საფრანგეთში, საპროტესტო აქციებზე შეტაკებების შედეგად, 108 პოლიციელი დაშავდა

02:59 - 02/05/2023

საფრანგეთში, საპროტესტო აქციებზე შეტაკებების შედეგად, 108 პოლიციელი დაშავდა. ამის შესახებ საფრანგეთის შინაგან საქმეთა მინისტრმა, ჟერალდ დარმანენმა განაცხადა.

მინისტრის ცნობით, პარიზში სერიოზული დაზიანებები ერთმა პოლიციელმა მიიღო, რომელსაც „მოლოტოვის კოქტეილი“ ესროლეს. მას ხელებისა და სახის არეში დამწვრობები აქვს მიღებული.

პირველ მაისთან დაკავშირებით საფრანგეთის ქალაქების ქუჩებში ასობით ათასი ადამიანი გამოვიდა, რომლებიც საპენსიო რეფორმას აპროტესტებენ და პრეზიდენტ ემანუელ მაკრონის გადადგომას მოითხოვენ.

საპროტესტო აქციებზე დემონსტრანტებსა და პოლიციას შორის მომხდარი შეტაკებებისას, სულ მცირე, 108 სამართალდამცველი დაშავდა.

არეულობის დროს პოლიციამ 291 ადამიანი დააკავა.

რადიკალურმა ჯგუფებმა საპროტესტო აქციაზე პიროტექნიკა და „მოლოტოვის კოქტეილები“ ისროლეს, რის შემდეგაც პოლიციამ ცრემლსადენი გაზი და წყლის ჭავლი გამოიყენა.

მედიის ცნობით, არეულობისას რამდენიმე დემონსტრანტი დაშავდა, თუმცა მათი ზუსტი რაოდენობა უცნობია.

პარიზის გარდა, აქციის მონაწილეებსა და პოლიციას შორის შეტაკებები იყო ლიონში, ნანტში, მარსელში, ტულუზასა და რენში. მომიტინგეებმა ცეცხლი წაუკიდეს ავტომობილებს, დაარბიეს მაღაზიები და ოფისები. გავრცელდა ინფორმაცია, რომ მომიტინგეებმა გარკვეული დროით დაიკავეს სასტუმრო ქალაქ მარსელში.

შეგახსენებთ, რომ 17 მარტს, საფრანგეთის მთავრობამ სადავო საპენსიო რეფორმის კანონი პარლამენტში კენჭისყრის გარეშე მიიღო. ქვეყნის პრეზიდენტმა, ემანუელ მაკრონმა საფრანგეთის კონსტიტუციაში გაწერილი სპეციალური უფლებამოსილებით ისარგებლა, რომლითაც მას შეუძლია პრემიერ-მინისტრს სთხოვოს, კანონი კენჭისყრის გარეშე მიიღოს.

ახალი საპენსიო რეფორმის მიხედვით, საფრანგეთში საპენსიო ასაკი 62-იდან 64 წლამდე გაიზრდება.

💬 "Les policiers n'allaient pas au contact gratuitement"

➡ Le témoignage de Jérôme Durain, sénateur PS et observateur au sein de la BRAV pic.twitter.com/tSAhxfdRh7

— BFMTV (@BFMTV) May 1, 2023

თურქეთში, სტუდენტებით სავსე ავტობუსი ამობრუნდა – 3 ადამიანი დაიღუპა

02:52 - 02/05/2023

თურქეთის ქალაქ ბურსაში, სტუდენტებით სავსე ავტობუსი ამოტრიალდა, რის შედეგადაც 3 ადამიანი დაიღუპა და 44 დაშავდა.

თურქული მედიის ინფორმაციით, ტურისტული ავტობუსი, რომელიც ჩანაქკალედან ანკარას მიმართულებით მიემგზავრებოდა, ბარიერს შეეჯახა.

ბურსას გუბერნატორის, იაკუპ ჯანბოლათის განცხადებით, ავარიის დროს ავტობუსში 47 ადამიანი იმყოფებოდა, მათ შორის 3 მასწავლებელი და 2 მძღოლი იყო.

