არავის არ აქვს არავითარი რესურსი საქართველოს მეშვეობით სანქციებს გვერდი აუაროს. რასაკვირველია, რუსეთი საქართველოს მეშვეობით სანქციებს გვერდს ვერ აუვლის და ეს არაერთხელ დადასტურდა, – ამის შესახებ პარლამენტის პირველმა ვიცე-სპიკერმა, გია ვოლსკიმ განაცხადა.

მისივე თქმით, ოპოზიცია ჩარჩა სიბინძურეში, რომელსაც ჰქვია ქვეყანაში დესტაბილიზაციის მცდელობა.

„ოპოზიცია ჩამორჩა, ოპოზიცია ჩარჩა იმ ტალახში, რომელიც თვითონვე შექმნა, თავის გარშემო სიბინძურეში, რომელსაც ჰქვია ქვეყანაში დესტაბილიზაციის მცდელობა. სხვა პროპაგანდისტული რესურსიც აღარ დარჩა, თუ არა რუსეთის თემის ექსპლუატაცია, რომელიც არ ამართლებს, ვინაიდან ამას არანაირი საფუძველი არ აქვს“, – აღნიშნა გია ვოლსკიმ.

ვოლსკის განმარტებით, ნებისმიერ შემთხვევაში, როცა ვითარება იძაბება, სტაბილურობა არის გამოხატულება იმისა, როგორ მართავს სახელმწიფოს დღევანდელი ხელისუფლება.

„საქართველოს საგარეო კურსი უცვლელია, უცვლელია იმდენად, რამდენადაც ჩვენს ინტერესებს შეესაბამება. ჩვენს ინტერესებს არ შეესაბამება რუსეთთან ურთიერთობის დაძაბვა, ეკონომიკური სანქციები, სამხედრო დაპირისპირება, რისკენაც ყოველდღიურად მოგვიწოდებენ. ნებისმიერ შემთხვევაში, როცა ვითარება იძაბება, სტაბილურობა არის გამოხატულება იმისა, როგორ მართავს სახელმწიფოს დღევანდელი ხელისუფლება. პროვოკაციას არანაირად არ უნდა ავყვეთ. აქედან გამომდინარე გაკოტრდა ოპოზიცია და გაკოტრებული, პოლიტიკურ ტალახში მყოფი ოპოზიცია ცდილობს, რაც შეიძლება მეტი სივრცე მოსვაროს თავის გარშემო. სამწუხაროა, რომ საერთაშორისო დონეზე მოქმედი ზოგიერთი პოლიტიკოსი ამას მხარს უჭერს“, – აღნიშნა გია ვოლსკიმ.

ამასთან, გია ვოლსკის განცხადებით, სანქციების საკითხებში ევროკავშირის სპეციალური წარმომადგენელის, დევიდ ო’სალივანის საქართველოში ვიზიტი იქნება ერთ-ერთი საგანგებო ინდიკატორი, თუ რამხელა მნიშვნელობას ანიჭებენ პარტნიორები საქართველოს ამ საგანგებოდ მნიშვნელოვან ვითარებაში.

„საქართველოს სტაბილურობა, უსაფრთხოება და საქართველოს გავლით იმ დერეფნის უსაფრთხოება, საიდანაც ალტერნატიული გზით ევროპა ენერგორესურსებით მარაგდება – ეს ძალიან მნიშვნელოვანი თემაა და, რასაკვირველია, ამ საკითხებზე იქნება მთავარი აქცენტი გაკეთებული“, – განაცხადა გია ვოლსკიმ.

არაერთხელ განვაცხადეთ, რომ სანქციებს არ ვუერთდებით და ამას ერთადერთი მიზანი აქვს, ვატარებთ ჩვენი ქვეყნის ინტერესს, არ გვინდა, ისეთი ნაბიჯი გადავდგათ, რომელიც თავიდანვე ვიცით, დამაზიანებელი იქნება ჩვენი ქვეყნის ეკონომიკური განვითარებისთვის. ეს პირდაპირ კავშირშია რიგით მოქალაქეზე, გლეხზე, რომელიც 24 საათი შრომობს, მუშაობს, ქმნის რაღაც პროდუქციას, შემდეგ ცდილობს რეალიზაციას, რატომ უნდა შევუშალოთ ხელი რუსული ბაზრის გამოყენებაზე, – ამის შესახებ თბილისის მერმა, კახა კალაძემ განაცხადა.

კალაძის თქმით, არ არსებობს არცერთი ფაქტი, რომ საქართველო სანქციების გვერდის ავლისთვის იყო გამოყენებული.

