ორი-სამი დღის წინ ბაიდენმა თქვა, რომ უკრაინას ნატო-ში გაწევრიანებისთვის რეფორმები სჭირდება, რეფორმების კუთხით ჩვენ ბევრად წინ ვართ, ვიდრე უკრაინა და სხვა ქვეყნები, რომლებიც არიან ნატო-ში გაწევრიანების მსურველი, – ამის შესახებ პარტია „ქართული ოცნების“ თავმჯდომარემ, ირაკლი კობახიძემ ჟურნალისტებს განუცხადა.

კობახიძის თქმით, მიზეზი პოლიტიკურია, პოლიტიკური იყო 2008 წელსაც და პოლიტიკურია დღესაც.

„არც MAP-ი მოგვცეს მაშინ და არც არაფერი. სააკაშვილი გამოდიოდა და MAP-ზე უკეთესი მოგვცესო, იტყუებოდა. რაში იყო საქმე? – პოლიტიკური მიზეზი ჰქონდა, რომ MAP-იც კი არ მოგვცეს მაშინაც კი, როცა ქვეყანამ ომი გამოიარა. არ მინდა, სიღრმეში შევიდე, მიზეზებს ბევრი ექსპერტი განმარტავს. მაგალითად, უკრაინა ნატო-ს წევრი რომ ყოფილიყო, ეს ომი უკრაინაში არ მოხდებოდა და ეს თავისუფლად მოხდებოდა, თუმცა სამწუხაროდ, პოლიტიკური გადაწყვეტილება ასეთი იყო და ეს ასე მოხდა“, – აღნიშნა კობახიძემ.

ილია დარჩიაშვილის მონაწილეობა მაღალი დონის წარმომადგენლობაა საქართველოდან – თუ გინდათ, რომ საგარეო საქმეთა მინისტრი დააკნინოთ მაშინ, როდესაც ოპოზიციიდან ვიღაც უსტატუსო ჟურნალისტები თუ პოლიტიკურ პარტიებს ამოფარებული ადამიანები მიგაჩნიათ ჯერ კიდევ პრეზიდენტებად ან მსოფლიო ლიდერებად, ეს ორმაგი სტანდარტია, – ამის შესახებ პარლამენტის ვიცე-სპიკერმა არჩილ თალაკვაძემ ჟურნალისტებს ვილნიუსში დაგეგმილ ნატო-ს სამიტთან დაკავშირებით განუცხადა და უპასუხა კრიტიკას, რატომ წარმოადგენს საქართველოს სამიტზე მხოლოდ საგარეო საქმეთა მინისტრი.

მისივე თქმით, ხელისუფლების პასუხისმგებლობაა ის, რაც საქართველოს სამიტზე და ნატო-ში მიაქვს, ხოლო რაც იქიდან მოაქვს, ეს ნატო-ს პოლიტიკური გადაწყვეტილებაა.

„დღეს რომ უკრაინაზე საუბრობენ და იმ კონტექსტზე, რაც უკრაინაში რუსეთის სამხედრო აგრესიას უკავშირდება, ამას ლოგიკური ახსნა აქვს – უკრაინა უმძიმეს ომშია და არაა გასაკვირი, რომ საერთაშორისო პოლიტიკურ დღის წესრიგში და ყურადღების ქვეშ უკრაინაა და უკრაინისთვის სამხედრო დახმარების გამწევი ქვეყნები. რაც შეეხება საგარეო საქმეთა მინისტრს – თუ პოლიტიკურ ისტორიას გადახედავთ, ნახავთ, რომ საგარეო საქმეთა მინისტრებს ძალიან ბევრ და ძალიან მნიშვნელოვან გადაწყვეტილებებზე აქვთ ხელი მოწერილი და ძალიან ბევრ მნიშვნელოვან შეთანხმებაზე აქვთ ხელი ჩამორთმეული პარტნიორებისთვის. შეურაცხმყოფელია საკუთარი ქვეყნის მიმართ, როდესაც გგონიათ, რომ საგარეო საქმეთა მინისტრი თითქოს დაბალი დონის წარმომადგენელია საკუთარი ქვეყნის“, – განაცხადა არჩილ თალაკვაძემ.