დაშავებულები სასწრაფო დახმარების მანქანით საავადმყოფოებში გადაიყვანეს.

https://www.haberturk.com/bursa-da-ogrencileri-tasiyan-tur-otobusu-devrildi-olu-ve-yaralilar-var-3587772

აშშ-ში სომხეთისა და აზერბაიჯანის საგარეო საქმეთა მინიტრების შეხვედრა გაიმართა

02:38 - 02/05/2023

აშშ-ში სომხეთისა და აზერბაიჯანის საგარეო საქმეთა მინიტრების შეხვედრა გაიმართა.

ორმხრივ შეხვედრამდე ჯეიხუნ ბაირამოვსა და არარატ მირზოიანს შორის მოლაპარაკებები გაიმართა სახელმწიფო მდივნის, ენტონი ბლინკენის შუამავლობით. მანამდე კი ბლინკენმა სომეხ და აზერბაიჯანელ კოლეგებთან ორმხრივი შეხვედრები გამართა.

როგორც სომხური მედია სომხეთის საგარეო საქმეთა სამინისტროზე დაყრდნობით იუწყება, შეხვედრაზე განიხილეს რეგიონში უსაფრთხოების, ასევე სომხეთსა და აზერბაიჯანს შორის ურთიერთობების დარეგულირების საკითხები. მხარეები შეეხნენ ჰუმანიტარულ სიტუაციას, რომელიც აზერბაიჯანის მიერ ლაჩინის დერეფნის ბლოკირების შედეგად შეიქმნა.

შეხვედრა არლინგტონში, ჯორჯ შულცის ცენტრში გაიმართა.

შეხვედრის შესახებ ინფორმაციას აზერბაიჯანული მხარეც ავრცელებს.

2 მაისის ასტროლოგიური პროგნოზი

01:34 - 02/05/2023

რას გვირჩევენ ვარსკვლავები 2 მაისისთვის

ვერძი

ამ დღეს გარშემო მყოფებს თქვენი შრომისმოყვარეობითა და მოტივაციით გააოცებთ. კონკურენტებზე გამარჯვებას და უბრალოდ შედეგის კი არა, საუკეთესო შედეგის მიღებას ცდილობთ! ხელსაყრელი დღეა ფლირტისა და სიყვარულისთვის – კონკურენტების გასწრებისა და გამარჯვების უნარი აქაც გამოგადგებათ.

კურო

ამ დღეს უსაქმოდ ჯდომას არ აპირებთ. თუნდაც საქმე არ გქონდეთ, რამეს მაინც გამონახავთ. ნებისმიერ დავალებას კეთილსინდისიერად და გულმოდგინედ შეასრულებთ. ერთადერთი სირთულე ისაა, რომ სხვებისგანაც იმავეს ელით და თუ ვინმე თქვენს მოთხოვნებს არ აკმაყოფილებს, შეგიძლიათ პირდაპირ პირდაპირ სახეში უთხრათ.

ტყუპები

ეს დღე ურთიერთობებით სავსეა. ადამიანებს მაგნიტივით იზიდავთ. რასაც არ უნდა აკეთებდეთ, ყველაფერი გარშემომყოფთა ყურადღებას იწვევს. ადამიანები რჩევისა და დახმარების თხოვნით მოგმართავენ და უარს არავის ეუბნებით. თქვენი ორატორული უნარები და ადამიანების დარწმუნების ნიჭი ჩანაფიქრის განხორციელებაში დაგეხმარებათ.

კირჩხიბი

ეს დღე მიმდინარე საქმეებს უნდა დაუთმოთ, რაც ყველაზე კარგად გამოგივათ. ჰოროსკოპის ვარსკვლავები სიზუსტითა და ყურადღებით დაგაჯილდოებთ, რაც საშუალებას მოგცემთ აქამდე დაუძლევენ ამოცანებს გაუმკლავდეთ. თუმცა ზედმეტად მნიშვნელოვანი, საპასუხისმგებლო ამოცანებისგან ჯერჯერობით თავი უნდა შეიკავოთ. ამის დრო ჯერ არ დამდგარა.

ლომი

ცნობისმოყვარეობით სავსე ხართ და თქვენ ირგვლივ ყველა და ყველაფერი გაინტერესებთ. იმდენად ყურადღებიანი მსმენელი ხართ, რომ ადამიანები მზად არიან საკუთარი საიდუმლო გაგიმხილონ. ურთიერთობების გარდა, ეს დღე საკუთარ ინტერესებსა და გატაცებებსაც უნდა დაუთმოთ. ამ დღეს თქვენთვის ყველაზე დამღლელი რუტინული საქმეები იქნება.

