როდესაც კითხულობენ, საქართველო იმსახურებდა თუ არა და ახლაც იმსახურებს თუ არა ევროკავშირის სტატუსს, მინდა გითხრათ, რომ „ქართული ოცნება“ არც კი არსებობდა, როდესაც ეს ქვეყანა სტატუსსაც იმსახურებდა, – ამის შესახებ პოლიტიკური ჯგუფის „რეფორმების ჯგუფის“ თავმჯდომარემ ხათუნა სამნიძემ განაცხადა.

მისივე შეფასებით, ეს შეკითხვა რელევანტურიც კი არ არის და ოპოზიციაში არ არსებობს არავინ, ვინც ამბობს, რომ ეს ქვეყანა კანდიდატის სტატუსს არ იმსახურებს.

„აქ მოვისმინე, თითქოს ოპოზიცია ხელისშემშლელია ამ პროცესის. ისიც მოვისმინე, რომ ძირგამომთხრელ საქმიანობას ეწევა და პოლიტიკური მიზნებისთვის იყენებს სტატუსის საკითხს. თითქმის ყველაფერი შესრულდაო, ესეც მოვისმინე. ძალიან კარგად იცით, რომ 12 რეკომენდაციიდან სამი პუნქტია მხოლოდ შესრულებული და დიახ, ოპოზიცია ყველაფერს აკეთებს იმისთვის, რომ საზოგადოებამდე მიიტანოს ის თუ რას აკეთებს „ქართული ოცნება“.

ევროპისკენ თუ მიისწრაფვით, მაშინ როდესაც პრემიერ-მინისტრი პირადი მიზნებისთვის სახელმწიფო ბიუჯეტს იყენებს, ამაზე უმრავლესობას ადეკვატური რეაგირება უნდა გქონდეთ. როდესაც ჩვენი სტრატეგიული პარტნიორი გვეუბნება, რომ ამ ქვეყანაში მაღალ თანამდებობაზე იყო რუსეთის სპეცსამსახურებთან დაკავშირებული ადამიანი, რაც პირდაპირ ქვეყნის ღალატია, მთელი უმრავლესობა ამას კი არ უნდა გადაეფაროს და უსაფრთხოების სამსახური იმაზე კი არ უნდა ზრუნავდეს, როგორ უსაფრთხოდ იგრძნოს თავი უმრავლესობამ, არამედ ქვეყნის უსაფრთხოებაზე უნდა ზრუნავდეს“, – განაცხადა ხათუნა სამნიძემ.

ჩვენი მხრიდან აბსოლუტურად ყველაფერი კეთდება და გაკეთდება, რომ დეკემბერში კანდიდატის სტატუსი მივიღოთ, – ამის შესახებ პარტია „ქართული ოცნების“ თავმჯდომარემ, ირაკლი კობახიძემ განაცხადა.

მისივე თქმით, ხელისუფლებას არცერთ პუნქტთან დაკავშირებით უკან არ დაუხევია.

როგორც კობახიძემ აღნიშნა, იმედი აქვს, რომ წელს გადაწყვეტილება იქნება სამართლიანი ქართველი ხალხის, ხელისუფლებისა და სახელმწიფოს მიმართ.

„ბატონი მიშელი გამოეხმაურა ჩვენს ნაბიჯებს. მთლიანობაში, ჩვენ აბსოლუტურად ყველაფერს ვაკეთებთ, რათა ქვეყანამ მიიღოს კანდიდატის სტატუსი. გუშინდელი ბრიფინგიც ამის დასტურია. ჩვენ ვუპასუხეთ აბსოლუტურად ყველა პუნქტს, რომელიც ჩამოგვითვალეს ბორელმა და მისმა თანმხლებმა პირებმა შეხვედრებზე. ყველა პუნქტს ვასრულებთ 100 პროცენტით, თავიდან ბოლომდე. არცერთ პუნქტთან დაკავშირებით არ დაგვიხევია უკან და არ გადაგვიდგამს რაიმე განსხვავებული ნაბიჯი. შესაბამისად, ჩვენი მხრიდან აბსოლუტურად ყველაფერი კეთდება და გაკეთდება, რომ დეკემბერში კანდიდატის სტატუსი მივიღოთ. დანარჩენი ევროპული საბჭოს მიერ არის პოლიტიკური გადაწყვეტილება მისაღები. ჩვენ აქაც გვაქვს ძალიან დიდი იმედი, რომ წელს ეს გადაწყვეტილება იქნება სამართლიანი, სამართლიანი ქართველი ხალხის მიმართ, საქართველოს ხელისუფლების მიმართ და ჩვენი სახელმწიფოს მიმართ“, – განაცხადა კობახიძემ.

