საქართველოს პრეზიდენტი სალომე ზურაბიშვილი ხვალ ევროპული საბჭოს პრეზიდენტს, შარლ მიშელს ბრიუსელში შეხვდება. ამის შესახებ ინფორმაციას საქართველოს პრეზიდენტის ადმინისტრაციის პრესსამსახური ავრცელებს.

შარლ მიშელისა და სალომე ზურაბიშვილის შეხვედრის შესახებ აღნიშნულია ევროპული საბჭოს ვებგვერდზეც.

ამასთან, სალომე ზურაბიშვილი დღეს ბერლინში გერმანიის პრეზიდენტს, ფრანკ-ვალტერ შტაინმაიერს შეხვდა. ოფიციალური ინფორმაცია დღევანდელი შეხვედრის შესახებ ამ დრომდე არ გავრცელებულა. შეხვედრის ამსახველი ფოტო და ვიდეომასალა სალომე ზურაბიშვილმა სოციალური ქსელებით გაავრცელა. გერმანიის პრეზიდენტის ოფიციალურ ვებგვერდზე გამოქვეყნდა ფოტო წარწერით – „მოლაპარაკებები სალომე ზურაბიშვილთან“.

30 აგვისტოს საქართველოს პრეზიდენტის ადმინისტრაციამ გაავრცელა ინფორმაცია, რომლის მიხედვითაც, სალომე ზურაბიშვილი 31 აგვისტოდან ევროპელ ლიდერებთან შეხვედრებს იწყებდა. პრეზიდენტის ადმინისტრაციაში განაცხადეს, რომ შეხვედრები კანდიდატის სტატუსს უკავშირდება. მოგვიანებით საქართველოს მთავრობამ სალომე ზურაბიშვილისთვის სამუშაო ვიზიტებზე უარის თქმასთან დაკავშირებით გაავრცელა განცხადება. როგორც განცხადებაშია ნათქვამი, სალომე ზურაბიშვილს საქართველოს მთავრობის განკარგულებით, 2023 წლის 3 აგვისტოს ოფიციალურად, წერილობით ეთქვა უარი გერმანიაში ვიზიტზე. ასევე, განცხადებაში საუბარია სხვა სამუშაო ვიზიტებთან დაკავშირებითაც, რომლებზეც პრეზიდენტს უარი ეთქვა.

აღნიშნულ საკითხთან დაკავშირებით დღეს „ქართულ ოცნებაში“ გაკეთდა კომენტარი. მმართველ გუნდში აღნიშნეს, რომ პრეზიდენტმა უხეშად დაარღვია საქართველოს კონსტიტუცია, რაზეც საჭიროა რეაგირება.

ბრიტანულმა საინფორმაციო სააგენტომ „როიტერმა“ (Reuters) თავის ვებ-გვერდზე გამოაქვეყნა სტატია სათაურით „გერმანიამ საქართველო და მოლდოვა უსაფრთხო ქვეყნების სიაში შეიყვანა – რას ნიშნავს ეს თავშესაფრის მაძიებლებისთვის?“ (ავტორი – ალექსანდრე რაცი).

გთავაზობთ პუბლიკაციას:

გერმანიის ფედერაციული რესპუბლიკის კოალიციურმა მთავრობამ საქართველო და მოლდოვა უსაფრთხო ქვეყნებად დაასახელა. ოთხშაბათს მიღებული ამ გადაწყვეტილების მიზანია თავშესაფრის მაძიებელთა განაცხადების შემცირება იმ ქვეყნებიდან, რომელთა წარმომადგენლებიც, მეტწილად, თავშესაფარზე უარს იღებენ. მთავრობის განმარტებით, უსაფრთხო წარმოშობის ქვეყანა ისეთი სახის ქვეყანას წარმოადგენს, სადაც არ არსებობს სახელმწიფო მიერ დევნის შიში და სახელმწიფო თავის მოქალაქეებს იცავს.

