“რუსული ოცნება” “გაუქმებულია-გაუქმებულია”. მეორე დღეა, კენჭისყრის დაწყების წინ, საგამოძიებო კომისია რომ არ შეიქმნას, სხდომათა დარბაზიდან “გარბიან“, – ამის შესახებ „ერთიანი ნაციონალური მოძრაობის“ თავმჯდომარე ლევან ხაბეიშვილი სოციალურ ქსელში წერს.

როგორც ხაბეიშვილი განმარტავს, ოპოზიციის “ბოიკოტი” გასაგები და კანონიერია, მაგრამ ხელისუფლების მოქმედება საბოტაჟია.

“რუსული ოცნება” “გაუქმებულია-გაუქმებულია”. მეორე დღეა, კენჭისყრის დაწყების წინ, საგამოძიებო კომისია რომ არ შეიქმნას, “გარბიან” სხდომათა დარბაზიდან. ოპოზიცია აგროვებს 50 ხმას და “ოცნება” კვორუმს აგდებს – სხდომას შლის. ოპოზიციის “ბოიკოტი” გასაგები და კანონიერია, მაგრამ ხელისუფლების მოქმედება საბოტაჟი. საკუთარ თავს უცხადებენ “ბოიკოტს”, აპროტესტებენ პარლამენტს… თვალნათლივ და მკაფიოდ გამოჩნდა სასამართლო “კლანის” რეალური მმართველები და ბოსები ვინ არიან. დასანქცირებული მოსამართლეების შემდეგ, იქნებიან პროკურორებიც და საბოლოოდ ირაკლი კობახიძეს არ ასცდება“, – წერს ლევან ხაბეიშვილი სოციალურ ქსელში.

ცნობისთვის, პარლამენტის პლენარულ სხდომაზე კენჭისყრის პროცედურის დასაწყებად საჭირო კვორუმი კვლავ არ შედგა. საპარლამენტო უმრავლესობამ კენჭისყრის წინ რეგისტრაცია არ გაიარა, ტაბლოზე მხოლოდ 52 დეპუტატი დაფიქსირდა. შედეგად კენჭისყრის პროცესი ჩაიშალა და მოსამართლეებთან დაკავშირებით დროებითი საგამოძიებო კომისიის შექმნის საკითხს კენჭი ვერ ეყარა. სხდომაზე „ქართული ოცნების“ თავმჯდომარე ირაკლი კობახიძემ მოსამართლეებს სოლიდარობა კიდევ ერთხელ გამოუცხადა და აღნიშნა, რომ სწორედ სასამართლოს დამოუკიდებლობის მხარდაჭერის მიზნით არ აპირებდნენ უმრავლესობის წევრი დეპუტატები რეგისტრაციის გავლას.

ვინმეს მიაჩნია, რომ ოპოზიციას საგამოძიებო კომისიის შექმნა იმისთვის უნდა, რომ სასამართლოში მიღწეული პროგრესი დაადასტუროს?! არა, რა თქმა უნდა, მათ ეს იმისათვის სჭირდებათ, რომ თქვან, რომ სასამართლოში ხდება უბედურება მაშინ, როცა ეს ასე არ არის და ამით შეაფერხონ საქართველოს ევრო ინტეგრაცია, – ამის შესახებ საპარლამენტო უმრავლესობის წევრმა, მამუკა მდინარაძემ ჟურნალისტებს განუცხადა.

„გუშინდელი გადაწყვეტილება ბუნებრივია არ შევცვალეთ! სოლიდარობა ქართულ სასამართლოს! თქვენ იცით, რომ წლის ბოლოს ევროკავშირმა შეფასების კრიტერიუმებზე დაყრდნობით უნდა მიიღოს გადაწყვეტილება, საქართველოს მისცეს თუ არა კანდიდატის სტატუსი. ეს სტატუსი ერთხელ ჩვენ არ მოგვეცა უსამართლოდ. ეს თავად ევროკავშირის მიერ გამოქვეყნებული კრიტერიუმებით დამტკიცდა და სხვას რას შეიძლება ემსახურებოდეს ახლა სასამართლოს თემაზე კომისიის შექმნა, თუ არა საბოტაჟს იმიტომ, რომ „ნაცმოძრაობასა“ და მთელ მის კლასტერს ვერ წარმოუდგენია „ქართული ოცნების“ პირობებში საქართველომ მიიღოს კანდიდატის სტატუსი და ყველაფერს აკეთებენ ამის გამოსარიცხად. საზოგადოებამ გადაწყვიტოს რას შეიძლება ემსახურებოდეს სასამართლოსთან დაკავშირებული კომისიის შექმნა მაშინ, როდესაც საქართველოში გატარებული რეფორმებისა და პროგრესის საფუძველზე ევროკავშირმა გადაწყვეტილება უნდა მიიღოს ევროკავშირის კანდიდატის სტატუსის შესახებ. შესაბამისად, ამას სხვაგვარი პასუხი ობიექტურად ვერ გაეცემა. მტკიცებულებების გარეშე გვისანქცირებენ მოსამართლეებს, სავიზო შეზღუდვებს უწესებენ და შენ, ოპოზიციონერი რომ გქვია, ნაცვლად იმისა, რომ დადგე ქვეყნის გვერდით და თქვა, რომ მტკიცებულებების გარეშე ეს დაუშვებელია, პირიქით, ამის საფუძველზე ამბობ, რომ ჩვენ ახლა უნდა შევქმნათ მტკიცებულებები და შევქმნათ კომისია. ვინმეს მიაჩნია, რომ ოპოზიციას ამ კომისიის შექმნა იმისთვის უნდათ, რომ სასამართლოში მიღწეული პროგრესი დაადასტუროს?! არა, რა თქმა უნდა, მათ ეს იმისათვის სჭირდებათ, რომ თქვან, რომ სასამართლოში ხდება უბედურება, როცა ეს ასე არ არის და ამით შეაფერხონ საქართველოს ევროინტეგრაცია“,- განაცხადა მდინარაძემ.