ქალწული

ამ დღეს ქალწულებს განსაკუთრებული წარმატება ბიზნესთან დაკავშირებულ საქმიანობაში ელით – შესყიდვები სასარგებლო იქნება, გეგმები და პროექტები მოგებიანი. ვარსკვლავები გირჩევენ, ძველი გეგმების განხორციელებას შეუდგეთ. რომელიღაც ნაბიჯის გადადგმისთვის ერთი წვეთი გამბედაობა გაკლიათ, მაგრამ ამ წვეთს მთელი ცხოვრების შეცვლა შეუძლია.

სასწორი

თქვენს ცხოვრებაში ახალი ეტაპის დაწყებისა და გეგმების განხორციელებისთვის ხელსაყრელი დღეა. ეცადეთ პლანეტების კეთილგანწყობით ისარგებლოთ და სურვილი აისრულოთ. თუ დიდი ხანია ახალი პროექტის დაწყებას, იმიჯის შეცვლას, მავნე ჩვევებისგან გათავისუფლებას, ახალი სამსახურის პოვნას და ვარჯიშის დაწყებას გეგმავთ, უკეთეს დროს ვერ ნახავთ. ცვლილებების დრო დადგა – იმოქმედეთ!

მორიელი

ამ დღეს ნებისმიერ საქმეს ზედმეტი დაძაბულობის გარეშე გაუმკლავდებით. საკუთარ თავთან და სამყაროსთან ჰარმონიაში ხართ, რაც ადამიანებთან ურთიერთობაში უპირატესობას მოგცემთ. სავსებით შესაძლებელია, რომ თქვენს ცხოვრებაში სასიამოვნო მოვლენა მოხდეს, რომელიც ძალიან დიდხანს გემახსოვრებათ. პლანეტების განლაგება საშუალებას მოგცემთ, რომ ეს დღე არა მხოლოდ სასიამოვნოდ, არამედ სასარგებლოდაც გაატაროთ.

მშვილდოსანი

რისკების არსებობის გამო ვარსკვლავები ფულთან სიფრთხილის გამოჩენას გირჩევენ. უპირველეს ყოვლისა, ეს რისკები შეიძლება თქვენი უყურადღებობითა და გულუბრყვილობით იყოს გამოწვეული. ეს რომ არ მოხდეს, ეცადეთ საკუთარი ხარჯები აკონტროლოთ. გირჩევთ შოპინგისთვის გარკვეული ლიმიტი დააწესოთ და ამ ლიმიტს არ გადააჭარბოთ. თავი შეიკავეთ ინვესტიციებში და აზარტული თამაშებში მონაწილეობისგან.

თხის რქა

ვარსკვლავები ბედის საჩუქრებით განებივრებენ. სავარაუდოდ, ბიზნესსა თუ ფინანსურ სფეროში სასიამოვნო სიურპრიზი გელით, რომელიც თქვენს პირად ცხოვრებაზე ან ადამიანებთან ურთიერთობაზე აისახება. პროექტი, რომელზეც დიდი დრო და ძალისხმევა დახარჯეთ, ნაყოფს გამოიღებს – შესაძლოა, პირველი მოგება მიიღოთ, რაც დაადასტურებს, რომ სწორ გზაზე ხართ.

მერწყული

შესაძლოა, სიტუაციამ თქვენი მზადყოფნა მოითხოვოს, ამიტომ მთელი დღე მოვლენებს თვალი უნდა ადევნოთ. გამორიცხული არ არის, თაღლითების მსხვერპლი ან არახელსაყრელი გარემოებების მძევალი გახდეთ. ამის თავიდან ასაცილებლად, ვარსკვლავები გირჩევენ, რომ თქვენ გარშემო განვითარებულ მოვლენებს ყურადღებით დააკვირდეთ. იქნებ ვიღაც თქვენს მოტყუებას ცდილობს? ყოველი შემთხვევისთვის, უცნობი ადამიანების მიმართ ნდობის რეიტინგი ამ დღეს ნულამდე უნდა შეამციროთ.

