“ევგენი პრიგოჟინის თვითმფრინავი ვლადიმერ პუტინის თანხმობითა და რუსეთის უშიშროების საბჭოს მდივნის, ნიკოლაი პატრუშევის ბრძანებით ააფეთქეს” – „უოლ სთრით ჯორნალი“

121
spot_img

„უოლ სთრით ჯორნალის“ ცნობით, „ვაგნერის“ დამფუძნებელ ევგენი პრიგოჟინის თვითმფრინავი ვლადიმერ პუტინის თანხმობითა და რუსეთის უშიშროების საბჭოს მდივნის, ნიკოლაი პატრუშევის ბრძანებით ააფეთქეს.

ამერიკული გამოცემა აღნიშნულ ინფორმაციას დასავლეთის სპეცსამსახურებზე და რუსეთის დაზვერვის ყოფილ ოფიცერზე დაყრდნობით ავრცელებს, რომლებიც ამტკიცებენ, რომ პატრუშევი შეშფოთებული იყო კერძო სამხედრო კომპანია „ვაგნერისა“ და თავად პრიგოჟინის პოლიტიკური თუ სამხედრო გავლენის ზრდით.  სტატიის მიხედვით, რუსეთის უშიშროების საბჭოს მდივანი ჯერ კიდევ 2022 წელის ზაფხულში აფრთხილებდა პუტინს, რომ პრიგოჟინი კრემლს ემუქრება.

„უოლ სთრით ჯორნალის“ ინფორმაციით, ოქტომბერში პრიგოჟინმა პირადად დაურეკა პუტინს და ემოციურად უსაყვედურა უკრაინაში ბრძოლის ველზე საბრძოლო მასალის დანაკლისის გამო. გამოცემა წერს, რომ ამ სატელეფონო საუბრის დროს, პატრუშევმა გაიგო, რომ პრიგოჟინი პუტინს ეუხეშებოდა.

სტატიაში ნათქვამია, რომ პრიგოჟინის ლიკვიდაციის გეგმა რუსეთის უშიშროების საბჭოს მდივნის დავალებით შეადგინეს, პუტინი მას გაეცნო და დაეთანხმა.

„უოლ სთრით ჯორნალის“ ცნობით, ასაფეთქებელი მოწყობილობა „ვაგნერის“ ხელმძღვანელის თვითმფრინავზე მოსკოვის შერემეტიევოს აეროპორტში, რუსეთის უსაფრთხოების სამსახურის თანამშრომლებმა, მისი შემოწმებისას დაამონტაჟეს.

ცნობისთვის, თვითმფრინავი, რომლის ბორტზეც ევგენი პრიგოჟინი იმყოფებოდა 23 აგვისტოს ტვერის ოლქში ჩამოვარდა. კრემლში ავიაკატასტროფასთან კავშირს უარყოფენ. პუტინმა მოგვიანებით განაცხადა, რომ დაღუპულების ცხედრებში ხელყუმბარის ფრაგმენტები აღმოაჩინეს და თვითმფრინავზე გარე ზემოქმედება არ მომხდარა. რუსეთის საგამოძიებო კომიტეტმა თვითმფრინავის ჩამოვარდნის შემდეგ საქმე აღძრა, თუმცა შედეგის შესახებ არაფერია ცნობილი.