ორი წლის წინ, ზაფხულში, გიორგი ვაშაძის ინიციატივით, სპეციალური შეხვედრაც შედგა „ლელოსთან”, „დროასთან“ და „გირჩთან“, რომ სწორედ ეს შუა გაერთიანებულიყო – კარგია რომ ახლა მოახერხონ, ესაა ერთადერთი გამოსავალი, – ასე ეხმიანება „სტრატეგია აღმაშენებლის“ დეპუტატი პაატა მანჯგალაძე „ლელოს“ ლიდერის მამუკა ხაზარაძის განცხადებას, რომ „შუა უნდა შეიკრიბოს“.

მანჯგალაძის თქმით, „ქართული ოცნების“ ინტერესია პარტიები ბარიერს მიღმა დარჩნენ, ხმები დაიკარგოს და გადაუნაწილებელი მანდატები მიიღონ.

„როგორ შეიძლება „სტრატეგია აღმაშენებელი“ იყოს გაერთიანებების რაიმე ფორმით წინააღმდეგი, პირიქით, ამას მოვუწოდებდით ჩვენ. მეტიც, ორი წლის წინ, ზაფხულში გიორგი ვაშაძის ინიციატივით სპეციალური შეხვედრაც კი შედგა „ლელოს“, „დროას“, „გირჩს“ შორის, რომ სწორედ ეს შუა გაერთიანებულიყო. კარგია, რომ ორი წლის შემდეგ მივიდნენ საბოლოოდ ამ გადაწყვეტილებამდე. მართლა კარგია და ამას ნიშნისმოგებით არ ვამბობ. ჩვენ ამას ვთავაზობდით ყველას და ვერავინ იტყვის, რომ „სტრატეგია აღმაშენებელი“ ამას არ ამბობდა. მაშინ რომ ვერ მოხერხდა ეს ყველაფერი, ძალიან ვწუხვარ, კარგია, რომ ახლა მოახერხონ, წარმატებას ვუსურვებ, ყველანაირი ნიშნისმოგების გარეშე ვამბობ. ეს არის ერთადერთი გამოსავალი, რადგან ბარიერს მიღმა პარტიების დარჩენა „ქართული ოცნების“ ინტერესშია. ელემენტარული მათემატიკაა. 2016 წელს 5%-იანი ბარიერის გამო 20% დაიკარგა, ეს არის დაახლოებით, 30 მანდატი, საიდანაც 15 მანდატზე მეტი წაიღო „ოცნებამ“. ახლაც ამის იმედი აქვთ, რომ პარტიების განსხვავებებიდან გამომდინარე გაერთიანებას ვერ მოახერხებენ. გასაკვირი ჩემთვის, როცა პარტიული იდენტობის დაკარგვის საფრთხეზე საუბრობენ, პარტიულ იდენტობას კი არა, ქვეყანას დავკარგავთ. პარტიები არაფერს დაკარგავენ, შენი გაკეთებული საქმე და ქვეყნის ერთიანობაში ჩადებული ინვესტიცია არსად დაიკარგება”, – განაცხადა მანჯგალაძემ.

საქართველოს მესამე პრეზიდენტის, მიხეილ სააკაშვილის წარმომადგენლის, სოფო ჯაფარიძის განცხადებით, ევროპარლამენტის მიერ რუსული სამხედროების მიერ მოკლული თამაზ გინტურის მკვლელობა შეფასდა, როგორც „პროვოკაცია, რომელიც საქართველოს ევროატლანტიკური მომავლის წინააღმდეგაა მიმართული“.

როგორც მან მიხეილ სააკაშვილის საზოგადოებრივ მისაღებში გამართულ ბრიფინგზე განაცხადა, ისინი ყველაფერს გააკეთებენ, რომ თამაზ გინტურის მკვლელები „სრული სიმკაცრით“ დაისაჯონ.

„ევროპარლამენტის მიერ მიღებული რეზოლუცია ქართული სახელმწიფოსთვის ძალიან მნიშვნელოვანია. ჩვენი და ჩვენი პარტნიორების ძალისხმევით ვაკეთებთ იმას, რასაც რეალურად „ქართული ოცნება“ უნდა აკეთებდეს. ევროპარლამენტი გმობს თამაზ გინტურის მკვლელობას და ასევე ეხმაურება, საოკუპაციო ხაზთან მშვიდობიანი მოქალაქეების დაკავებას. თამაზ გინტურის მკვლელობა შეფასდა, კიდევ ერთი პროვოკაცია, რომელიც საქართველოს ევროატლანტიკური მომავლის წინააღმდეგაა მიმართული. დღევანდელი რეზოლუცია თამაზ გინტურის კიდევ ერთი გამარჯვებაა და ჩვენ ყველაფერს გავაკეთებთ იმისთვის, რომ თამაზ გინტურის მკვლელები სრული სიმკაცრით დაისაჯონ. სამწუხაროდ, დღეს რასაც უნდა აკეთებდეს ჩვენი ხელისუფლება, აკეთებს ქართველი ხალხი და ქვეყნის მესამე პრეზიდენტი მის გუნდთან ერთად. მესამე პრეზიდენტის დაპირება შესრულებულია“, – განაცხადა სოფო ჯაფარიძემ.