თევზები

ამ დღეს გარშემომყოფებთან თქვენს ურთიერთობას იდეალურს ვერ ვუწოდებთ. შესაძლოა, კონფლიქტების პროვოცირებას თავად ახდენთ, შესაძლოა, ამისკენ გარშემო მყოფების კრიტიკა და ჭორაობა გიბიძგებთ. ასეა თუ ისე, ვარსკვლავები გირჩევენ, კონფლიქტისთვის მოემზადოთ. თუ არ გსურთ, რომ მთელი დღე ურთიერთობების გარკვევაში გაატაროთ, უფრო მოქნილი და დიპლომატიური უნდა გახდეთ.

” ორი მილიარდი დოლარი აქვთ გაჩერებული ბანკში და ეს არის დე ფაქტო, არაფორმალური სანქცია ბიძინა ივანიშვილის წინააღმდეგ”-მამუკა მდინარაძე

00:27 - 02/05/2023

მე არ ვიცი, მეტი როგორ უნდა დაასანქცირონ ბიძინა ივანიშვილი, როდესაც უკვე ყველამ იცის, რომ თუკი რაიმე მკაცრი სანქცია შეიძლება იყოს გამოყენებული ამ ადამიანის წინააღმდეგ, უკვე გამოყენებულია, – ასე უპასუხა „ქართული ოცნების“ აღმასრულებელმა მდივანმა, მამუკა მდინარაძემ ბიძინა ივანიშვილისთვის სანქციების დაწესების თაობაზე გარე აქტორების მხრიდან გახშირებული მოწოდებების შესახებ დასმულ შეკითხვას.

როგორც მდინარაძემ აღნიშნა, უკრაინაში ომის დაწყების შემდეგ ბიძინა ივანიშვილს ბანკში თანხის განკარგვასთან დაკავშირებით პრობლემები შეექმნა, რაც არაფორმალური სანქციის ტოლფასია. მისივე თქმით, განსხვავებით იმ პირებისგან, რომლებიც ოფიციალურად სანქცირებულთა სიაში არიან, ბიძინა ივანიშვილის მიმართ დე ფაქტო სანქციების დაწესების მიზეზი არავის განუმარტავს.

„ორი მილიარდი დოლარი აქვთ გაჩერებული ბანკში და ეს არის დე ფაქტო, არაფორმალური სანქცია, რომელიც უკვე წელიწადზე მეტია, მას შემდეგ, რაც ომი დაიწყო, გამოყენებულია ბიძინა ივანიშვილის წინააღმდეგ. ამაზე მკაცრი სანქცია ალბათ არც გაგიგიათ მიმდინარე პერიოდში. კონკრეტულ ადამიანებს დაადეს სხვადასხვა სანქცია. თითოეული ადამიანის სანქცირებას ყოველთვის რაღაც განმარტება მოჰყვებოდა ხოლმე. ბიძინა ივანიშვილი დე ფაქტო, არაფორმალური სანქციით დასანქცირებულია ისე, რომ არანაირი განმარტება მის დასანქცირებას არ მოჰყოლია. ამიტომ უფრო მეტ სანქციას ვერაფერს დაადებენ, რაც უკვე პრაქტიკაში გააკეთეს და არა – სამომავლო პერსპექტივაში“, – განაცხადა მამუკა მდინარაძემ.

ალექსეი გონჩარენკოს ახლო ნათესავები დიდი ოდენობით სახელმწიფო ქონების მითვისების გამო დააკავეს

00:05 - 02/05/2023

უკრაინის პარლამენტის დეპუატის, ალექსეი გონჩარენკოს ახლო ნათესავები დიდი ოდენობით სახელმწიფო ქონების მითვისების გამო დააკავეს.

ინფორმაციას ამის შესახებ ადგილობრივი მედია უკრაინის უსაფრთხოების სამსახურზე დაყრდნობით ავრცელებს.

უკრაინის უსაფრთხოების სამსახურის ცნობით, ოდესის საოლქო საბჭოს დეპუტატი მეუღლესთან ერთად, რომელიც ალექსეი გონჩარენკოს ბიძაშვილია, ცდილობდა ფოსტის შენობის მითვისებასა და 280 ჰექტარი მიწის დასაკუთრებას.

