგომარეობით, 17 მილიონი ლარი არის მიღებული შემოსავლების სახით, ამას გარდა 4.5 მილიონი ლარი არის სპონსორობით მიღებული შემოსავლები და წლის ბოლომდე ველოდებით 150 მილიონი ლარის ფარგლებში შემოსავალს.

ეს იყო კონკრეტული, კარგად გააზრებული, გათვლილი პროგრამა. ამას ჩვენ გავაგრძელებთ, ჩვენს ახალგაზრდებს და არამხოლოდ ახალგაზრდებს, ყველას შევთავაზებთ ძალიან ბევრ სიურპრიზს, მათ შორის 2024-შიც და საქართველო უნდა გახდეს მუდმივად აი ასეთი დონის, საერთაშორისო დონის სპორტის, კულტურის ღონისძიებების, შეკრების ადგილი. ჩვენ გვაქვს ამისთვის ყველაფერი, ყველა პირობა, რომ ვუმასპინძლოთ საერთაშორისო დონის ღონისძიებებს.

აი ეს გახლავთ ყველა ის ძირითადი მიღწევები, ამის თაობაზე თქვენ გამოგეგზავნათ დეტალური ანგარიში”, – განაცხადა ირაკლი ღარიბაშვილმა.

ჩვენ მივემართებით კასპში, რადგან პოლიტიკური ეპიცენტრი ახლა არის სწორედ იქ და არ ვაპირებთ, მოვუსმინოთ რუს პრემიერს, რომელიც მორიგ ჯერზე ვამხილეთ ქვეყნის ღალატში, – ამის შესახებ „ნაციონალური მოძრაობის“ წევრმა, თინა ბოკუჩავამ განაცხადა.

როგორც თინა ბოკუჩავამ აღნიშნა, „რუსული ოცნების“ მხრიდან ორგანიზებული ბიუროკრატიული ბანდიტები იყვნენ მიქსეული პენსიონერებთან და ჰქონდათ მცდელობა, რომ ჩაშალონ „ერთიანი ნაციონალური მოძრაობის“ თავმჯდომარის და ლიდერების შეხვედრა პენსიონერებთან.

„ჩვენ მოვითხოვთ დაუყოვნებლივ შს მინისტრისგან, რომ აღდგეს კანონიერება, დაისაჯონ მოძალადეები და აღკვეთონ უკანონობა. ჩვენც მივემართებით კასპში, რადგან პოლიტიკური ეპიცენტრი ახლა არის სწორედ იქ და არ ვაპირებთ, მოვუსმინოთ რუს პრემიერს, რომელიც მორიგ ჯერზე ვამხილეთ ქვეყნის ღალატში. ის და ივანიშვილის ბანდიტოკრატიული რეჟიმი ართმევს ჩვენს ქვეყანას ევროპულ მიმავალს, ხოლო ჩვენი ქვეყნის ერთადერთი ეროვნული ინტერესი არის დღეს ევროპული ინტერესი. ჩვენი ქვეყნის ერთადერთი მნიშვნელოვანი საქმე, რომ არ ემსახურებოდეს დღეს ჩვენი ხელისუფლება რუსულ საქმეს, იქნებოდა ჩვენი ქვეყნის ევროინტეგრაცია, მაგრამ ქვეყნის ევროპული მომავლის ნგრევისთვის ყველაფერს აკეთებს რუსი ღარიბაშვილი და ივანიშვილის რუსული რეჟიმი“, – განაცხადა ბოკუჩავამ.

ეს ადამიანი პენსიაზე გადის და მასთან პოლემიკაში შესვლა არ მინდა, – ასე უპასუხა „ქართული ოცნების“ თავმჯდომარე ირაკლი კობახიძემ კითხვას აშშ-ის ელჩის კელი დეგნანის განცხადებაზე, რომ კობახიძემ ძალადობის წახალისების თაობაზე ბრალდებების დროს უნდა დაასახელოს, ვის გულისხმობს.

ამასთან, კითხვაზე, რატომ არ იმყოფებოდნენ „ქართული ოცნების“ ლიდერები გუშინ, ამერიკის შეერთებული შტატების დამოუკიდებლობის დღისადმი მიძღვნილ ღონისძიებაზე, კობახიძემ განმარტა, რომ საპარლამენტო უმრავლესობის ლიდერებმა სოლიდარობა გამოუცხადეს იმ დეპუტატებს, რომელთაც ჯერ მოსაწვევი მიიღეს, შემდეგ კი უთხრეს, რომ ღონისძიებაზე არ მისულიყვნენ.

„პარლამენტიდან უმრავლესობაში ვინც კი მაღალი თანამდებობის პირია, არცერთი მივედით, ამას კონკრეტული მიზეზი ჰქონდა – ჩვენ მცირე სოლიდარობა გამოვხატეთ დეპუტატების მიმართ, რომელთაც გამოუგზავნეს მოსაწვევი, შემდეგ კი უთხრეს, რომ ჯობდა, არ მისულიყვნენ. მე არ დავაკონკრეტებ. ასეთი იყო სამი ადამიანი, ვისაც ჩვენი ინფორმაციით, შეცდომით გამოუგზავნეს მოწვევა და შემდეგ უთხრეს, რომ არ მისულიყვნენ. ეს რბილად რომ ვთქვათ, არასწორი დამოკიდებულებაა. ასეთ დროს, ჩვენი მხრიდან ვალდებულება იყო, რომ სოლიდარობა გამოგვეხატა. ეს არის და ეს. პატივს ვცემთ საელჩოს, მაგრამ, როდესაც კონკრეტული ჩინოსნების გამო უხეში შეცდომების დაშვება ხდება, რეაგირება გვჭირდება. მომავალ წელს რომ გაიმართება ამერიკის შეერთებულ შტატების დამოუკიდებლობის დღისადმი მიძღვნილი ღონისძიება, ყველა მიწვეული დეპუტატი მიიღებს მონაწილეობას, მაგრამ წელს, ასეთი უხეში შეცდომა იყო და ამას ჩვენი მხრიდან რეაგირება ჰქონდა. დეპუტატები იყვნენ, მაგრამ რამდენიმე ლიდერი საპარლამენტო უმრავლესობიდან მისული არ იყო სოლიდარობის ნიშნად. გვქონდა კონსულტაცია და დეპუტატები უნდა მისულიყვნენ. რეაგირება სჭირდება კონკრეტული ჩინოსნის არასწორ ქმედებას, მაგრამ ჩვენ გამოვხატავთ პატივისცემას ამერიკელი ხალხის მიმართ, ამერიკის დამოუკიდებლობის დღის მიმართ, აქედან გამომდინარე, საელჩოში დეპუტატების მისვლა ამის გამოხატულება იყო“,- განაცხადა კობახიძემ.

შეგახსენებთ, რომ ამერიკის შეერთებული შტატების ელჩის კელი დეგნანის განცხადებით, ძალადობა მიუღებელია და თუ კობახიძე ბრალდებებზე საუბარს აპირებს, „უნდა აღნიშნოს მაინც ვისზე საუბრობს“. დეგნანის შეფასება ირაკლი კობახიძის იმ განცხადებას მოჰყვა, როდესაც „ქართული ოცნების“ თავმჯდომარემ თქვა, რომ „კონკრეტულმა ელჩმა ძალადობა წაახალისა“.