ალუდა ღუდუშაურმა გიგა ოთხოზორიას მკვლელობასთან დაკავშირებით ევროსასამართლოს გადაწყვეტილება შეაფასა. საკითხზე ადამიანის უფლებათა დაცვის კომიტეტის თავმჯდომარის პირველმა მოადგილემ მედიასთან გააკეთა კომენტარი.

„იქამდე რაც სრული, მარტივი ჭეშმარიტება იყო, ახლა უკვე იურიდიულ სიბრტყეზე გადავიდა და საქართველოს მიეცა დამატებით კიდევ ერთი მნიშვნელოვანი მტკიცებულება, ბერკეტი იმისა, რომ ევროპის სასამართლოს მიერ გამოტანილი გადაწყვეტილებით საქართველო არის სრულად გამართლებული, ხოლო რუსეთის ფედერაცია სრულად არის გამტყუნებული ამ აგრესიული ომის წარმოებაში“, – განაცხადა ღუდუშაურმა.

ევროსასამართლოს პალატამ, გიგა ოთხოზორიას მკვლელობის საქმეში, რუსეთის ფედერაციის ბრალეულობა დაადასტურა. ადვოკატ გიორგი ტაბატაძის ინფორმაციით, სტრასბურგში გიგა ოთხოზორიას საქმე მოიგეს და რუსეთს 130 000 ევროს გადახდა დაეკისრა. ამის შესახებ ადვოკატი სოციალურ ქსელში წერს.

ჩინეთთან პარტნიორობა და მისგან ინვესტიციების მიღება შეიძლება, მაგრამ რუსეთი განსხვავებული ისტორიაა, – ამის შესახებ კავკასიასა და ცენტრალურ აზიაში ნატოს გენერალური მდივნის სპეციალურმა წარმომადგენელმა, ხავიერ კოლომინამ თბილისში გამართულ პრესკონფერენციაზე განაცხადა.

მისი თქმით, ჩინეთთან დაბალანსებული საგარეო პოლიტიკა უნდა იყოს.

“ამაზე თბილისში ჩემი ვიზიტების დროს ხშირად გვილაპარაკია. გეოსტრატეგიული შეჯიბრის სამყაროში ვცხოვრობთ, ეს ნათელია. რუსეთისა და ჩინეთის სიტუაციებს არ ვადარებთ ერთმანეთს, მაგრამ შეშფოთებები გვაქვს იმ უსაფრთხოების გამოწვევებთან დაკავშირებით, რომლებსაც ჩინეთი წარმოადგენს. ამ მხრივ, გვჯერა, რომ ჩვენს პარტნიორებსა და ჩვენს მოკავშირეებსაც კი შეუძლიათ უფრო დახვეწილი ურთიერთობები ჰქონდეთ ჩინეთთან, ვინაიდან, ჩინეთს გარკვეულ დონემდე შეუძლია პარტნიორი იყოს, შეუძლია გლობალური აქტორი იყოს, რომელთანაც ჩართულობა შეიძლება. ნატო ჩართულია ჩინეთთან, მაგრამ ამავდროულად უნდა გესმოდეს ის ფაქტი, რომ ის [ჩინეთი] წარმოადგენს უსაფრთხოების ამ გამოწვევებს, განსაკუთრებით კი როდესაც საქმე კრიტიკულ ინფრასტრუქტურას და დამოკიდებულებებს ეხება, რომელთა შექმნაც ზოგიერთ [ჩინურ] ინსევსტიციას შეუძლია.

ეს არ ნიშნავს, რომ ჩინეთთან პარტნიორობა არ შეგიძლია ან ჩინეთისგან ინვესტიციების მიღება არ შეგიძლია. რუსეთი სრულიად განსხვავებული ისტორიაა. ის, როგორც იცით, ჩვენთვის საფრთხეა, დამპყრობელია, და რუსეთზე ჩვენი შეხედულება არ შეიცვლება მანამ, სანამ ომი მიმდინარეობს.

ეს იყო საუბრების ნაწილი, რომლებიც ქართველ ოფიციალურ პირებთან მქონდა. მათ უნდა იცოდნენ დამოკიდებულებების შექმნის რისკები, განსაკუთრებით კრიტიკულ ინფრასტრუქტურაში. ამავდროულად, გვესმის, იმ სექტორებში ინვესტიციების საჭიროება, რომლებიც ასეთ დამოკიდებულებებს არ ქმნიან. ასე რომ, ჯამში დაბალანსებული საგარეო პოლიტიკა უნდა იყოს”, – განაცხადა კოლომინამ.

ჯერ საუბარიც არ დაგვიწყია ვაშინგტონის სამიტზე პარტნიორების მოწვევაზე, ახლახან დავიწყეთ მსჯელობა, რა იქნება არსებითი და პრიორიტეტული ამ სამიტზე, – ამის შესახებ კავკასიასა და ცენტრალურ აზიაში ნატო-ს გენერალური მდივნის სპეციალურმა წარმომადგენელმა, ხავიერ კოლომინამ განაცხადა.

