ოპოზიციის მხრიდან იმის ძახილი, რომ საქართველო „ქართული ოცნების“ პირობებში ევროკავშირის წევრი ქვეყანა ვერ გახდება, არის მტკნარი სიცრუე და ტყუილი და ამის მარტივ გამაბათილებლად შეიძლება გამოვიყენოთ ის მიღწევები, რომლებიც ბოლო 11 წლის განმავლობაში გვქონდა, – ამის შესახებ ირაკლი ჩიქოვანმა განაცხადა. ფრაქცია „ქართული ოცნების“ თავმჯდომარის მოადგილემ ამ მიღწევებზე საუბრისას გამოყო ასოცირების შეთანხმება, თავისუფალი ვაჭრობა, ვიზალიბერალიზაცია, და ევროკომისიის დადებითი რეკომენდაცია.

„ძალიან დიდი მონდომება დახარჯა ოპოზიცია და ასევე ძალიან დიდი ფინანსური რესურსი და ხაზი უნდა გაესვას იმას, რომ ეს არაკეთილსინდისიერად მოპოვებული ფინანსური რესურსია, რომ შესწინააღმდეგებოდა დადებით რეკომენდაციას საქართველოსთვის კანდიდატის სტატუსის მინიჭების თაობაზე. ზუსტად ამიტომ, ახლა ცდილობენ რაღაცნაირად გადაფარონ საკუთარი წარუმატებლობა, მაგრამ კიდევ ერთხელ დადასტურდა, რომ რეფორმები, რომლებსაც ჩვენ ვახორციელებთ, რეფორმებს, რომლებიც მიმართულია იმისკენ რომ უზრუნველყოფილი იყოს ჩვენი ქვეყნის თავსებადობა ევროპულ კანონმდებლობასთან და ევროკავშირის სტანდარტებთან, შედეგი მოაქვს“, – განაცხადა ჩიქოვანმა.

ვერ შემდგარი იმპიჩმენტის შემდეგ შეიძლება, პრეზიდენტი გაბლატავდა და როგორც უნდა, ისე იქცევა, რადგან კონსტიტუციის დარღვევის გამო მაინც ვერ ისჯება, – ამის შესახებ პარტია „გირჩის“ წევრმა, იაგო ხვიჩიამ განაცხადა.

იგი საქართველოს პრეზიდენტის მიერ საფრანგეთში ვიზიტთან დაკავშირებით გაკეთებულ განცხადებას გამოეხმაურა.

„შერიგება უნდა ვითომ, ღარიბაშვილთან? შეიძლება ასეთი ნაბიჯი იყოს? არ ვიცი. შეიძლება ის იყოს, როცა შერიგება გინდა ადამიანთან და რაღაცას იყენებ. ან ვერ შემდგარი იმპიჩმენტის შემდეგ, როდესაც, ბევრი მცდელობის მიუხედავად, პრინციპული ოპოზიციონერი დეპუტატები ვერ მოისყიდა „ქართულმა ოცნებამ“, შეიძლება, პრეზიდენტი გაბლატავდა და ზოგადად როგორც უნდა, ისე იქცევა ამიერიდან, რადგან მოგეხსენებათ, კონსტიტუციის დარღვევის გამო, მაინც ვერ ისჯება“, – განაცხადა იაგო ხვიჩიამ.

იაგო ხვიჩიას შეფასებით, მთავრობის ნებართვის გარეშე ვიზიტის განხორციელებასთან დაკავშირებით მხოლოდ დატუქსვას უნდა ველოდოთ.

სალომე ზურაბიშვილმა გუშინ ორბელიანის სასახლესთან სიტყვით გამოსვლისას განაცხადა, რომ 9 ნოემბერს მიემგზავრება პარიზში, სადაც ტარდება მშვიდობის ფორუმი და რომელსაც პრემიერი დაესწრება.

აღნიშნულთან დაკავშირებითაც მთავრობის ადმინისტრაციამ კი განაცხადა, რომ სალომე ზურაბიშვილს მთავრობისთვის არ მიუმართავს.

