დღეს შეგვიძლია თამამად ვთქვათ, რომ როგორც შიდა, ასევე ჩვენს საერთაშორისო მოგზაურებს გუდაურში ახალი ინფრასტრუქტურა დახვდებათ, ასევე დახვდებათ განახლებული და რეაბილიტირებული სასრიალო ტრასები, რაც უზრუნველყოფს იმას, რომ ჩვენ შევძლებთ მთაზე გავატაროთ კიდევ უფრო მეტი დამსვენებელი, გავზარდოთ გამტარუნარიანობა, რაც დაეხმარება კერძო სექტორს, განთავსებისა და კვების ობიექტებს, რომ კიდევ უფრო მეტ მოგზაურს უმასპინძლონ, – ამის შესახებ ეკონომიკის მინისტრის მოადგილემ, მარიამ ქვრივიშვილმა  განაცხადა.

„გუდაურში საზეიმო ვითარებაში ზამთრის ტურისტული სეზონი და ასევე ახალი საბაგირო კომპლექსი გავხსენით, რომელიც საქართველოს მთავრობამ გუდაურში მოაწყო. ეს არის ახალი საბაგირო კომპლექსი, რომელიც გულისხმობს ორ დამოუკიდებელ, პარალელურ ხაზს. ამ საბაგიროს გარშემო ჩვენ მოვაწყვეთ სრულიად ახალი 6კმ-იანი სასრიალო არეალი, ასევე მოხდა არსებული 70კმ-იანი სასრიალო ტრასის რეაბილიტაცია. მიმდინარე სეზონისთვის ასევე შევიძინეთ ახალი სპეცტექნიკა, რომელიც დაგვეხმარება, რომ ჩვენი სასრიალო ტრასები იყოს ევროპული სტანდარტებით მოწესრიგებული“, – აღნიშნა მარიამ ქვრივიშვილმა.

გვეყოფა დაპირისპირება, ევროკავშირმა კანდიდატის სტატუსი მოგვცა და გვთხოვა, რომ მოვიქცეთ ევროპული სტანდარტით. „ვიღაც მინდა ბოლომდე დავსაჯო და სადღაც ამოვალპო ციხეში“ – ეს არ არის ევროპული მიდგომა, – ასე ეხმაურება „სტრატეგია აღმშენებლის“ ლიდერი, გიორგი ვაშაძე პარტიის „საქართველოსთვის“ ხელისუფლებისადმი მოწოდებას, რომ საქართველოს მესამე პრეზიდენტი, მიხეილ სააკაშვილი სასჯელაღსრულების დაწესებულებაში გადაიყვანონ.

გიორგი ვაშაძის თქმით, პარტია „საქართველოსთვის“ მიერ გაკეთებული განცხადება ჰუმანურობას სრულიად მოკლებულია.

„ძალიან ვწუხვარ ამ განცხადების გამო. მისი შინაარსი ჰუმანურობას აბსოლუტურად მოკლებულია. ვწუხვარ, რომ ამაზე პოლიტიკური ქულების დაწერას ცდილობს რომელიმე პოლიტიკური ძალა. „ქოცზე“ უფრო „ქოცი“ ვერავინ ვერ გახდება, ეს აბსოლუტურად ყველას უნდა ესმოდეს. ჩვენ უნდა ავაშენოთ ქვეყანა, სადაც პრეზიდენტები ციხეში კი არ სხედან, არამედ პრეზიდენტები არიან დაფასებულები“, – განაცხადა გიორგი ვაშაძემ.

გიორგი ვაშაძის განცხადებით, აღნიშნული განცხადება პოლიტიკოსების დაპირისპირებისკენ წაქეზებაა და ხელს უშლის ერთიანობას.

„მას შემდეგ, რაც ევროკავშირის კანდიდატი ქვეყანა ვართ, დაპირისპირებაზე ორიენტირებული ყველა განაცხადი ფუჭი საქმის კეთებაა და შეცდომა. დღეს გვინდა გაერთიანება და არა დაპირისპირება. თუ ისინი ფიქრობენ, რომ ამით რეიტინგი მოემატებათ, არ მოემატებათ იმიტომ, რომ ხალხს ყელში ამოუვიდა დაპირისპირება. ეს განაცხადები არის წაქეზება დაპირისპირებისკენ და არა გაერთიანებისკენ“, – განაცხადა გიორგი ვაშაძემ.