კოლომინას თქმით, საკმარისი საფუძველია საიმისოდ, რომ საქართველო იყოს მიწვეული ვაშინგტონის სამიტზე.

„ამ ეტაპზე უკვე შემიძლია გითხრათ, რომ ვიმუშავებთ ისევ პარტნიორებს შორის იმ ატმოსფეროს შექმნაზე, რასაც უკრაინის დახმარება ჰქვია, გავაგრძელებთ მუშაობას თავდაცვისა და შეკავების გადაწყვეტილებებზე, რომელზეც ხშირად ვსაუბრობთ. ასევე, ვმუშაობთ სამხრეთით პარტნიორებთან, რაც ახლა ძალიან რელევანტურია. როგორც გითხარით, რთულია ახლა იმაზე საუბარი, ვინ დაესწრება ვაშინგტონის სამიტს. ეს საუბრები მოკავშირეებს შორის უნდა გაიმართოს და გადაწყვეტილებებიც მათ უნდა მიიღონ. ჩემი აზრით, საქართველო იქნება მოწვეული და წარმოდგენილი. ჯერ არ ვიცი, რა დონეზე, მაგრამ მჯერა, რომ საკმარისი საფუძველია საიმისოდ, რომ საქართველო იქნება მოწვეული. მოწვევა მოვა უმაღლეს დონეზე თუ მინისტრის დონეზე, ამაზე საუბარი რთულია, მაგრამ მჯერა და დარწმუნებული ვარ, რომ დღის ბოლოს საქართველო სამიტზე იქნება წარმოდგენილი“, – განაცხადა კოლომინამ.

საქართველოს პრეზიდენტი კავკასიასა და ცენტრალურ აზიაში NATO-ს გენერალური მდივნის სპეციალურ წარმომადგენელს, ხავიერ კოლომინას შეხვდა.

შეხვედრისას საუბარი შეეხო ქვეყნის ევროატლანტიკურ ინტეგრაციას საქართველოს ევროკავშირის წევრობის კანდიდატის სტატუსის მინიჭებას, ნატო – საქართველოს ურთიერთობებს, საქართველოში დაგეგმილ 2024 წლის არჩევნებს.

ხავიერ კოლომინამ საქართველოს პრეზიდენტს პირადად მიულოცა საქართველოს ევროკავშირის წევრობის კანდიდატის სტატუსის მინიჭება.

NATO-ს გენერალური მდივნის სპეციალურმა წარმომადგენელმა ხაზი გაუსვა ქვეყნის ევროინტეგრაციის პროცესში სახელმწიფო ინსტიტუტების აქტიურად ჩართულობის მნიშვნელობას, ასევე, ინსტიტუციური და დემოკრატიული რეფორმების განხორციელების მნიშვნელობას.

შეხვედრისას აღინიშნა, რომ დაგეგმილი საპარლამენტო არჩევნების თვალსაზრისით, ქვეყნისათვის მომავალი წელი კიდევ უფრო მნიშვნელოვანია, რათა არჩევნები ჩატარდეს დემოკრატიულ და სამართლიან გარემოში.

NATO-ს გენერალური მდივნის სპეციალურმა წარმომადგენელმა კიდევ ერთხელ დაადასტურა საქართველოს სუვერენიტეტისა და ტერიტორიული მთლიანობის ურყევი მხარდაჭერა.

საქართველოს პრეზიდენტმა სტუმარს ინფორმაცია მიაწოდა მცოცავი ოკუპაციისა და ოკუპირებულ ტერიტორიებზე არსებული მდგომარეობის შესახებ, რომელიც საქართველოს მოქალაქეების მკვლელობებსა და ადამიანის უფლებების დარღვევებს უკავშირდება და რომელზეც საერთაშორისო საზოგადოებამ მკაცრი რეაგირება უნდა მოახდინოს.

შეხვედრისას მხარეებმა ისაუბრეს ნატო – საქართველოს ურთიერთობების გაძლიერებისა და განვითარების საკითხებზე, აღინიშნა, რომ მნიშვნელოვანია, მომავალ წელს ვაშინგტონში დაგეგმილ NATO-ს საიუბილეო სამიტზე საქართველო უმაღლეს დონეზე იყოს წარმოდგენილი.