„აქ მოვისმინე ბრალდებები, რომ თურმე ოპოზიცია უშლის ხელს კანდიდატის სტატუსის მიღებას. მე შეგახსენებთ, რომ საქართველოს პრეზიდენტის იმპიჩმენტის დაწყება კანდიდატის სტატუსზე მუშაობის გამო, არის კანდიდატის სტატუსის საბოტაჟი თქვენი მხრიდან“, -ამის შესახებ  „ლელოს“ წევრმა ანა ნაცვლიშვილმა პლენარულ სხდომაზე განაცხადა.

მისივე თქმით, სალომე ზურაბიშვილმა შესთავაზა ხელისუფლებას და  ოპოზიციას, რომ ეს შეხვედრები ევროპის დედაქალაქებში ერთობლივად ეწარმოებინათ. რაზეც ოპოზიცია დათანხმდა, ხოლო ხელისუფლების გუნდი არა.

„თუ სტატუსი გინდათ, თუ ერთად მუშაობა და კონსენსუსი გინდათ, რატომ არ გინდოდათ რომ ერთად შემდგარიყო ეს ვიზიტები? იმიტომ, რომ თქვენ არ გინდათ სტატუსის  მიღება.

რაც შეეხება ოპოზიციის როლს და მის მუშაობას, სად არის „ლელოს“ კანონპროექტების განხილვა მაინც, სასამართლოსთან დაკავშირებით, კორუფციასთან დაკავშირებით, და ყველა საკვანძო საკითხთან დაკავშირებით, რომელიც 12 რეკომენდაციაშია. ჩვენ ოფიციალურად დავარეგისტრირეთ და წარმოგიდგინეთ კონკრეტული ხედვები, რომლის ირგვლივაც არის ფართო კონსენსუსი, როგორც საპარლამენტო ოპოზიციაში ასევე ექსპერტების წრეებში. თქვენ ხელოვნურად ბლოკავთ ამ კანონპროექტების განხილვის დაწყებასაც კი. კარგი იქნება ბიუროს წევრებმა ამაზე განმარტებები გააკეთოთ, რატომ იყენებთ საკუთარ უფლებამოსილებას ბოროტად“, – განაცხადა პოლიტიკური ჯგუფი „ლელოს“ წევრმა  ანა ნაცვლიშვილმა.

სალომე ზურაბიშვილსა და რადიკალურ ოპოზიციას საერთო დღის წესრიგი აქვთ, რადგან მათ ჰყავთ საერთო პატრონი – 2018 წელს მას რადიკალები ჯაშუშს ეძახდნენ, ეს ხომ არ არის ის სტატუსი, რომელიც იცვლება?- ამის შესახებ პარტია „ქართული ოცნების“ თავმჯდომარე ირაკლი კობახიძემ განაცხადა.

კობახიძის თქმით, იმპიჩმენტისთვის საჭირო 100 ხმის მობილიზების მოლოდინი არ აქვთ, თუმცა, როგორც ის აღნიშნავს, ეს პროცესი ლუსტრაციისთვის კარგი იქნება.

