ქართველ ხალხს ბატონის გამოცვლისთვის არ უბრძოლია – არ ავარევინებთ ამ ქვეყანას, ვისაც არეულობა უნდა, იცოდეს, რომ ვერც ერთ საელჩომდე თავშესაფრის მისაღებადაც ვერ მიაღწევს, – ამის შესახებ რესპუბლიკის მოედანზე, ჟურნალისტებთან ვატო შაქარიშვილმა განაცხადა. შაქარიშვილი აღნიშნავს, რომ მშვიდობას არავის “გაანიავებინებენ”. “ძალიან ამაღლებული განწყობაა მიუხედავად ამინდისა, რადგან აქ ქართველი ხალხი მოსულია საკუთარი ქვეყნის დასაცავად, რომ კიდევ ერთხელ გააგონოს ყველას ხმა ქვეყნის შიგნით და გარეთ, რომ საქართველოს ბედი ვერ გადაწყდება ვერც მოსკოვში, ვერც ბრიუსელში და ვერც კიევში, საქართველოს ბედი გადაწყდება თბილისში, ბათუმში, ქუთაისში, თელავში, ახალციხეში – აქ, საქართველოში. როგორ უნდა ვიცხოვროთ, რა უნდა მოგვწონდეს, რა უნდა გვიხაროდეს, ამას გადაწყვეტს ქართველი ხალხი. გამოვედით იმისათვის, რომ მკაფიოდ დავაფიქსიროთ, ქართველ ხალხს ბატონის გამოცვლისთვის არ უბრძოლია, ეს იქნება ბრიუსელი, ვაშინგტონი, მოსკოვი თუ სხვა რომელიმე დედაქალაქი. ვეუბნებით ყველას, ხელისუფლებას პარტნიორებს, დაუძინებელ მეგობრებს, მათ შორის, მტრებს: რა უნდა მოგვწონდეს, როგორ ვიცხოვროთ, ამას გადაწყვეტს ქართველი ხალხი. ყველამ უნდა იცოდეს, რომ მშვიდობა წინაპრებმა მოიტანეს ძალიან ბევრი შრომის, სისხლის, თავგანწირვის ფასად, ამას არ დავთმობთ, არ გავანიავებინებთ. არ ავარევინებთ ამ ქვეყანას. ვისაც ამ ქვეყანაში არეულობა უნდა, უნდა იცოდეს, ვერც ერთ საელჩომდე თავშესაფრის მიღებამდეც ვერ მიაღწევს და ეს გაითვალისწინოს,” – განაცხადა შაქარიშვილმა. ინფორმაციისთვის, რესპუბლიკის მოედანზე აქციის მონაწილეები იკრიბებიან. აქციის ორგანიზატორი გია გაჩეჩილაძეა (უცნობი).
,,29 აპრილს ხალხმა ყველაფერი თქვა” – პაპუაშვილი
შალვა პაპუაშვილი საქართველოში ჩატარებულ რიგგარეშე და შუალედურ არჩევნებს გამოეხმაურა.
შესაბამისი განცხადება პარლამენტის თავმჯდომარის Twitter-ზე გამოქვეყნდა. „ხალხმა ყველაფერი თქვა. 29 აპრილის არჩევნები (ევროკავშირის მიერ ინიცირებული საარჩევნო რეფორმის საფუძველზე) ძლიერად ასახავს ელექტორატის მზარდ მხარდაჭერას „ქართული ოცნებისა“ და მისი პოლიტიკის მიმართ. ჩვენი პრივილეგიაა ვემსახუროთ ხალხს უფრო მაღალი დემოკრატიული მანდატითა და ლეგიტიმაციით“, – წერს პაპუაშვილი.
,,ამ არჩევნებზე წარმოდგენილი საპილოტო პროექტი წარმატებული გახდა”- აშშ დამკვირვებელი
შუალედურ და რიგგარეშე არჩევნებს საქართველოში 12 ქვეყნის საარჩევნო ადმინისტრაციის, ასევე საერთაშორისო ორგანიზაციებისა და საელჩოების 55 საერთაშორისო დამკვირვებელი აკვირდებოდა. საერთაშორისო დამკვირვებლებმა მედიისთვის განცხადება გააკეთეს. მათ შორის იყო დინ ლოგანიც – დამკვირვებელი აშშ-დან, რომელიც პროცესს ქუთაისის 6 საარჩევნო უბანზე აკვირდებოდა.