ჩვენ ვამტკიცებთ, რომ 12 რეკომენდაციიდან შევასრულეთ დაახლოებით 9, – ამის შესახებ ჟურნალისტებთან საპარლამენტო უმრავლესობის წევრმა ბექა დავითულიანმა განაცხადა, რითაც უპასუხა კითხვას, თუკი სათანადოდ იმუშავა ხელისუფლებამ რეკომენდაციებზე, რატომ მიიღო ქვეყანამ 9 დათქმა, რომელიც ძირითადად სწორედ 12 რეკომენდაციაში იყო ასახული.

დავითულიანი აცხადებს, რომ „ევროკავშირი პუტინის მოკავშირეებს სტატუსს არ აძლევს და სპეკულაცია ყველამ უნდა დახუროს“.

დავითულიანმა ასევე ისაუბრა იმ მიზეზებზე, რის გამოც ევროკავშირის საგარეო პოლიტიკასთან საქართველოს თანხვედრა შემცირდა და აღნიშნა, რომ ამის მიზეზი კონკრეტულ ქვეყნებთან დაკავშირებული რეზოლუციებია. ამასთან, დავითულიანი აცხადებს, რომ ზოგიერთ დოკუმენტზე შეერთება რუსეთთან ორმხრივი სანქციების დაწესებას ნიშნავდა და ამიტომ არ შეუერთდნენ.

„ჩვენ მზად ვართ ვიმუშაოთ და ყველაფერში გავხდეთ თავსებადები, რაშიც შესაძლებელია. ეს( საგარეო პოლიტიკის თავსებადობაზე) ჩაიწერა იმიტომ, რომ იქ არის რეზოლუციების ნაწილი, რომელსაც უბრალოდ საქართველო ვერ უერთდებოდა ორი მიზეზით. ერთი ისაა, რომ ორმხრივი სანქციების დაწესებას ნიშნავდა და მოიცავდა, რასაც ჩვენ არ შევუერთდით, რადგან ჩვენ არც ნატოს წევრები ვართ, არც ევროკავშირის და აგერ, 30 კილომეტრში გვიდგას მტერი, ვერ შევუერთდით უბრალოდ, ეკონომიკა დაგვექცეოდა თავზე. მეორე ნაწილი, რასაც ვერ შევუერთდით, ეხება ქვეყნებს, რომელიც უშუალოდ ჩვენს სამეზობლოშია, ჩვენს მეგობარ ქვეყნებს და იმას რომ შეუერთდე ამ მეგობარ ქვეყნებთან ურთიერთობა გაგიფუჭდება. ვგულისხმობ რეზოლუციებს, რომელიც შეეხება მაგალითად, თურქეთს, აზერბაიჯანს, მათ შორის, ირანს, აფრიკულ ქვეყნებს, რომელსაც მხოლოდ და მხოლოდ არაღიარების პოლიტიკიდან გამომდინარე ვერ ვუერთდებით. რუსეთთან მიმართებით რეზოლუციებზე მიერთების არანაირი პრობლემა არ გვაქვს, გარდა ორმხრივი სანქციების დაწესებისა, პრაქტიკულად ყველას შეერთებული ვართ, ჰააგაში სარჩელის თანაინიციატორები ვართ. რუსეთთან მიმართებით რეზოლუციების ნაწილში პრობლემა არ ყოფილა. მაშინ, როცა ჰააგაში სარჩელის თანაავტორი ხარ, რუსეთთან მიმართებით რაიმე რეზოლუციაზე ხელის მოწერის ყოველგვარი უხერხულობა მოხსნილი გაქვს. მერე როგორი მარტივი მაგალითები ხდება ხოლმე – უცებ ატყდება ხოლმე ამბავი, უკრაინის მხარდამჭერ რეზოლუციას ხმა რატომ არ მივეცით და აღმოჩნდება ხოლმე, რომ დელეგაციის რომელიღაც წევრმა რეზოლუციას, სადაც ყველაფერი კარგად ეწერა, მივიდა და მიაწერა, რომ “მიშა გაათავისუფლეთ”,- განაცხადა დავითულიანმა.