„მოქალაქე დამატებით შემოსავალს მიიღებს შვილებისთვის, ოჯახისთვის, მეგობრებისთვის, ბიზნესს კიდევ უფრო გააძლიერებს, რა არის ამაში ცუდი, მაშინ როდესაც ევროპულ ქვეყნებს დღესაც არ გაუწყვეტია სავაჭრო ურთიერთობები რუსეთთან. ვერ მოიყვანთ ვერცერთ ფაქტს, რომ სანქციების გვერდის ავლისთვის გამოყენებული იყო ჩვენი ქვეყანა. ყველას დიდ პატივს ვცემ, ვიცით მეგობრობაც, პარტნიორობაც. ვიღაცას რაღაც ეჭვი აქვს ამაზე და ამით ხომ არ უნდა შემოვიფარგლოთ. თუ კონკრეტული ფაქტები არსებობს, წარმოადგინონ. ჩვენ მივესალმებით რუსი ტურისტების შემოსვლას. გაიხსენეთ, 2008 წლის ომის შემდგომი პერიოდი, ომის, რომელიც ჩვენი ქვეყნისთვის დამანგრეველი იყო, დავკარგეთ ტერიტორიები, დღესაც ოკუპირებულია ჩვენი ტერიტორიების დიდი ნაწილი, უამრავი გარდაცვლილი მშვიდობიანი მოსახლეობა, დანგრეული სოფლები, ქალაქები, ვიცით, ეს ომი რამდენად მძიმე იყო და მესამე-მეოთხე დღეს ხელისუფლებიდან წერილებს აგზავნიდნენ რუსეთის ფედერაციაში, რომ სახალხო ურთიერთობები დაეწყოთ, კონცერტები გაემართათ საქართველოში, ამის ვიდეოკადრებიც არსებობს. მოუწოდებდნენ ჩამოსულიყვნენ, ბიზნესი ეკეთებინათ. შინაგან საქმეთა მინისტრი გვეუბნებოდა, რუსულ ფულს სუნი არ ასდისო, სტრატეგიული ობიექტების გასხვისება მოხდა რუსულ კომპანიებზე, სააკაშვილი ყვავილებით ხელში ლარსის გამშვებ პუნქტზე ხვდებოდა რუს ტურისტებს. დღეს ისევ ეს ადამიანები გაბრაზებული სახეებით, თურმე როგორ შეიძლება რუსი ტურისტი შემოვიდეს საქართველოში, გაბრაზებული სახეებით აპროტესტებენ ამ ყველაფერს. ეს ორმაგი სტანდარტია და ეს ადამიანები ფარისევლები არიან. ხელისუფლება ატარებს პირველ რიგში ამ ქვეყნის ინტერესს, ასე იქნება მომავალშიც“, – განაცხადა კალაძემ.

თბილისის მერი კახა კალაძე მიიჩნევს, რომ ის ადამიანები, ვინც დღეს ქვეყანაში რუსი ტურისტების შემოსვლით აღშფოთებულია, ორმაგი სტანდარტებით მოქმედებენ, რადგან მათი წარსული გამოცდილება სულ სხვა რამეზე მეტყველებს.

როგორც მან შესაბამისი შეკითხვის საპასუხოდ განაცხადა, 2008 წლის აგვისტოს ომის შემდეგ, მაშინდელი ხელისუფლების წარმომადგენლები რუსებს ქვეყანაში ჩამოსვლისა და ბიზნესის დაწყებისკენ მოუწოდებდნენ.

„ჩვენ მივესალმებით რუსი ტურისტების შემოსვლას. ამაში ცუდი არაფერია. გაიხსენეთ 2008 წლის ომის შემდგომი პერიოდი – ომის, რომელიც დამანგრეველი იყო ჩვენი ქვეყნისთვის, ხალხისთვის, საქართველოს ეკონომიკისთვის; დავკარგეთ ტერიტორიები; საუბედუროდ, დღესაც ოკუპირებულია ჩვენი ტერიტორიის ძალიან დიდი ნაწილი. გვყავს უამრავი გარდაცვლილი – მშვიდობიანი მოსახლეობა, გმირი ჯარისკაცები; დანგრეული და განადგურებული სოფლები, ქალაქები; ვიცით, რამდენად მძიმე იყო ეს ომი. მესამე-მეოთხე დღეს კი, ხელისუფლების წარმომადგენლები წერილებს აგზავნიდნენ რუსეთის ფედერაციაში, რომ სახალხო ურთიერთობები დაეწყოთ და საქართველოში კონცერტები გაემართათ. მოუწოდებდნენ რუსებს, ტურისტებს, ჩამოსულიყვნენ, ბიზნესი ეკეთებინათ. ამის ვიდეოკადრებიც არსებობს“, – განაცხადა კახა კალაძემ.

