ბელგიის პოლიციამ „კატარგეითის“ საქმეზე მიმდინარე გამოძიების ფარგლებში ევროპარლამენტარ მარია არენას სახლში ჩხრეკა ჩაატარა. ამის შესახებ Politico წერს.

აღსანიშნავია, რომ კორუფციულ სკანდალში მარია არენას რამდენიმე თანაპარტიელი ფიგურირებდა, თუმცა უშუალოდ მისთვის ბრალი არ წაუყენებიათ და არც კი დაუკითხავთ.

ევა კაილის, მარკ ტარაბელას და ანდრეა კოცოლინოს შემდეგ მარია არენა რიგით მეოთხე ევროპარლამენტარია, რომელთან დაკავშირებითაც პოლიციამ საგამოძიებო ქმედებები ჩაატარა. ბრიუსელში, მის სახლში ჩატარებულ ჩხრეკას ევროპარლამენტის პრეზიდენტი რობერტა მეცოლაც ესწრებოდა.

ბელგიის პროკურატურის ცნობით, არენას სახლში ჩატარებული ჩხრეკა წარმოადგენდა ბრიუსელში, ერთდროულად 6 მისამართზე ჩატარებული ოპერაციის ნაწილს. მათივე ინფორმაციით, ამ 6 მისამართიდან რამდენიმე პირდაპირ ან ირიბად არენას ან მის ოჯახს უკავშირდება.

ავსტრალიის საგარეო საქმეთა სამინისტროს ინფორმაციით, ქვეყანამ რუსეთის ფედერაციას დამატებითი სანქციები დაუწესა. სანქციები რუსეთისთვის ეკონომიკური და სტრატეგიული მნიშვნელობის მქონე იურიდიულ და ფიზიკურ პირების წინააღმდეგ არის მიმართული.

უწყებაში განმარტავენ, რომ სასანქციო სიაშია რუსული კომპანიები, რომლებიც რუსეთის ფედერაციის შეიარაღებული ძალებისთვის მოწინავე ტექნოლოგიების, ელექტრონიკის და მოწყობილობის მიწოდებას ახორციელებენ. შეზღუდვები, ასევე, ატომური ენერგეტიკისა და არქტიკაში რესურსების მოპოვების დარგში მომუშავე კომპანიებს შეეხება.

„ასევე, სიაში რუსეთის ფედერაციის უმსხვილესი თავდაცვითი საწარმოები შევიდნენ, მათ შორის სამხედრო ვერტმფრენების მწარმოებელი – „რუსეთის ვერტმფრენები“ და მისი გენერალური დირექტორი“, – ნათქვამია განცხადებაში.

საერთო ჯამში, სანქციები რუსეთის ფედერაციის თავდაცვით, ტექნოლოგიურ და ენერგეტიკულ სექტორში მომუშავე 35 ორგანიზაციების და რუსეთის და ბელარუსის 10 ფიზიკური პირის წინააღმდეგ არის მიმართული, მათ შორის სანქციები რუსეთის ფედერაციის პირველი ვიცე-პრემიერის, ანდრეი ბელოუსოვის და ვიცე-პრემიერის, დიმიტრი ჩერნიშოვის წინააღმდეგ არის გათვალისწინებული.

თეთრი სახლი აცხადებს, რომ რუსეთმა, შესაძლოა, უკრაინის მარცვლეულის ობიექტებზე თავდასხმა გააფართოოს და შავ ზღვაში სამოქალაქო გემებსაც დაესხას თავს.

თეთრი სახლის ეროვნული უშიშროების საბჭოს პრესსპიკერის, ადამ ჰოჯის განცხადებით, აშშ-ის ოფიციალური პირები ფლობენ ინფორმაციას იმის შესახებ, რომ რუსეთმა უკრაინის პორტების მისადგომებთან დამატებითი საზღვაო ნაღმები განათავსა.

„მიგვაჩნია, რომ ეს არის კოორდინირებული ძალისხმევა შავ ზღვაში სამოქალაქო გემებზე ნებისმიერი თავდასხმის გასამართლებლად და ამ თავდასხმებზე პასუხისმგებლობის უკრაინისთვის დასაკისრებლად“, – აღნიშნა ადამ ჰოჯმა.

მისი თქმით, შავ ზღვაში აღნიშნული კოორდინირებული ძალისხმევის გარდა, რუსეთი რაკეტებითა და უპილოტო საფრენი აპარატებით თავს დაესხა უკრაინის მარცვლეულის საექსპორტო პორტებს ოდესაში, რის შედეგადაც განადგურდა სასოფლო-სამეურნეო ინფრასტრუქტურა და 60 000 ტონა მარცვლეული.