აშშ-ის მიერ 4 ქართველი მოსამართლის სანქცირების შემდეგ, ოპოზიცია პარლამენტში სასამართლო სისტემის შემსწავლელი დროებით საგამოძიებო კომისიის შექმნას ითხოვს.

პარლამენტის 18 აპრილის პლენარულ სხდომაზე სასამართლოსთან დაკავშირებით დროებითი საგამოძიებო კომისიის შექმნის საკითხისთვის უნდა ეყარათ კენჭი, თუმცა, კვორუმის არარსებობის გამო კენჭისყრა ვერ შედგა.

სასამართლოს შესახებ საგამოძიებო კომისიის შექმნაზე კენჭისყრა ისევ კორუმის არარსებობის გამო ვერც 19 აპრილს შედგა. ამის მიზეზი მმართველი გუნდის პოლიტიკური გადაწყვეტილება იყო.

დავით კეზერაშვილი არის ოლიგარქი თავისი სისხლიანი ფულით, შესაბამისად, ამ ადამიანისგან ფულის მიღება სხვადასხვა ფორმით, აბსოლუტურად ამორალური ქმედებაა, – ამის შესახებ „ქართული ოცნების“ თავმჯდომარემ ირაკლი კობახიძემ განაცხადა.

მისი თქმით, „ნაციონალური მოძრაობა“ ლიდერების დონეზე “მთლიანად კრიმინალებისგან შედგება”.

„კეზერაშვილი არის ოლიგარქი, მას სისხლიანი ფული აქვს ნაშოვნი. რის ხარჯზე? ეს იყო ბიზნესის რეკეტი, ჯარის გაძარცვა, ევროპელი პენსიონერების გაძარცვა და ვიღაცები მხოლოდ ახლა შეშფოთდნენ, როცა ეს ყველაფერი, მესამე ნაწილი BBC-დან გაიგეს. ქართველმა ხალხმა ძალიან კარგად იცის, რის ხარჯზე აქვს კეზერაშვილს ფული ნაშოვნი. ეს არის ოლიგარქი თავისი სისხლიანი ფულით, შესაბამისად, ამ ადამიანისგან ფულის მიღება სხვადასხვა ფორმით, აბსოლუტურად ამორალური ქმედებაა. რაც შეეხება წილების გადაფორმებას, ეს რა თქმა უნდა, ვითარებას არ ცვლის, „ფორმულა“ წაგებაზე მომუშავე ტელევიზიაა, შესაბამისად, მას სჭირდება მილიონობით ლარი იმისთვის, რომ ფუნქციონირება განაგრძოს. ბუნებრივია, წილების გადანაწილება აქ არაფერს ცვლის, კეზერაშვილი კვლავაც დააფინანსებს სისხლიანი ფულით ტელეკომპანია „ფორმულას“, შესაბამისად, წილების ფორმალური, თუ არაფორმალური გადანაწილებით არაფერი იცვლება, კეზერაშვილი გააგრძელებს სისხლიანი ფულით „ფორმულას“ დაფინანსებას.

მთლიანობაში ვსაუბრობთ „ნაცმოძრაობაზე“, კეზერაშვილი არის აქ ერთ-ერთი კრიმინალი, ეს პოლიტიკური პარტია მთლიანად შედგება ლიდერების დონეზე კრიმინალებისგან – ეს არის კეზერაშვილი, მერაბიშვილი, სააკაშვილი, თითოეული მათგანი უმძიმესი კრიმინალური წარსულის მქონეა. თუ ვინმეს უნდა, რომ კეზერაშვილამდე დაიყვანოს „ნაცმოძრაობის“ დანაშაულებრივი წარსული, ეს არასწორია. ეს პარტია, ლიდერების დონეზე მთლიანად კრიმინალებისგან შედგება. შესაბამისად, კეზერაშვილის ფაქტორი აქ არაფერს ცვლის, ყველა მათგანი, ყველა ლიდერი კრიმინალური წარსულის მქონეა, საზოგადოებამ მთლიანობაში უნდა იმსჯელოს „ნაცმოძრაობის“ არსზე და ამის მიხედვით კიდევ ერთხელ უნდა მიიღოს ის გადაწყვეტილება, რომელიც არაერთხელ მიიღო არჩევნებზე“, – განაცხადა კობახიძემ.