გამომძიებლებმა დაადგინეს, რომ წყვილს საკუთრების უფლების შესახებ დოკუმენტები ნოტარიუსის მეშვეობით ჰქონდა გაყალბებული, ხოლო შემდეგ ეჭვმიტანილებმა სახელმწიფო ქონება საკუთარ ფირმას გადასცეს.

უკრაინის უსაფრთხოების სამსახურში მიიჩნევენ, რომ საუბარია ათობით მილიონი გრივნის ღირებულების ქონებაზე. საკურორტო სოფელში მდებარე ფოსტის შენობები და მიმდებარე ტერიტორია სახელმწიფო საკუთრებაში დაბრუნდა.

ალექსეი გონჩარენკოს თქმით, მისი ნათესავი იმის გამო დააკავეს, რომ თავად გონჩარენკო უკრაინის პრეზიდენტის აპარატის ხელმძღვანელს, ანდრეი ერმაკს აკრიტიკებს.

„რისთვის? იმის გამო, რომ ვცდილობ ვიბრძოლო სამხედრო ანაზღაურებისთვის, წვევამდელების, შვებულების საკითხის დაყენებისთვის და ზოგადად ერმაკის კრიტიკისთვის. ეს არის ჩემზე პოლიტიკური ზეწოლა“, – განაცხადა გონჩარენკომ.

ამასთან, სახალხო დეპუტატი აცხადებს, რომ უკრაინის პრეზიდენტის ოფისის წარმომადგენლები მასთან მოლაპარაკებას ცდილობდნენ.

„[მითხრეს], რომ ყველაფრის მოგვარება შეიძლება. უბრალოდ ერმაკს ნუ აკრიტიკებ. ხვალ კი ყველას გამოუშვებენ წინასწარი დაკავების იზოლატორიდან და ყველაფერი ძალიან კარგად იქნება. კლოუნები, ეს მათ ტელეფონით ვუთხარი“, – განაცხადა გონჩარენკომ.

5000-მდე აბონენტს გაზის მიწოდება დროებით შეუწყდება

23:51 - 01/05/2023

ავარიული ქსელის რეაბილიტაციის გამო 5000-მდე აბონენტს გაზის მიწოდება დროებით შეუწყდება. ამის შესახებ ინფორმაციიას „თბილისი ენერჯი“ ავრცელებს.