რუსული ხელწერის ხალხმა შეიძლება მოითხოვოს, რომ თვალები დათხაროს პრეზიდენტ სააკაშვილს, ეს არ გამიკვირდება. ერთ მხარეს არის რუსული პარტია გახარია-ივანიშვილი, მეორე მხარეს ბორის ჯონსონი, მაკრონი, დასავლური პერსპექტივა, თავისუფლება, ეკონომიკური დოვლათი. – ასე ეხმაურება „ნაციონალური მოძრაობის” თავმჯდომარე, ლევან ხაბეიშვილი პარტია „საქართველოსთვის“ მიერ ხელისუფლების მისამართით გაკეთებულ მოწოდებას, რომ საქართველოს მესამე პრეზიდენტი, მიხეილ სააკაშვილის კლინიკიდან სასჯელაღსრულების დაწესებულებაში გადაიყვანონ.

როგორც ხაბეიშვილმა აღნიშნა, ის დარწმუნებულია, რომ ხალხი 2024 წელს რუსულ პარტიებს პასუხს გასცემს.

„უდიდესია კონტრასტი, ერთ მხარეს არის გახარია-ივანიშვილი, მეორე მხარეს ვნახეთ, რომ ბორის ჯონსონმა დაბადების დღე და შობა მოულოცა სააკაშვილს. რუსული ხელწერის ხალხმა შეიძლება მოითხოვოს, რომ თვალები დათხაროს სააკაშვილს, ეს არ გამიკვირდება. ერთ მხარეს არის რუსული პარტია გახარია-ივანიშვილი, მეორე მხარეს ბორის ჯონსონი, მაკრონი, დასავლური პერსპექტივა, თავისუფლება, ეკონომიკური დოვლათი. ხალხი ანალიტიკას გააკეთებს, შეაფასებს. დარწმუნებული ვარ, გახარიას ამ შეფასებაზე ადეკვატური რეაქცია ექნებათ. თავად მიიღებს ხალხი ამ განცხადებას ცნობად და 2024 წელს რუსულ პარტიებს პასუხს გასცემს“,- აღნიშნა ხაბეიშვილმა.

ამასთან, მან 2019 წლის 20-21 ივნისზე ისაუბრა და აღნიშნა, რომ „ყველამ კარგად ვიცით, ვინ ისროდა დათვის ტყვიებს, ვინ ჩამოიყვანა გავრილოვი და როგორ ვითარდებოდა მოვლენები“.

მისივე თქმით, ისტორიას ვერავინ გადაწერს და პასუხისმგებლობას ვერავინ გაექცევა.

„ეს არის კოლექტიური “გავრილოვები”, რომლებიც ხელისუფლებაში არიან. ის, რომ ერთი ჭანჭიკი გამოეცალათ და რუსული პროპაგანდის გაძლიერებაში ეხმარება ივანიშვილს, არ ნიშნავს, რომ პასუხისმგებლობას ვინმე გაექცევა”,- აღნიშნა ხაბეიშვილმა.

ცნობისთვის, პოლიტიკური ჯგუფი „საქართველოსთვის“ ხელისუფლებას მიხეილ სააკაშვილის კლინიკა „ვივამედიდან” სასჯელაღსრულების დაწესებულებაში გადაყვანისკენ მოუწოდებს. როგორც დეპუტატმა მიხეილ დაუშვილმა პარლამენტში გამართულ ბრიფინგზე განაცხადა, არ შეიძლება უცხო ქვეყნის მოქალაქეს ქვეყნის შიდა პოლიტიკურ პროცესებში ჩარევისა და მონაწილეობის უფლება ეძლეოდეს.

დაუშვილის თქმით, ადგილი აქვს „სისხლის სამართლის საპროცესო კოდექსის” სისტემატურ დარღვევას, რაც უნდა შეწყდეს და ახალი წლების შემდეგ მაინც გადაყვანილ იქნას მიხეილ სააკაშვილი სასჯელაღსრულების დაწესებულებაში.

საქართველოს მესამე პრეზიდენტის, მიხეილ სააკაშვილის წარმომადგენლის, სოფო ჯაფარიძის განცხადებით, „ფაქტები სამწუხაროდ, მეტყველებს იმაზე, რომ გიორგი გახარიას გუნდი „ქართულ ოცნებასთან“ სინქრონში მუშაობს“.