მინისტრთა კაბინეტმა შინაგან საქმეთა მინისტრის მიერ მომზადებული დადგენილება მიიღო. ეს ნაბიჯი ნიშნავს, რომ “უსაფრთხოდ” შეფასებული ქვეყნებიდან თავშესაფრის თაობაზე განაცხადების განხილვა შესაძლოა უფრო სწრაფად მოხდეს, თავშესაფრის მინიჭებაზე უარის მიღების შემთხვევაში კი, განმცხადებელი დეპორტაციას უფრო სწრაფ ვადებში დაექვემდებაროს.

გერმანიის შინაგან საქმეთა სამინისტროს მონაცემებით, 2022 წელსა და 2023 წლის პირველ ნახევარში, ორივე ქვეყნიდან, საქართველოდან და მოლდოვიდან თავშესაფრის მაძიებლების 99,9%-ს განაცხადის დაკმაყოფილებაზე უარი ეთქვა.

კანცლერ ოლაფ შოლცის მთავრობა წელს ცდილობდა, გარკვეული უნარების მქონე იმიგრანტებისთვის გერმანიის მოქალაქეობის მიღება გაემარტივებინა. მიზანი, მუშახელის ქრონიკული დეფიციტია. მაგრამ, მიგრაცია გერმანიაში ერთ-ერთ მთავარ პოლიტიკურ საკითხად რჩება, რამაც ხელი შეუწყო ულტრამემარჯვენე პარტიის, „ალტენატივა გერმანიისთვის“ აღმასვლას. პარტიას ძირითად პოლიტიკურ პარტიებზე მეტი მხარდაჭერა აქვს და მომავალ საყოველთაო არჩევნებში, შესაძლოა მნიშვნელოვანი მიღწევებიც მოიპოვოს.

ლტოლვილთა უფლებადამცველმა ორგანიზაცია „Pro Asyl”-მა, მთავრობის გადაწყვეტილება გააკრიტიკა. ორგანიზაცია მიიჩნევს, რომ გერმანიის მთავრობა უგულებელყოფს რუსეთის მიერ, ორივე ქვეყანაში სეპარატისტული რეგიონების ოკუპაციას, რაც უსაფრთხოების მხრივ რისკებს ქმნის. უფლებადამცველმა ორგანიზაციამ ასევე ხაზი გაუსვა საქართველოში კანონის უზნაესობის შეფერხებას, ასევე „ლგბტქ+“ თემის უფლებების დარღვევას და მოლდოვაში, პრესის თავისუფლების მხრივ არსებულ პრობლემებს.

როგორც „ლგბტქ+“ უფლებადამცველი ჯგუფების წარმომადგენლები აცხადებენ, დისკრიმინაციისა და სიძულვილის დანაშაულების წინააღმდეგ კანონმდებლობა საქართველოს მიღებული აქვს, მაგრამ სამართალდამცავები შესაბამის უსაფრთხოებას არ უზრუნველყოფენ, ჰომოფობია კი კვლავ გავრცელებულია სოციალურად კონსერვატიულ სამხრეთ კავკასიაში.

წყარო

სალომე ზურაბიშვილს, მიუხედავად იმისა, რომ საქართველო საპრეზიდენტო ქვეყანა არ არის, აქვს თავისი ბერკეტები, რისი გამოყენებაც შეუძლია, მაგალითად, მთავარი პოლიტპატიმრის – მიხეილ სააკაშვილის შეწყალების შედეგად საქართველო ბევრად უფრო წინ წაიწევდა ევროინტეგრაციის გზაზე, – ამის შესახებ „ერთიანი ნაციონალური მოძრაობის“ გენერალურმა მდივანმა პეტრე ცისკარიშვილმა განაცხადა, რითაც საქართველოს პრეზიდენტის სალომე ზურაბიშვილის ევროპაში ვიზიტს გამოეხმაურა.

მისი თქმით, არსებულ მოცემულობაში – მოქმედი პრეზიდენტისა და ხელისუფლების პირობებში, ევროკავშირიდან პოზიტიური და სასარგებლო გადაწყვეტილების მიღების იმედი არ არის.

