მაღალი ალბათობით მგონია, სალომე ზურაბიშვილს გადააყენებენ პრეზიდენტის თანამდებობიდან, ეს ალბათ მოხდება აგვისტო-სექტემბერში, – ამის შესახებ ჟურნალისტებს საპარლამენტო უმრავლესობის ლიდერმა, პარტია „ქართული ოცნების“ თავმჯდომარე ირაკლი კობახიძემ განუცხადა.

მისი თქმით, სალომე ზურაბიშვილთან დაკავშირებით განიხილება ორი სცენარი.

„ჩვენ გვაქვს ინფორმაცია, რომ ასეთი სცენარი აქტიურად განიხილება და მაღალი ალბათობაა, რომ პრეზიდენტი გადადგება, გადააყენებენ რეალურად, როგორც გახარია გადააყენეს თავის დროზე. დიდი ალბათობით, ეს შეიძლება, მოხდეს აგვისტოში, სექტემბერში. რეალურად ორი რამისთვის შეიძლება, დასჭირდეთ სალომე ზურაბიშვილი. ერთი ეს არის პრეზიდენტის თანამდებობაზე მისი მხრიდან ოპოზიციის არჩევნების შემდგომი კამპანიის მხარდაჭერა გაყალბებასთან დაკავშირებით და ასე შემდეგ. ყველამ წინასწარ ვიცით, რაზეც ააგებს კამპანიას არჩევნების შემდეგ ოპოზიცია და ამაში შეიძლება, დასჭირდეს რადიკალურ ოპოზიციას სალომე ზურაბიშვილის მხარდაჭერა. ამისთვის ის სჭირსებათ პრეზიდენტის პოსტზე, თუმცა შეიძლება, განხილული იქნას ალტერნატიული სცენარი, როდესაც სალომე ზურაბიშვილი აგვისტოში, სექტემბერში გადადგება პრეზიდენტის თანამდებობიდან, რათა მონაწილეობა მიიღოს საპარლამენტო არჩევნებში. მე იმ ადამიანებისთვის უფრო პრაგმატული სცენარი მგონია მისი პრეზიდენტად დატოვება, რადგან დიდი საარჩევნო რესურსი სალომე ზურაბიშვილს არ აქვს. თუმცა, საბოლოო ჯამში დაველოდოთ მოვლენების განვითარებას. მე მაინც, უფრო მაღალი ალბათობით მგონია, სალომე ზურაბიშვილს გადააყენებენ პრეზიდენტის თანამდებობიდან. ეს ალბათ მოხდება აგვისტო-სექტემბერში“, – განაცხადა ირაკლი კობახიძემ.

საქართველოს ევროკავშირში ინტეგრაციას უნგრეთის ხელისუფლებისა და მმართველი პარტიის მყარი მხარდაჭერა აქვს, 14-15 დეკემბერს კანდიდატის სტატუსის მინიჭებაზე მათი პოზიცია არის უცვლელი, – ამის შესახებ პარტია „ქართული ოცნების“ თავმჯდომარე ირაკლი კობახიძემ ჟურნალისტებს განუცხადა.

მისივე თქმით, უნგრეთში მმართველი პარტიის ხელმძღვანელობასთან შეხვედრაზე ისაუბრეს ორმხრივ თანამშრომლობაზე, პარტიებს შორის თანამშრომლობაზე, ურთიერთობების გაღრმავებასა და გამოცდილების გაზიარებაზე.

„ხვალიდან გვექნება შეხვედრები უნგრეთის ხელისუფლების წარმომადგენლებთან უმაღლეს დონეზე. ჩვენი მიზანია ქვეყნებს შორის თანამშრომლობის უფრო მეტად განვითარება. კანდიდატის სტატუსის საბოლოო გადაწყვეტილების მიღებამდე ეს ვიზიტი იყო მნიშვნელოვანი ჩვენს პარტნიორებთან. უნგრეთის ხელისუფლება და უნგრეთის მმართველი პარტია ძალიან მყარად უჭერენ მხარს საქართველოს ევროკავშირში ინტეგრაციას. 14-15 დეკემბერს კანდიდატის სტატუსის მინიჭებაზე მათი პოზიცია არის უცვლელი და რა თქმა უნდა, ჩვენ ეს მხარდაჭერა კიდევ ერთხელ დაგვიფიქსირეს ჩვენმა მეგობრებმა“, – აღნიშნა კობახიძემ.