„მას უნდა ჰკითხოთ, რატომ გავიდა კონსტიტუციური ჩარჩოებიდან. ჩვენ გვაქვს ჩვენი დასკვნები და არამხოლოდ დასკვნები, ინფორმაციები მიღებული, რატომაც გავიდა ჩარჩოებიდან. რეალურად, საერთო დღის წესრიგი აქვთ სალომე ზურაბიშვილს და რადიკალურ ოპოზიციას, რადგან მათ ჰყავთ საერთო პატრონი, ეს არის ძირითადი მიზეზი, რატომაც გავიდა კონსტიტუციური ჩარჩოებიდან. რისკები ამ ქალბატონთან არის დაკავშირებული და ეს ახალი ამბავი არ არის. პირველად ეს რისკები გამომჟღავნდა თუ არ ვცდები 2019 წელი იყო, როცა მან გააკეთა ისეთი განცხადებები, რამაც სახელმწიფოს უხერხულობები შეუქმნა. იმპიჩმენტი გამოცხადდა ერთი მარტივი მიზეზის გამო, სალომე ზურაბიშვილი კონსტიტუციას არღვევდა „ნაციონალური მოძრაობის“ იმედად. მას აქვს გარანტია, რომ რადიკალური ოპოზიცია მხარს მის იმპიჩმენტს არ დაუჭერს, რადგან კონსტიტუციური ჩარჩოებიდან ორივე ერთად არის გასული, ორივეს ერთად აქვს რადიკალური დღის წესრიგი. ამიტომ არ გვაქვს მოლოდინი, რომ 100 ხმა იქნება მობილიზებული, მაგრამ იმპიჩმენტის პროცედურა ბევრი თვალსაზრისით მნიშვნელოვანი იყო, მათ შორის იმით, რომ ალიანსისა ლუსტრაცია მოხდება, რაც არის ზურაბიშვილსა და რადიკალებს შორის. 2018 წელს ეს რადიკალები მას მოიხსენიებდნენ როგორც მოღალატეს, რეზიდენტს, ეს ხომ არ არის ის სტატუსი, რომელიც იცვლება? თუ ერთხელ უკვე ხარ აგენტი და ჯაშუში, აგრძელებ ამ საქმიანობას და წარმოიდგინეთ იგივე ადამიანები, ვინც უწოდებდნენ მას აგენტს, ჯაშუშს, აცხადებენ დღეს, რომ ჯაშუში უნდა დარჩეს თანამდებობაზე. რა გამოდის, ან 2018 წელს ატყუებდნენ საზოგადოებას ან დღეს მოსწონთ ჯაშუშთან ერთად მუშაობა. სხვა ლოგიკა აქ არ არის, ეს არის მარტივი ლუსტრაცია და ამ კუთხითაც კარგია იმპიჩმენტის პროცედურა,“ – განაცხადა კობახიძემ.

რაც შეეხება „ხალხის ძალის“ განცხადებას, მე აქ სიღრმეში ვერ და არ შევალ – უბრალოდ კიდევ ერთხელ გავიმეორებ: რა თქმა უნდა, რისკები და გეგმები არსებობს , – ამის შესახებ პარტია „ქართული ოცნების“ თავმჯდომარემ, საპარლამენტო უმრავლესობის ლიდერმა, ირაკლი კობახიძემ განაცხადა.

„ოპოზიცია ძალიან სუსტია, მაგრამ ამ სისუსტემ არ უნდა მოგვადუნოს, ხანდახან სუსტი უფრო საშიშია, რადგან ყველაფერზეა წამსვლელი. აქედან გამომდინარე, ოპოზიციის სისუსტე არაფრის გარანტი არ არის. პირიქით, რისკები ასეთ დროს შეიძლება გაიზარდოს. ამაში მთლიანად ვეთანხმები „ხალხის ძალის“ მიერ გავრცელებულ განცხადებას“, – განაცხადა კობახიძემ.

სახელმწიფო უსაფრთხოების სამსახურის მიერ გუშინ გავრცელებულმა ინფორმაციამ კიდევ ერთხელ შეგვახსენა, რომ რადიკალური ოპოზიციის უმძიმესი მდგომარეობის მიუხედავად, ყურადღების მოდუნება ერთი წამითაც არ შეიძლება, – აღნიშნულია „ხალხის ძალის“ მიერ გავრცელებულ განცხადებაში.