ყველაფერი ხდებოდა გამჭირვალე მეთოდით. სხვადასხვა პოლიტიკური პარტიის დამკვირვებლებს შეეძლოთ, რომ სიტუაცია ეკონტროლებინათ და კონტროლის ქვეშ ყოფილიყო ყველა საარჩევნო უბანი
„კოლეგებთან ერთად მქონდა საშუალება დავსწრებოდი პროცესს ქუთაისის 6 საარჩევნო უბანზე. აღვნიშნავ, რომ საპილოტო პროექტი, რომელიც ამ არჩევნებზე იყო წარმოდგენილი, წარმატებული გახდა. კომისიამ შეძლო ტექნოლოგიების გამოყენება შედეგების დაჯამების დასაჩქარებლად. ასევე, იყო უზრუნველყოფილი თავისუფალი, ღია და სამართლიანი გარემო, რაც ძალიან მნიშვნელოვანია. ასევე, გამართულად მუშაობდნენ კომისიის წევრები“, – აღნიშნა ლოგანმა.
შუალედური და რიგგარეშე არჩევნები საქართველოში 29 აპრილს ჩატარდა. ცენტრალურმა საარჩევნო კომისიამ წინასწარი შედეგები უკვე წარადგინა. დათვლილია 165-ვე უბანი, მათ შორის 117 ელექტრონული და 48 ტრადიციული.
,,რუსეთი უნდა დარწმუნდეს, რომ მისი მუქარით აღსავსე ტონი ვერ შეცვლის ჩვენს გადაწყვეტილებას” – პრეზიდენტი (ფოტოები)
„რუსეთი უნდა დარწმუნდეს, რომ მისი აგრესიული ქმედებები და მუქარით აღსავსე ტონი არანაირ გავლენას არ ახდენს ჩვენს მუდმივ და კონსტიტუციაში ასახულ გადაწყვეტილებაზე და ორიენტაციაზე“, – ამის შესახებ საქართველოს პრეზიდენტმა სალომე ზურაბიშვილმა თავდაცვის ძალების დღესთან დაკავშირებით სიტყვით გამოსვლისას განაცხადა.
პრეზიდენტ ზურაბიშვილის განცხადებით, პარტნიორებმა უნდა გაიგონ, რომ დღეს სწორედ მტკიცე გადაწყვეტილების მიღების დროა და არა ყოყმანის.
„ჩვენთვისაც, ახალი გეოპოლიტიკური მოცემულობა იმას ნიშნავს, რომ ქვეყნის მშვიდობისა და უსაფრთხოების განმტკიცებისთვის, ყველა შესაძლებლობა უნდა იქნეს გამოყენებული. ძალისხმევა არ უნდა დავიშუროთ ატლანტიკურ ალიანსში ჩვენი ინტეგრაციის გზის განმტკიცებისთვის. უნდა ვიმედოვნოთ, რომ ვილნიუსის სამიტი ამ კუთხით საეტაპო აღმოჩნდება.
რუსეთი უნდა დარწმუნდეს, რომ მისი აგრესიული ქმედებები და მუქარით აღსავსე ტონი არანაირ გავლენას არ ახდენს ჩვენს მუდმივ და კონსტიტუციაში ასახულ გადაწყვეტილებაზე და ორიენტაციაზე.
უკრაინის გამარჯვება განაპირობებს ხვალინდელი მსოფლიოს ბედს… მათი და ყველა ჩვენგანის თავისუფლებას.
და ჩვენმა პარტნიორებმა უნდა გაიგონ, რომ დღეს სწორედ მტკიცე გადაწყვეტილების მიღების დროა და არა ყოყმანის. რუსეთის მიმართ გზავნილი უნდა იყოს მკაფიო და ერთგვაროვანი.
ძალიან მნიშვნელოვანია და ძალიან ვაფასებთ წლების მანძილზე პარტნიორების მიერ გაწეულ უდიდეს დახმარებას, მათი ძალისხმევით, სწავლებებით და თანამედროვე აღჭურვილობით, ამაღლდა ჩვენი ძალების პროფესიონალიზმი და საერთაშორისო სტანდარტებთან თავსებადობა.
