მოსამართლეებს მტკიცებულებების გარეშე კორუმპირებულები უწოდეს და სანქციები დაუწესეს, ეს პირდაპირი მინიშნება იყო, რომ თუ კონტროლის უფლებას არ გადმოგვცემთ ქართულ მართლმსაჯულებაზე, ასეთი ტიპის სანქციებს დავაწესებთო, – ამის შესახებ „ხალხის ძალის“ ერთ-ერთმა ლიდერმა, გურამ მაჭარაშვილმა აშშ-ის მიერ ოთხი ქართველი მოსამართლისთვის სანქციების დაწესებაზე საუბრისას განაცხადა.

გურამ მაჭარაშვილის თქმით, აშშ-ის სახელმწიფო დეპარტამენტმა ან უნდა დაამტკიცოს, რომ მოსამართლეები კორუმპირებულები არიან, ან გამოვა, რომ მათ სასამართლოზე კონტროლის მოპოვებით ხელისუფლების კონტროლი სურთ, რაც მიუღებელია.

„ის, რომ აშშ-ის ელჩი იუსტიციის საბჭოს იგნორირებით დადიოდა მოსამართლეებთან და ოფისი ჰქონდა სასამართლოში, არის წარმოუდგენელი და ასეთი რამ არცერთ ქვეყანაში არ ხდება. ეს ყველაფერი დაგვირგვინდა იმით, რომ მოსამართლეებს მტკიცებულებების გარეშე, ვითომ რაღაც ღია წყაროებიდან მიღებული ინფორმაციების გამო, კორუმპირებულები უწოდეს და ასე დაუწესეს სანქციები. რა თქმა უნდა, ეს პირდაპირი მინიშნება იყო იმისკენ, რომ თუ კონტროლის უფლებას არ გადმოგვცემთ ქართულ მართლმსაჯულებაზე, ასეთი ტიპის სანქციებს დავაწესებთო. თუმცა, შესაბამისი რეაქცია მიიღეს ხელისუფლებისგან, რის შემდეგაც თავის მართლების მსგავსი კომენტარები მოვისმინეთ მათგან, რომ ეს არ არის ფინანსური სანქცია, მხოლოდ სავიზოაო.

ამას არსებითი მნიშვნელობა შეიძლება, შინაარსის მხრივ ჰქონდეს, მაგრამ ფორმალურად არ აქვს, რადგან, როდესაც პარტნიორი ქვეყანა სანქციების ენით გესაუბრება, თანაც, რაც ყველაზე მთავარია, მტკიცებულებების გარეშე, ეს მიუღებელია. თან, ამას არც უარყოფს, რადგან არ გეუბნება ამ მტკიცებულებების შესახებ. შესაბამისად, ასეთი მტკიცებულებები არც აქვს. როგორ წარმოგიდგენიათ „ენჯეოების“ გაჩუმება, „საჯარო ინფორმაციაში“ კორუფციის ფაქტი რომ არსებობდეს?

ამ თემას, რა თქმა უნდა, არ მოვეშვებით და აშშ-ის სახელმწიფო დეპარტამენტს ბოლომდე მოუწევს პასუხის გაცემა – ან მტკიცებულებებით, ან ამ თემის უკან გაწვევით. სხვა შემთხვევაში, გამოვა ის, რაც პირდაპირაც გვითხრეს, რომ ქართული მართლმსაჯულების კონტროლის სურვილი აქვთ. ეს კი პირდაპირი გაგებით იმას ნიშნავს, რომ ხალხის ნების გვერდის ავლით ხელისუფლებაზე კონტროლის დამყარება სურთ, რაც მიუღებელია და ქართული საზოგადოება ამას არ დაუშვებს“, – განაცხადა გურამ მაჭარაშვილმა.

ჩვენი ოფიციალური ვიზიტი პოლონეთში, პოლონეთის მიერ იყო ორგანიზებული და დაგეგმილი ჯერ კიდევ ათი დღის წინ, ჩვენი ვარშავაში ვიზიტი უკავშირდება პრეზიდენტ სააკაშვილისთვის გადასაცემ უმნიშვნელოვანეს ჯილდოს. მიხეილ სააკაშვილის გარდა, ამ ჯილდოს მიიღებენ სხვადასხვა ქვეყნის მოქმედი მაღალი თანამდებობის პირები, – ამის შესახებ „ნაციონალური მოძრაობის“ თავმჯდომარე ლევან ხაბეიშვილი სოციალურ ქსელში წერს.