„სტრატეგია აღმაშენებლის“ წევრის, პაატა მანჯგალაძის განცხადებით,  კანდიდატის სტატუსზე დადებითი შეფასება პროგრესია, თუმცა „ქართული ოცნება“ დამატებითი ევროკომისიის რეკომენდაციების შესრულებას არ შეეცდება.

მისივე თქმით, 2024 წლის გეოპოლიტიკურ არჩევნებში პროდასავლური ოპოზიცია გაიმარჯვებს, შემდგომ კი საქართველო ევროკავშირის წევრიც გახდება.

„კანდიდატის სტატუსზე ევროკომისიის დადებითი შეფასება არის წინ გადადგმული ნაბიჯი ევროკავშირში საქართველოს გაწევრიანებისა და საქართველოს გაერთიანების გზაზე. ჩვენ ვნახეთ, ერთი წელი ველოდით, არანაირი 12 პირობის და ახალი, დამატებითი დათქმების შემსრულებელი “ქართული ოცნება” არ არის.

არჩევანი მარტივია, მოდის 2024 წლის გეოპოლიტიკური არჩევნები, ვისაც უნდა ევროპა, ვისაც უნდა უსაფრთხოება და განვითარება ის მხარს დაუჭერს ოპოზიციას, ვისაც უნდა სიღარიბე, კორუფცია, მეტი რუსეთი და რუსული ჭაობი – მხარს დაუჭერს „ქართულ ოცნებას”.

მე მჯერა, როგორც 33 წლის წინ ქართველმა ხალხმა ჯერ აირჩია ეროვნული ხელისუფლება და შემდეგ მხარი დაუჭირა საქართველოს თავისუფლებას, ზუსტად ასე მოხდება ახლაც, ჯერ გაიმარჯვებს პროდასავლური ძალები ანუ ეროვნული ოპოზიცია და შემდეგ გავხდებით ევროკავშირის წევრი”, – განაცხადა მანჯგალაძემ.

საქართველოს პრეზიდენტი, სალომე ზურაბიშვილი პარიზში მთავრობის ნებართვის გარეშე გაემგზავრა.

როგორც საქართველოს მთავრობის ადმინისტრაციაში აცხადებენ, ზურაბიშვილს საფრანგეთში ვიზიტთან დაკავშირებით მთავრობისთვის არ მიუმართავს.

სალომე ზურაბიშვილმა ორბელიანის სასახლესთან სიტყვით გამოსვლისას გუშინ განაცხადა, რომ 9 ნოემბერს მიემგზავრება პარიზში, სადაც მშვიდობის ფორუმი ჩატარდება.

„რაც შემეხება მე პირადად, რასაც ვაკეთებდი აქამდე, იმას გავაკეთებ და გავაგრძელებ საქართველოს კანდიდატურის ლობირებას. ხვალ მივემგზავრები პარიზში, სადაც ტარდება მშვიდობის ფორუმი. მონაწილეობა უნდა მივიღო შარლ მიშელთან ერთად პანელში, რომელიც განიხილავს კრიზისებს და კონფლიქტებს“, – განაცხადა სალომე ზურაბიშვილმა.

ევროკომისიის პრეზიდენტმა ურსულა ფონ დერ ლაიენმა თქვა: – ოპოზიცია ყოჩაღ! სამოქალაქო სექტორი – ყოჩაღ! ხელისუფლება – მოუსმინე ქართველ ხალხს! ეს არის მთელი შინაარსი, – ასე აფასებს საქართველოსთვის ევროკავშირის კანდიდატის სტატუსზე ევროკომისიის დადებით რეკომენდაციას „სტრატეგია აღმაშენებლის“ ლიდერი გიორგი ვაშაძე.

ვაშაძის თქმით, ევროკომისიის რეკომენდაცია დეკემბერში „აუცილებლად უნდა ჩაბეტონდეს“.