„სალომე ზურაბიშვილს, მიუხედავად იმისა, რომ საქართველო საპრეზიდენტო ქვეყანა არ არის, აქვს თავისი ბერკეტები, რისი გამოყენებაც შეუძლია, მაგალითად იგივე მთავარი პოლიტპატიმრის – მიხეილ სააკაშვილის შეწყალების შედეგად საქართველო ბევრად უფრო წინ წაიწევდა ევროინტეგრაციის გზაზე, მაგრამ არის მეორე ასპექტიც – როდესაც ჩვენ პრეზიდენტის ვიზიტის არაკონსტიტუციურობაზე ვსაუბრობთ, ნუ დაგვავიწყდება, რომ ეს კონსტიტუცია არის კობახიძის დაწერილი. ეს ტექსტი, რომელიც მათ შეადგინეს და „ქოცებმა“ მიიღეს, არის კობახიძის მიერ ფორმულირებული, აქედან გამომდინარე პრეზიდენტს, რომელიც ელჩებს ნიშნავს, უცხოეთში შეხვედრების გამართვა და პოლიტიკურ თემებზე საუბარი არ შეეძლოს, სწორედ იმაზე მიუთითებს, რამდენად გაუმართავი, არალოგიკურია და არასახელმწიფოებრივი ნიშნით არის სწორედ ეს ტექსტი და ფორმულირება კონსტიტუციაში, რადგან ქალბატონი პრეზიდენტი ცდილობს იმის გაკეთებას, რაც შეუძლებელია. სინამდვილეში, ის ევროპაში თუ მოგზაურობს, „ქოცების“ საქმეს გააკეთებდა, რადგან პირდაპირ ეუბნება ევროპელებს, რომ ყველაფრის მიუხედავად, უნდა მოგვცენ კანდიდატის სტატუსი, რაც მათი გადმოსახედიდან ერთგვარი აბსურდია – რას ჰქვია ყველაფრის მიუხედავად, შენ ხარ სახელმწიფო, შენ გაქვს მთავრობა, სპეციალურად მონიჭებული რეკომენდაციები, რომელიც შესასრულებელია და ეს არ სრულდება და მიუხედავად იმისა, რომ ეს არ სრულდება და მაინც მიგვიღეთ, ეს ერთგვარი არასაქმიანი მიდგომაც არის. ჩვენ პირიქით, უნდა გვქონდეს საუბარი იმაზე, რომ აუცილებელია ქვეყნის შიგნით იყოს დემოკრატიული ცვლილებები, პოლიტიკური კლიმატის ცვლილება, ეს რეკომენდაციები არ არის უბრალოდ მოსანიშნი და კანონპროექტების მისაღები შემოთავაზებები რეფორმების კუთხით, ეს არის კონკრეტული დავალება, რომელიც ითხოვს პოლიტიკური გარემოს კლიმატის ცვლილებას კანონის უზენაესობის კუთხით რეფორმის გატარებას, კორუფციის აღმოფხვრას, რუსეთთან მეგობრობის და სატრანზიტო დერეფნის გაჭრის და მთელი ამ სქემის პროექტის დასრულებას, ბევრ ფუნდამენტურ ევროპული ტიპის მიდგომას და რეფორმას გთხოვს 12 რეკომენდაცია.

ამ მოცემულობაში, ამ პრეზიდენტის პირობებში, ამ „ქოცური“ მმართველობის პირობებში, სამწუხაროდ, არ გვაქვს იმედი, რომ რამე პოზიტიური და სასარგებლო გადაწყვეტილება იქნება მიღებული, ამიტომ აუცილებელია, რაც შეიძლება სწრაფად გამოიცვალოს მთავრობა და ახალმა მთავრობამ გაატაროს ის ცვლილებები და რეფორმები, რასაც ითხოვს ევროპა თავისი დემოკრატიული, ინსტიტუციური სტანდარტების დასაკმაყოფილებლად“, – განაცხადა პეტრე ცისკარიშვილმა.

იმდენად დაბალია ინტელექტუალური მზაობა პოლიტიკური სუბიექტების, რომ ერთადერთი თემა, რითაც საინფორმაციო სივრცეში შემოდიან არის სკამის გარშემო სირბილი, ამ სკამზე უკვე ზის ლევან ხაბეიშვილი, რომელიც თავის „ქურქუმალ ვაითით” ნამდვილად არ ჩამოუვარდება მოწინააღმდეგე ფრთას,- ამის შესახებ ჟურნალისტებთან პარლამენტის პირველმა ვიცე- სპიკერმა გია ვოლსკიმ განაცხადა.