საერთაშორისო სამშვიდობო მისიებში ჩვენმა აქტიურმა მონაწილეობამ დიდი როლი ითამაშა ჯარის მოდერნიზაციის და განვითარების გზაზე. სწორედ იქ შევძელით, რომ მაგალითი მიგვეცა საქართველოს ჯარის მზადყოფნის, საერთაშორისო გამოწვევებთან გამკლავების და ამით საქართველო დამკვიდრდა, როგორც სანდო და საიმედო პარტნიორი. თქვენ მსოფლიოს აჩვენეთ, რომ ურთულეს პირობებში ღირსეული ადგილის დაკავება შეგიძლიათ. ქართველებს კარგად გვესმის, რომ პარტნიორობა ორმხრივი გზაა და თქვენ ესეც დაამტკიცეთ“, – აღნიშნა პრეზიდენტმა.
მისივე თქმით, თავდაცვის ძალებს, დღევანდელი გლობალური საფრთხეების წინაშე, ქვეყნის უსაფრთხოების დასაცავად უფრო და უფრო განსხვავებული მისიები და ვალდებულებები ეკისრებათ.
„თავდაცვის ძალებს, დღევანდელი გლობალური საფრთხეების წინაშე, ქვეყნის უსაფრთხოების დასაცავად უფრო და უფრო განსხვავებული მისიები და ვალდებულებები ეკისრებათ: ამის არც თუ ისე შორი მაგალითი კოვიდ პანდემიაა, სადაც კარგად გამოჩნდა ჩვენი თავდაცვის ძალების დიდი წვლილი, მზადყოფნა და პროფესიონალიზმი. კლიმატური ცვლილებები და მისგან გამოწვეული საფრთხეები ჩვენი ძალებისთვის მოითხოვს ახალ აღჭურვილობას და მზადყოფნას, საზოგადოების ყველა საჭიროებისა და უსაფრთხოების დასაცავად. კიბერუსაფრთხოება ახალი მსოფლიოს ერთ-ერთი ურთულესი გამოწვევაა, რომელსაც ასევე უნდა გავუმკლავდეთ.
მჯერა და ვიცი, რომ თქვენ ამას შეძლებთ, იქნებით ყველგან და ყოველთვის იქ, სადაც დაგიძახებთ თქვენი მოვალეობა და ამ ქვეყნის სამსახური.
ამისთვის მინდა კიდევ ერთხელ გამოვხატო ჩემი და ჩვენი საზოგადოების მადლიერება. გილოცავთ ფიცის დადებას! ამ ფიცის ერთგულნი იყავით მუდამ, ამ ფიცის და თქვენი სამშობლოს ღირსნი იყავით მუდამ, ამაყად ატარეთ ჩვენი ქვეყნის დროშა!
თქვენ, საქართველოს ჯარისკაცებო, გილოცავთ თავდაცვის ძალების დღეს! თქვენ ემსახურებით საქართველოს და ამაზე დიდი, საპატიო და საამაყო სამსახური არ არსებობს“, – აცხადებს ზურაბიშვილი.
ზუგდიდში მიტოვებული ახალშობილი იპოვეს
ზუგდიდში ქუჩაში მიტოვებული ახალშობილი იპოვეს. ადგილობრივების ცნობით, ის, სავარაუდოდ, 2 დღისაა.
ცნობილია, რომ ბავშვი რუხში, სკოლის გვერდით არსებულ გზაზე იპოვეს. დედის ვინაობა დადგენილია, თუმცა ის ჯერჯერობით დაკავებული არ არის.
ადგილობრივები ამბობენ, რომ სავარაუდოდ ის ორსულობასაც მალავდა. ახალშობილის მდგომარეობა დამაკმაყოფილებელია, ჯანმრთელია და ის ამ დროისთვის საავადმყოფოში შემოწმებებს გადის.
შსს-ცნობით,გამოძიება დაწყებულია სისხლის სამართლის კოდექსის 128-ე მუხლით, რაც განსაცდელში მიტოვებას გულისხმობს.
სამართალდამცველები საგამოძიებო მოქმედებებს ატარებენ.
აშშ- მ სუდანიდან საკუთარი მოქალაქეების მასობრივი ევაკუაცია დაიწყო (ფოტოები)
ამერიკის შეერთებულმა შტატებმა სუდანიდან საკუთარი მოქალაქეების მასობრივ ევაკუაცია დაიწყო. ამის შესახებ abcnews-ი იტყობინება.