მისი თქმით, აღნიშნულზე მიანიშნებს რუსეთის ხელისუფლების განცხადება, რომ შავი ზღვის წყლებში უკრაინის პორტებისკენ მიმავალი ყველა გემი სამხედრო ტვირთის პოტენციურ გადამზიდავად განიხილება.

რუსეთის პრეზიდენტი, მარცვლეულის შეთანხმებაში დაბრუნების პირობებს, მსოფლიოს კიდევ ერთხელ ახსენებს. პარალელურად კი, დასავლეთის ქვეყნებს, შავი ზღვის მარცვლეულის შეთანხმების საკუთარი მიზნებისთვის გამოყენებაში ადანაშაულებს.

„ჩვენ არაერთხელ გავაგრძელეთ ეს შეთანხმება და გამოვიჩინეთ მოთმინება. ველოდით, რომ ჩვენი საერთაშორისო კოლეგები ბოლოს და ბოლოს შეასრულებდნენ შეთანხმების პირობებს. მაგრამ ასე არ მოხდა. დასავლეთმა მარცვლეულის შეთანხმებით, ურცხვად ისარგებლა. უბრალოდ და სრულად დამახინჯებულია ამ შეთანხმებების მნიშვნელობა და არსი. დასავლეთმა მთლიანად გაანადგურა და დაამახინჯა ეს არსი და იმის ნაცვლად, რომ რეალურად გაჭირვებულ ქვეყნებს დახმარებოდა, მარცვლეულის შეთანხმება პოლიტიკური შანტაჟისთვის გამოიყენა. გარდა ამისა, ტრანსნაციონალური კორპორაციების, მარცვლეულის მსოფლიო ბაზრის სპეკულანტების გამდიდრების იარაღად აქცია“, – აცხადებს პუტინი.

გლობალურ ბაზრებზე ხორბლის ფასი მკვეთრად გაიზარდა მას შემდეგ, რაც რუსეთმა შავი ზღვის მარცვლეულის შეთანხმება დატოვა და განაცხადა, რომ უკრაინის პორტებისკენ მიმავალ გემებს პოტენციურ სამხედრო სამიზნედ განიხილავს, – ინფორმაციას BBC-ი ავრცელებს.

„2023 წლის 20 ივლისს, მოსკოვის დროით 00:00 საათიდან, შავ ზღვაზე უკრაინის პორტებისკენ მიმავალი ყველა გემი განიხილება, როგორც სამხედრო ტვირთის პოტენციური გადამზიდავი, ის სახელმწიფოები კი, რომლის დროშის ქვეშაც ასეთი გემები იმოძრავებენ, ჩაითვლებიან უკრაინის კონფლიქტში, კიევის რეჟიმის მხარეს ჩართულ სახელმწიფოებად“, – განაცხადეს რუსეთის თავდაცვის სამინისტროში.

ამ განცხადების შემდეგ, თეთრი სახლის პრესსპიკერმა აღნიშნა, რომ რუსეთი სამოქალაქო გემებზე თავდასხმას და ამ თავდასხმაში უკრაინის დადანაშაულებას გეგმავს.

BBC-ის ცნობით, ერთი ტონა ხორბლის ფასი ევროპის საფონდო ბირჟაზე ოთხშაბათს, წინა დღესთან შედარებით, 8.2%-ით, 253.75 ევრომდე გაიზარდა, სიმინდის ფასზე კი 5.4%-იანი ზრდა დაფიქსირდა.

რუსეთმა გაერო-სა და თურქეთის შუამავლობით უკრაინასთან გაფორმებული შავი ზღვის მარცვლეულის შეთანხმება, რომელიც შავი ზღვის პორტების საშუალებით უკრაინული მარცვლეულისა და სოფლის მეურნეობის სხვა პროდუქტების უსაფრთხო ექსპორტის საშუალებას იძლეოდა, ორშაბათს დატოვა. რუსეთმა, შეთანხმების დატოვებიდან რამდენიმე საათის შემდეგ, უკრაინის პორტებზე თავდასხმები დაიწყო. უკრაინის სოფლის მეურნეობის მინისტრის, მიკოლა სოლსკის განცხადებით, დარტყმების შედეგად 60 000 ტონა მარცვლეული გაანადგურა და მარცვლეულის ექსპორტის ინფრასტრუქტურის მნიშვნელოვანი ნაწილი დააზიანა.რუსეთის პრეზიდენტმა, ვლადიმერ პუტინმა გუშინ განაცხადა, რომ მოსკოვი დაუყოვნებლივ დაუბრუნდება მარცვლეულის შეთანხმებას, თუ მისი მოთხოვნები დაკმაყოფილდება. მოთხოვნებს შორისაა რუსეთის სოფლის მეურნეობის ბანკის გლობალურ გადახდის სისტემასთან, SWIFT-თან დაკავშირება.

