“ალბათ, ნიკა გვარამიასგან ახალ ოპოზიციურ ლიდერს ამზადებენ” – ირაკლი ზარქუა

93
spot_img

დარწმუნებული ვარ, გვარამია დასავლეთში არსებულ ლობისტურ ჯგუფებს ხვდება, „ნაციონალურ მოძრაობას“ რომ ჰყავს – ალბათ, ბატონი გვარამიასგან ახალ ოპოზიციურ ლიდერს ამზადებენ, – ამის შესახებ „ქართული ოცნების“ წევრმა დეპუტატმა ირაკლი ზარქუამ ჟურნალისტებს განუცხადა, რითაც გამოეხმაურა ინფორმაციას, რომ „მთავარი არხის“ დამფუძნებელი ნიკა გვარამია სტრასბურგში იმყოფება.

მისი თქმით, გვარამიას შეწყალებას, პრეზიდენტის აზრით, რადიკალიზაცია უნდა შეემცირებინა, თუმცა „საპირისპირო შედეგს მივიღებთ“.

„ვიზიტში მოულოდნელი არც არაფერი ყოფილა. დარწმუნებული ვარ, ხვდება დასავლეთში არსებულ ლობისტური ჯგუფებს, „ნაციონალურ მოძრაობას“ რომ ჰყავს. ესენი არიან კუბილიუსები, ფოტიგები, ქალბატობი რასა. ალბათ, ბატონი გვარამიასგან ახალ ოპოზიციურ ლიდერს ამზადებენ. ისედაც ვიცოდით, რომ გვარამია ამ რადიკალურ ოპოზიციაში ერთ-ერთი მნიშვნელოვანი ფიგურა იყო, ვინც ამ პროცესს მართავს. როგორც კი ის განერიდა და დანაშაულის ჩადენის შემდეგ ციხეში ჯდომა მოუწია, კი ნახეთ, როგორ ჩამოინგრა მთელი ოპოზიციური სპექტრი. სავარაუდოდ, ახალი ემოციებით, ახალი პროგრამებით, მისიებით, ამოცანებით იქნება ბატონი გვარამია დატვირთული. არადა, ქალბატონ პრეზიდენტს რომ ჰკითხოთ, რა მიზნითაც შეიწყალა, ეს ნაბიჯი უნდა ყოფილიყო საზოგადოების გამაერთიანებელი და რადიკალიზაციის შემამცირებელი. მგონია, პირიქით, საპირისპირო შედეგს მივიღებთ. ამაშიც ჩანს, როგორი აცდენილია ქალბატონი სალომე რეალურ ხედვებს, მოცემულობებს. „ნაციონალურმა მოძრაობამ“ 7, 10 გვარამია რომ დაიყენოს, ქართველი ხალხის ნებას ვერავინ გადავა. ქართველი ხალხის ნება ისაა, რომ აქ იყოს სიმშვიდე და არა ქაოსი, ეკონომიკური კეთილდღეობა და უარი „მეორე ფრონტს“. დანარჩენი – ვინც ამ გზას გადაუხვევს, საზოგადოების მხრიდან დასჯილი და პოლიტიკურ სანაგვეზე მოსროლილი იქნება. როგორც ხედავთ ახლა ე.წ. პოლიტიკურ ლიდერებს ოპოზიციაში“, – განაცხადა ზარქუამ.