ამავე ცნობით, სუდანის დედაქალაქ ხარტუმში შეერთებული შტატების 100-მდე მოქალაქე იმყოფება.
სახელმწიფო დეპარტამენტის ინფორმაციით, შეერთებული შტატების კოლონა, სადაც აშშ-ის მოქალაქეები, სუდანში დასაქმებული მოქალაქეები და პარტნიორი ქვეყნების წარმომადგენლები იმყოფებოდნენ, 29 აპრილს პორტ სუდანში ჩავიდა.
„ჩვენ მივმართეთ სუდანის თითოეულ მოქალაქეს, ვინც ჩვენთან კომუნიკაციაში იყო და მივაწოდეთ კონკრეტული ინსტრუქციები ამ კოლონაში გაწევრიანების შესახებ. ევაკუაცია შესაძლებელი გახადა ამერიკის შეერთებული შტატების ინტენსიურმა მოლაპარაკებებმა ჩვენი რეგიონალური და საერთაშორისო პარტნიორების მხარდაჭერით“, – ნათქვამია სახელმწიფო დეპარტამენტის განცხადებაში.
ინფორმაციისთვის, სუდანის დედაქალაქში 14 აპრილის შემდეგ სწრაფი რეაგირების ძალებსა და ქვეყნის შეიარაღებულ ძალებს შორის საბრძოლო მოქმედებები მიმდინარეობს.
,,აუცილებლად უნდა დაიწყოს გამოძიება მკვლელობის მუხლით”- ბაჩალიაშვილის დედა
თამარ ბაჩალიაშვილის დედის, თეონა თამაზაშვილის განცხადებით, მისი შვილის საქმეზე გამოძიება მკვლელობის მუხლით უნდა დაიწყოს.
“აუცილებლად უნდა დაიწყოს გამოძიება მკვლელობის მუხლით. ყველაფერს გავაკეთებ იმისთვის, რომ გამოძიება დაიწყონ თავიდან”, – ამბობს ბაჩალიაშვილის დედა.
თამაზაშვილი ამბობს, რომ მისი შვილის ტელეფონში ყველაფერი წაშლილი იყო. მისი თქმით, მან შვილს არაერთხელ დაურეკა, თუმცა ტელეფონში მისი ზარი და შეტყობინება ასახული არ იყო.
“ყველაფერი ზუსტადაც მიანიშნებს და ამტკიცებს იმას, რომ ყველაფერი წაშლილია ტელეფონში და Whatsapp-ში პირველ რიგში, სადაც დაურეკეს თამარს და გაიტყუეს სახლიდან საქმის გასარჩევად.
შოთაძეს მივმართავ, კეთილი ინებონ და დაიწყონ გამოძიება. მტკიცებულებები საკმარისია და საკმარისზე მეტიც არის, რომ დაიწყონ გამოძიება. თუ არადა, პირდაპირ უკვე მიუთითებს მაგათ მფარველობაზე, რომ მფარველობენ მკვლელებს და აყალბებენ ყველაფერს”, – განაცხადა თამაზაშვილმა.
გუშინ, შაბათის ფორმულამ ჩაწერა 23 წლის პროგრამისტის თამარ ბაჩალიაშვილის გარდაცვალების საქმის ყოფილი გამომძიებელი სერგო შუბითიძე, რომელიც აქამდე უცნობ დეტალებს ჰყვება. გამომძიებლის თქმით, საქმის გამოძიება გაყალბდა.
,,გიდასტურებთ ჩემს პატივისცემას, მადლიერებას და ნდობას”- პრეზიდენტი თავდაცვის ძალებს
ეს ის დღეა, როცა ვიაზრებთ, თუ რა არის თავდაცვის ძალების დანიშნულება ქვეყანაში, მათი შეუფასებელი სამსახური ქვეყნის წინაშე და არა მხოლოდ ომის დროს, არამედ სწორედ მშვიდობის ჟამს და ყოველდღიურად, თუ ყოველწუთიერად. თქვენ ქვეყნის სადარაჯოზე დგახართ!, – ამის შესახებ საქართველოს პრეზიდენტმა სალომე ზურაბიშვილმა საქართველოს თავდაცვის ძალების დღესთან დაკავშირებით გამართულ საზეიმო ღონისძიებაზე განაცხადა.
