ისრაელის მთავრობა ღაზის სამხრეთ ნაწილში ცეცხლის შეწყვეტის შესახებ ინფორმაციას უარყოფს. ამის შესახებ ნათქვამია ისრაელის პრემიერ-მინისტრის, ბენიამინ ნეთანიაჰუს ოფისის მიერ გავრცელებულ განცხადებაში.

მანამდე სააგენტო „როიტერმა“ გაავრცელა ცნობა, რომ ისრაელი ღაზის სექტორის სამხრეთ ნაწილში ცეცხლის დროებით შეწყვეტას დათანხმდა.

მათი ინფორმაციით, ცეცხლის შეწყვეტის პარალელურად, უნდა გახსნილიყო ეგვიპტისა და ღაზის სექტორის სასაზღვრო გამშვები პუნქტი „რაფაჰი“, რათა ღაზის სექტორის მოსახლეობისთვის ჰუმანიტარული დახმარების ჩატანა შესაძლებელი ყოფილიყო. პარალელურად, კი ღაზის სექტორის დატოვების საშუალებას მისცემდნენ უცხო ქვეყნების მოქალაქეებს.

თუმცა, ისრაელის პრემიერ-მინისტრის ოფისში აცხადებენ, რომ მსგავსი შეთანხმება არ ყოფილა.

ისრაელი დღეს დილით, ადგილობრივი დროით 09:00 საათიდან სამხრეთ ღაზაში ცეცხლის დროებით შეწყვეტაზე დასთანხმდა, იმისთვის, რომ რაფაჰის სასაზღვრო გამშვები პუნქტის გახსნა შესაძლებელი გახდეს, – ინფორმაციას Reuters-ი ავრცელებს.

მოძრაობა „ჰამასი“ აცხადებს, რომ ცეცხლის შეწყვეტის შესახებ შეთანხმებასთან დაკავშირებით ინფორმაცია არ აქვს.

სააგენტო ეგვიპტის უსაფრთხოების სამსახურის ორ ოფიციალურ პირზე დაყრდნობით იუწყება, რომ შეთანხმება აშშ-ს, ეგვიპტესა და ისრაელს შორის მოხდა.

რაფაჰის სასაზღვრო გამშვები პუნქტი, რომელიც ღაზას სექტორს ეგვიპტესთან აკავშირებს, სავარაუდოდ, მცირე დროით გაიხსნება, რათა უცხო ქვეყნის მოქალაქეებს ტერიტორიის დატოვების საშუალება მიეცეთ, ღაზას სექტორში კი დახმარების შეტანა გახდეს შესაძლებელი.

ფილიპ ლაზარინმა გაეროს დახმარებისა და სამუშაოების სააგენტოს გენერალურმა კომისარმა, ისაუბრა ღაზას სექტორში არსებულ მძიმე ვითარებაზე.

ლაზარინმა აღნიშნა, რომ ღაზას წყალი და ელექტროენერგია სწრაფად ეწურება და მოსახლეობას სურსათისა და მედიკამენტების მწვავე დეფიციტი ემუქრება.

„სამყარომ ახლა დაკარგა ადამიანობა. თუ გადავხედავთ წყლის საკითხს – ჩვენ ყველამ ვიცით, რომ წყალი სიცოცხლეა – ღაზას წყალი ეწურება, ხოლო ღაზას სიცოცხლე ეწურება. წყლის აღდგენას ჩვენ ჯერ ვერ დავადასტურეთ“, – განაცხადა ლაზარინმა.

მისი თქმით, ათასობით ადამიანი ეძებს თავშესაფარს.

„ადამიანთა რიცხვი, რომლებიც თავშესაფარს ეძებენ ჩვენს სკოლებსა და UNRWA-ს [გაეროს დახმარებისა და სამუშაოების სააგენტო] სამხრეთით მდებარე სხვა დაწესებულებებში, აბსოლუტურად დიდია და ჩვენ აღარ გვაქვს მათთან გამკლავების შესაძლებლობა. სანამ ძალიან გვიან იქნება, ალყა უნდა მოიხსნას, ჩვენ გვჭირდება: საწვავი, წყალი, საკვები და მედიკამენტები“, – დასძინა მან.

