საქართველოს პრემიერ-მინისტრმა ირაკლი ღარიბაშვილმა საქართველოში წმინდა საყდრის დესპანთან, ჟოზე აველინო ბეტანკურთან გამოსამშვიდობებელი შეხვედრა გამართა. ამის შესახებ ინფორმაციას მთავრობის ადმინისტრაცია ავრცელებს.

მათივე ცნობით, მთავრობის ადმინისტრაციაში გამართულ შეხვედრაზე საქართველოსა და ვატიკანს შორის არსებული თანამშრომლობის საკითხები განიხილეს; დადებითად შეაფასეს თანამშრომლობის დინამიკა კულტურის, მეცნიერებისა და განათლების სფეროში.

„პრემიერ-მინისტრმა ხაზი გაუსვა საქართველოსა და წმინდა საყდარს შორის არსებულ მეგობრულ კავშირებს.

ირაკლი ღარიბაშვილმა ჟოზე აველინო ბეტანკურს ორ ქვეყანას შორის არსებული მეგობრული ურთიერთობების კიდევ უფრო განმტკიცებასა და გაღრმავებაში შეტანილი წვლილისთვის, ასევე − საქართველოს სუვერენიტეტისა და ტერიტორიული მთლიანობის მხარდაჭერისათვის მადლობა გადაუხადა და სამომავლო საქმიანობაში წარმატებები უსურვა“,- ნათქვამია ინფორმაციაში.

ოპოზიციისთვის კანდიდატის სტატუსს არასდროს ჰქონია მნიშვნელობა, არც მაშინ, როცა პანიკა ჰქონდათ მოწყობილი, რომ ქვეყანა იღუპება სტატუსის გარეშეო და არც ახლა, როცა ამბობენ, რომ კანდიდატის სტატუსი არაფერს ნიშნავს, სინამდვილეში, მათთვის კანდიდატის სტატუსს და ევროკავშირთან ინტეგრაციას რაიმე ღირებულება არასოდეს ჰქონია, – ამის შესახებ პარლამენტის თავმჯდომარემ, შალვა პაპუაშვილმა განაცხადა.

პაპუაშვილის თქმით, რადიკალური ოპოზიციის წარმომადგენლები ცდილობდნენ,ევროპასთან ინტეგრაცია ხელისუფლებისა და ქვეყნის წინააღმდეგ იარაღად გამოეყენებინათ.

“ერთადერთ ღირებულებას იმაში ხედავდნენ, რომ ფიქრობდნენ, შეიძლება, გამოეყენებინათ, როგორც იარაღი ხელისუფლების წინააღმდეგ. დღეს რომ ერთმანეთის მხილებით არიან დაკავებული და იმ გემიდან გარბიან, რომელიც იძირება, თითოეული ეს ადამიანი ჩართული იყო იმაში, რომ ევროპასთან ინტეგრაცია ხელისუფლებისა და ქვეყნის წინააღმდეგ იარაღად გამოეყენებინათ, რათა ქვეყანაში სიტუაცია აერიათ. ხედავენ, რომ ეს ხელიდან ეცლებათ და არ უნდათ, რომ ჩაჰყვნენ იმ გემს, რომელიც იძირება. გამოჩნდება, რომ სინამდვილეში, ვინც ანტიევროპულია საქართველოში, სამწუხაროდ, ჩვენი ოპოზიციაა,” – განაცხადა პაპუაშვილმა.

საპარლამენტო უმრავლესობის წევრის, მაკა ბოჭორიშვილის განცხადებით, მიხეილ სააკაშვილი ნებისმიერ მნიშვნელოვან საკითხს, რაც ეხება საქართველოს, იყენებს საკუთარი ინტერესებისთვის, რომელსაც ხელისუფლებაში დაბრუნება წარმოადგენს.

„მიხეილ სააკაშვილი არსებობს ერთადერთი ოცნებით, რომ საქართველოში როგორმე დაბრუნდეს ხელისუფლებაში და ამისთვის ყველაფერს იყენებს. ამისთვის იყენებს იმ პოლიტიკურ ძალას, რომელსაც „ნაციონალური მოძრაობა“ ჰქვია და სხვა ოპოზიციურ პარტიებსაც, რომლებიც „ნაციონალური მოძრაობის“ განაყოფები, თუ ქვეშევრდომები არიან.