„საქართველომ კანდიდატის სტატუსზე პოზიტიური რეკომენდაცია მიიღო და როგორც ურსულა ფონ დერ ლაიენმა თქვა, ეს ყველაფერი სწორედ ქართველი ხალხის დამსახურებაა.

რა თქმა უნდა, ჩვენ რუსეთთან პირისპირ არ დაგვტოვეს. მხარი დაგვიჭირა ევროკავშირმა, მაგრამ ცხრა წინაპირობა ჩვენი გასაკეთებელია. მთავარი არის ის, რომ მომავალი, 2024 წლის არჩევნები გეოპოლიტიკური არჩევნებია. რა გზას ირჩევს საქართველო: ამ 9 რეკომენდაციის შესრულებით ევროკავშირის წევრობას თუ ისევ ჭიდაობას და იმ მაიმუნობას, რასაც „ქართული ოცნების“ მხრიდან ჰქონდა ადგილი. ვინ არის ამ პირობების შემსრულებელი? ჩვენ ხომ ვიცით, რომ გამკეთებლები ვართ! მოგვეცით შესაძლებლობა და ცხრავე პირობა უმოკლეს ვადაში იქნება შესრულებული, ყოველგვარი პრობლემის გარეშე.

„ქართული ოცნება“ კვლავ დაიწყებს ჭიდაობას… არ უნდათ ცხრა პირობა შეასრულოს. რატომ არის „ქართული ოცნება“ ასეთი დამწუხრებული? მათაც კარგად იციან, რომ ამ ცხრა პირობის გამკეთებლები ისინი არ არიან და დიაგნოზს ამ ყველაფერს საზოგადოება აუცილებლად დაუსვამს.

წინ დიდი გამარჯვებისკენ! პირველი ნაბიჯი გადადგმულია, დეკემბერში იმედი მაქვს ჩაბეტონდება და ყველაზე დიდი გამარჯვება, რაც უნდათ ჩვენს ევროპელ პარტნიორებს, დარწმუნებული ვართ 2024 წლის არჩევნებში იქნება, რომელიც ამ პირობებიდან მესამე მნიშვნელოვანი პირობაა“, – განაცხადა გიორგი ვაშაძემ.

ევროკომისიისგან ძალიან მკაფიო გზავნილი მივიღეთ, რომ საქართველოსთვის სტატუსის მინიჭებაზე მისი დადებითი რეკომენდაცია არის ქართველი ხალხის დამსახურება! მადლობა ქართველ ხალხს! – ამის შესახებ ჟურნალისტებთან პარტია „საქართველოსთვის“ დეპუტატმა ანა ბუჩუკურმა განაცხადა.

მისივე თქმით, ახლა ხელისუფლების ვალდებულებაა, ლიდერის სტატუსი, რომელიც საქართველომ ევროინტეგრაციის გზაზე დაკარგა, დროულად დაიბრუნოს და ამ მხრივ დაკარგული დრო აინაზღაუროს.

„საქართველოსთვის კანდიდატის სტატუსის მინიჭება იმ ურყევი და უდრეკი ბრძოლის შედეგია, რასაც ქართველი ხალხი ამდენი ხნის განმავლობაში აკეთებს – იმის მიუხედავად, რომ თავისუფლებისთვის ბრძოლის ფასი ბევრჯერ გადავიხადეთ. მადლობა ქართველ ხალხს და მადლობა ევროპელ ხალხს, რადგან სირთულეების მიუხედავად, ევროპელი ხალხი ნამდვილ მეგობრებს გვერდით უდგას. ახლა თვითმიზანი უნდა იყოს, რომ საქართველომ ევროკავშირში გაწევრიანების გზაზე ლიდერის სტატუსი დაიბრუნოს, რაც იმას ნიშნავს, რომ როგორც ყველა შეუსრულებელი რეკომენდაცია, ასევე დამატებითი პირობები რაც შეიძლება სწრაფად შესასრულებელია”, – განაცხადა ანა ბუჩუკურმა.