მისივე თქმით, ყოფილი ხელისუფლების წარმომადგენლებმა სტრატეგიული ობიექტები რუსულ კომპანიებზე გაასხვისეს, დღეს კი ქვეყანაში ტურისტების შემოსვლას აპროტესტებენ.

„იყო მოწოდებები პარლამენტის ტრიბუნიდან. თუ არ ვცდები, შინაგან საქმეთა მინისტრი გვეუბნებოდა: რუსულ ფულს სუნი არ ასდისო. სტრატეგიული ობიექტების გასხვისება მოხდა რუსულ სახელმწიფო კომპანიებზე. სააკაშვილი ყვავილებით ხელში, ლარსის გამშვებ პუნქტზე ხვდებოდა რუს ტურისტებს და მათ ჩამოსვლას მიესალმებოდა. დღეს, ისევ ეს ადამიანები, გაბრაზებული სახეებით აპროტესტებენ, რომ თურმე როგორ შეიძლება, რუსი ტურისტი შემოვიდეს საქართველოში. ეს ორმაგი სტანდარტია და ისინი ჩვეულებრივი ფარისევლები არიან“, – აღნიშნა დედაქალაქის მერმა.

საქართველოს პრემიერ-მინისტრის ირაკლი ღარიბაშვილის ხელმძღვანელობით მთავრობის სხდომა გაიმართა.

მინისტრთა კაბინეტის წევრებმა დღის წესრიგით გათვალისწინებული 12 საკითხი განიხილეს.

განსახილველ საკითხებს შორის იყო საქართველოს კანონების პროექტები „წამლისა და ფარმაცევტული საქმიანობის შესახებ” საქართველოს კანონში ცვლილების შეტანის თაობაზე” და „სახელმწიფო შესყიდვების შესახებ” საქართველოს კანონში ცვლილების შეტანის თაობაზე”.

ცვლილებების შესაბამისად, სახელმწიფო, ინოვაციური ფარმაცევტული პროდუქტების შეძენას სპეციალური პირობებით, მწარმოებელთან ან სავაჭრო ლიცენზიის მფლობელთან პირდაპირი მოლაპარაკების გზით შეძლებს.

ინოვაციურ მედიკამენტებზე მოსახლეობის ხელმისაწვდომობის გაუმჯობესების მიზნით, მედიკამენტების სპეციალური პირობებით შესყიდვა, მართული შესვლის შეთანხმების (Managed Entry Agreement) მექანიზმის გამოყენებით მოხდება, რაც სპეციალურ (ფასდაკლებულ) ფასად მედიკამენტების შესყიდვას გულისხმობს.

სხდომაზე აღინიშნა, რომ კანონპროექტის მიღება დადებითად იმოქმედებს ინოვაციური ორიგინალური ფარმაცევტული პროდუქტის მომხმარებლებზე, გაიზრდება წვდომა ინოვაციურ მედიკამენტებზე და გაუმჯობესდება სახელმწიფო ფინანსების ხარჯვის ეფექტურობა. აქვე, ხაზი გაესვა, რომ შედეგად, მკურნალობის დაფინანსება მეტი პაციენტისთვის იქნება შესაძლებელი ან გაიზრდება დაფინანსებული მედიკამენტების რაოდენობა მკურნალობის კურსის გათვალისწინებით.

მართული შესვლის შეთანხმება (MEA) მსოფლიოში გავრცელებული პრაქტიკაა, მათ შორის, ამ მექანიზმს იყენებს ევროკავშირის თითქმის ყველა წევრი ქვეყანა.

ხელმოცარული ოპოზიცია ჩასაფრებულია, რომ ქვეყანა რაიმე უბედურებას წამოაგონ. მოწოდებები იყო: „აბა, ჯარები განათავსეთ“, „უშიშროების საბჭო მოიწვიეთ“ – ამ ყველაფერს აჰყვა პრეზიდენტიც, უფუნქციოდ არის დარჩენილი ქალი და რა ქნას, არ იცის,- ამის შესახებ საპარლამენტო უმრავლესობის წარმომადგენელმა ირაკლი ზარქუამ განაცხადა, რითაც რუსეთში მიმდინარე მოვლენებთან დაკავშირებით უსაფრთხოების საბჭოს მოწვევის თაობაზე პრეზიდენტ სალომე ზურაბიშვილის განცხადებას გამოეხმაურა.