„ამის პარალელურად, ცხადია, გვაქვს შეხვედრები ჩვენს კოლეგებთან, რომლებიც ეხება ჩვენი ქვეყნის ევროპულ მომავალს და პერსპექტივას. ვწუხვარ გამოგონილი ისტერიკის გამო, რომელიც აბსოლუტურად უსაფუძვლოა. არაანაზღაურებადი, ოფიციალური მივლინებით ვიმყოფებით პოლონეთში და, შესაბამისად, უმარტივესად შეეძლოთ ენახათ იმ ადამიანებს, ვინც კონკრეტულ საკითხზე მუშაობდნენ. ნორვეგიაში მიღებული ჯილდო უმწვავესად და მტკივნეულად მიიღო რუსულმა ოცნებამ და იქიდან რამდენიმე დღეში, მაქვს პატივი, პრეზიდენტ სააკაშვილისთვის ჯილდოს გადაცემის ცერემონიას დავესწრო“, – წერს ხაბეიშვილი Facebook-ზე.

ოპოზიციის წარმომადგენლები საქართველოს პრეზიდენტს მიმართავენ, რიგგარეშე სხდომა, რომელიც მათ მოითხოვეს, 11 აპრილს არ მოიწვიოს. დეპუტატ თამარ კორძაიას განმარტებით, გადაწყვეტილების შეცვლის მიზეზი გახდა ის, რომ ორმა ოპოზიციონერმა დეპუტატმა, ლევან ხაბეიშვილმა და ანა წითლიძემ დაუგეგმავად დატოვეს საქართველო. მისი თქმით, ოპოზიციას არ ჰყოფნის ხმები იმისათვის, რომ საგამოძიებო კომისიის შექმნასთან დაკავშირებით გადაწყვეტილება მიიღოს.

როდესაც ვიღაცამ იცოდა, რომ ხვალ კენჭისყრა უნდა გამართულიყო საგამოძიებო კომისიის შექმნასთან დაკავშირებით და გადაწყვიტა, წასულიყო ქალაქიდან, ეს არის უკიდურესი პოლიტიკური უპასუხისმგებლობა, – ამის შესახებ „ლელოს“ პოლიტიკურმა მდივანი, სალომე სამადაშვილმა განაცხადა.

სალომე სამადაშვილი გამოეხმაურა პრეზიდენტისადმი ოპოზიციონერი დეპუტატების მიმართვას, რომ 11 აპრილს რიგგარეშე სესია აღარ მოიწვიოს, რადგან პარლამენტის ორმა დეპუტატმა – ლევან ხაბეიშვილმა და ანა წითლიძემ „მოულოდნელად დატოვეს საქართველო“.

„როდესაც ვიღაცამ იცოდა, რომ ხვალ კენჭისყრა უნდა გამართულიყო საგამოძიებო კომისიის შექმნასთან დაკავშირებით და გადაწყვიტა, რომ წასულიყო ქალაქიდან, ეს არის უკიდურესი პოლიტიკური უპასუხისმგებლობა.

თუ მიგაჩნია, რომ პარლამენტში უნდა იყო და მანდატი უნდა გქონდეს, უფრო მნიშვნელოვანი რა საკითხი შეიძლება არსებობდეს მანდატის გამოსაყენებლად.

დღეებია ვაწარმოებთ კამპანიას და ვაფრთხილებთ მთელ ოპოზიციას, რომ ეს არის უკიდურესად მნიშვნელოვანი საკითხი ჩვენი ქვეყნისთვის და ამ პროცესში თითო ხმას აქვს გადამწყვეტი მნიშვნელობა.

ასეთი უპასუხისმგებლო დამოკიდებულება საკუთარ ხმასთან და მანდატთან არის ის, რაც საზოგადოებას უჩენს განცდას, რომ არ შეიძლება ენდო ოპოზიციურ პოლიტიკოსებს და მსგავსი საქციელი აზიანებს მთლიანად ოპოზიციას“, – განაცხადა სალომე სამადაშვილმა.

ოპოზიციის წარმომადგენლები საქართველოს პრეზიდენტს მიმართავენ, რიგგარეშე სხდომა, რომელიც მათ მოითხოვეს, 11 აპრილს არ მოიწვიოს.