ვოლსკი გამოეხმაურა ბაჩო დოლიძის მიერ გაკეთებულ განცხადებას იმასთან დაკავშირებით, რომ ახლა მიდის მცდელობა ივანიშვილის მმართველობა კეზერაშვილის მმართველობით ჩანაცვლდეს და აღნიშნა, რომ ივანიშვილის ხშირი ხსენების მიზანია, „რაიმე არ დააბრალონ”.

„ბაჩო დოლიძე ცდილობს თავის ფრთა “ქართულ ოცნებასთან” არანაკლებ მებრძოლად გამოაჩინოს, ბიძინა ივანიშვილის სახელსაც ხშირად ახსენებს, რომ ვინმემ რამე არ დააბრალოს. თუმცა, ფაქტია, ეს სისტემა დალპა, რადგან მუდმივად იყო ძალადობრივი, არავინ არავის აზრს არ ითვალისწინებდა, არსებობდა ერთი აზრი, ახლა ეს ერთი აზრი ორად გაიყო და ბრძოლა მიდის, რომ კეზერაშვილის ფულს დაეუფლონ. ერთმა ფრთამ ამ ბრძოლაში წააგო და ახლა ცდილობს, განცხადებებით მაინც დააბალანსოს ეს. მეორე ფრთამ ეს ბრძოლა მოიგო, მაგრამ როგორც ერთი, ისე მეორე ფრთა ინარჩუნებს მთავარ ამოცანას – განავითაროს დესტაბილიზაციის სტრატეგია. გვარების წამოძახილი და ბრტყელ-ბრტყელი განცხადებები არის ანტურაჟი შინაარსის, რომელიც არ იმალება. მაგრამ დღემდე ველოდებით იქნებ, რაღაც იქნებ აგროდაზღვევაზე გვითხრან, ან საპენსიო ფონდზე დემაგოგიას თავი დაანებონ და რეალურად საკითხებზე ვილაპარაკოთ ამ მთლიან შიდა პროდუქტის ზრდის შედეგად რესურსების სწორად განაწილებაზე, ან საგარეო პოლიტიკაზე ჩინეთთან იქნება ეს თუ ევროპულ ბაზრებთან. ამ თემებზე იმდენად დაბალია ინტელექტუალური მზაობა პოლიტიკური სუბიექტების, რომ ერთადერთი თემა, რითაც საინფორმაციო სივრცეში შემოდიან არის სკამის გარშემო სირბილი, ამ სკამზე უკვე ზის ლევან ხაბეიშვილი და მე ვიტყოდი, თავის „ქურქუმალ ვაითით“ არ ჩამოუვარდება ნამდვილად მოწინააღმდეგე ფრთას“, – განაცხადა ვოლსკიმ.

ფრაქცია „ქართული ოცნების“ თავმჯდომარის, მამუკა მდინარაძის თქმით, ევროკავშირის კრიტერიუმების მიხედვით, ყველა მნიშვნელოვან სფეროში საქართველო წამყვან პოზიციას იკავებს, პრეზიდენტი კი ცდილობს, კანდიდატის სტატუსთან დაკავშირებით თავისი ქვეყნის საწინააღმდეგო გადაწყვეტილება გაამართლოს.

როგორც მდინარაძე სოციალურ ქსელში წერს, სალომე ზურაბიშვილი იმ პოლიტიკოსთა რიტორიკას იმეორებს, რომლებიც ყველაფერს აკეთებენ სტატუსის მიღების საწინააღმდეგოდ. მამუკა მდინარაძე ფიქრობს, რომ სალომე ზურაბიშვილი მიზანმიმართულად არღვევს ქვეყნის კონსტიტუციას.

„სწორია, სტატუსი რომ არ მოგვცესო – ამბობს საქართველოს პრეზიდენტი!

მას თავგამოდებით იცავენ ომის პარტიის ქართველი წარმომადგენლები, მათი ტელემედიები და სვამენ კითხვას, მთავრობამ რატომ არ მისცა თანხმობა პრეზიდენტს, კანდიდატის სტატუსზე თავისი პოზიცია ახლა უკვე ევროპაში, საქართველოს სახელით გაეხმოვანებინა!

