სოხუმის დე ფაქტო უშიშროების სამსახური ქართულ სპეცსამსახურებს ოკუპირებული აფხაზეთის წინააღმდეგ სადაზვერვო საქმიანობის გააქტიურებაში ადანაშაულებს. შესაბამისი სიუჟეტი დე ფაქტო უწყების ვებ-გვერდზე გავრცელდა.

სიუჟეტში ნაჩვენებია ორი ქალის აღიარებითი ჩვენება, რომელთა გვარებია შენგელია და ხუხია. ისინი ამბობენ, რომ რამდენიმე წლის წინ ენგურის საკონტროლო-გამშვებ პუნქტზე საქართველოს მხრიდან მათ ვინმე ჯანო ძაგანია გაესაუბრა, რომელზედაც ისინი ამბობენ, რომ ქართული სპეცსამსახურების თანამშრომელია და აფხაზეთში საიდუმლო ობიექტების, მათ შორის სამხედრო ბაზების, ე.წ. უშიშროების სამსახურის ობიექტების და სამხედრო ტექნიკის გადაადგილებისთვის ფოტოსურათების გადაღებას და ამ ობიექტებთან დაკავშირებული სხვადასხვა ინფორმაციის გარკვევას ავალებდა. მანამდე ის ქალებს დაემუქრა, რომ თუ არ ითანამშრომლებენ, მათ ნათესავებს საქართველოში სერიოზული პრობლემები შეექმნებოდათ. დაკავებული ქალების თქმით, ისინი ფოტოებს „უოთს აპის“ და სხვა მესენჯერების გამოყენებით გადასცემდნენ.

„საქართველოს სპეცსამსახურებისთვის პრიორიტეტულ ამოცანებს შორის არის აფხაზეთის წამყვან სახელმწიფო უწყებებში, სამართალდამცველ სტრუქტურებში და პოლიტიკურ პარტიებში შეღწევა. საქართველოს სპეცსამსახურების მუშაობა სულ უფრო კარგად ორგანიზებული ხდება და ისინი  კარგად არიან აღჭურვილები. ისინი ყველა შესაძლო მეთოდს იყენებენ ინფორმაციის მოსაპოვებლად და მას აფხაზეთში დესტაბილიზაციისთვის იყენებენ. მათ სურთ კრიტიკულ ობიექტებთან დაკავშირებით ინფორმაციის მოგროვება და სახელმწიფო სტრუქტურებში შეღწევა. ე.წ. უშიშროების სამსახური აფრთხილებს მოქალაქეებს, რომ საქართველოს სპეცსამსახურები ძალზე გააქტიურებულები არიან“ – აცხადებენ ე.წ. უშიშროების სამსახურში.

დე ფაქტო უწყება საკანონმდებლო სოხუმის დე ფაქტო მთავრობისგან და პარლამენტისგან ცვლილებების მიღებას მოითხოვს, რომელიც მას დამატებით უფლებებს მიანიჭებს.

„ნაციონალურ მოძრაობას“ როცა კეზერაშვილის მიმართ მარტო იმიტომ არ აქვს კითხვები, რომ ის მათი დამფინანსებელია, ნიშნავს, რომ ამ გარემოებამ გამოააშკარავა მათი ნამდვილი ბუნება, – ამის შესახებ ადამიანის უფლებათა დაცვის კომიტეტის თავმჯდომარე მიხეილ სარჯველაძემ განაცხადა.

სარჯველაძის თქმით, მათ არასდროს ჰქონიათ განწყობა, ყოფილიყვნენ თავისუფლების, დემოკრატიის, სამართლებრივი სახელმწიფოს მხარდამჭერები ამ ქვეყანაში.

