ევროპულმა საბჭომ საქართველოსთვის კანდიდატის სტატუსის მინიჭება გადაწყვიტა.

ამის შესახებ ევროპული საბჭოს პრეზიდენტის შარლ მიშელის მიერ სოციალურ ქსელ X-ში გავრცელებულ განცხადებაშია ნათქვამი.

ამასთან, ევროპულმა საბჭომ მიიღო გადაწყვეტილება, უკრაინასა და მოლდოვასთან გაწევრიანების მოლაპარაკებების გახსნის შესახებ.

ბოლო დღეებში ახალი ტენდენციის მომსწრენი ვხდებით, როდესაც რადიკალური ოპოზიციის წარმომადგენლები დედაქალაქში საცობებთან დაკავშირებით უკვე პოლიტიკურ განცხადებებს აკეთებენ. მათ კიდევ ერთხელ შევახსენებ, რომ ისინი არიან პოლიტიკოსები და არ არიან ადგილობრივი თვითმმართველობის წარმომადგენლები , – ამის შესახებ პარლამენტის გარემოს დაცვისა და ბუნებრივი რესურსების კომიტეტის თავმჯდომარემ მაია ბითაძემ ჟურნალისტებს განუცხადა.

მისი თქმით, ის უტოპიური და არაპროფესიონალური განცხადებები, რასაც ისინი აკეთებენ, პირდაპირ დაკავშირებულია კიდევ ერთხელ იმის ხაზგასმასთან, რომ ერთი მხრივ, ეს ადამიანები მხოლოდ დეკლარაციული განცხადებებით შემოიფარგლებიან და არ ცდილობენ, საკითხის არსში გაერკვნენ, მეორე მხრივ, ცდილობენ, მოსახლეობა შეცდომაში შეიყვანონ.

„მათ გაიარეს გზა – „ქართული ოცნების“ გაშავების ტენდენცია, თითქოს რუსულია „ქართული ოცნება“ და ახლა გადავიდნენ საცობებზე საუბარზე. ცდილობენ, ამ კონტექსტში დაიწერონ პოლიტიკური ქულები, რაც იქნება კიდევ ერთი წარუმატებელი ნაბიჯი. თვალნათლივ ვნახეთ, მათ შორის რამდენიმე პოლიტიკოსის განცხადება, თუ როგორ იქნა გაკრიტიკებული საერთაშორისო ექპერტების მხრიდან. შეიძლება ითქვას, დედაქალაქი არის საპილოტე პროექტი, რომელშიც სატრანსპორტო პოლიტიკის განხორციელება რამდენიმე წლის წინ დაიწყო, სწორედ იქიდან გამომდინარე, რომ მოლოდინები დედაქალაქში გადაადგილების გართულებასთან დაკავშირებით იყო. შესაბამისად, დღეს უკვე მომსწრეები ვართ, რომ დედაქალაქში შემოდის დამატებით 200-მდე 18-მეტრიანი ავტობუსი, რაც სწორედ იმის მანიშნებელია, რომ სატრანსპორტო პოლიტიკა იყო წინასწარ გათვლილი და მიმდინარეობს გეგმაზომიერად. მათ შორის პარლამენტში ახლახანს დავამტკიცეთ ახალი კანონპროექტი, რომლის მიხედვით, დედაქალაქში შეიზღუდება დიდი გაბარიტის ავტომობილების გადაადგილება. მოსახლეობას შევახსენებ, რა მდგომარეობაა სატრანსპორტო კუთხით დედაქალაქში. დედაქალაქში გადაადგილდება დაახლოებით 30 000 ტაქსი, დაახლოებით 30 000 დიდი გაბარიტის ავტომობილი, ჯამში ავტომობილების რაოდენობა არის 660 ათასი. მაშინ, როცა 2020-2021 წლებში ავტომობილების საერთო რაოდენობა არ აღემატებოდა 430 ათასს“, – განაცხადა მაია ბითაძემ.

როგორც მაია ბითაძემ აღნიშნა, ავტომობილების რაოდენობის ზრდის ტენდენცია ძალიან დინამიურია და ერთადერთი გამოსავალი, რომ ქალაქში გადაადგილება გაუმჯობესდეს, არის არა ახალი გზების და ესტაკადების მშენებლობა, როგორც ამას სხვადასხვა ოპოზიციონერები ამბობენ, არამედ საზოგადოებრივი ტრანსპორტის განვითარებაა.