დეპუტატ თამარ კორძაიას განმარტებით, გადაწყვეტილების შეცვლის მიზეზი გახდა ის, რომ ორმა ოპოზიციონერმა დეპუტატმა, ლევან ხაბეიშვილმა და ანა წითლიძემ დაუგეგმავად დატოვეს საქართველო. მისი თქმით, ოპოზიციას არ ჰყოფნის ხმები იმისათვის, რომ საგამოძიებო კომისიის შექმნასთან დაკავშირებით გადაწყვეტილება მიიღოს.

დღეს მეორედ მივმართავთ საქართველოს პრეზიდენტს, სამწუხაროდ, დღეს ჩვენ მიერ გაგზავნილი მიმართვის შემდეგ, რომელიც ეხებოდა, ხვალ, 11 აპრილს რიგგარეშე სესიის მოწვევას, მოულოდნელად ორმა დეპუტატმა დაუგეგმავად დატოვა საქართველო. ამიტომ ხვალ ოპოზიციას არ ჰყოფნის ხმები, რომ მიიღოს გადაწყვეტილება საგამოძიებო კომისიის შექმნასთან დაკავშირებით, – ამის შესახებ ოპოზიციონერმა დეპუტატმა, თამარ კორძაიამ განაცხადა.

მისი თქმით, სხდომა მაშინ უნდა გაიმართოს, როდესაც ოპოზიცია სრულად იქნება პარლამენტში.

როგორც კორძაიამ დააზუსტა, საუბარია ლევან ხაბეიშვილსა და ანა წითლიძეზე.

„იმისთვის, რომ აღმოვფხვრათ ზედმეტი ინტერპრეტაციები, ამ თხოვნის მიზანი პრეზიდენტისადმი არის ის, რომ საქართველოს პარლამენტში მყოფი ოპოზიცია შეთანხმებულია საგამოძიებო კომისიის განსაკუთრებულ მნიშვნელობაზე და ამიტომ, გვსურს, რომ კენჭისყრა ჩატარდეს სწორედ მაშინ, როცა ოპოზიცია სრულად იქნება პარლამენტში წარმოდგენილი. ბოდიშს ვუხდით პრეზიდენტს, რომ ეს დაუგეგმავი ვითარება შეიქმნა. მივმართავთ საქართველოს პრეზიდენტს, ხვალინდელი სხდომა არ მოიწვიოს“, – განაცხადა კორძაიამ.

ამასთან, ოპოზიციონერმა დეპუტატმა ხათუნა სამნიძემ აღნიშნა, რომ მათთვის მთავარია, საგამოძიებო კომისიის შექმნასთან დაკავშირებული საკითხი არ ჩავარდეს და მომავალ კვირას გაიტანონ კენჭისყრაზე.

სამნიძის განცხადებით, წინასწარ შეთანხმებული იყო მთელი ოპოზიცია, რომ იქნებოდნენ მობილიზებული და იმედი აქვს, ასეთი ტიპის პრობლემები არ შეიქმნება მომავალ კვირას.

„ოპოზიციაში საკმარისი ხმები არის, ოპოზიცია შეთანხმებულია, რომ შეიქმნას საგამოძიებო კომისია, ოპოზიციაში გააზრებულია, რომ ამ საკითხის ბოლომდე მიყვანა, კომისიის შექმნა არის ინდივიდუალური პასუხისმგებლობა თითოეული ოპოზიციონერი დეპუტატის, ვინც იქნება დარბაზში ამ საკითხის კენჭისყრის დროს. ჩვენ შეგვეძლო, კენჭისყრაზე გაგვეტანა ეს საკითხი. ამიტომ მივმართეთ დილით პრეზიდენტს რიგგარეშე სხდომის ჩანიშვნასთან დაკავშირებით, მაგრამ, ბოდიშს ვიხდით ამისთვის, ახლა, საღამოს გვიწევს მიმართვა, რომ არ ჩაინიშნოს რიგგარეშე სხდომა. აქვე, ხაზი უნდა გავუსვა, რომ ეს საკითხი დარეგისტრირებულია, საკითხს სჭირდება მხოლოდ კენჭისყრა და ჩვენ შეგვიძლია, კენჭი ვუყაროთ კომისიის შექმნას მომავალ კვირას მორიგ სხდომაზე. ანუ, საკითხი დღესაც დგას დღის წესრიგში და ჩვენი ამ ბრიფინგის მიზანია, ეს საკითხი გადაწყდეს და მორიგ სხდომაზე გავიტანოთ კენჭისყრაზე. თუ ამას არ გავაკეთებდით, შეიძლება, საკითხი ჩავარდნილიყო და ამ საკითხის მნიშვნელობას იაზრებს თითოეული ოპოზიციონერი. ამიტომ მობილიზება იქნება მომავალ კვირას, მორიგ სხდომაზე, სადაც აუცილებლად იქნება დღის წესრიგში კომისიის შექმნის საკითხი. ჩვენ წინასწარ არ ვიცოდით, 52 ოპოზიციონერი დეპუტატი და მანდატი არსებობს პარლამენტში, ვიცოდით, რომ საკმარისი ხმები გვქონდა, სწორედ ამიტომ მივმართეთ პრეზიდენტს, მაგრამ არ ვიცოდით, რომ მოგვიანებით, როცა უკვე გაიგზავნა თხოვნა პრეზიდენტთან, ქალბატონმა წითლიძემ და ბატონმა ხაბეიშვილმა დატოვეს ქვეყანა, როგორც ვიცი, დაუგეგმავად. იმედი მაქვს, ასეთი ტიპის პრობლემები არ შეიქმნება მომავალ კვირას, სხვა ინფორმაცია არ მაქვს. წინასწარ შეთანხმებულ იყო მთელი ოპოზიცია, რომ ვიქნებოდით მობილიზებულად ყველანი აქ, დავთვალეთ ხმები, შევუთანხმდით ერთმანეთს, 50 ხმა იყო საკმარისი, რათა შექმნილიყო და კენჭი გვეყარა ხვალ, მაგრამ რადგან ასეთი ვითარება აღარ არის ამ საღამოსთვის, ვთხოვეთ პრეზიდენტს, არ ჩაინიშნოს რიგგარეშე სხდომა და ამ საკითხს გავიტანთ მომავალ კვირას, მორიგ სხდომაზე“, – განაცხადა ხათუნა სამნიძემ.

