გურჯაანის მუნიციპალიტეტში ავარიას ერთი ოჯახის სამი წევრი ემსხვერპლა. შემთხვევა სოფელ ახაშენში გვიან ღამით მოხდა.

გარდაცვლილია დედა მამა და მათი 4 წლის ბავშვი. ადგილობრივების თქმით, ახალგაზრდა მამაკაცი მსუბუქი ავტომობილით მეუღლესთან და ორ მცირეწლოვან შვილთან ერთად სახლის მიმართულებით გადაადგილდებოდა, რა დროსაც ტრაქტორს დაეჯახა და ამობრუნდა.

შეჯახება იმდენად ძლიერი აღმოჩნდა, რომ ცოლ-ქმარი და მათი 4 წლის ბიჭი ადგილზე დაიღუპნენ, მეორე მოზარდი კი საავადმყოფოშია მოთავსებული.

მომხდარზე მიმდინარეობს გამოძიება.

ჩვენ გვჭირდება სიმართლე შოვთან დაკავშირებით – კობახიძის სინანული, ამათი „ნიანგის ცრემლები“ ჩვენ უნდა მივიღოთ როგორც სიგნალი, მათ ძალიან კარგად იციან თუ სად არის სიმართლე, – ამის შესახებ პარტია „ხალხისთვის“ ლიდერმა, ანა დოლიძემ შოვში მომხდარ ტრაგედიასთან დაკავშირებით განაცხადა.

მისივე თქმით, რაჭაში მომხდარი შემთხვევა სისტემურად უნდა იყოს შესწავლილი, რათა მომავალში მსგავსი ტრაგედია ქვეყანამ თავიდან აიცილოს.

„ჩვენ გვჭირდება სიმართლე რაჭის მოვლენებთან დაკავშირებით. საგამოძიებო კომისია, გამოძიება, ამ პარლამენტის მიერ შექმნილი საგამოძიებო კომისია თუ შემდეგის, ეს ყველაფერი არის საშუალება. შედეგი არის ის, რომ ჩვენ გავიგოთ სიმართლე. მივიღოთ ზომები, რათა შემდეგში მსგავსი რამ აღარ განმეორდეს. კობახიძის სინანული, ამათი „ნიანგის ცრემლები“ ჩვენ უნდა მივიღოთ როგორც სიგნალი, მათ ძალიან კარგად იციან თუ სად არის სიმართლე. გული გაუსკდათ, როდესაც დაინახეს ხალხის მრისხანება, ეს არის ჩვენი გამარჯვება, თუმცა ეს არ არის საკმარისი. ჩვენ უნდა მოვითხოვთ სიმართლე რაჭაზე.

სიმართლე რაჭასთან დაკავშირებით, ჩვენ შეგვიძლია გავყოთ ორ ეტაპად. პირველი ეტაპი – რატომ არ დადგა გაფრთხილების და ადრეული შეტყობინების სისტემები, რომელსაც არსებული ხელისუფლება ათასჯერ დაჰპირდა ხალხს. ჩვენ სახელმწიფოს ევროკავშირის დირექტივის საფუძველზე აქვს ვალდებულები, კერძოდ, მოახდინოს ზონირება იმ ტერიტორიების, რომელიც არის მეწყერსაშიში და საფრთხის შემცველი. 2020 წელს, პრემიერ-მინისტრი გიორგი გახარია ჩავიდა რაჭაში და მან საჯაროდ თქვა, რომ როგორც კი გზა გაიხსნებოდა გეოლოგები ამოვიდოდნენ და არსებულ ტერიტორიას შეისწავლიდნენ. ამასთანავე, ის ადგილობრივ მოსახლეობას დაჰპირდა, რომ იქნებოდნენ უსაფრთხოდ. კითხვა არ უნდა დავსვათ?! რა ნაბიჯებს დგამდა ხელისუფლება იმისთვის, რომ თავიდან აეცილებინა ეს ტრაგედია. საგამოძიებო კომისიის შექმნის საკითხი პარლამენტში პირველად დავაყენეთ ჩვენ. თუმცა, ჩვენ ვართ არასაპარლამენტო ოპოზიცია და ამისთვის გვჭირდება საპარლამენტო ოპოზიცია. თუ ვინმე ამ კომისიას არ შექმნის და ხელს შეუშლის, ბუნებრივია კითხვები გაჩნდება მათ მიმართ. მაშინ გამოვიდეს და სხვა ფორმით უპასუხოს კითხვებს. მეორე ეტაპი ეხება ღვარცოფის პერიოდს, თუ რა გაკეთდა ამ მიმართულებით. ვერტმფრენის საკითხი კვლავ გაურკვეველია, ბოლო-ბოლო გვაქვს თუ არა ვერ გავიგეთ. ასევე ძალიან მნიშვნელოვანია თუ რა ხდება მაშველებთან მიმართებაში, მათ აქვთ ძალიან დაბალი ხელფასები. დავინახეთ რომ შესაბამისი მოწყობილობებიც არ აქვთ. არ არის ეს საკითხი დასასმელი?! ვინ ხელმძღვანელობდა ამ ოპერაციას, როდესაც შინაგან საქმეთა მინისტრი ოჯახური პრობლემების გამო თურქეთში იმყოფებოდა? თუ ტელეფონით ხელმძღვანელობდა და ეს დასაჯერებელია, მაშინ სასწრაფოდ უნდა გაქუსლონ აქედან. ეს საკითხი უნდა შევისწავლოთ სისტემურად, რათა მომავალში მსგავსი ტრაგედია თავიდან ავიცილოთ. ერთი მინისტრის მოსვლა პარლამენტში არ კმარა, გვჭირდება პროცესი და სიმართლე შოვთან დაკავშირებით”, – განაცხადა ანა დოლიძემ, რომლის კომენტარსაც პარტია „ხალხისთვის“ ავრცელებს.

