ჩვენ უნდა მივეჩვიოთ, რომ ევროპული ინტეგრაციის გზაზე რაც უფრო შორს წავალთ, ახალ-ახალი რეკომენდაციები და მეტი საშინაო დავალება გაჩნდება, რომელიც საქართველომ უნდა შეასრულოს, – ამის შესახებ პარლამენტის საგარეო ურთიერთობათა კომიტეტის თავმჯდომარე ნიკოლოზ სამხარაძემ განაცხადა.

სამხარაძის თქმით, მიესალმება, თუ ოპოზიცია რეკომენდაციების შესრულების პროცესში ჩაერთვება.

„ევროკომისიის დასკვნაში თვალსაჩინოდ წერია, რომ ევროკომისიამ გადაწყვეტილება ქვეყნის პროგრესის გათვალისწინებით მიიღო, რომ საქართველოსთვის რეკომენდაცია გაეწია. რა თქმა უნდა, არის საკითხები, რომლებიც ძველი რეკომენდაციებიდან გადმოყვა, თუმცა უკვე ახალ რეალობაში ვცხოვრობთ, რადგან 12 რეკომენდაცია აღარ არსებობს და შემდეგ ეტაპზე გადასასვლელად არის ახალი რეკომენდაციები. ჩვენ უნდა მივეჩვიოთ იმას, რომ ევროპული ინტეგრაციის გზაზე რაც უფრო შორს წავალთ, ახალ-ახალი რეკომენდაციები და მეტი სექტორული საშინაო დავალება გაჩნდება, რომელიც საქართველომ უნდა შეასრულოს. ვინ შეასრულებს? – რა თქმა უნდა, მთავრობა და ხელისუფლება.

კარგი იქნება, თუ ოპოზიცია რეკომენდაციების შესრულებაში ჩაერთვება, ამას მხოლოდ მივესალმებით, მაგრამ წარსულის გამოცდილება აჩვენებს, რომ ისინი მაინც და მაინც აღფრთოვანებული და მოწადინებული არ არიან, ამაში დაგვეხმარონ. ამ ყველაფერს ბრჭყალებში ვამბობ – ქვეყანას მივაქანებდით რუსეთისკენ და უცებ, კანდიდატის სტატუსით აღმოვჩნდით ევროკავშირში, ასეთი ჯადოქრები ვართ, ყველაფერს გატყუებთ, თვალს გიხვევთ, გვინდა, შეცდომაში შეგიყვანოთ, გაჩვენებთ, რომ რუსეთისკენ მივდივართ და უცებ ევროკავშირში აღმოვჩნდებით. დღეს საქართველოს ასეთი სასწაულმოქმედი ხელისუფლება ჰყავს. თუ ეს ყველაფერი ევროკავშირისა და ნატო-ს წევრობამდე მიგვიყვანს, ამ ჯადოქრობას გავაგრძელებთ“, – განაცხადა ნიკოლოზ სამხარაძემ.

საპარლამენტო უმრავლესობის წევრი, არჩილ თალაკვაძე საქართველოს პრეზიდენტის, სალომე ზურაბიშვილის საფრანგეთში ვიზიტს გამოეხმაურა.

“ეს იქნება წინა შემთხვევაზე კიდევ უფრო უხეში დარღვევა და იმის დემონსტრირება, რომ მისთვის საქართველოს კონსტიტუცია არაფერს არ ნიშნავს, ასევე ის, რომ სახელმწიფოს არჩეული პრეზიდენტი კონსტიტუციაზე მაღლა თავის პირად მოსაზრებას აყენებს, რაც დაუშვებელია, ფაქტი, რომ პრეზიდენტი განმეორებით დაარღვევდა კონსტიტუციას, ეს არის ძალიან მძიმე და ნეგატიური სიგნალი ევროინტეგრაციის პროცესში. ევროპელებისთვის გაუგებარი იქნება ევროინტეგრაციის ამ ისტორიულ მომენტში, ქვეყნის უმაღლესი რანგის პოლიტიკურმა წარმომადგენელმა დაარღვიოს კონსტიტუცია. მე თავს არ მივცემ უფლებას, სხვა კონსტიტუციური ინსტიტუტების ნაცვლად გავაკეთო განცხადებები, თუ რა რეაგირება იყო პარლამენტმა ეს უკვე აჩვენა. ასე რომ დაველოდოთ თუ რა ნაბიჯები იქნება გადადგმული,” – აცხადებს თალაკვაძე.