„ვფიქრობ, რომ დღეს საქართველოში ბიზნესის სექტორს აქვს ნდობა ხელისუფლების ეკონომიკური პოლიტიკის მიმართ და შესაბამისად, აქტივობაც ძალიან მაღალია. შარშანდელთან შედარებით, ბიზნესსსექტორის გამოშვება 12%-ით  არის გაზრდილი და ჩვენი მოლოდინია, რომ ეს დინამიკა მომავალ წელსაც შენარჩუნდება. ეს  უმნიშვნელოვანესია იმისთვის, რომ გვქონდეს ეკონომიკური ზრდა, რომელიც პირდაპირ დასაქმებაში, შემოსავლებში აისახება და ამაზე დეტალურად იყო ინფორმაცია წარმოდგენილი პრემიერის ანგარიშში” – განაცხადა ლევან დავითაშვილმა პრემიერ-მინისტრის მიერ წარდგენილი 2023 წლის ანგარიშის შეფასებისას.

მისი თქმით, პრემიერის ანგარიშის დასკვნით ნაწილში წარმოდგენილი იყო ძალიან ბევრი კონკრეტული რეიტინგი, რომელიც ადასტურებს,  რომ საერთაშორისო კომპეტენტური შემფასებლების მიერ შეფასებულია საქართველოს პროგრესი  – საუბარია როგორც დემოკრატიის მმართველობის კუთხით ინდექსებში პროგრესზე, ასევე საქართველოს პროგრესზე ეკონომიკური კუთხით.

ვიცე-პრემიერის განცხადებით, ზოგადად, საქართველო სხვადასხვა რეიტინგის მიხედვით უსწრებს არამხოლოდ აღმოსავლეთის, არამედ, მრავალი რეიტინგის მიხედვით, ევროკავშირის ქვეყნებსაც.

„ბოლო ინფორმაცია, რაც დეკემბერში გახდა ცნობილი, OECD-ის მცირე და საშუალო მეწარმეობის პოლიტიკის ინდექსია, სადაც საქართველო კვლავაც ლიდერია აღმოსავლეთ პარტნიორობის ქვეყნებს შორის. ჩვენი ქვეყანა წინა შეფასებებითაც ლიდერი იყო, მაგრამ  კვლავ ინარჩუნებს ამ პოზიციას და 12 მნიშვნელოვანი ინდიკატორიდან 11-ში  პირველ ადგილზეა” – განაცხადა  ვიცე-პრემიერმა.

როგორც ლევან დავითაშვილმა აღნიშნა, სტაბილური გარემოს პროგნოზირებადობა უმნიშვნელოვანესი მესიჯებია როგორც ადგილობრივი, ისე უცხოური ინვესტორებისთვის, თუმცა, ასევე ძალიან მნიშვნელოვანია სტრუქტურული მესიჯები, როგორიც არის კაპიტალის ბაზრის განვითარება, ადმინისტრირების გაუმჯობესება, მნიშვნელოვანი ინფრასტრუქტურული პროექტები და ა.შ.

გიორგი ვოლსკიმ გიგა ოთხოზორიას მკვლელობასთან დაკავშირებით ევროსასამართლოს გადაწყვეტილება შეაფასა. ამ საკითხის მნიშვნელობაზე პარლამენტის პირველმა ვიცე-სპიკერმა „ქრონიკაში“ ისაუბრა.

„რა საკვირველია, ამას სერიოზული პოლიტიკური მნიშვნელობა აქვს სამომავლოდაც და სამართლებრივი ბერკეტების გამოყენება, არის ამ ჭიდილში ერთ-ერთი საგანგებო, ხაზგასასმელი საკითხი. არა მარტო იმიტომ, რომ დამარცხდა რუსეთი, ჩვენი ქვეყნის დიდი ნაწილის ოკუპანტი ძალა, არამედ შიდა ვითარებისთვისაც. საკმაოდ აშკარა სურათი იქმნება – რა გვქონდა, რა გვაქვს და რამდენად არის რუსული თემა ექსპლუატირებული პოლიტიკურ სპეკულაციებში. ასე რომ საგარეო მნიშვნელობაც აქვს ამ თემას და, რა საკვირველია, შიდაპოლიტიკურ სივრცეშიც საგანგებო მნიშვნელობის არის.

საზოგადოება რეალურად ხედავს, რას ჰქვია სერიოზული მუშაობა, რას ჰქვია ქვეყნის ინტერესების დაცვა, მით უმეტეს მცირე რესურსებით ამ უშველებელი ძალის წინააღმდეგ და რას ნიშნავს, საით არის სიმართლე და რა საკითხებთან არის საჭირო განსაკუთრებით ყურადღების გამახვილება“, – განაცხადა ვოლსკიმ.

ევროსასამართლოს პალატამ, გიგა ოთხოზორიას მკვლელობის საქმეში, რუსეთის ფედერაციის ბრალეულობა დაადასტურა. ადვოკატ გიორგი ტაბატაძის ინფორმაციით, სტრასბურგში გიგა ოთხოზორიას საქმე მოიგეს და რუსეთს 130 000 ევროს გადახდა დაეკისრა. ამის შესახებ ადვოკატი სოციალურ ქსელში წერს.