ოპოზიციამ პრეზიდენტს  11 აპრილს პარლამენტის რიგგარეშე სხდომის მოწვევის მოთხოვნით დღეს, დღის პირველ ნახევარში მიმართა.

ამასთან, ცოტა ხნის წინ „ნაციონალური მოძრაობის“ თავმჯდომარემ, ლევან ხაბეიშვილმა სოციალურ ქსელში გაავრცელა ფოტო პოლონეთიდან, რომელზეც მასთან ერთად არიან ანა წითლიძე, გიული ალასანია, გიორგი ჩალაძე და ევროპარლამენტის წევრი პოლონეთიდან ანა ფოტიგა.

იუსტიციის უმაღლესი საბჭოს მოსამართლე წევრი, დიმიტრი გვრიტიშვილი ფარულ აუდიოჩანაწერს გამოეხმაურა, რომელიც ნიკა გვარამიასა და საქალაქო სასამართლოს ყოფილი თავმჯდომარის, მამუკა ახვლედიანის საუბარს ასახავს.

“როგორც ვხედავ, მამუკა ახვლედიანთან მიმართებით ასეთი მიდგომაა – ცუდი კაცია, მაგრამ ჩვენი კაცია. მიუხედავად იმისა, რომ პასუხგაუცემელი, სერიოზული მტკიცებულებები დევს ამ კაცის კეთილსინდისიერებასთან დაკავშირებით, შესაბამისი თანამდებობის პირები, ამ შემთხვევაში ბლინკენზეა საუბარი და აშშ-ის საელჩოზე, რომელთაც ჩემი მოქმედი კოლეგები და ასევე ვალერი ცერცვაძე დაასანქცირეს, რატომღაც, მამუკა ახვლედიანთან დაკავშირებით დუმან. ალბათ, მათი ტელევიზორი არ უჩვენებს მამუკა ახვლედიანის ამბავს, თუ რა ხდება, ვერ ვხვდები. ანუ, პრინციპში, არის ასეთი მიდგომა, ჩვენი კაცია, თუნდაც ცუდი იყოს, უნდა დავიფაროთ“, – განაცხადა გვრიტიშვილმა.

უზენაესი სასამართლოს თავმჯდომარისა და იუსტიციის უმაღლესი საბჭოს თავმჯდომარის, ნინო ქადაგიძის განცხადებით, მასსა და აშშ-ს ელჩ, კელი დეგნანს შორის შეხვედრა გაიმართა.

ნინო ქადაგიძის თქმით, მოსამართლეები მტკიცებულებების წარმოდგენას ითხოვენ.