ლაზარინმა ღაზას ალყას უწოდა „სხვა არაფერი, თუ არა კოლექტიური სასჯელი“.

ცნობისთვის, 7 ოქტომბრის დილიდან პალესტინურმა დაჯგუფება „ჰამასმა“, რომელიც ღაზის სექტორს აკონტროლებს, ისრაელის ტერიტორიებზე მასიური სარაკეტო იერიში წამოიწყო. „ჰამასის“ რაზმები ღაზას სექტორიდან გადავიდნენ მოსაზღვრე რაიონებში ისრაელში და რამდენიმე დასახლებული პუნქტი, მათ შორის, ისრაელის სამხედრო ბაზა დაიკავეს. „ჰამასმა“ ისრაელს 2000-მდე რაკეტა ესროლა.

„ჰამასის“ მებრძოლებმა ათობით ადამიანი დაატყვევეს, მათ შორის ისრაელის სამხედროები.

მალევე ისრაელში საომარი მდგომარეობა ოფიციალურად გამოცხადდა. „ისრაელი ომშია“ – განაცხადა ისრაელის სახელმწიფოს პრემიერ-მინისტრმა ბენიამინ ნეთანიაჰუმ.

ისრაელის პრემიერ-მინისტრმა მოსახლეობას მიმართა და პირობა დადო, რომ ისრაელის შეიარაღებული ძალები „მთელ ძალას“ გამოიყენებს „ჰამასის“ შესაძლებლობების გასანადგურებლად.

გასულ ღამეს რუსმა სამხედროებმა უკრაინის ტერიტორიას რაკეტებითა და კამიკაძე-დრონებით შეუტიეს. ინფორმაციას ამის შესახებ უკრაინის საჰაერო სარდლობა ავრცელებს.

მათი ცნობით, საუბარია ბალისტიკურ რაკეტაზე „ისკანდერ ემი“, 5 რაკეტაზე Х-59 და 12 „შაჰიდის“ ტიპის დრონზე. სარდლობის ცნობით, უკრაინელმა სამხედროებმა ორი რაკეტისა და 11 დრონის ჩამოგდება შეძლეს.

იერიშის შედეგად, პოლტოვის ოლქში 3 ადამიანი, მათ შორის 10 წლის ბავშვი დაშავდა. ისინი ჰოსპიტალიზებულები არიან.

ისრაელი ღაზას ოკუპაციით დაინტერესებული არ არის, მაგრამ გააკეთებს რაც საჭიროა, „ჰამასის“ გასანადგურებლად, – ამის შესახებ გაერო-ში ისრაელის ელჩმა, გილად ერდანმა CNN-ს განუცხადა.

„ჩვენს ინტერესებში ღაზას ოკუპაცია ან ღაზაში დარჩენის ინტერესი არ გვაქვს, მაგრამ ვინაიდან ჩვენ გადარჩენისთვის ვიბრძვით და ერთადერთი გზა, როგორც თავად პრეზიდენტმა ბაიდენმა განსაზღვრა არის „ჰამასის“ განადგურება, უნდა გავაკეთოთ ყველაფერი, რაც საჭიროა, რომ გავანადგუროთ მათი შესაძლებლობები“, – განაცხადა ისრაელის ელჩმა.

დიპლომატმა ეს კომენტარი მას შემდეგ გააკეთა, რაც აშშ-ის პრეზიდენტმა, ჯო ბაიდენმა განაცხადა, რომ ისრაელმა რეაგირება უნდა მოახდინოს „ჰამასის“ მიერ განხორციელებულ თავდასხმებზე, თუმცა ღაზას ხელახალი ოკუპაცია დიდი შეცდომა იქნება.