ნებისმიერ მნიშვნელოვან საკითხს, რაც ეხება საქართველოს, იყენებს არა საქართველოს ინტერესებიდან, არამედ საკუთარი ინტერესებიდან გამომდინარე. ამის მოწმეები ვართ უკვე ძალიან დიდი ხანია და არაფერი შეცვლილა, მიხეილ სააკაშვილი იყენებდა, იყენებს და გამოიყენებს საქართველოს საკუთარი ინტერესებისთვის“, – განაცხადა მაკა ბოჭორიშვილმა.

საქართველოს ყოფილმა პრეზიდენტმა, მიხეილ სააკაშვილმა დღევანდელ სასამართლო სხდომაზე განაცხადა, რომ დღეს ქვეყანა უნდა იყოს მობილიზებული, რადგან საფრთხის ქვეშ იმყოფება. სააკაშვილის თქმით, საქართველოში შემოსულია დივერსიული ჯგუფი, რის გამოც „სამოქალაქო თავდაცვისთვის“ ცხელი ხაზის შექმნა სურს.

პარლამენტი პროცედურული ხრიკებით კონსტიტუციას არღვევს – ოპოზიციის მიერ ინიცირებულია 72 კანონპროექტი, საიდანაც 57 დღემდე განხილული არ არის , – ამის შესახებ „ევროოპტიმისტების“ დეპუტატმა რომან გოცირიძემ პარლამენტში გამართულ ბრიფინგზე განაცხადა.

გოცირიძე ოპოზიციის მიერ ინიცირებული კანონპროექტების განხილვის მიზანმიმართულ შეფერხებაზე საუბრობს და აცხადებს, რომ ოპოზიციას წაართვეს კანონშემოქმედებითი უფლება.

“პარლამენტი პროცედურული ხრიკების გამოყენებით არღვევს კონსტიტუციას. ოპოზიციის მიერ ამ მოწვევის პარლამენტში ინიცირებულია 72 კანონპროექტი, საიდანაც 57 დღემდე განხილული არ არის, არათუ პლენარულ, არამედ კომიტეტის სხდომებზეც კი. შეიძლება მოხდეს ისეთი უცნაური მოვლენა, რომ პარლამენტმა მუშაობა დაამთავროს და 4 წლის განმავლობაში ოპოზიციის მიერ წარმოდგენილი კანონპროექტების უმრავლესობა საერთოდ არ იყოს განხილული , არც ერთ დონეზე. ეს არის კონსტიტუციის პირდაპირი დარღვევა. ზოგიერთი კანონპროექტი გადავადებულია 12- ჯერ, 11- ჯერ, 6- ჯერ და 7- ჯერ. არის კანონპროექტები, რომელიც 2 წელია თაროზეა შემოდებული. იციან, რა ამ კვლევის შესახებ, რეზოლუციაც მომზადდება და ამ საკითხს მივცემთ უფრო სერიოზულ რეზონანსს, ბოლო პერიოდში რაღაც პროექტები დაიძრა, ჩვენი პროექტებიც გამოიტანეს წინა კომიტეტზე, მაგრამ ეს არსებითად არაფერს ცვლის,”- განაცხადა გოცირიძემ.

მისივე თქმით, კანონპროექტების ძირითად ნაწილს იურიდიული კომიტეტი აფერხებს და 72- დან 36 იურიდიულ კომიტეტშია “გაჭედილი”.

გოცირიძე აცხადებს, რომ ინიციატივების შეფერხება შერჩევითად ხდება და ძირითადად ის ინიციატივები ფერხდება, რომელიც მათთვის არის მტკივნეული და ეხება საარჩევნო საკითხებს, სასამართლოს რეფორმას, რუსეთს.

დეპუტატი აღნიშნავს, რომ ოპოზიციის კანონპროექტები საკომიტეტო მოსმენებზე არ გააქვთ, რათა ოპოზიციის ინიციატივებთან დაკავშირებით მსჯელობა საერთოდ არ შედგეს და საინფორმაციო ვაკუუმი შეიქმნას.

“მოვითხოვთ დაუყოვნებლივ შეწყდეს ეს მავნე პრაქტიკა, შეტანილ იქნას ცვლილებები რეგლამენტში, რომ სარეგლამენტო ხრიკებით უმრავლესობას არ ჰქონდეს შესაძლებლობა ოპოზიცია გამოთიშოს კანონშემოქმედებითი საქმიანობიდან”, – განაცხადა გოცირიძემ.