“ხაზგასმით მინდა აღვნიშნო, ჩვენ არავის არავისგან არ ვიცავთ, მათ შორის, არც აშშ-სგან. ჩვენ ვითხოვთ მტკიცებულებებს. თქვენ იცით, რომ მე ძალიან ხშირად არ ვსაუბრობ იმ კულუარულ ვითარებებზე, რაც ხდება სასამართლოს შიგნით. აქედან გამომდინარე, მე ცალსახად განგიმარტავთ, რომ ყველაზე მძიმე, რაც შეიძლება ბრალად დასდო მოსამართლეს, ეს არის კორუფციული დანაშაულის ჩადენა და ყველაზე მძიმე, რაც შეიძლება იყოს სასამართლოს დისკრედიტაციის თვალსაზრისით, ეს არის ის, რომ სასამართლო არის კორუმპირებული. აქედან გამომდინარე, ხაზგასმით აღვნიშნავ, მე პირადად, მქონდა შეხვედრები და მქონდა თხოვნა, წარმოდგენილიყო არათუ პირდაპირი მტკიცებულებები, არამედ მინიშნება, რას ედავებიან და რაში სდებენ ბრალს ჩვენ სამ მოსამართლეს. პასუხი ამაზე არის ასეთი – ეს არის ღია, საჯარო ინფორმაციები. თუ თქვენ მიმითითებთ, რომელია ეს ღია, საჯარო ინფორმაციები, მაშინ მე დაგეთანხმებით, რომ ჩვენ ვინმესგან თავის გვაქვს დასაცავი. ჩვენ არავისგან თავი დასაცავი არ გვაქვს. არცერთ ეტაპზე და არცერთ მოცემულობაში”, – განაცხადა ქადაგიძემ.

ნინო ქადაგიძემ  ასევე, უპასუხა კითხვას, რომ დღეს მოსამართლეებს პრემიერ-მინისტრი შეხვდა და მაშინ, რა საჭირო იყო ეს ფორმატი, თუკი სასამართლოს არაფერი აქვს დასაცავი.

“ჩვენ შეგვწევს იმის ძალები, რომ ჩვენ თვითონ დავიცვათ ჩვენი თავი, მაგრამ სახელმწიფო მოწყობის თვალსაზრისით თქვენ იცით, თანამდებობრივად, რა უწყებები და ორგანოები ემორჩილება პრემიერს. აქედან გამომდინარე, ყველა ის ინფორმაცია, რომელიც არის სასამართლოსთვის შიდაკულუარულად ცნობილი, მნიშვნელოვანია, რომ ამის თაობაზე ინფორმაცია ჰქონდეს პრემიერს და დანარჩენის, შესაბამისად გადაწყვეტილება სახელმწიფო პოლიტიკის წარმართვისა, ეს უკვე არის პრემიერის პრეროგატივა”, – განაცხადა ნინო ქადაგიძემ.

რაც შეეხება საგამოძიებო კომისიის შესაძლო შექმნას, ნინო ქადაგიძის თქმით, მოსამართლეებს არავის დახმარება არ სჭირდებათ, მათ შორის არც კომისიის.

“ზოგადად მე არ ვიცი, თქვენ როგორ წარმოგიდგენიათ ამ კომისიის შექმნის ფორმატი, კონსტიტუციის მოწყობიდან გამომდინარე, ჩემთვის ცოტა, როგორც იურისტისთვის ძნელია, ამაზე განმარტების გაკეთება, თუმცა კიდევ ერთხელ ვიმეორებ, ჩვენ არ გვჭირდება არავის დახმარება, მათ შორის არც კომისიის. წარმოდგენილი იქნას ფაქტები, წარმოდგენილი იქნეს მტკიცებულებები და სასამართლოს აქვს თავისი რესურსი, იუსტიციის საბჭოს აქვს რესურსი, დეტალურად აქვს გაწერილი, როგორ უნდა მოხდეს მოსამართლის მიმართ დევნის დაწყება. იმ პირობებში, როდესაც მოსამართლის მიმართ დანაშაულის ნიშნები იკვეთება, ესეც კანონმდებლობაში პუნქტობრივად არის გაწერილი. აქედან გამომდინარე, ჩვენ ეს რესურსი გაგვაჩნია. თუ რაიმე მტკიცებულება აქვთ სიამოვნებით, პირადად მე ვიქნები გარანტორი, როგორც საზოგადოების ისე ნებისმიერი ჩემი მოსამართლის და მტკიცებულებების წარმოდგენის შემთხვევაში, მექნება მყისიერი რეაგირება და პირველი ამას თქვენ გაიგებთ”, – განაცხადა ჟურნალისტებთან ნინო ქადაგიძემ.