მისივე თქმით, საზოგადოებრივი ტრანსპორტის განვითარების პროცესი კი 2019 წლიდან დაიწყო.

„დღესდღეობით, ავტობუსების პირველი ნაკადის შემოსვლის პარალელურად, მგზავრთნაკადის გადაყვანის პოტენციალი გაზრდილია 25 პროცენტით, 18-მეტრიანი ავტობუსების შემოყვანასთან ერთად, ეს პოტენციალი კიდევ უფრო გაიზრდება და ჯამში დაახლოებით 30 000 ადამიანით მეტით გადაყვანის პოტენციალი ექნება ქალაქს, მაგრამ ყველას კარგად უნდა გვესმოდეს, რომ ეს არის გარდამავლი პერიოდი, რომელიც თავის თავში გულისხმობს არა მხოლოდ ავტობუსებით დედაქალაქის მომარაგებას, არამედ შესაბამის საგზაო ინფრასტრუქტურას, 10 დერეფნის დასრულებას, მათ შორის ბასლაინებით, ასევე თავის თავში მოიცავს ჭკვიანი შუქნიშნების პროექტის დასრულებას. ამჟამად მიმდინარეობს კვლევების საბოლოო ეტაპი და დაახლოებით ორ წელიწადში დედაქალაქი მთლიანად აღიჭურვება ხელოვნურ ინტელექტზე დაფუძნებული ჭკვიანი შუქნიშნებით, რაც გამტარუნარიანობას კიდევ უფრო გაზრდის 18-მეტრიანი ავტობუსების შემოყვანასთან ერთად“, – განაცხადა მაია ბითაძემ.

მისი თქმით, ეს არის ძალიან რთული რეფორმა, რომელიც რამდენიმე ეტაპად მიმდინარეობს.

„შევახსენებ ჩვენს ოპოზიციონერებს, ასევე მოსახლეობას, რომ თუ ვინმე არსებობს მთელ მსოფლიოში ყველაზე კვალიფიციური, გამოცდილი სატრანსპორტო სისტემების ჩამოყალიბების კუთხით, ჩართულია ამ პროცესში. პროექტის განხორციელებაში ჩართული არიან – ევროპის რეკონსტრუქციისა და განვითარების ბანკი, აზიის განვითარების ბანკი, GIZ გერმანიის მთავრობა, საფრანგეთის მთავრობა და სხვადასხვა ყველაზე მაღალკვალიფიციური საერთაშორისო კომპანიები, რომელთა გათვლებისა და დაგეგმარების კუთხით ხდება სატრანსპორტო პოლიტიკის მოდელირება. კიდევ ერთხელ მოვუწოდებ ოპოზიციონერებს რადიკალური ოპოზიციიდან, ნუ აჩვენებენ ადამიანებს, რომ ისინი არიან არაკვალიფიციურები, რადგან ყოველთვის მიიღებენ პასუხებს. საცობებთან დაკავშირებით რა პროცესიც დედაქალაქში მიმდინარეობს, შეიძლება ითქვას, წინასწარ იყო გათვლილი. სწორედ ამიტომ არის, რომ ავტობუსების მომარაგების, ავტობუსებით დედაქალაქის აღჭურვის და ბასლაინების მოწყობის აქტიური პროცესი მიმდინარეობს.