„დღეს, როგორც ყოველ წელს, თქვენთან ერთად შევიკრიბეთ და სიამაყით აღვნიშნავთ თავდაცვის ძალების დღეს, თუმცა ეს დღე არაა და არც უნდა იყოს მხოლოდ ფორმალური, ცერემონიალური, თუ ათეტიკით აღსავსე სიტყვების წარმოთქმის დღე.
ეს დღე, ქვეყნისთვის, რომელსაც საქართველოსნაირი ისტორია უდგას სათავეში, ნიშნავს იმას, რომ ჩვენ სრულიად ვიაზრებთ და ვაფასებთ საუკუნეების მანძილზე, თავდაცვის ძალების უდიდეს მნიშვნელობას ჩვენი ქვეყნის დამოუკიდებლობის მოპოვებაში, შენარჩუნებაში და დღეს უკვე მის გამყარებაში.
ეს ის დღეა, როცა ვიაზრებთ, თუ რა არის თავდაცვის ძალების დანიშნულება ქვეყანაში, მათი შეუფასებელი სამსახური ქვეყნის წინაშე და არა მხოლოდ ომის დროს, არამედ სწორედ მშვიდობის ჟამს და ყოველდღიურად, თუ ყოველწუთიერად. თქვენ ქვეყნის სადარაჯოზე დგახართ!
პირველ რიგში თავდაცვა, კლასიკურად, ნიშნავს, ჩვენი საზღვრების, ტერიტორიული მთლიანობის და სუვერენობის დაცვას. ეს არაა მარტივი მოვალეობა: ჩვენ ვიცით, და გვახსოვს 1921, 1992-93 და 2008 წლების რუსული აგრესიის წინააღმდეგ ჩვენი ჯარისკაცების თავდადებული ბრძოლა. არ ვივიწყებთ, და არ დავივიწყებთ რამდენი მათგანი შეეწირა ამ უმაღლეს და უმნიშვნელოვანეს მიზანს – საქართველოს დამოუკიდებლობას!
დღეს მათთვის პატივის მიგების დღეა, მათი ოჯახების მიმართ მადლობის გამოცხადების დღეა. ასევე განსაკუთრებული მადლიერება ეკუთვნის ჩვენს ვეტერანებს.
მე როგორც ამ ქვეყნის უმაღლესი მთავარსარდალი გიდასტურებთ ჩემს პატივისცემას, მადლიერებას და ნდობას.
თავდაცვის ძალების როლი, მხოლოდ წარსულზე არ გვაფიქრებს, არამედ მომავალზე. ჩვენ ვცხოვრობთ ეპოქაში, სადაც საფრთხეები ძალიან გახშირდა. ძველ ფორმებთან ერთად გაჩნდა მთელი რიგი ახალი საფრთხეები. ამდენად, თავდაცვის ძალების როლი კიდევ უფრო იზრდება და მოითხოვს კიდევ მეტ პროფესიონალიზმს, მეტ მოქნილობას და მეტ ცოდნას.
დღესაც, ოცდამეერთე საუკუნეში, აგრესიული იმპერიალიზმი, რაც არ უნდა ანაქრონიულად ჟღერდეს – ახალი სისასტიკით და დაუნდობლობით იჩენს თავს. უკრაინის მიმართ რუსეთის მიერ 14 თვის წინ გაჩაღებულმა ომმა მსოფლიო შეძრა, რამეთუ აბუჩად იქნა აგდებული ყველა საერთაშორისო სამართლის და ჰუმანიტარული პრინციპი. თუმცა სისასტიკის და ძალთა შეფარდების მიუხედავად ვხედავთ, რომ უცხო შემოჭრილი ძალა, ქვეყნის დაცვისთვის და გადარჩენისთვის თავდადებულ ძალას ვერ ჯობნის და ვერ ამარცხებს. ეს ის მაგალითია, რომელიც ჩვენს ისტორიაში, საქართველოს მიერ მრავალჯერ იქნა ნაჩვენები. ამდენად, უფრო მეტად გვესმის და ვგულშემატკივრობთ უკრაინას და მის ღირსეულ სამხედრო და სამოქალაქო მებრძოლებს. მათი გამარჯვება განაპირობებს ხვალინდელი მსოფლიოს ბედს, მათი და ყველა ჩვენგანის თავისუფლებას.