კერძოდ, 2 მაისს 22:00 საათიდან ავარიული ქსელის სარეაბილიტაციო სამუშოების გამო გაზის მიწოდება შეუწყდება: წმ. მოწამე ვასილისკოს ქ. 14, ალექსანდრე იოსელიანის III შეს. 1, II შეს. 2, II შეს. 2-8-6 (წმ. ვასილისკოს ქ. 8), II შეს. 3, ალ. იოსელიანის ქ. 95, 99 (ჯიქიას მიმდებარე ტერიტორია, ნაკვ. 28), 101, ჯიქიას ქ. 5-ში (ელიზბარ მინდელის ქ. 12) მდებარე შპს ,,დონა გრუპი”-ს, ელიზბარ მინდელის ქ. 9ბ-ში მდებარე შპს ,,გრინლაიფ”-ის, ელიზბარ მინდელის ქ. 11, ელიზბარ მინდელის ქ. 12, ელიზბარ მინდელის ქ. 7ბ, ჯიქიას ქ. 9ა-ში (იგივე 9ა-45 და პოლიტკოვსკაიას ქ. 45) მდებარე შპს “საქაგრომანქანას”, 9ა-51, პოლიტკოვსკაის ქ. 55-ში მდებარე შპს “ჯეო ტექინვესტი”-ს, პოლიტკოვსკაიას ქ. 57-ში (ჯიქიას ქ. 9ა-57) – შპს “სოლო დეველოპმენტი”-ს, ჯიქიას ქ. 9ა-1, 9ა-2, 9ა-3, პოლიტკოვსკაიას ქ. 32-30-ში მდებარე შპს “სეუ გრუპ დეველოპმენტ კომპანი”-ს, პოლიტკოვსკაიას ქ. 36-ში – შპს “ჯიქია 36”-ის, შპს “კომპაქტ დეველოპმენტი”-ს საცხოვრებელი კორპუსისა და ჯიქიას ქ. 7-ში მდებარე ,,A” და ,,B” ბლოკის (ახლ. ანნა პოლიტკოვსკაიას ქ. 36 და 38), ა. პოლიტკოვსკაიას ქ. 41ა (იგივე ჯიქიას ქ. 9ა, 9ა-3), ა. პოლიტკოვსკაიას ქ. 20, გაზის მიწოდება შეუწყდება ანნა პოლიტკოვსკაიას ქ. 10/12, 10.12. 12, 12ა-ში მდებარე შპს ,,აპ დეველოპმენტი”-ს, შპს ,,ნოვო დეველოპმენტი”-ს საცხოვრებელი კორპუსების, ასევე პოლიტკოვსკაიას ქ. 22ა-ში მდებარე შპს ,,ნოვო ჯიქია 22″-ს საცხოვრებელი კორპუსის მოსახლეობას. ა. პოლიტკოვსკაიას ქ. 10/12-ში მდებარე შპს ,,ნოვო დეველოპმენტი”-ს, ა. პოლიტკოვსკაიას ქ. 47 (ჯიქიას ქ. 9), ა. პოლიტკოვსკაიას ქ. 57-ში მდებარე შპს ,,სოლო დეველოპმენტი”-ს, ა. პოლიტკოვსკაიას ქ. 59 (იგივე ა. პოლიტკოვსკაიას ქ. 9ა-57), ელიზბარ მინდელის ქ. 9ე-ში (ვაკის რაიონის ქუჩა, ნაკვ. 005/086) მდებარე შპს ,,გრინ ლაიფი”-ს, ა. პოლიტკოვსკაიას ქ. 46ა (ჯიქიას ქ. 18), ა. პოლიტკოვსკაიას ქ. 44, 48, 50, 50-1, 50-2 (ჯიქიას ქ. 18ბ, 18გ), ანა პოლიტკოვსკაიას ქ. 65, ჯიქიას ქუჩის მიმდებარედ, ნაკვ. 31/45-ში (წმ. მოწამე ვასილისკოს ქ. 10) მდებარე შპს ,,ანკო”-ს, წმ. ვასილისკოს ქ. 3 (იგივე ჯიქაის ქ. 7, 7-ის მიმდებარედ), ჯიქიას ქუჩის მიმდებარედ, ნაკვ. 28, ჯიქიას ქუჩის მიმდებარედ შპს ,,კომპაქტ დეველოპმენტი”-ს, ჯიქიას ქუჩის მიმდებარედ, 50-52-ში მდებარე შპს ,,კომპაქტ +”-ის, ომარ ფხაკაძის ქ. 26-ში მდებარე ამხ. ,,ფხაკაძე 26″-ის საცხოვრებელი კორპუსების მოსახლეობას, ასევე ალექსანდრე იოსელიანის, ნაფეტვრების, ჯიქიას, ძოწის ქუჩაზე (ლისის მიმდებარედ) მცხოვრებ კერძო სექტორის მოსახლეობის ნაწილს, აგრეთვე გაზმომარაგება შეუწყდება აღნიშნულ ტერიტორიაზე მსხვილ და მცირე კომერციულ ობიექტებს, მათ შორისაა: შსს ეკონომიკური დეპარტამენტი, სსიპ ”სოხუმის უნივერსიტეტი”, სამთო ინსტიტუტი, შპს ,,ასორტი ვერე”, შპს “ევრორეგიონალური სასწავლო უნივერსიტეტი”, შპს ,,სისტემ ნეტ”, შპს ,,მვპ სტამბა”, გრიგოლ ხანძთელის სახელობის ტაძარი და სხვა.

გაზმომარაგების აღდგენა დაიწყება 3 მაისის 09:00 საათიდან და დასრულდება 20:00 საათისთვის.

“თბილისი-ენერჯი” ბოდიშს გიხდით აბონენტებს შექმნილი დისკომფორტის გამო. აღნიშნული სამუშოები აუცილებელია დედაქალაქის უსაფრთხო და უწყვეტი გაზმომარაგებისთვის.