მთელმა მსოფლიომ და განსაკუთრებით ევროპამ გაიარა ეს პრაქტიკა თავის დროზე. ერთადერთი გამოსავალი იმისთვის, რომ ჰაერის ხარისხი გაუმჯობესდეს, არ იყოს საცობები დედაქალაქში და დიდ ქალაქებში საერთოდ, არის საზოგადოებრივი ტრანსპორტის განვითარება. ჩვენ კარგად ვატყობთ, როგორ არის დატვირთული ნებისმიერი საზოგადოებრივი ტრანსპორტი და ნებისმიერი ქუჩა, სადაც ავტომობილები გადაადგილდებიან. ეს მზარდად მიუთითებს მოსახლეობის რაოდენობაზე ერთი მხრივ და მეორე მხრივ მიუთითებს იმაზე, რომ ის, რომ დღეს დედაქალაქში ე.წ. მწვანე ავტობუსებია, ამ მწვანე ავტობუსების პოტენციალი არის 25%-ით გაზრდილი. 2019 წელთან შედარებით დღეს 25-დან 30%-მდე მეტი მგზავრის გადაყვანის უნარი აქვს ავტობუსებს, შესაბამისად, სწორი დაგეგმარების პოლიტიკაა, რომ დღეს ჩვენ უფრო მეტი პრობლემები არ გვაქვს. 18-მეტრიანი ავტობუსები ამ პრობლემას კიდევ უფრო მეტად გადაჭრის, მაგრამ პარალელურად, აუცილებელია ჭკვიანი შუქნიშნების სისტემის დასრულება და ბასლაინების მოწესრიგება ათივე ძირითად დერეფანზე. საერთაშორისო მასშტაბით თუ არსებობს რომელიმე კვალიფიციური კომპანია, ყველა არის ჩართული ამ პროცესში. ერთადერთი გამოსავალია სწორედ ის გზა, რომელიც დედაქალაქში ხორციელდება და ამის ალტერნატივა ფიზიკურად არ არსებობს. ეს არის საკითხი რომელიც ერთ დღეში ვერ გადაწყდება, აქ ჩვენთვის საგანგაშო არის ერთი მაჩვენებელი, რაც კიდევ მიუთითებს იმაზე, რომ სწორი მიმართულებით მივდივართ და 18 მეტრიანი ავტობუსების შემოყვანა არის ძალიან მნიშვნელოვანი, მანქანების მზარდი რაოდენობა – 2019 – 2021 წელს იყო დედაქალაქში 437 ათასი მსუბუქი ავტომობილი, დღეს არის 660 ათასი“, – განაცხადა მაია ბითაძემ.

თბილისის საკრებულოს თავმჯდომარის, გიორგი ტყემალაძის განცხადებით, 15 დეკემბერს, თბილისის საკრებულო თბილისის მერის 2023 წლის ანგარიშს მოისმენს და 2024 წლის ბიუჯეტის პროექტის განხილვა მოხდება.

შესაბამისი განცხადება ტყემალაძემ საკრებულოში დედაქალაქის მერის ანგარიშთან და თბილისის 2024 წლის ბიუჯეტის დამტკიცებასთან დაკავშირებით გააკეთა.

„მიმდინარე 2023 წელი, რომლის შეჯამებაც უნდა მოხდეს, საკმაოდ წარმატებული იყო. ეს წელი ძალიან მნიშვნელოვანი იყო ქალაქის განვითარების მიმართულებით. მერის ანგარიში სხვადასხვა მიმართულებით განხორციელებულ რეფორმებს მოიცავს“, – განაცხადა გიორგი ტყემალაძემ.

საკრებულოს თავმჯდომარემ თბილისის მომავალი წლის ბიუჯეტის პროექტზეც გაამახვილა ყურადღება და აღნიშნა, რომ დედაქალაქის მთავარი ფინანსური დოკუმენტის პროექტი მუნიციპალიტეტს კიდევ უფრო მეტი პროექტის განხორციელების საშუალებას მისცემს.

„საკრებულოში შემოსულია დედაქალაქის ფინანსური დოკუმენტის გადამუშავებული პროექტი, რომელშიც მაქსიმალურად არის გათვალისწინებული თბილისის საკრებულოს რეკომენდაციები. 2024 წლის ბიუჯეტი მნიშვნელოვნად გაზრდილია მიმდინარე ბიუჯეტთან მიმართებით. მისი მოცულობაა 1 763 354,7 ათასი ლარით განისაზღვრება. ეს კიდევ ერთი შესაძლებლობაა იმისთვის, რომ მომავალი წელი კიდევ უფრო დატვირთული იყოს როგორც ინფრასტრუქტურული, ასევე სოციალური კუთხით. ჩვენ გვაქვს საინტერესო პროექტები. დარწმუნებული ვარ, მომავალი წელი კიდევ უფრო წარმატებული იქნება“, – განაცხადა გიორგი ტყემალაძემ.

რომ გითხრათ, პარტიების დაფინანსების წესთან დაკავშირებული ცვლილებებით რაიმე არსებითად იცვლება, ასე არ არის – აქამდეც ყველა პარტიის დაფინანსების უდიდეს ნაწილს ფიზიკური პირების შემოწირულობები შეადგენდა, – ამის შესახებ ჟურნალისტებს “ქართული ოცნების“ დეპუტატმა ბექა დავითულიანმა განუცხადა.