აშშ-ის თავდაცვის დეპარტამენტმა უკრაინისთვის 1,3 მილიარდი დოლარის ოდენობის სამხედრო დახმარების ახალი პაკეტის შესახებ გამოაცხადა. ინფორმაციას პენტაგონი ავრცელებს.

აშშ-ის დახმარების ახალი პაკეტი უზრუნველყოფილია უკრაინის უსაფრთხოების დახმარების ინიციატივით (USAI), რომელიც ითვალისწინებს სამხედრო დახმარების არა აშშ-ის მარაგებიდან გაგზავნას, არამედ შეძენას. პაკეტში ძირითადად შედის ოთხი NASAMS საზენიტო სარაკეტო სისტემა და მათთვის საბრძოლო მასალა, 152 მმ-იანი საარტილერიო ჭურვები, TOW ტანკსაწინააღმდეგო რაკეტები და ზუსტი მართვადი საავიაციო საბრძოლო მასალა. ასევე, ნახსენებია ადრე გამოცხადებული Phoenix Ghost და Switchblade დრონები, ასევე უპილოტო საფრენი აპარატების საწინააღმდეგო სისტემები.

გარდა ამისა, შეერთებული შტატები უკრაინისთვის შეიძენს 150 ბენზომზიდს, 115 ტაქტიკურ მანქანას ბუქსირებისა და ტრანსპორტირებისთვის, 50 ტაქტიკურ მანქანას აღჭურვილობის ევაკუაციისთვის, პორტების და ნავსადგურების დასაცავად და ნაღმების გაწმენდის აღჭურვილობას, ასევე ტაქტიკურ უსაფრთხო საკომუნიკაციო სისტემებს.

უკრაინის თავდაცვის ძალებსა და რუსეთის საოკუპაციო ძალებს შორის, გასული დღე-ღამის განმავლობაში, 5 მიმართულებით 30-მდე შეტაკება მოხდა, – ამის შესახებ უკრაინის შეიარაღებული ძალების გენერალური შტაბის ანგარიშშია აღნიშნული.

„მტერი ძირითადი ძალების კონცენტრირებს კუპიანსკის, ლიმანის, ბახმუტის, ავდეევკისა და მარინკას მიმართულებებზე ახორციელებს – გასული დღის განმავლობაში 30-მდე სამხედრო შეტაკება მოხდა“, – აცხადებენ გენშტაბში.

მათივე ცნობით, რუსულმა ძალებმა, ბოლო 24 საათის განმავლობაში, უკრაინის ტერიტორიაზე მასიური საჰაერო-სარაკეტო დარტყმის განსახორციელებლად საზღვაო ბაზირების „კალიბრის“ ტიპის 16 რაკეტა, Х-22 ტიპის 8 ფრთოსანი რაკეტა, „ონიქსის“ ტიპის 6 ფრთოსანი რაკეტა, Х-59 ტიპის მართვადი რაკეტა და Shahed-ის ტიპის 32 დრონი გამოიყენა.

გენშტაბის ცნობით, რუსულმა ძალებმა უკრაინის ტერიტორიაზე 78 საჰაერო დარტყმა განახორციელეს და უკრაინის ჯარების პოზიციებსა და მშვიდობიან დასახლებებს მრავალჯერადი სარაკეტო სისტემებიდან ცეცხლი 69-ჯერ გაუხსნეს.

„უკრაინის მასშტაბით სარაკეტო და საჰაერო თავდასხმების ალბათობა კვლავ მაღალია“, – აღნიშნულია გენშტაბის ანგარიშში.

ამასთან, უკრაინის თავდაცვის ძალების ავიაციამ, ბოლო 24 საათის განმავლობაში, 7 დარტყმა მიაყენა რუსების ცოცხალი ძალის კონცენტრაციის ტერიტორიებს და ოპერატიულ -ტაქტიკური დონის 2 სადაზვერვო დრონი გაანადგურეს.

უკრაინის სარაკეტო-საარტილერიო ქვედანაყოფებმა რუსების ცოცხალი ძალისა და იარაღის კონცენტრაციის 4 ტერიტორიას და საბრძოლო მასალის საცავს დაარტყეს. ამასთან, გაანადგურეს საცეცხლე პოზიციებზე განლაგებული რუსების კუთვნილი 11 საარტილერიო დანადგარი და 2 საჰაერო თავდაცვის სისტემა.