ამასთან, ბრიფინგზე რუსი სამხედროების მიერ მოკლული თამაზ გინტურის ძმა, გივი გინტური იმყოფებოდა, რომელმაც მიხეილ სააკაშვილს და ევროპარლამენტარ ანა ფოტიგას მადლობა გადაუხადა.

მოვუწოდებთ ევროპულ საბჭოს, დაამატოს ახალ სანქციებს მათი გვარები, ვინც პასუხისმგებელია თამაზ გინტურის მკვლელობაზე, კრემლს სურს, ისინი შიშში ცხოვრობდნენ და უარი თქვან ევროპულ გზაზე, მხარი დავუჭიროთ მათ და პუტინი დამარცხდება, – ამის შესახებ  სტრასბურგში, ევროპარლამენტის სესიაზე დებატებისას ევროპარლამენტარმა, მარკეტა გრეგოროვამ განაცხადა.

„ძვირფასო კოლეგებო და ძვირფასო ქართველო მეგობრებო, პირველ რიგში, მინდა, სამძიმარი გამოვთქვა თამაზ გინტურის მკვლელობასთან დაკავშირებით. ჩემი ფიქრები თქვენთანაა. მე არ ვასხვავებ ერთი ადამიანის მკვლელობას ათასობით უდანაშაულო ადამიანის მკვლელობისგან, რადგან ყველა დანაშაულს უნდა მოჰყვეს თანაბრად ძლიერი რეაქცია. როდესაც რუსეთმა დაიწყო მეზობელი უკრაინელების მკვლელობა, ჩვენ მივიღეთ მკაცრი რეაგირება სანქციებით. ჩვენს სამეზობლოში კიდევ არის რუსეთის მიერ ოკუპირებული სახელწიფო, რომლის მოქალაქეებსაც რუსეთის საოკუპაციო ძალები იტაცებენ, კლავენ. არის საქართველო უფრო შორს? დიახ. აქვს ამას მნიშვნელობა? არა. მოვუწოდებთ ევროპულ საბჭოს, დაამატოს შემდეგ სანქციებს ან ახალ სანქციებს მათი გვარები, ვინც პასუხისმგებელია თამაზ გინტურის მკვლელობაზე და ქართველების ტანჯვაზე. კრემლს სურს, ისინი შიშში ცხოვრობდნენ და უარი თქვან ევროპულ გზაზე, მხარი დავუჭიროთ მათ და პუტინი დამარცხდება“,- განაცხადა ევროპარლამენტარმა.

ევროპარლამენტარები მიიღებენ რეზოლუციას, რომელიც კატეგორიულად გმობს თამაზ გინტურის მკვლელობასა და ლევან დოთიაშვილის უკანონო გატაცებას, ასევე უსამძიმრებს საქართველოს ყველა მოკლული მოქალაქის ოჯახს, მოუწოდებს ამ და სხვა მკვლელობების საფუძვლიან გამოძიებას, მოითხოვს პასუხისმგებელ პირთა დასჯას და პასუხისგებაში მიცემას.

თამაზ გინტურის მკვლელობისთვის დამნაშავე პირებმა კანონის მთელი სიმკაცრით უნდა აგონ პასუხი, მომხდარ საზარელ მკვლელობაზე პასუხისმგებელია რუსეთის საოკუპაციო ძალა – ეს ევროპარლამენტარების პოზიციაა 6 ნოემბერს საოკუპაციო რეჟიმის მიერ თამაზ გინტურის მკვლელობაზე.

სტრასბურგში ევროპარლამენტის სესიაზე გვიან ღამით ევროპარლამენტის წევრებმა დებატები გამართეს და რეზოლუციასაც მიიღებენ. ევროპარლამენტარები ევროპულ საბჭოს მიმართავენ შექმნას სია საქართველოს ტერიტორიული მთლიანობისა და სუვერენიტეტის, ადამიანის უფლებების უხეშად დამრღვევთა წინააღმდეგ მიზანმიმართული სანქციების და შეზღუდვების დასაწესებლად.