დავითულიანისთვის გაუგებარია, რატომ არ უჭერს ოპოზიცია მხარს “მოქალაქეთა პოლიტიკური გაერთიანებების შესახებ“ კანონში დაგეგმილ ცვლილებებს.

“პარტიების დაფინანსების წესთან დაკავშირებით ინიცირებული ცვლილებები ჩვენი პარტნიორების რეკომენდაციაა – ეს “ქართული ოცნების“ ინიციატივა არ ყოფილა.

ფაქტი და მოცემულობაა ის, რომ აქამდეც ყველა პარტიის დაფინანსების უდიდეს და გადამწყვეტ ნაწილს ფიზიკური პირების შემოწირულობები შეადგენდა. შესაბამისად, რომ გითხრათ, რომ ამით პოლიტიკურ ველზე არსებითად რაიმე იცვლება, ასე არ არის – ვერ ვიგებ ოპოზიცია ცვლილებებს რატომ არ უჭერს მხარს.

თუ ისინი ევროპელ პარტნიორებს გადაარწმუნებენ, რომ აღნიშნული რეკომენდაცია შესასრულებელი არ არის, მისი არმიღების მხრივ პრობლემა არ იქნება“, – განაცხადა ბექა დავითულიანმა.

პარლამენტი, დაჩქარებული წესით, “ქართული ოცნების“ საკანონმდებლო პაკეტს განიხილავს, რომლის მიხედვით, პოლიტიკური პარტიები იურიდიული პირებისგან ფინანსური და მატერიალური შემოწირულებების მიღებას ვეღარ შეძლებენ.

საკანონმდებლო ინიციატივის გათვალისწინებით, იურიდიულ პირებს პარტიებისთვის შემოწირულებების გაცემა აეკრძალებათ. ამავე პროექტით, წინა წლის მთლიანი შიდა პროდუქტის 0.05%-დან 0.04%-მდე მცირდება პარტიის მიერ წლის განმავლობაში გაწეული ხარჯების დასაშვები საერთო ოდენობის ზედა ზღვარი.

როგორც “ქართული ოცნება” განმარტავს, აღნიშნული პროექტის მიღების შემთხვევაში, საქართველო გაითვალისწინებს ვენეციის კომისიის მიერ 2023 წლის 12 ივნისს გამოქვეყნებულ რეკომენდაციას “დეოლიგარქიზაციის შესახებ”, სადაც მითითებულია იურიდიული პირებისთვის პოლიტიკური პარტიების დაფინანსების შესაძლებლობის აკრძალვა.

ევროპული საბჭოს სხდომის დასკვნის ამ დროისთვის არსებული პროექტის მიხედვით, რომელიც ქართულმა მედიასაშუალებებმა მოიპოვეს, ევროპული საბჭო საქართველოსთვის კანდიდატის სტატუსის მინიჭებას თანხმდება.

„ევროპულმა კომისიამ გადაწყვიტა, რომ საქართველოს კანდიდატის ქვეყნის სტატუსი მიანიჭოს, იმის გათვალისწინებით, რომ 2023 წლის 8 ნოემბრის ევროკომისიის რეკომენდაციით განსაზღვრული შესაბამისი ნაბიჯები გადაიდგმება“,- ნათქვამია დასკვნის პროექტში.

რაც შეეხება უკრაინას და მოლდოვას, ამავე პროექტის თანახმად, ევროპული საბჭო იღებს გადაწყვეტილებას, გახსნას გაწევრიანების მოლაპარაკებები აღნიშნულ ორ ქვეყანასთან.

„ევროპულმა საბჭომ გადაწყვიტა, გახსნას გაწევრიანების მოლაპარაკებები უკრაინასთან და მოლდოვის რესპუბლიკასთან. ევროპული საბჭო იწვევს საბჭოს მიიღოს მოლაპარაკების ჩარჩო, იმის გათვალისწინებით, რომ 2023 წლის 8 ნოემბრის ევროკომისიის რეკომენდაციით განსაზღვრული შესაბამისი ნაბიჯები გადაიდგმება“,- ნათქვამია დასკვნის პროექტში.