“ცალ ფეხზე დგომით არა, ორ ფეხზე, მყარად უნდა ვიაროთ ევროპულ გზაზე” -მამუკა მდინარაძე

22:53 - 01/05/2023

იქ იყო უამრავი ადამიანი, რომელიც ახმოვანებდა პატრიოტულ მესიჯებს და საქართველოს პრეზიდენტთან დაკავშირებულ შეფასებაში მეტწილად ვეთანხმებოდი, იქიდან გამომდინარე, რომ ვინც უზრუნველყო მისი საქართველოს პრეზიდენტად არჩევა, ამ ადამიანების და პრეზიდენტის პოზიციები რადიკალურად ასცდა ერთმანეთს, – ასე გამოეხმაურა ფრაქცია „ქართული ოცნების“ თავმჯდომარე, მამუკა მდინარაძე გუშინდელ აქციაზე, პრეზიდენტ სალომე ზურაბიშვილისადმი გაჟღერებულ განცხადებებს.

მდინარაძემ ასევე უპასუხა ჟურნალისტის კითხვას – იზიარებს თუ არა ამავე აქციის მონაწილეების განცხადებების შინაარსს, რომ საქართველომ ნეიტრალიტეტი უნდა აირჩიოს.

„ნეიტრალიტეტს არ ვეთანხმები, იმიტომ, რომ საქართველოს აქვს არჩეული კურსი, რომელიც კონსტიტუციაში ჩვენ ჩავწერეთ. მეღიმება ხოლმე, ნაცმოძრაობა და მისი კლასტერი აქეთ რომ გვამუნათებს – „საქართველოს კონსტიტუციაში წერია, რომ საქართველოს მომავალი არის ევროპა…“ – ჩვენ ჩავწერეთ ეს კონსტიტუციაში. შეიძლება ეს მოსაზრება იყოს და ნებისმიერ ადამიანს თავისი აზრი აქვს, მაგრამ საქართველოს თავისი კურსი აქვს.

ამ ქვეყნის თითოეული მოქალაქის ვალია იფიქროს ეროვნულ ინტერესებზე და ამ ეროვნული ინტერესების გათვალისწინებით ევროპული ოჯახის სრულფასოვან წევრობაზე. როგორც ჩვენი ოპონენტები წამოცდენებში აიხლართებიან ხოლმე, ცალ ფეხზე დგომით კი არა, არამედ ორ ფეხზე, მყარად უნდა ვიაროთ ევროპულ გზაზე. ადრე თუ გვიან შედეგი დადგება, ეს ქვეყანა გახდება ევროპული ოჯახის სრულფასოვანი წევრი, დაუბრუნდება თავის ბუნებრივ ადგილს და ღირსებას, ეროვნულ იდენტობას და ეროვნულ თავმოყვარეობას შევინარჩუნებთ. ეს არის ერთ-ერთი უპირატესი მიზანი “, – აცხადებს მდინარაძე.

პატარა ფოთში ავტოსაგზაო შემთხვევას ორი ადამიანი ემსხვერპლა

22:00 - 01/05/2023

ხობის მუნიციპალიტეტის სოფელ პატარა ფოთში მომხდარ ავტოსაგზაო შემთხვევას რვა წლის ბავშვისა და შუახნის მამაკაცის სიცოცხლე ემსხვერპლა.

არსებული ინფორმაციით, მსუბუქი ავტომობილი ორ ქვეითს იმ დროს დაეჯახა, როცა ისინი ქუჩის გადაკვეთას ცდილობდნენ.

ადგილზე მისულ სასწრაფო-სამედიცინო დახმარების ბრიგადას ორივე მათგანი გარდაცვლილი დახვდა.

სასამართლომ ლაზარე გრიგორიადისი პატიმრობაში დატოვა

20:45 - 01/05/2023

პოლიციელზე თავდასხმისა და ნივთის დაზიანების ფაქტებზე ბრალდებული ლაზარე გრიგორიადისის მიმართ აღკვეთი ღონისძიების სახით შეფარდებული პატიმრობა სასამართლომ ძალაში დატოვა. მოსამართლემ არ დააკმაყოფილა დაცვის მხარის მოთხოვნა 20 000-ლარიანი გირაოს შეფარდების შესახებ.

სხდომაზე დაცვის მხარე პატიმრობის გირაოთი შეცვლას ითხოვდა, საწინაამღდეგო მოთხოვნა ჰქონდა პროკურორს, რომეიც ლაზარე გრიგორიადისის პატიმრობაში დატოვებას ითხოვდა.