„მათთვის ეს არის მხოლოდ და მხოლოდ დროებითი ფასადი, რომ რეალური ზრახვები იყოს სადღაც შეფარებული და რაღაც ფორმით განხორციელებული. ეს არის ხალხი, რომლებსაც მათ შორის დრესტრუქციული, სისხლიანი რევოლუციების გზით ძალაუფლების სურვილი ამოძრავებთ და ამას ნიღბავენ დემოკრატიისა და ადამიანის უფლებათა მხარდაჭერით. ზუსტად ამ ტენდენციასთან და მოვლენასთან გვაქვს საქმე, როდესაც ჩვენი რომელიმე ოპოზიციონერი კოლეგა თავს უფლებას აძლევს, არ აკრიტიკოს კეზერაშვილი, რადგან მისთვის დღეს პოლიტიკურად მომგებიანია, ხმა არ ამოიღოს, როცა ამაზე „ბიბისი“ საუბრობს, და აკრიტიკოს თუნდაც ხელისუფლება, როდესაც ასევე შირმად იყენებენ ჩვენს ქვეყანაში კეზერაშვილის ვითომ პოლიტიკურ დევნას. არსებობს ცნობილი გამონათქვამი, რომ შეუძლებელია, ადამიანი მოატყუო და თან მუდმივად, ადრე თუ გვიან, ასეთი ტყუილები იშიფრება. ასეთ შემთხვევასთან გვაქვს საქმე. რაღაც ეტაპზე ვიღაცას გამოუვიდა, მათ შორის ევროპარლამენტშიც არიან ადამიანები, რომლებიც ჩვენს ოპოზიციას გულშემატკივრობენ და ეთიკური სტანდარტებით შეიძლება, ჩვენი ოპოზიციონერი კოლეგებისგან დიდად შორს არ იყვნენ წასული. როდესაც ეს ადამიანები ახერხებენ და გარკვეულ რეზოლუციებში შეიძლება, კეზერაშვილის გვარი დადებით კონტექსტში ხვდებოდეს, ეს მუდმივი ვერ იქნება და ვერ იქნება ყველაზე გათვილი, რომ ყველა მოტყუვდება. როცა ეს აშკარავდება, უკლებლივ ყველას უქმნის დისკომფორტს. მათ შორის, იმ ევროპარლამენტარ კოლეგებსაც, რომლებსაც არ ჰქონდათ ეს ინიციატივა, მაგრამ ენდნენ საკუთარ კოლეგებს, ვინც შეაჩეჩა ფრაზეოლოგია, რომელიც არის მოხვედრილი რეზოლუციებში, ბუნებრივია, გაუჩენს კითხვის ნიშნებს“, – განაცხადა მიხეილ სარჯველაძემ.

„ბიბისი“ აქვეყნებს ჟურნალისტური გამოძიების მასალებს, სადაც გაშიფრულია ევროპელი პენსიონრების გაძარცვის სქემა, ხოლო თაღლითური სქემის ორგანიზატორად დავით კეზერაშვილია დასახელებული.

„მივესალმები ბრიფინგზე გაჟღერებულ ამ ინიციატივას, რომ სამშაბათს, 18 აპრილს ეს საკითხი უნდა გავიდეს სესიაზე და ოპოზიცია უნდა იყოს მობილიზებული, ყველანი უნდა ვიყოთ ადგილზე, რომ ხმა მივცეთ და ეს საგამოძიებო კომისია შექმნას“, – ამის შესახებ ფრაქცია „ერთიანი ნაციონალური მოძრაობის“ დეპუტატმა ანი წითლიძემ განაცხადა.

ოპოზიციონერი დეპუტატების ხათუნა სამნიძის და თამარ კორძაიას განცხადებით, სასამართლოში სისტემურ პრობლემებთან და კორუფციასთან დაკავშირებით საგამოძიებო კომისიის შექმნის საკითხზე კენჭისყრა 18 აპრილის სხდომაზე შედგება, რასაც გამოეხმაურა ანი წითლიძე და თქვა, რომ მიესალმება ამ ინიციატივას და ახლა დაპირისპირების ნაცვლად, მთელი ოპოზიცია უნდა მობილიზდეს სამშაბათის სესიაზე და შეიქმნას საგამოძიებო კომისია.

„მივესალმები ბრიფინგზე გაჟღერებულ ამ ინიციატივას, მეც ზუსტად ასე ვთვლი, რომ არანაირი დაპირისპირების და ურთიერთბრალდებების დრო არ არის და ისტერიკა, რომელიც ამ საკითხთან დაკავშირებით ატყდა არის უსაფუძვლო და არის ის, რაც მხოლოდ „ქართულ ოცნებას“ აწყობს. ამიტომ, სანამ ეს საკითხი დადგება კენჭისყრაზე საგამოძიებო კომისიასთან დაკავშირებით, მანამდე ჩვენ ყველა უნდა შევეცადოთ, რომ ეს ურთიერთბრალდებები და უსაფუძვლო ბრალდებები ჩვენზე შეწყდეს. ყველაზე მნიშვნელოვანი საკითხები არის არა ის ურთიერთბრალდებები, არამედ ის, რომ სამშაბათს ეს საკითხი უნდა გავიდეს სესიაზე და ოპოზიცია უნდა იყოს მობილიზებული, ყველანი უნდა ვიყოთ ადგილზე, რომ ხმა მივცეთ და ეს საგამოძიებო კომისია შეიქმნას“, – აღნიშნა ანი წითლიძემ.