გილად ერდანი ჯო ბაიდენის ამ განცხადებას სოციალურ ქსელშიც გამოეხმაურა და ხაზი გაუსვა, რომ ისრაელის მიზანი „ჰამასის“ ტერორისტული შესაძლებლობების აღმოფხვრაა.

„გმადლობთ პრეზიდენტო ბაიდენ, რომ აღიარეთ ის, რასაც ისრაელი ამბობს ბარბაროსული „ჰამასის“ ხოცვა-ჟლეტის შემდეგ: ისრაელის მიზანი „ჰამასის“ ტერორისტული შესაძლებლობების სრული აღმოფხვრაა“, – დაწერა ელჩმა.

რუსეთ-ჩინეთის ურთიერთობები მსოფლიოში სტაბილურობის ფუნდამენტური ფაქტორია, რუსეთი და ჩინეთი ყოველთვის ცდილობდნენ კომპრომისის გამოძებნას, – ამის შესახებ რუსეთის პრეზიდენტმა, ვლადიმერ პუტინმა ჩინეთის მედია კორპორაციასთან ინტერვიუში განაცხადა.

ინტერვიუს დროს პუტინმა აღნიშნა, რომ სხვადასხვა დროს რუსეთის ფედერაციასა და ჩინეთს ექსპორტისა და იმპორტის განსხვავებული თანაფარდობა ჰქონდათ და ქვეყნები ყოველწლიურად აუმჯობესებენ სავაჭრო ბალანსს.

„ასე მივდივართ თითქმის ყველა მიმართულებით. აღარ ვსაუბრობ იმ როლზე, რომელსაც რუსეთ-ჩინეთის ურთიერთობები მსოფლიოში სტაბილურობის საკითხში თამაშობს. ეს არის ფუნდამენტური ფაქტორი – რუსეთ-ჩინეთის ურთიერთობები. ეს ყველაფერი ერთად გვაძლევს საფუძველს ვიფიქროთ, რომ ჩვენ მივდიოდით აბსოლუტურად სწორი მიმართულებით და როგორც ჩინელი, ისე რუსი ხალხის ინტერესებიდან გამომდინარე“, – დასძინა პუტინმა.

მისი მტკიცებით, მოსკოვსა და პეკინს შორის თანამშრომლობა არ არის ნაკარნახევი მსოფლიოში არსებული პოლიტიკური ვითარებით და ეს თანამშრომლობა ორი ათწლეულის განმავლობაში ფრთხილად და მშვიდად ყალიბდებოდა.

პალესტინის პრეზიდენტი, მაჰმუდ აბასი ისრაელზე „ჰამასის“ მიერ განხორციელებულ თავდასხმას გმობს და აცხადებს, რომ „ჰამასის“ ქმედებები პალესტინელ ხალხს არ წარმოადგენს, – ინფორმაციას CNN-ი ავრცელებს.

„ჰამასის“ პოლიტიკა და ქმედებები არ წარმოადგენს პალესტინელ ხალხს, პალესტინელ ხალხს წარმოადგენს პალესტინის განმათავისუფლებელი ორგანიზაციის პოლიტიკა, პროგრამები და გადაწყვეტილებები“, – აღნიშნა აბასმა ვენესუელის პრეზიდენტთან, ნიკოლას მადუროსთან სატელეფონო საუბარში.

აბასმა ასევე ხაზი გაუსვა, რომ აუცილებელია ისრაელმა შეაჩეროს თავისი აგრესია ღაზაში და დაუყოვნებლივ დაიცვას მშვიდობიანი მოსახლეობა ჰუმანიტარული დერეფნის გახსნით სამედიცინო მარაგით, წყლით, ელექტროენერგიით და საწვავით უზრუნველყოფის მიზნით. ამასთან, მისი თქმით, ღაზადან პალესტინელების გადასახლება პალესტინელი ხალხისთვის მეორე კატასტროფას წარმოადგენს.