ოჯახის ახლობლები თავად აღწერდნენ თუ რა მოხდა შოვში, სტიქიის დროს – ადამიანები პრაქტიკულად ალყაში იყვნენ და ვერანაირი სამაშველო ოპერაცია, სამწუხაროდ, ამ ადამიანებს ვერ იხსნიდა, – ეს განცხადება პარლამენტში, “ქართული ოცნების” დეპუტატმა ბექა ოდიშარიამ გააკეთა.

ოდიშარიას აზრით, იმაზე საუბარი, რომ სტიქიის ადგილზე საკმარისი სამაშველო სპეცტექნიკა და ცოცხალი ძალა არ არსებობდა, დეზინფორმაციისა და ფეიკ კამპანიის ნაწილს წარმოადგენდა.

მისივე შეფასებით, შოვში „ადამიანურ შესაძლებლობებზე მეტი ძალისხმევა იყო გაწეული”.

„თითქოს მეზობელი ქვეყნებიდან დახმარების მიღება იყო საჭირო და ჩვენ განზრახ უარი ვთქვით, რაც საჭირო ნამდვილად არ იყო. საზოგადოება ხედავდა, რომ მაშველები ფუტკრებივით მუშაობდნენ და ხეობაში ცოცხალი ძალისა და სპეცტექნიკის მობილიზების გამო, მგონი, ადგილიც აღარ იყო დარჩენილი.

ჩვენ ნამდვილად არ გვეთაკილება, არაერთი მეზობლისთვის ანალოგიური დახმარება გაგვიწევია და საჭირო რომ ყოფილიყო ამ დახმარებას თავისუფალი სინდისით ვთხოვდით”, – განაცხადა ბექა ოდიშარიამ.

სარჩელი მოვამზადეთ, მთავრობას პასუხი უნდა მოვთხოვოთ რიკოთზე ჩადენილ დანაშაულებზე, – ამის შესახებ „ერთიანი ნაციონალური მოძრაობის“ პოლიტსაბჭოს წევრმა, ლაშა ფარულავამ რიკოთზე გამართულ აქციაზე განაცხადა.

როგორც მან აღნიშნა, მოითხოვენ, რომ გენერალურმა პროკურატურამ დაიწყოს გამოძიება ირაკლი ქარსელაძის, საავტომობილო გზების დეპარტამენტის და ჩინური კომპანიების წინააღმდეგ.

„საქართველოს მთავრობის კორუფციული ინტერესებით შერჩეულმა ჩინურმა კომპანიებმა ადგილობრივებს საცხოვრებელი დაუნგრიეს. მათი სახლების ქვეშ გაიყვანეს გვირაბები, ნგრევის საფრთხეა. დღეს აქ შეკრებილი ადამიანები მოითხოვენ გამოძიების დაწყებას ამ კორუფციასა და გულგრილობაზე.

საქართველოს მთავრობას, ირაკლი ქარსელაძეს და ჩინურ კომპანიას უნდა მოვთხოვოთ პასუხი ყველა იმ დანაშაულზე, რომელიც რიკოთის უღელტეხილზე ჩაიდინეს. ეს არ არის ჩვენი მოქალაქეების არჩევანი.

ვითხოვთ, რომ გენერალურმა პროკურატურამ დაიწყოს გამოძიება ირაკლი ქარსელაძის, საავტომობილო გზების დეპარტამენტის და ჩინური კომპანიების წინააღმდეგ.