თალაკვაძის თქმით, ნატო-ს ანგარიშებში და ოფიციალურ განცხადებებში დადასტურებულია, რომ საქართველო თავსებადია ნატო-ს მოთხოვნებთან და რომ საქართველო მზადაა გაწევრიანებისთვის.

„სტატუს-კვო ისაა, რომ საქართველო არის სტრატეგიულ მზადყოფნაში გაწევრიანებისთვის და პარტნიორებთან ერთად ვმუშაობთ, რათა პოლიტიკური გადაწყვეტილება იყოს მიღებული, რომელსაც საქართველო იმსახურებს. საქართველო აუცილებლად გახდება ევროპული და ევროატლანტიკური ოჯახის წევრი. ეს ბევრ ფაქტორზეა დამოკიდებული. იცით, ნატო-ს თითოეულ გადაწყვეტილებას და გაფართოებაზე თითოეულ პოლიტიკურ ნაბიჯს რამხელა საერთაშორისო ძვრები და ტექტონიკური ცვლილებები მოჰყვება ხოლმე. ამიტომ, ვინც ზედაპირულად განიხილავს ამ საკითხს და ნიშნის მოგებით საუბრობს საქართველოზე, ან ზედაპირული წარმოდგენა აქვს ნატო-სა და საერთაშორისო უსაფრთხოებაზე ან აქვს სუბიექტური ინტერესი, რომ როგორმე საქართველოს იმიჯი დააზიანონ“, – განაცხადა არჩილ თალაკვაძემ.

ნატო-ში არაერთხელ თქვეს, რომ პოლიტიკური გადაწყვეტილებაა საჭირო, სხვა მხრივ ქვეყანა მზად არის, ნატო-ს წევრი გახდეს, მაგრამ ეს მზაობა ჯერ არსად არ გამოჩნდა, – ამის შესახებ საქართველოს პირველ არხს „ხალხის ძალის“ წევრმა, გურამ მაჭარაშვილმა განუცხადა.

მისი თქმით, საქართველომ გაცილებით იმაზე მეტი გაიღო, ვიდრე ნატო-ს წევრმა ქვეყნებმა, ვინც ნატო-ში გაწევრიანდნენ.

„მწვავე რეგიონში, ოკუპაციის პირობებში, ჩვენმა ჯარისკაცებმა შეძლეს და საერთაშორისო მისიებში მიიღეს მონაწილეობა. ათეულობით ჯარისკაცი საკუთარი სიცოცხლისა და ჯანმრთელობის ფასად იყო მისიებში. ნატო-ში არაერთხელ თქვეს, რომ პოლიტიკური გადაწყვეტილებაა საჭირო, სხვა მხრივ ქვეყანა მზად არის, რომ ნატო-ს წევრი გახდეს, მაგრამ ეს მზაობა ჯერ არსად არ გამოჩნდა. პოლიტიკური გადაწყვეტილება ეფუძნება იმას, თუ რა პროცესები იქნება მსოფლიოსა და რეგიონში. ნატო-ს ხელმძღვანელობა არასოდეს მალავდა, რომ ფრთხილი პოლიტიკა ჰქონდა რუსეთის მიმართ. პრობლემა თუ საქართველოს ოკუპაცია იყო, ესეც უნდა თქმულიყო. საქართველო თავისი სიცოცხლისა და ჯანმრთელობის ფასად იმსახურებს ნატო-ს წევრობას. ახლა საუბარია მაპი-ს გარეშე თუ მაპ-ით ნატო-ს წევრობაზე, ამას ვინ დაიჯერებს? ადამიანი ცოლად თუ არ მოგყავს და ეუბნები, ცოლის სტატუსს გაგიუქმებ და პირდაპირ ცოლად მოგიყვანო, ეს არ არის დაპირება. ნატო-ს წევრობაზე თუ არის საუბარი, პირდაპირ უნდა თქვა, რომ საქართველო ნატო-ს წევრი გახდება“, – განაცხადა გურამ მაჭარაშვილმა.

გიორგი ბაჩიაშვილის ადვოკატი ამ საქმის პოლიტიზებას როცა ცდილობს, ეს არასწორია და ამაში ჩვენს წვლილს ვერ შევიტანთ, – ამის შესახებ „ქართული ოცნების“ თავმჯდომარე ირაკლი კობახიძემ ჟურნალისტებს განუცხადა.