აღნიშნულის შესახებ ჯაფარიძემ ჟურნალისტებს განუცხადა, რითაც გამოეხმაურა პარტია „საქართველოსთვის“ მოთხოვნას სააკაშვილის კლინიკიდან ციხეში გადაყვანის თაობაზე.

„საზოგადოებას არ დავიწყებია სისხლიანი 20 ივნისის აქტორები და ასევე, შეუძლებელია თავს ასაღებდე ოპოზიციურ პარტიად და ერთი მხრივ, ხელისუფლებას ბიუჯეტს უმტკიცებდე და მეორე მხრივ, ითხოვდე მთავარი ოპოზიციური პარტიის ლიდერის საზოგადოებისგან სრულ იზოლირებას. აქედან გამომდინარე, ვფიქრობ, რომ ფაქტები სამწუხაროდ, მეტყველებს იმაზე, რომ ბატონი გახარიას გუნდი სინქრონში მუშაობს „ქართულ ოცნებასთან“, – განაცხადა სოფო ჯაფარიძემ.

ყველა ხვდება, რომ რადიკალური ოპოზიცია არჩევნებს მძიმედ წააგებს, აქედან გამომდინარე, საუბარი, რომ ისინი კიდევ ერთხელ ეცდებიან იგივე სცენარის განვითარებას, რაც განავითარეს 2020 წლის საპარლამენტო არჩევნების შემდეგ, აბსოლუტურად ლოგიკურია, – ამის შესახებ პარტია „ქართული ოცნების“ თავმჯდომარე ირაკლი კობახიძემ განაცხადა.

მისივე თქმით, ეს მცდელობა განწირულია ფიასკოსთვის.

„მათ სხვა გზა და არჩევანი არც აქვთ. სინამდვილეში, ესეც არ არის მათი არჩევანი, რესურსი არ აქვთ, ან არჩევნებით დაიბრუნონ ძალაუფლება, ან ქუჩით. საბოლოო ჯამში, არჩევნებსაც და ქუჩასაც ერთი და იგივე რესურსი სჭირდება, ეს ხალხის მხარდაჭერაა. როცა ხალხი მხარს არ გიჭერს, ბუნებრივია, ვერც არჩევნებს მოიგებ და ვერც რევოლუციას მოაწყობ. აქედან გამომდინარე, ეს მცდელობა იქნება, თუმცა განწირულია, ფიასკოსთვის, წარუმატებლობისთვის. რაც შეეხება მოლაპარაკებების გახსნის თემის გამოყენებას ამ მიზნებისთვის, ყველაფერი შეიძლება. როგორც წინა შემთხვევაში ვერაფერი მოახერხეს, ვერც რევოლუციის მოწყობა, ვერც ქვეყანაში არსებითად ვითარების არევა, ასე გააგრძელებენ მომავალშიც. მათ არავითარი რესურსი არ აქვთ, რათა ქვეყანაში არეულობა მოაწყონ.

ამასთან, კობახიძემ საქაღთველოს პრეზიდენტის, სალომე ზურაბიშვილის მიერ ლაზარე გრიგორიადისის შეწყალების საკითხთან დაკავშირებული კითხვის საპასუხოდ განაცხადა, რომ სალომე ზურაბიშვილი არის კოლექტიური „ნაცმოძრაობის“ შემადგენელი ნაწილი, შესაბამისად, ნებისმიერი ნაბიჯი შეიძლება, გადადგას.

„რაც შეეხება შეწყალებას, სალომე ზურაბიშვილმა ბოლო პერიოდის განმავლობაში ისეთი რაღაცები აკეთა, მისგან არავის არაფერი გაუკვირდება. ის არის რადიკალური ოპოზიციის, კოლექტიური „ნაცმოძრაობის“ ერთი შემადგენელი ნაწილი, შესაბამისად, ნებისმიერი ნაბიჯი შეიძლება, გადადგას. თუ ამას გააკეთებს, ეს იქნება მორიგი მტკიცებულება, რომ ის პირდაპირ მიყვება კოლექტიური „ნაცმოძრაობის“ დღის წესრიგს“, – აღნიშნა კობახიძემ.