ჩვენ მოვამზადეთ საჩივარი და მოვაწერთ ხელს ჩვენს თანამოქალაქეებთან ერთად, ვისაც კონკრეტული საფრთხე აქვს. ამას სჭირდება დროული რეაგირება ხელისუფლებისგან. ყველა კარგად უნდა ხედავდეს, რა საფრთხის შემცველია ის სამუშაოები, რომელსაც ჩინური კომპანია აწარმოებს. გენერალურ პროკურატურას გამოძიების მოთხოვნით მივმართავთ, თუმცა იმედი არ გვაქვს, რომ ისინი რამეს გამოიძიებენ”, – განაცხადა ლაშა ფარულავამ, რომლის კომენტარსაც პარტიის პრესსამსახური ავრცელებს.

არავითარი სურვილი არ მქონია, ვინმეს ღვაწლი, ვინმეს მონდომება, გმირობა იოტისოდენად მაინც შემებღალა და დამეკნინებინა, ამის მიზანი და განზრახვა ნამდვილად არ მქონია – პატიებას ვითხოვ ყველასგან, ვინც შეიძლება ჩათვალა, რომ ჩემს მიერ გაკეთებული განცხადებიდან ასეთი აღქმა ჩნდებოდა, – ეს განცხადება ჟურნალისტებთან “ქართული ოცნების” დეპუტატმა მიხეილ სარჯველაძემ გააკეთა

როგორც სარჯველაძემ აღნიშნა, ის იმ ადამიანების კატეგორიას არ განეკუთვნება, ვისაც ადამიანის მონდომების დანახვა არ შეუძლია.

“იმ დღეს, როცა ვსაუბრობდი, ვთქვი და დღესაც გავიმეორებ, რომ ძალიან ხშირად ხდება, როცა გარკვეული ფრაზები კონტექსტიდან ამოგლეჯილად ვრცელდება და ეს გარკვეულ არასწორ შთაბეჭდილებას და არასწორ აღქმებს ქმნის. ის რაც გუშინ ირაკლი კობახიძემ თქვა, აბსოლუტურად სწორი იყო, თუმცა აქვე მინდა ვთქვა, რომ ის რაც ყველაზე მეტად ვაჟკაცურად გამოიყურებოდა და აბსოლუტურად კორექტული იყო, რა თქმა უნდა, არავის, არც პირველ, არც მეორე დღეს და არც არასდროს არ გვქონია სურვილი, რომ ვინმეს ღვაწლი, ვინმეს ჰეროიკული საქციელი და ვინმეს გმირობა დაგვეკნინებინა. ეს თქვა და ყოველგვარი სპეკულაციის მიზეზი მოსპო. ეს არის ძალიან დასაფასებელი რაც ირაკლიმ გააკეთა. რასაკვირველია, მე ამ განცხადებას ვუერთდები და მინდა დავადასტურო ჩემი ღრმა პატივისცემა ნებისმიერი ადამიანის მიმართ, ვინც არა თუ უბრალოდ გადარჩა, არამედ გმირობა გამოიჩინა, თუმცა არ უნდა დაგვავიწყდეს და უნდა ვთქვათ, რომ არც ირაკლის და არც მე არასდროს გვქონია განზრახვა და სურვილი, რომ ვინმე შეურაცხყოფილი დარჩენილიყო, ვინმეს ღვაწლის დაკნინება ნამდვილად არ გვინდოდა – რა თქმა უნდა, პატიებას ვითხოვთ, თუკი ასე გამოვიდა და ვინმეს ასეთი შთაბეჭდილება გაუჩნდა, რომ ვინმეს ღვაწლი დავაკნინეთ”, – განაცხადა სარჯველაძემ.

14 აგვისტოს გამართულ პრესკონფერენციაზე, „ქართული ოცნების“ თავმჯდომარე ირაკლი კობახიძემ განაცხადა, რომ არასწორი ინფორმაცია ვრცელდებოდა, თითქოს ერთ-ერთი ბავშვი 3 საათი ებრძოდა ღვარცოფს. მისივე თქმით, საუბარი იმაზე, რომ ვიღაც 3 საათი ებრძოდა სტიქიას, უბრალოდ არის ცარიელი ტყუილი. ამასთან, კობახიძემ აღნიშნა, რომ გაუგებარია რატომ შეიძლებოდა ღვარცოფის ერთი ნაპირიდან მეორე ნაპირზე ვინმე გადასულიყო.

აღნიშნული განცხადებების შემდეგ ირაკლი კობახიძე დავით ჯელაძეს შეხვდა და შეხვედრის შემდეგ, მან „სინანული გამოხატა დავით ჯელაძის გულის ტკენის გამო“.