მისი თქმით, ეს არის კონკრეტული საქმე, რომელიც სავარაუდო დანაშაულს უკავშირდება და საქმე განხილული უნდა იყოს სამართლებრივ ჭრილში.

„ამ თემას არ ჩავუღრმავდები. ხედავთ, რომ იქითა მხარის ადვოკატი ამ საკითხის პოლიტიზებას ცდილობს. მიზანი ჩანს, რაც არის, ეს არის არასწორი. ეს არის კონკრეტული საქმე, რომელიც სავარაუდო დანაშაულს უკავშირდება და საქმე განხილული უნდა იყოს სამართლებრივ ჭრილში. როცა ბაჩიაშვილის ადვოკატი ამ საქმის პოლიტიზებას ცდილობს, ეს არასწორია და ამაში ჩვენს წვლილს ვერ შევიტანთ“, – განაცხადა კობახიძემ.

საქართველოს გენერალურმა პროკურატურამ დიდი  ოდენობით კრიპტოვალუტის მართლსაწინააღმდეგო მითვისებისა და უკანონო შემოსავლის ლეგალიზაციის ფაქტზე თანაინვესტირების ფონდის ყოფილი ხელმძღვანელის, გიორგი ბაჩიაშვილის მიმართ სისხლისსამართლებრივი დევნა დაიწყო.

 საქმეზე პროცესი 6 ივლისს გაიმართა, რომელსაც თავად ბრალდებულიც ესწრებოდა. როგორც ბაჩიაშვილმა სასამართლო სხდომაზე განაცხადა, ის თავს დამნაშავედ არ ცნობს. სასამართლომ გიორგი ბაჩიაშვილს აღკვეთის ღონისძიების სახით 2 500 000 ლარის ოდენობის გირაო შეუფარდა. საქმეზე წინასასამართლო სხდომა 31 აგვისტოს, 13:00 საათზე ჩაინიშნა.

თანაინვესტირების ფონდის ყოფილი ხელმძღვანელის, გიორგი ბაჩიაშვილის საქმესთან დაკავშირებით ბიძინა ივანიშვილის ადვოკატმა, თეიმურაზ წიქვაძემ განცხადება გაავრცელა, სადაც ნათქვამია, რომ „გიორგი ბაჩიაშვილის კეთილსინდისიერების მიმართ ეჭვების გაჩენის შემდეგ, ივანიშვილი დაინტერესდა ბიტკოინების მაინინგის საკითხის შესწავლით, რის შედეგადაც აღმოჩნდა, რომ გიორგი ბაჩიაშვილმა მიითვისა მილიონობით დოლარის ღირებულების კრიპტოვალუტა.“ განცხადება გაავრცელა გიორგი ბაჩიაშვილის ადვოკატმა, რობერტ ამსტერდამაც, რომლის თქმითაც, „თეიმურაზ წიქვაძის პრეტენზიები თავხედურად არ შეესაბამება სიმართლეს“ და სიმართლის გამოსავლენად ბოლომდე იბრძოლებენ.

ერთადერთი ლოგიკური გადაწყვეტილება უნდა იყოს იმ პროცესების დაჩქარება, რასაც შეუძლია საქართველოსა და უკრაინის ნატო-ს წევრ სახელმწიფოდ ქცევა, – ამის შესახებ საქართველოს პირველ არხს პარლამენტის ადამიანის უფლებათა დაცვის კომიტეტის თავმჯდომარემ, მიხეილ სარჯველაძემ განუცხადა.

მისი თქმით, ყველა კარგად ხვდება და აღიარებს, რომ 2008 წლამდეც ბევრი გაბედული ნაბიჯი უნდა ყოფილიყო გადადგმული, რასაც შეეძლო შედეგად მოეტანა ის, რომ 2008 წლის სამხედრო აგრესია ყოფილიყო თავიდან აცილებული.

„მგონი, შემდეგომ განვითარებული მოვლენებიც კარგად აჩვენებს, თუ რაოდენ დიდი მნიშვნელობა აქვს გაბედული გადაწყვეტილებების მიღებას, მათ შორის საქართველოსთან მიმართებაში. ერთადერთი ლოგიკური გადაწყვეტილება უნდა იყოს იმ პროცესების დაჩქარება, რასაც შეუძლია საქართველოსა და უკრაინის ნატო-ს წევრ სახელმწიფოდ ქცევა“, – განაცხადა სარჯველაძემ.