კითხვას იმის შესახებ, რომ „უნგრეთის მმართველმა პარტიამ პარლამენტს წარუდგინა რეზოლუცია, რომელშიც მოუწოდებს მთავრობას, მხარი არ დაუჭიროს უკრაინის ევროკავშირში გაწევრიანებაზე მოლაპარაკებების დაწყებას, იქნება თუ არა ეს საქართველოს კონტექსტში საფრთხის შემცველი“, კობახიძემ აღნიშნა, რომ „ეს ევროკავშირისა და უნგრეთის საქმეა“.

„მგონია, საბოლოო ჯამში, შეთანხმება იქნება მიღწეული ამ ყველაფერთან დაკავშირებით და ძალიან დიდი იმედი მაქვს, როგორც საქართველო, ისე უკრაინა და მოლდოვაც მიიღებენ მხარდაჭერას 27-ვე ქვეყნისგან. ეს არის ის, რაც სჭირდება საქართველოს, უკრაინასა და მოლდოვას.

ოპოზიცია სინამდვილეში გაღიზიანებულია იმის გამო, რომ სინამდვილეში, ვიქტორ ორბანი და უნგრეთის ხელისუფლება მთლიანობაში არის ჩვენი ქვეყნის ევროინტეგრაციის ძალიან მყარი მხარდამჭერი. ისინი გაღიზიანებას არასდროს მალავდნენ. თქვენ გახსოვთ, როდესაც უნგრელი ევროკომისარი იყო საქართველოში ჩამოსული და ღიად გამოხატა საქართველოს მხარდაჭერა, როგორი გზავნილები მიუძღვნეს მას ოპოზიციის წარმომადგენლებმა. რეალურად, ოპოზიციას აღიზიანებს ყველაფერი, რაც დაკავშირებულია ჩვენი ქვეყნის წარმატებასთან, მათ შორის ევროინტეგრაციის გზაზე“, – აღნიშნა ირაკლი კობახიძემ.

ერთადერთი პარტია ვართ ქართულ პოლიტიკურ სპექტრში, რომელიც სალომე ზურაბიშვილს არ მივიღებთ – არ ვართ დაინტერესებული ივანიშვილის კადრების გადაბირებით , – ამის შესახებ საქართველოს პარლამენტში “გირჩის” დეპუტატმა, იაგო ხვიჩიამ განაცხადა, რითაც გამოეხმაურა ირაკლი კობახიძის განცხადებას იმის თაობაზე, რომ სალომე ზურაბიშვილი არჩევნებამდე 1-2 თვით ადრე გადადგება და არჩევნებში მიიღებს მონაწილეობას.

ხვიჩიას თქმით, თანამშრომლობით ყველასთან ითანამშრომლებენ.

“ჩვენ ერთადერთი პარტია ვართ ქართულ პოლიტიკურ სპექტრში, რომელიც სალომე ზურაბიშვილს პარტიაში არ მივიღებთ. ამიტომ სხვა დროს თუ კობახიძეს ან ვინმეს რაიმე წამოსცდება ჩვენი მისამართით, იცოდეთ, რომ მე თქვენთან ეს მაქვს განხილული.

რაც შეეხება ამ ვერსიას, „ქართული ოცნების“ ხელშია მოსასმენი აპარატებიც, თვალთვალიც, სუს-იც, პოლიციაც, შესაბამისად, მათ ბევრად მეტი ინფორმაცია აქვთ, ვინ რას აპირებს ამასთან დაკავშირებით, მაგრამ ჩვენ ვერ შევამოწმებთ ამ ინფორმაციის სანდოობას, რასაც „ქართული ოცნება“ გვთავაზობს, შესაბამისად, შეიძლება ეს მართალი იყოს, შეიძლება საერთოდ ტყუილი იყოს, ჩვენთვის გზის ასაბნევად”, – განაცხადა ხვიჩიამ.

კითხვაზე, რატომ არ მიიღებენ სალომე ზურაბიშვილს მათ პარტიაში, ხვიჩია აცხადებს, რომ “ივანიშვილის კადრების გადაბირებით” დაინტერესებულნი არ არიან.

“ჩვენ არ ვართ დაინტერესებული ბატონი ივანიშვილის კადრების გადაბირებით. არ მიგვაჩნია სწორად და გვგონია, რომ ჩვენ ჩვენი ხალხი გვჭირდება იმისთვის, რომ ჩვენს მიზნებს მივაღწიოთ. ხოლო სალომე ზურაბიშვილი ბატონ ბიძინა ივანიშვილს და “ქართულ ოცნებას” ღმერთმა სიკეთეში მოახმაროს”, – განაცხადა ხვიჩიამ.