მაშინ, როდესაც, თავად ევროკავშირის კრიტერიუმების მიხედვით, ყველა მნიშვნელოვან სფეროში საქართველო წამყვან პოზიციას იკავებს, პრეზიდენტი ცდილობს, გაამართლოს თავისი ქვეყნის საწინააღმდეგო გადაწყვეტილება!

ის იმ პოლიტიკოსების რიტორიკას იმეორებს, რომლებიც ყველაფერს აკეთებენ სტატუსის მიღების საწინააღმდეგოდ და ქართველი ხალხის არჩევანის პრორუსულად მოსანათლად!

ამ ყველაფერთან ერთად, პრეზიდენტი უხეშად, უდავოდ და მიზანმიმართულად არღვევს საკუთარი ქვეყნის კონსტიტუციას!

ამ და სხვა წინაღობების, ანტიქართული და ფსევდოდასავლური მავნებლობების მიუხედავად, საქართველო გააგრძელებს ევროპული ოჯახის სრულფასოვანი და ღირსეული წევრობისკენ სვლას!“ – წერს მამუკა მდინარაძე.

30 აგვისტოს პრეზიდენტის ადმინისტრაციამ გაავრცელა ინფორმაცია, რომლის მიხედვითაც, სალომე ზურაბიშვილი 31 აგვისტოდან ევროპელ ლიდერებთან შეხვედრებს იწყებდა. პრეზიდენტის ადმინისტრაციაში განაცხადეს, რომ შეხვედრები კანდიდატის სტატუსს უკავშირდება. მოგვიანებით საქართველოს მთავრობამ სალომე ზურაბიშვილისთვის სამუშაო ვიზიტებზე უარის თქმასთან დაკავშირებით გაავრცელა განცხადება. როგორც განცხადებაშია ნათქვამი, სალომე ზურაბიშვილს საქართველოს მთავრობის განკარგულებით, 2023 წლის 3 აგვისტოს ოფიციალურად, წერილობით ეთქვა უარი გერმანიაში ვიზიტზე. ასევე, განცხადებაში საუბარია სხვა სამუშაო ვიზიტებთან დაკავშირებითაც, რომლებზეც პრეზიდენტს უარი ეთქვა. მმართველ გუნდში აღნიშნეს, რომ პრეზიდენტმა უხეშად დაარღვია საქართველოს კონსტიტუცია, რაზეც საჭიროა რეაგირება.

საქართველოს პრეზიდენტის ევროპელ კოლეგებთან შეხვედრები შეიძლება მხოლოდ ჩვენი ქვეყნის და ევროინტეგრაციის მტრებს აწუხებდეს – თუ რამე არღვევს დღეს საქართველოს კონსტიტუციას, ეს არის რუსული ხელისუფლება “ქართული ოცნების” სახით,- ამის შესახებ „ლელოს“ ერთ-ერთი ლიდერი მამუკა ხაზარაძე სოციალურ ქსელში წერს.

როგორც ხაზარაძე აღნიშნავს, “ქართული ოცნება” კონსტიტუციით დადგენილ პროდასავლურ არჩევანს უკეთებს საბოტაჟს.

“საქართველოს პრეზიდენტის ევროპელ კოლეგებთან შეხვედრები შეიძლება მხოლოდ ჩვენი ქვეყნის და ევროინტეგრაციის მტრებს აწუხებდეს (აშინებდეს).

თუ რამე არღვევს დღეს საქართველოს კონსტიტუციას, ეს არის რუსული ხელისუფლება “ქართული ოცნების” სახით, რომელიც კონსტიტუციით დადგენილ პროდასავლურ არჩევანს უკეთებს საბოტაჟს!

ევროპა ქართველი ხალხის არჩევანია, ევროპა ჩვენი ქვეყნისა და ჩვენი შვილების უსაფრთხო მომავალია“, – წერს ხაზარაძე.