ვილნიუსის სამიტზე დადასტურდება, რომ ომის დამთავრების შემდეგ უკრაინა სწრაფად გახდება ნატო-ს წევრი სახელმწიფო – სამწუხაროდ, დღეს ძალიან ნათლად ვხედავთ, რომ საქართველო უკრაინის დღის წესრიგს ჩამოშორდა არა მხოლოდ ევროკავშირში გაწევრიანების თვალსაზრისით, არამედ ნატო-ში გაწევრიანების გზაზეც, – ამის შესახებ „ლელოს” ერთ-ერთმა ლიდერმა, დეპუტატმა სალომე სამადაშვილმა ჟურნალისტებს განუცხადა.

მისი თქმით, უკრაინისა და საქართველოს გაყოფა მოხდა, რასაც რამდენიმე მიზეზი აქვს, მათ შორის საქართველოს დღევანდელი ხელისუფლება.

„შეიძლება ითქვას, რომ ამ ორი ქვეყნის გაყოფა მოხდა და ამას რამდენიმე მიზეზი აქვს – პირველი არის საქართველოს დღევანდელი ხელისუფლება, რომელიც მიუხედავად იმისა, რომ კონსტიტუციაში გვიწერია, რომ ეს ქვეყანა ნატო-ში უნდა გაწევრიანდეს, რეალურად, გაწევრიანებას მიზნად არ ისახავს. მეორე – უკანასკნელი წლების განმავლობაში უკან წავედით და არც ერთი მნიშვნელოვანი რეფორმა არ გატარებულა. რეფორმების გატარება რომ მოთხოვნაა, ეს ვნახეთ უკრაინასთან მიმართებით, რომელსაც უთხრეს, რომ ნატო-ს წევრი გახდება, როდესაც გატარდება რეფორმები, რომელსაც ნატო ელოდება და მითუმეტეს საქართველოსთვის არავითარ გამონაკლისს რეფორმების თვალსაზრისით არავინ დაუშვებს. ხელისუფლებამ ჩააგდო ყველა შესაბამისი რეფორმა. მესამე – ძალიან მნიშვნელოვანი მიზეზი, რის გამოც საქართველო ვილნიუსიდან ხელცარიელი დაბრუნდება, ეს არის საქართველოს დღევანდელი ხელისუფლების პოზიცია რუსეთ-უკრაინის ომში. საქართველოს დღეს ჰყავს ხელისუფლება, რომელიც გულშემატკივრობს ვლადიმერ პუტინის რეჟიმს და გეოპოლიტიკურ კონტექსტში ეს შეუძლებელს ხდის ჩვენი დასავლელი პარტნიორებისთვის საქართველოს ნატო-ში გაწევრიანების მხარდაჭერას. ასე რომ, სანამ ქვეყანაში დემოკრატიული არჩევნების გზით არ შევცვლით რუსული ოლიგარქიულ რეჟიმს, არავითარი პროგრესი ამ ქვეყანას არც ნატო-ში და არც ევროკავშირში გაწევრიანების გზაზე არ ექნება”, – განაცხადა სალომე სამადაშვილმა.

შეგახსენებთ, რომ ლიეტუვის დედაქალაქ ვილნიუსში დღეს ნატო-ს ორდღიანი სამიტი იხსნება. შეხვედრებს ნატო-ს გენერალური მდივანი, იენს სტოლტენბერგი უხელმძღვანელებს. ძირითადი საკითხები, რომელსაც ალიანსის ლიდერები ვილნიუსში განიხილავენ, უკრაინაში მიმდინარე რუსეთის ომი და ალიანსის წევრობაზე კიევის განაცხადი იქნება. უკრაინის ხელისუფლებაში აცხადებენ, რომ ისინი ვილნიუსის სამიტისგან გაწევრიანებასთან დაკავშირებით მკაფიო სიგნალს ელიან. გუშინ ცნობილი გახდა, რომ სამიტს უკრაინის პრეზიდენტი, ვოლოდიმირ ზელენსკიც დაესწრება.