ზარქუა მიიჩნევს, რომ ხელისუფლებამ ამას გონიერება და სიმშვიდე დაუპირისპირა.

“მე იმ პერიოდში თბილისში არ გახლდით, გზად მოვდიოდი აჭარიდან დილას რომ დაიწყო ამ ჩვენი ხელმოცარულების ვაი-ვიში, ჩასაფრებულები რომ არიან, ოპოზიციას ვგულისხმობ, რომ რამენაირად ქვეყანა რაიმე უბედურებას წამოაგონ, რომ რაღაც შეცდომა დაუშვას, ქაოსი, დაძაბულობა შეიქმნას, საზღვარზე ვიღაც შემოგვივარდეს. ამაზე არიან აქცენტირებულები ეს ხელმოცარულები და მერე დღის მეორე ნახევარში სასაცილო იყო მათი შერბილებული ტონი. ჯერ მოუწოდებდნენ, “აბა, ჯარები განათავსეთ”, “მოიწვიეთ უშიშროების საბჭო”, ეს ხელმოცარულები და ამ ყველაფერს აჰყვა პრეზიდენტიც სამწუხაროდ. უფუნქციოდ არის დარჩენილი ქალი და რა ქნას არ იცის. ჩემთვის გაუგებარია ეს ყველაფერი. ჩვენ კიდევ დავუპირისპირეთ როგორც ყოველთვის, გონიერება, სიმშვიდე. ეს ხელმოცარულები… ჩვენ ვნახეთ, ზოგი ლექსებს უძღვნიდა პრიგოჟინს, მოძალადეს და ოკუპანტს და მეორე ოკუპანტია პუტინი და ამათ შორის არჩევანს აკეთებენ და ჰგონიათ რომელიმე… ესენი აქცენტირებული არიან, რომ ჩვენს საზღვრებზე დაიძაბოს სიტუაცია, რატომ? – იმიტომ, რომ ნაწილი რუსეთიდან ფინანსდება, ფედერალური ბიუჯეტიდან წლებია უკვე, უძრავ ქონებას ყიდულობენ, გამდიდრდნენ და მეორე ნაწილი კიდევ გავლენის აგენტები არიან. ამათი ამოცანაა სიტუაცია დაიძაბოს, რადგან არჩევნებით ვერ მოდიან. ვერ მიაღწევენ ამას ვერასდროს, რადგან დღეს საქართველოს ჰყავს კვალიფიციური, გონიერი და ქვეყნის ინტერესებზე აქცენტირებული ხელისუფლება. ჩვენ ამ იმპულსებით და საფრთხისშემცველი განცხადებებით არასდროს გამოვირჩეოდით და არც მომავალში ვიქნებით, რომ ქვეყანა არ გავახვიოთ ამ ტრაგედიებში, რაც ხდება რეგიონში. ამათი ამოცანაა, რომ რამენაირად მეორე ფრონტი გაიხსნას, მაგრამ ვერასდროს მიაღწევენ ამას,” – განაცხადა ზარქუამ.

თუ დადასტურდება, რომ საქართველო სანქციების გვერდის ავლაში​ მონაწილეობს, ეს იქნება ძალიან მძიმე, – ამის შესახებ „სტრატეგია აღმაშენებლის“ წევრმა, პაატა მანჯგალაძემ განაცხადა.

„რუსეთის საბაჟო სამსახურმა დივერსიული განცხადება გაავრცელა, რომ საქართველოს მხრიდან რუსეთმა სანქციები გაარღვია. სამწუხაროდ, ამ ინფორმაციის უარყოფა ქართული მხარის მხრიდან არ მომხდარა. თუ დადასტურდება, რომ საქართველო სანქციების გვერდის ავლაში​ მონაწილეობს, ეს იქნება ძალიან მძიმე.

აშშ-ის განცხადებაა, რომ ვინც სანქციების გვერდის ავლაში მონაწილეობს, თავად მოხვდებიან სანქციებში. არ მინდა, რომ საქართველოს სანქციები დაუწესდეს, მაგრამ თუ ვინმე ეხმარება პუტინის სამხედრო მანქანას ომის გაგრძელებაში, აუცილებლად უნდა დასანქცირდეს.

ჩვენი საბაჟო სამსახურის განცხადება რომ მენახა, რუსეთის საბაჟო სამსახური იტყუება და ეს დივერსიაა, ასეთ განცხადებას არ გავაკეთებდი. ვინაიდან, დუმილია, ამიტომ პრევენციისთვის ვამბობ ამ ყველაფერს“,- განაცხადა პაატა მანჯგალაძემ.