საქართველოს პარლამენტის თავმჯდომარის, შალვა პაპუაშვილის განცხადებით, სააკაშვილთან დაკავშირებით სტრასბურგის სასამართლოს გადაწყვეტილებით კიდევ ერთხელ დადასტურდა, რომ საქართველო იყო დეზინფორმაციული კამპანიის სამიზნე, არა მხოლოდ ქართველი, არამედ უცხოელი პოლიტიკოსების მხრიდანაც.

პაპუაშვილის თქმით, ამასთან დაკავშირებით დუმდნენ არასამთავრობო ორგანიზაციები, რომლებსაც, მისივე განმარტებით, მილიონობით დაფინანსება აქვთ სწორედ იმისთვის, რომ ქვეყნის წინააღმდეგ დეზინფორმაცია ამხილონ.

„რაც შეეხება სტრასბურგის სასამართლოს გადაწყვეტილებას და მის გავლენას, კიდევ ერთხელ დადასტურდა ის, რასაც ჩვენ წელიწად-ნახევარი ვსაუბრობდით, რომ საქართველო იყო ჩვეულებრივი დეზინფორმაციული კამპანიის ობიექტი და სამიზნე, არა მხოლოდ ქართველი, არამედ უცხოელი პოლიტიკოსების მხრიდანაც. ეს იყო მთელი კასკადი ტყუილის, დეზინფორმაციისა, შარლატანი ექიმებისა, შარლატანი ადვოკატებისა, რომლებიც ამტკიცებდნენ, თითქოს იყო წამება, მოწამვლა, უცხოელი, არაუცხოელი, ჩართული იყო მთელი კოჰორტა ადამიანებისა, რომლებიც დღისით, მზისით საქართველოს სდებდნენ ბრალს, თითქოს ხდებოდა მიხეილ სააკაშვილის წამება. ამ ყველაფერს ჩუმად და ხმის ამოღების გარეშე შესცქეროდნენ ჩვენი არასამთავრობო ორგანიზაციები, რომლებსაც მილიონობით დაფინანსება აქვთ სწორედ იმისთვის, რომ ქვეყნის წინააღმდეგ დეზინფორმაცია ამხილონ ხოლმე და აბსოლუტურად ჩუმად იყვნენ, ერთი ხმა არ ამოუღიათ ამასთან დაკავშირებით. ისინი მარტო მაშინ საუბრობენ დეზინფორმაციაზე, როდესაც მათ დონორებს ეხებათ საკითხი, როცა მათ ქვეყანას ეხება, ჩუმად არიან. ეს კიდევ ერთხელ ადასტურებს, რომ სინამდვილეში ამ ორგანიზაციებს არ უნდა ჰქონდეთ არანაირი კავშირი ქართულ საზოგადოებასთან, მით უმეტეს, სამოქალაქო საზოგადოების სახელით საუბრის რაიმე პრეტენზია“, – განაცხადა შალვა პაპუაშვილმა.

რაც შეეხება „ნციონალურ მოძრაობაში“ არსებულ ვითარებას, პაპუაშვილის შეფასებით, „რაც უფრო დასუსტდება „ნაციონალური მოძრაობა“, მით უფრო გაძლიერდება ქართული დემოკრატია“. „ეს არის ფორმულა, ამიტომ ამ კუთხით ვუყურებ ამ ყველაფერს“, – დასძინა შალვა პაპუაშვილმა.

12 მაისს ცნობილი გახდა, რომ სტრასბურგის სასამართლომ უარი უთხრა მიხეილ სააკაშვილს ვარშავაში გადაყვანაზე და სახელმწიფოს არ დაავალა ქვეყნის შიგნით მისი სხვა სამკურნალო დაწესებულებაში გადაყვანა.

რატომ ავიწყდება ყველას, მათ შორის ჩვენს მეგობრებს, რომ 2019 წლის შემდეგ კი არ შეცვლილა სიტუაცია, 2008 წელს იყო ამ ქვეყანაში ომი და ამ ომის შემდეგ ბევრი რამ მოხდა,  მანამდე არ იყო რუსეთი ოკუპანტი? ეს გადავშალეთ და თეთრი ფურცლიდან ვიწყებთ ურთიერთობას უკრაინის ომის გამო? – ამის შესახებ ფრაქცია „ქართული ოცნების“ თავმჯდომარემ, მამუკა მდინარაძემ განაცხადა.

მდინარაძეს კითხვა დაუსვეს საქართველოში აშშ-ის ელჩის, კელის დეგნანის განცხადებაზე, რომელმაც განაცხადა: „ახლა და 2019 წელს შორის განსხვავება ისაა, რომ რუსეთი უკრაინაში შეიჭრა და არ ვიცი, რატომ უნდა მიესალმოს ვინმე საჩუქარს იმ ქვეყნისგან, რომელიც სასტიკი აგრესორია“.

მამუკა მდინარაძის თქმით, არავის უნდა დაავიწყდეს, რომ საქართველოში რუსეთი 2008 წელს შემოიჭრა.