ამ დაუნდობელმა აგრესიამ რუსეთის იმპერიალიზმის ხასიათი ყველასთვის გამოაშკარავა. მსოფლიოში და მით უმეტეს ევროპულ კონტინენტზე გამოიწვია საფრთხის ახალი აღქმა, რასაც უკრაინის მიმართ არნახული დახმარების გაწევა, სამხედრო ბიუჯეტების ზრდა და ჩრდილოატლანტიკური კავშირის მნიშვნელობის განმტკიცება მოჰყვა – შვედეთისა და ფინეთის გაცხადებული კანდიდატურები სწორედ ამას ამტკიცებს.
ჩვენთვისაც, ახალი გეოპოლიტიკური მოცემულობა იმას ნიშნავს, რომ ქვეყნის მშვიდობისა და უსაფრთხოების განმტკიცებისთვის, ყველა შესაძლებლობა უნდა იქნას გამოყენებული. ძალისხმევა არ უნდა დავიშუროთ ატლანტიკურ ალიანსში ჩვენი ინტეგრაციის გზის განმტკიცებისთვის. უნდა ვიმედოვნოთ, რომ ვილნიუსის სამიტი ამ კუთხით საეტაპო აღმოჩნდება.
რუსეთი უნდა დარწმუნდეს, რომ მისი აგრესიული ქმედებები და მუქარით აღსავსე ტონი არანაირ გავლენას არ ახდენს ჩვენს მუდმივ და კონსტიტუციაში ასახულ გადაწყვეტილებაზე და ორიენტაციაზე.
და ჩვენმა პარტნიორებმა უნდა გაიგონ, რომ დღეს სწორედ მტკიცე გადაწყვეტილების მიღების დროა და არა ყოყმანის. რუსეთის მიმართ გზავნილი უნდა იყოს მკაფიო და ერთგვაროვანი.
ძალიან მნიშვნელოვანია და ძალიან ვაფასებთ წლების მანძილზე პარტნიორების მიერ გაწეულ უდიდეს დახმარებას, მათი ძალისხმევით, სწავლებებით და თანამედროვე აღჭურვილობით, ამაღლდა ჩვენი ძალების პროფესიონალიზმი და საერთაშორისო სტანდარტებთან თავსებადობა. საერთაშორისო სამშვიდობო მისიებში ჩვენმა აქტიურმა მონაწილეობამ დიდი როლი ითამაშა ჯარის მოდერნიზაციის და განვითარების გზაზე. სწორედ იქ შევძელით, რომ მაგალითი მიგვეცა საქართველოს ჯარის მზადყოფნის, საერთაშორისო გამოწვევებთან გამკლავების და ამით საქართველო დამკვიდრდა, როგორც სანდო და საიმედო პარტნიორი. თქვენ მსოფლიოს აჩვენეთ, რომ ურთულეს პირობებში ღირსეული ადგილის დაკავება შეგიძლიათ.
ქართველებს კარგად გვესმის, რომ პარტნიორობა ორმხრივი გზაა და თქვენ ესეც დაამტკიცეთ.
თავდაცვის ძალებს, დღევანდელი გლობალური საფრთხეების წინაშე, ქვეყნის უსაფრთხოების დასაცავად უფრო და უფრო განსხვავებული მისიები და ვალდებულებები ეკისრებათ: ამის არც თუ ისე შორი მაგალითი კოვიდ პანდემიაა, სადაც კარგად გამოჩნდა ჩვენი თავდაცვის ძალების დიდი წვლილი, მზადყოფნა და პროფესიონალიზმი. კლიმატური ცვლილებები და მისგან გამოწვეული საფრთხეები ჩვენი ძალებისთვის მოითხოვს ახალ აღჭურვილობას და მზადყოფნას, საზოგადოების ყველა საჭიროებისა და უსაფრთხოების დასაცავად. კიბერუსაფრთხოება ახალი მსოფლიოს ერთ-ერთი ურთულესი გამოწვევაა, რომელსაც ასევე უნდა გავუმკლავდეთ.
მჯერა და ვიცი, რომ თქვენ ამას შეძლებთ, იქნებით ყველგან და ყოველთვის იქ სადაც დაგიძახებთ თქვენი მოვალეობა და ამ ქვეყნის სამსახური.
ამისთვის მინდა კიდევ ერთხელ გამოვხატო ჩემი და ჩვენი საზოგადოების მადლიერება.