პრეზიდენტის ადმინისტრაციის ინფორმაციით, სალომე ზურაბიშვილი „პარიზის მშვიდობის ფორუმში“ მონაწილეობის მისაღებად საფრანგეთში გაემგზავრა. მთავრობის ადმინისტრაციაში აცხადებენ, რომ ზურაბიშვილს საფრანგეთში ვიზიტთან დაკავშირებით მთავრობისთვის არ მიუმართავს.

ვულოცავ ჩვენს ქვეყანას კიდევ ერთ მნიშვნელოვან წარმატებას და ევროკავშირის მხრიდან ჩვენი პროგრესის აღიარებას, რომ საქართველო დღეს არის უფრო ევროპული, თავისუფალი, ძლიერი სახელმწიფო, ვიდრე იყო 10-11 წლის წინ, – ამის შესახებ საპარლამენტო უმრავლესობის წევრმა, არჩილ თალაკვაძემ განაცხადა.

თალაკვაძის თქმით, ევროკომისიის გადაწყვეტილება მნიშვნელოვანი წინაპირობაა დეკემბერში სტატუსის მისაღებად.

„ეს არის მნიშვნელოვანი წინაპირობა, რომ საქართველო დეკემბერში სტატუსს მიიღებს, საქართველო გახდება ევროკავშირის წევრი სახელმწიფო. ამით ასრულდება ჩვენი წინაპრების „ოცნება“, ჩვენი თაობის „ოცნება“, საქართველო იყოს დასავლეთის სრულფასოვანი წევრი. მადლობა პარტნიორებს სამართლიანი შეფასებისთვის. მინდა, განსაკუთრებული მადლობა გადავუხადო ჩვენს გუნდს და ხელისუფლებას, რომელმაც ხალხთან ერთად ყველაფერი გააკეთა, რომ შესაძლებელი ყოფილიყო გადაწყვეტილების მიღება, რომელსაც საქართველო უკვე დეკემბერში ელოდება. მადლობა ყველა საჯარო მოხელეს, ვინც ევროპული რეკომენდაციებისთვის იმუშავა და რაც მთავარია, მინდა, განსაკუთრებული მადლობა გადავუხადო ჩვენს მხარდამჭერებს, რომლებიც მტკიცედ გვიჭერდნენ მხარს ევროპული კურსისა და ინტეგრაციის მისაღწევად“, – განაცხადა არჩილ თალაკვაძემ.

არჩილ თალაკვაძის განცხადებით, ხელისუფლებას დღეს საკუთარ ქვეყანასთან დაპირისპირებული ხალხი აკრიტიკებს.

„რადიკალური ოპოზიციის რეაქციებს რაც შეეხება, არ უნდა დაგვავიწყდეს, რომ ეს არის პოლიტიკური ბანაკი, რომელიც ქირაობდა ლობისტებს, რათა საქართველოს ევროპული სტატუსი დაებლოკა. ჩადიოდნენ ევროპის დედაქალაქებში და ჩვენს პარტნიორებს, ლიდერებს არწმუნებდნენ, საქართველოსთვის კანდიდატის სტატუსი არ მიეცათ. ხალხს არწმუნებდნენ, თითქოს გეოპოლიტიკური პოზიცია შეიცვალა და შემდეგ ლამის იმასაც ამბობდნენ, თუ სტატუსს მივიღებთ, ეს „რუსული სტატუსი“ იქნებაო. ასეთი უმსგავსი და საკუთარ ქვეყანასთან დაპირისპირებული ხალხი გვაკრიტიკებს დღეს. პოლიტიკური თვალსაზრისით, განსაკუთრებით უტიფარი და ამორალური იყო, როდესაც ახალი კამპანია წამოიწყეს, თითქოს „ქართულ ოცნებას“ სტატუსის მიღება არ გაუხარდა. ევროკავშირი შეს ქვეყანას მწვანე შუქს როცა უნთებს სტატუსის მისაღებად და შენ ხელისუფლებას რაღაცას უსამძიმრებ, თითქოს საქართველომ გეოპოლიტიკა შეიცვალა, თითქოს ხალხი შედის ევროკავშირში და ხელისუფლება – ვერა, ან ხელისუფლება შედის ევროკავშირში და ხალხი გარეთ დარჩება – ასეთი განცხადებებით როცა ხარ დაკავებული, ეს ნიშნავს, რომ პოლიტიკურად გაკოტრებული ხარ და შენი ადგილი ევროპულ პოლიტიკაში, მომავლის პოლიტიკაში არ არის“, – განაცხადა არჩილ თალაკვაძემ.

ამასთან, როგორც არჩილ თალაკვაძემ აღნიშნა, ევროკომისიის მხრიდან ნებისმიერ საქმიან რეკომენდაციასა და პირობას მიესალმება.