შეგახსენებთ, გერმანიაში საქართველოს პრეზიდენტ სალომე ზურაბიშვილის ვიზიტი დაიწყო. ვიზიტის ფარგლებში სალომე ზურაბიშვილი უკვე შეხვდა გერმანიის ფედერაციული რესპუბლიკის პრეზიდენტ ფრანკ-ვალტერ შტაინმაიერს. შეხვედრის ამსახველ ფოტო და ვიდეომასალას პრეზიდენტი სოციალურ ქსელში თავად აქვეყნებს. პრეზიდენტის ადმინისტრაციის ცნობით, საქართველოს პრეზიდენტი სწორედ გერმანიაში ვიზიტით იწყებს საქართველოსთვის ევროკავშირის წევრობის კანდიდატი ქვეყნის სტატუსის მინიჭების მხარდასაჭერად ევროპელ ლიდერებთან შეხვედრებს.

ცნობისთვის, მთავრობის ადმინისტრაციამ პრეზიდენტ სალომე ზურაბიშვილის უცხოეთში ვიზიტის საკითხზე განცხადება გაავრცელა, სადაც ნათქვამია, რომ როგორც გერმანიაში, ასევე კიდევ 9 ქვეყანაში ვიზიტზე სალომე ზურაბიშვილს უარი ეთქვა.

წამსვლელი წავიდეს, თუ ვინმე იმისთვის არის ამ პარტიაში, რომ პარტიას ავნოს, მიბრძანდეს, – ამის შესახებ „ნაციონალური მოძრაობის“ წევრმა, გიორგი ბოტკოველმა განაცხადა.

გიორგი ბოტკოველს კითხვა დაუსვეს იმასთან დაკავშირებით, რომ ნიკა მელიას ფრთის წარმომადგენლები პარტიის დატოვებას განაგრძობენ.

როგორც გიორგი ბოტკოველმა აღნიშნა, „ნაციონალური მოძრაობა“ ძლიერდება და დადგმული სცენარები პარტიას არაფერს დააკლებს.

„დღეს პარტიიდან წასვლის კვირეული დაიწყო ალბათ და მერე პარტიის შექმნის კვირეულს გამოაცხადებს, უკეთესი იქნება ყველამ თავის საქმეს მიხედოს. იმედა კევლიშვილმა უკვე მეორედ დატოვა პარტია, იანვრის ბოლოს, როდესაც მას იგივე სტატუსი ჰქონდა გამზადებული, უბრალოდ ფრაქცია ეწერა მაშინ, ახლა ჩაანაცვლა პარტიით. მაშინ არ მისცეს უფლება, რომ პარტიიდან წასულიყო. მთავარი არის ერთი რამ, როგორც ჩანს, ვიღაცას არ მოსწონს ჩვენი აქტიურობა მაგალითად კახეთში. ყველა ადამიანი „ნაციონალური მოძრაობისთვის“ ღირებულია, მაგრამ თვითონაც არ ახსოვდა, რომ პარტიის წევრი იყო და დღეს უთხრეს, ეს განცხადება გაეკეთებინა. ამიტომ, ყველაფერი კარგად იქნება, წამსვლელი წავიდეს, თუ ვინმე იმისთვის არის ამ პარტიაში, რომ პარტიას ავნოს, მიბრძანდეს“, – განაცხადა ბოტკოველმა.

ამასთან, როგორც იმედა კევლიშვილმა აღნიშნა, რაც დღეს „ნაციონალურ მოძრაობაში“ ხდება, არის კატასტროფა.

„ყველაფერი დაიწყო „ნაციონალური მოძრაობის“ თავმჯდომარის არჩევნების დროს, ღიად განვაცხადე, რომ მხარს ვუჭერდი ნიკა მელიას, რადგან მიუღებელი იყო ჩემთვის ბრძოლის კულვარული მეთოდები. ნიკა მელია დამარცხდა და ამ დღიდან დაიწყო ბოიკოტი ჩვენ მიმართ, ვინც ნიკა მელიას ვუჭერდით მხარს. რაც პარტიაში ხდება, არის კატასტროფა, არაფორმალური მმართველობა. როცა შენ ედავები ხელისუფლებას და ეუბნები, რომ შენ გაქვს არაფორმალური მმართველობა, იმავეს არ უნდა აკეთებდე შენ პარტიაში. მე არ მიმაჩნია ლევან ხაბეიშვილი პარტიის თავმჯდომარედ“, – განაცხადა იმედა კევლიშვილმა.