გილოცავთ ფიცის დადებას! ამ ფიცის ერთგულნი იყავით მუდამ, ამ ფიცის და თქვენი სამშობლოს ღირსნი იყავით მუდამ, ამაყად ატარეთ ჩვენი ქვეყნის დროშა!
თქვენ საქართველოს ჯარისკაცებო გილოცავთ თავდაცვის ძალების დღეს!
თქვენ ემსახურებით საქართველოს და ამაზე დიდი, საპატიო და საამაყო სამსახური არ არსებობს.
გილოცავთ და ვულოცავ ამ დღეს სრულიად საქართველოს“, – განაცხადა პრეზიდენტმა.
,,მე მჯერა, რომ ჩვენი ჯარი კიდევ უფრო ძლიერი გახდება”- ღარიბაშვილი
პატივცემულო სამხედროებო, მინდა ყველა თქვენგანს გულწრფელი მადლობა გადაგიხადოთ თქვენი თავდადებისთვის და ჩვენი სამშობლოს ერთგული სამსახურისთვის, – ამის შესახებ საქართველოს პრემიერ–მინისტრმა ირაკლი ღარიბაშვილმა, საქართველოს თავდაცვის ძალების დღესთან დაკავშირებით გამართულ საზემო ღონისძიებაზე განაცხადა.
პრემიერის თქმით, ქართული ჯარი იმსახურებს ყველაფერს საუკეთესოს.
„ჩვენი ვალია მაქსიმალურად დავაფასოთ თქვენი ღვაწლი და თქვენი ღირსეული სამსახური. საქართველოს მთავრობა აკეთებს ყველაფერს იმისთვის, რომ კიდევ უფრო მეტად გავაძლიეროთ ქართული ჯარი, იმისთვის, რომ კიდევ უფრო მეტად იყოს დაფასებული თითოეული თქვენგანის სამსახური
ჩვენ ძალიან კარგად გვესმის, რომ კიდევ უფრო მეტად უნდა გავაძლიეროთ ჩვენი სახელმწიფოს ინსტიტუტები და პირველ რიგში ქართული ჯარი, როგორც ყველაზე მნიშვნელოვანი ძალა ჩვენი ქვეყნის უსაფრთხოებისთვის და მშვიდობისთვის
„დღეს ძალიან რთული დროა მთელს მსოფლიოში, რუსეთის აგრესია უკრაინაში, ომი, რომელიც არ ჩერდება – ისედაც რთულად პროგნოზირებად ტურბულენტურ გეოპოლიტიკურ გარემოში ჩვენს ხელისუფლებას განსაკუთრებული გონიერება მართებს. ამავდროულად, ჩვენ ძალიან კარგად გვესმის, რომ კიდევ უფრო მეტად უნდა გავაძლიეროთ ჩვენი სახელმწიფოს ინსტიტუტები და პირველ რიგში ქართული ჯარი, როგორც ყველაზე მნიშვნელოვანი ძალა ჩვენი ქვეყნის უსაფრთხოებისთვის და მშვიდობისთვის. იცით, რომ ჩვენ ვაგრძელებთ გრძელვადიანი გეგმის მიხედვით ჩვენი თავდაცვის შესაძლებლობების განვითარებას, ჩვენ ვაგრძელებთ თავდაცვის ძალების ტრანსფორმაციის პროცესს და მე მჯერა, რომ ჩვენი ჯარი კიდევ უფრო ძლიერი გახდება“, – განაცხადა პრემიერმა.
მან მადლობა გადაუხადა საერთაშორისო პარტნიორებს, ყველას ვინც ეხმარება ქართული ჯარის გაძლიერებას.
30 აპრილი საქართველოს თავდაცვის ძალების დღეა.
„რუსებო, წადით სახლში, სანამ გვიან არ არის“ – ჩეხეთის პრეზიდენტი (ფოტო)
უკრაინაში ვიზიტის დროს ჩეხეთის პრეზიდენტმა პეტრ პაველმა რუსებს სამხედრო აღჭურვილობაზე ერთგვარი მესიჯი დაუტოვა და სახლში წასვლისკენ მოუწოდა. ამის შესახებ უკრაინული მედია წერს.
„მე ვიცი ეს რა განცდაა. თქვენი ქვედანაყოფი მიდის ფრონტის ხაზზე და თქვენ გინდათ მათთან ერთად წახვიდეთ. როგორც მეთაური, მე ყოველთვის ვიყავი ჩემი ჯარისკაცების გვერდით. რუსებო, წადით სახლში, სანამ გვიან არ არის“, – აცხადებს ჩეხეთის პრეზიდენტი. 