„დათქმები, პირობები და მკაფიო საგზაო რუკა ევროკავშირში გაწევრიანებისთვის არის ის, რაც გვჭირდება და რაზეც არაერთხელ მიუმართავს ჩვენს ხელისუფლებას ევროპელი პარტნიორებისთვის. კარგია, რომ საქართველოსთვის ამ საგზაო რუკის მონახაზი უკვე არსებობს. ევრორეკომენდაციები არის საგზაო რუკის შინაარსობრივი ნაწილი და მივესალმებით ნებისმიერ საქმიან რეკომენდაციასა და პირობას, რომელიც დაგვეხმარება, საქართველო გახდეს უფრო ძლიერი დემოკრატია, ძლიერი ეკონომიკა და ევროკავშირის ძლიერი პარტნიორი. ასევე ველოდებით მეტ სიცხადეს საკითხებთან დაკავშირებით, არა მხოლოდ საქართველოსთან მიმართებით, არამედ უკრაინასა და მოლდოვასთან მიმართებით. ძალიან მნიშვნელოვანია, „ასოცირებული ტრიოსთვის“ არსებობდეს მკაფიო საგზაო რუკა, სადაც პროგნოზირებადი იქნება რეფორმების გეგმა, კონკრეტული თარიღები, როდის, რა ეტაპზე გადადიან ჩვენი ქვეყნები და როდის მოხდება გაწევრიანება.

რადიკალური ოპოზიცია დაკავებულია პირობებისა და დათქმების დემონიზებით. უნდათ წარმოაჩინონ, თითქოს ცუდი ამბავია, რომ  ევროკავშირმა მომავალ რეფორმებზე ჩვენთან გახსნა დისკუსია. ეს თავისთავად მიუთითებს, რა დამოკიდებულება აქვთ და როგორ ესმით ევროპეიზაცია. 12 რეკომენდაციიდან ერთადერთი რეკომენდაცია იყო დეპოლარიზაცია, სადაც ძირითადი პასუხისმგებლობა საპარლამენტო ოპოზიციას ეკუთვნოდა და მათი წვლილი შეიძლება, მართლაც პოზიტიური ყოფილიყო. ანუ პოლიტიკის გადაყვანა კონფლიქტიდან საქმიან დისკუსიაში, ჩხუბიდან დემოკრატიულ ოპონირებაში და ესეც კი არ გააკეთეს. 12 რეკომენდაციიდან, პრაქტიკულად, არცერთზე მუშაობის პროცესში არ ჩაერთნენ და არცერთ კენჭისყრაში ოპოზიციის მხრიდან სრული მხარდაჭერა არ ჰქონია ევროპულ რეფორმებს. ამიტომ, პოლიტიკური მორალიც აღარ აქვთ, რომ რეფორმებთან და სამომავლო გეგმებთან დაკავშირებით ილაპარაკონ“, – აღნიშნა არჩილ თალაკვაძემ.

არ ვიცი, მიხეილ სააკაშვილმა საკუთარ პარტიას მანიფესტი რის საპირწონედ შესთავაზა, მაგრამ დღეს „ნაციონალური მოძრაობა“ ისეთ დღეშია, რომ მათ არცერთი მანიფესტი არ უშველით, – ამის შესახებ საპარლამენტო უმრავლესობის წევრმა, ირაკლი ჩიქოვანმა განაცხადა.

როგორც ირაკლი ჩიქოვანმა აღნიშნა, ვერცერთი მანიფესტი ვერ გააქარწყლებს იმ ვითარებას, რომ ამ პარტიას მართავს ვანო მერაბიშვილი და მისი იდეოლოგიით იმართება.

„მისი იდეოლოგია მისი თანამდებობაზე ყოფნის დროს ვნახეთ. ამ პარტიას ფინანსები კრიმინალ კეზერაშვილისგან აქვს, რაც სერიოზული პრობლემაა. რეალურად, პარტიაში ვერ გაურკვევიათ, ვინ არის წევრი, ვინ – არა და ვინ რას წარმოადგენს. არ მგონია, პარტიის რღვევა ამ მანიფესტმა შეაჩეროს. თუ „ნაციონალური მოძრაობა“ დაიშლება, ეს საქართველოს პოლიტიკური ლანდშაფტისთვის კარგი იქნება“, – განაცხადა ჩიქოვანმა.

მიხეილ სააკაშვილმა რამდენიმე დღის წინ „ნაციონალურ მოძრაობას“ შესთავაზა, შექმნან ერთიანობის მანიფესტი. „თუ ვინმე არ მოისურვებს ხელის მოწერას, ავტომატურად დაიყენებს თავს პარტიის გარეთ“, – აღნიშნა მიხეილ სააკაშვილმა.