„ყველას ავიწყდება, რომ მათმა ბელადმა და ლიდერმა ცალმხრივად მოუხსნა სავიზო შეზღუდვები რუსებს. ამ შემთხვევაში საუბარია, რომ თურმე ჩვენ უნდა დავუწესოთ სანქციები ჩვენს მოქალაქეებს. თუ სააკაშვილი უხსნიდა სანქციებს რუსებს, ეს თურმე პროევროპული ყოფილა და ჩვენ თუ საკუთარ მოქალაქეებს არ ვუწესებთ, ეს ყოფილა პრორუსული. ასეთი ლოგიკა აქვთ  ჩვენს ოპონენტებს. სამწუხაროა, რომ, მათ შორის, ჩვენი სტრატეგიული პარტნიორისა და მეგობარი ქვეყნის წარმომადგენელსაც არ ახსენდება 2008 წლის ომი და ისიც ათვლას იწყებს უკრაინის ომიდან გამომდინარე. სააკაშვილის გადაწყვეტილება, რომ რუსებს მოუხსნა სანქციები, არის კარგი და „ქართული ოცნების“ გადაწყვეტილება, რომ საკუთარ მოქალაქეებს არ დაუწესოს დე ფაქტო თუ დე იურე სანქციები, ეს არის ცუდი. ამ ლოგიკას ასაღებენ საზოგადოებას. ეს ლოგიკა არ გავა, ამ ანკესზე საზოგადოება არ წამოეგება“, – განაცხადა მდინარაძემ.

საპარლამენტო უმრავლესობა ოპოზიციაში შემავალ თითოეულ პოლიტიკურ სუბიექტს სთავაზობს, ხვალინდელი დღის განმავლობაში მცირე დასაბუთებით წარმოადგინოს მათთვის მისაღები იუსტიციის უმაღლესი საბჭოს წევრობის კანდიდატები.

ამის შესახებ ფრაქცია „ქართული ოცნების“ თავმჯდომარემ, მამუკა მდინარაძემ უმრავლესობის სხდომის დასრულების შემდეგ გამართულ ბრიფინგზე განაცხადა. მდინარაძის თქმით, ეს საშუალებას მისცემთ, განსაზღვრონ, არის თუ არა პრაქტიკული შანსი, ამ საკითხზე მიღწეულ იქნას კონსენსუსი.

„ოპოზიციასთან გვაქვს გარკვეული შეთავაზება. მოგეხსენებათ, იუსტიციის უმაღლესი საბჭოს წევრების არჩევის საკითხი ევროპული რეკომენდაციების ერთ-ერთი პუნქტია. ამასთან დაკავშირებით, მიგვაჩნია, რომ წარმოდგენილი კანდიდატებიდან 15-მდე კანდიდატი აკმაყოფილებს როგორც კომპეტენციის, კომპეტენტურობის, ასევე კეთილსინდისიერების კრიტერიუმებს, რაც კარგად გამოჩნდა, მათ შორის, მათთან გასაუბრების დროს, რომელიც გაიმართა პარლამენტში. თუმცა ჩვენი პოზიციით ჩვენ არ შევზღუდავთ ჩვენი ოპოზიციის წარმომადგენლებს და მათ, ოპოზიციაში შემავალ თითოეულ პოლიტიკურ სუბიექტს ვთავაზობთ, წარმოადგინონ მცირე, მოკლე დასაბუთებით მათთვის მისაღები კანდიდატები ხვალინდელი დღის განმავლობაში. ეს ჩვენ საშუალებას მოგვცემს, განვსაზღვროთ, არის თუ არა პრაქტიკული შანსი, ამ საკითხზე მიღწეულ იქნას კონსენსუსი. თუ იქნება დადებითი შედეგი, მაშინ ჩვენ კიდევ უფრო ჩქარა ვიზრუნებთ იმასთან დკავშირებით, რომ კენჭისყრა მოხდეს. ყველა შემთხვევაში, ჩვენ ამაზე ვიზრუნებთ, თუმცა უმჯობესი იქნება, რომ ჩვენი პოზიციები რაღაც ნაწილში მაინც დაემთხვეს ერთმანეთს. ამიტომ, უმრავლესობის გადაწყვეტილებით, ჩვენ ხვალ ველოდებით მათი მხრიდან კონკრეტულ ადამიანებთან, კონკრეტულ კანდიდატებთან დაკავშირებულ პოზიციას, მოკლე დასაბუთებას, რატომ არის მათთვის მისაღები, რატომ დაუჭერენ კონკრეტულ ადამიანებს მხარს. შედეგების შესახებ, არის თუ არა თანხვედრა, კონსენსუსის შანსი ამასთან დაკავშირებით, დღის ბოლომდე საზოგადოებას დამატებით ჩავაყენებთ საქმის კურსში“, – განაცხადა მამუკა მდინარაძემ.

რუსეთის საოკუპაციო ძალების წარმომადგენლებმა, გორის მუნიციპალიტეტის სოფელ ერგნეთის მიმდებარედ, ოკუპირებულ ტერიტორიაზე უკანონოდ დააკავეს საქართველოს მოქალაქე. ამის შესახებ ინფორმაციას სახელმწიფო უსაფრთხოების სამსახური ავრცელებს.

უწყების ცნობით, აღნიშნული ინციდენტის შესახებ ინფორმაციის მიღებისთანავე, სახელმწიფო უსაფრთხოების სამსახურის მიერ გააქტიურდა ევროკავშირის სადამკვირვებლო მისიის მიერ ოპერირებული “ცხელი ხაზი”.

„ინციდენტის შესახებ დაუყოვნებლივ ეცნობა საერთაშორისო პარტნიორებსა და ჟენევის საერთაშორისო დისკუსიების თანათავმჯდომარეებს.

ამოქმედებულია ყველა არსებული მექანიზმი უკანონოდ დაკავებული საქართველოს მოქალაქის უმოკლეს ვადებში გასათავისუფლებლად.

საქართველოს ოკუპირებულ ტერიტორიებზე, ისევე როგორც საოკუპაციო ხაზის გასწვრივ ჩადენილ ყველა დესტრუქციულ ქმედებაზე პასუხისმგებლობა ეკისრება საოკუპაციო ძალა”, – აღნიშნულია ინფორმაციაში.