სტრასბურგის სასამართლოს გადაწყვეტილებას, ხურჩა – ნაბაკევის საზღვარზე მოკლული გიგა ოთხოზორიას დედა ჯულიეტა ჭანტურია საქართველოს გამარჯვებად აფასებს და ამბობს, რომ ახლა უკვე საქართველოს ხელისუფლების ჯერია.
იგი მოითხოვოს მკვლელის გადმოცემას და მის კანონიერად დასჯას.
„იმედის ნაპერწკალი გამიჩნდა. ახლა უკვე საქართველოს ხელისუფლებამ უნდა გადადგას ქმედითი ნაბიჯები. ჩემი შვილის მკვლელი უნდა გადმოეცეს ქართულ მხარეს და მოხდეს მისი დასჯა.
ეს არის საქართველოს გამარჯვება და ეს იქნება საწინდარი იმისა, რომ დაფიქრდეს, ვისაც ევალება, რუს ჯალათებს, რომ ასე ქართველი ადამიანის სიცოცხლის ხელყოფა არ შერჩებათ მათ“, – აცხადებს გიგა ოთხოზორიას დედა.
ჯულიეტა ჭანტურიას თქმით, მნიშვნელოვანია, მხოლოდ ქაღალდზე არ დარჩეს განაჩენი, რომელიც ქართულმა სასამართლომ გიგას მკვლელს დაუსწრებლად მიუსაჯა.
შეგახსენებთ, ევროსასამართლომ გიგა ოთხოზორიას მკვლელობის საქმეზე რუსეთს სიცოცხლის უფლების დარღვევა დაუდგინა და 130 000 ევროს კომპენსაციის გადახდა დააკისრა.