“დავუჭიროთ მხარი ნუცა ბუზალაძეს, ვრეგისტრირდებით და ვემზადებით კვირა-ორშაბათისთვის! -ზალკალიანი
“დავუჭიროთ მხარი ნუცა ბუზალაძეს, ვრეგისტრირდებით და ვემზადებით კვირა-ორშაბათისთვის!”- წერს სოციალურ ქსელში ამერიკის შეერთებულ შტატებში საქართველოს ელჩი დავით ზალკალიანი და სხვებსაც მოუწოდებს. ნუცა ბუზალაძის მხარდაჭერისკენ
https://idolvote.abc.com ხმის მიცემა ლაივ შოუს დაწყებიდან ბოლო სარეკლამო ჭრამდე იქნება შესაძლებელი – ნიუ იორკის დროით 20:00ზე, ლოს ანჯელესის დროით 17:00ზე. საქართველოს დროით დილის 04:00ზე. ჯამში 30 ხმის გაგზავნა შეგიძლიათ შემდეგი საშუალებებით:
მაქსიმუმ 10 ხმა – ონლაინ მისამართზე (ერთჯერადი რეგისტრაციის გზით): AmericanIdol.com/vote
მაქსიმუმ 10 ხმა – სპეციალური აპლიკაციით: American Idol App
მაქსიმუმ 10 ხმა – ტექსტური შეტყობინებით.
ნუცას საკონკურსო ნომერი შოუს დაწყებამდე გახდება ცნობილი Text 9 to 21523″, – წერს დავით ზალკალიანი.
ნუცა ბუზალაძე პოპულარული მუსიკალური კონკურსის, American Idol-ის 12 საუკეთესო მონაწილეს შორის არის. წინა ტურის შემდეგ, ის ჟიურის გადაწყვეტილებით მოხვდა ტოპ 12-ს შორის, თუმცა ამჯერად ჟიური თავის რჩეულს ვეღარ დაასახელებს და ყველაფერს მაყურებელთა ხმების რაოდენობა გადაწყვეტს.
შუალედური/რიგგარეშე არჩევნების წინასწარი შედეგები გამოქვეყნდა
ცესკომ 2024 წლის 29 აპრილის შუალედური/რიგგარეშე არჩევნების წინასწარი შედეგები გამოაქვეყნა. დათვლილია ყველა, 165-ვე საარჩევნო უბნის შედეგი.
საქართველოს პარლამენტის შუალედური არჩევნები:
ფოთის, სენაკისა და ხობის მაჟორიტარულ ოლქებში „თავისუფალი საქართველოს“ მიერ წარდგენილმა კანდიდატმა ბესიკ წულეისკირმა მიიღო 1 359 ხმა, რაც მონაწილე ამომრჩეველთა 4,7 პროცენტი, ხოლო „ქართული ოცნების“ კანდიდატმა გიორგი ხახუბიამ მიიღო 27 553 ხმა, რაც ამომრჩეველთა 95,33 პროცენტია.
საკრებულოების შუალედური არჩევნების შედეგების წინასწარი მონაცემები:
გურჯაანი: #41 ზურაბ მუხულიშვილი „ქართული ოცნება“ 1 347 ხმა. თიანეთი: #41 იოსებ მათურელი „ქართული ოცნება“ 345 ხმა. ახალციხე: #41 როინ ნებაძე „ქართული ოცნება“ 463 ხმა. ტყიბული #41 გიორგი კერესელიძე „ქართული ოცნება“ 1 322 ხმა, რაც მონაწილე ამომრჩეველთა 86,63 პროცენტია, ხოლო დამოუკიდებლად მონაწილე კანდიდატმა გიორგი გაგოშიძემ 204 ხმა, რაც 13,37 პროცენტია. ქუთაისი: #41 მიხეილ გიორგაძე „ქართული ოცნება“ 5 396 ხმა.
მერების რიგგარეშე არჩევნები:
ცაგერი: #41 ლევან ზალკანიანი „ქართული ოცნება“ 4 825 ხმა. თერჯოლა: #41 მანუჩარ რობაქიძე „ქართული ოცნება – დემოკრატიული საქართველოდან“ 11 511 ხმა მიიღო.