ლაზარე გრიგორიადისმა სხდომაზე აღნიშნა, რომ მას მიმალვა არ სურს.

„მიმალვის სურვილი რომ მქონოდა, ერთ თვეში დავიმალებოდი. ის ტანსაცმელი მეცვა დაკავებისას, რომელიც აქციაზე მეცვა და არ გამინადგურებია არაფერი“, – აღნიშნა ბრალდებულმა.

სასამართლო სხდომის პარალელურად, ლაზარე გრიგორიადისის გათავისუფლების მოთხოვნით, საპროტესტო აქცია მიმდინარეობდა. აქციას ესწრებოდნენ აქტივისტები და პოლიტიკოსები.

რუსთაველის გამზირზე 7, 8, 9 მარტს გამართულ აქციაზე პოლიციელზე თავდასხმისა და ნივთის დაზიანების ფაქტებზე ბრალდებულ ლაზარე გრიგორიადისს აღკვეთის ღონისძიებად პატიმრობა 31 მარტს შეეფარდა. გამოძიების ინფორმაციით, გრიგორიადისმა საპროტესტო აქციაზე პოლიციის თანამშრომლებს ქვები და ე.წ. მოლოტოვის კოქტეილები ესროლა, რის შედეგად დაზიანება მიიღეს სამართალდამცველებმა. გამოძიების ცნობით, ბრალდებულმა ცეცხლი წაუკიდა შინაგან საქმეთა სამინისტროს კუთვნილ ავტომობილსაც.

“სააკაშვილი უხეშად არღვევს კვების რაციონს, საკვებს იღებს შერჩევით” – ზურაბ ჩხაიძე

17:59 - 01/05/2023

ექსპრეზიდენტ მიხეილ სააკაშვილის მიერ, მესამე მკურნალ ექიმზე უარის თქმას კლინიკა „ვივამედის“ კლინიკური დირექტორი ზურაბ ჩხაიძე ეხმაურება.

ჩხაიძის თქმით, მიხეილ სააკაშვილი შეგნებულად უხეშად არღვევს კვების რაციონს, რაც მის მდგომარეობას აუარესებს.

„გიდასტურებთ, რომ მესამე ექიმია, რომელზედაც უარი განაცხადა. მიზეზი ძირითადად არის ის, რომ როდესაც ექიმების მიერ ხდება მისი მდგომარეობის ობიექტურად შეფასება, ის მეორე დღესვე უკვე მიუღებელია პაციენტისთვის. საკვებს ისევ იღებს შერჩევით და უფრო მცირე რაოდენობით, კვების რაციონის უხეში დარღვევით, დავარქვათ ასე.

გიულისთან არა ერთხელ მქონდა კომუნიკაცია, არა ერთხელ ვთხოვეთ ჩვენ, რომ გაეთვალისწინებინა ჩვენი რეკომენდაციები. მოეტანა ის შესაბამისი საკვები, რაზედაც ჩვენი ექიმები აძლევენ რეკომენდაციებს, კერძოდ, ნუტრიციოლოგი და ენდოკრინოლოგი, მაგრამ არაფრის გათვალისწინება არ ხდება“, – აცხადებს ზურაბ ჩხაიძე.

“მზად ვარ ლაზარე გრიგორიადისს თავდებში დავუდგე” – ლევან ხაბეიშვილი

17:55 - 01/05/2023

„ნაციონალური მოძრაობის” თავმჯდომარე ლევან ხაბეიშვილი მარტის აქციების დროს დაკავებულის, ლაზარე გრიგორიადისის ადვოკატებს სთავაზობს, რომ როგორც პარლამენტის წევრი მზად არის თავდებში ჩაუდგეს ლაზარე გრიგორიადისს იმისთვის, რომ ის აღკვეთის ღონისძიების სახით შეფარდებული პატიმრობიდან გათავისუფლდეს. აღნიშნულის შესახებ ხაბეიშვილმა ჟურნალისტებს თბილისის საქალაქო სასამართლოს ეზოში განუცხადა, სადაც გრიგორიადისის პროცესის პარალელურად მისი მხარდამჭერი აქცია მიმდინარეობს.

როგორც ლევან ხაბეიშვილმა განაცხადა, ეს არ არის სამართლებრივი პროცესი, გრიგორიადისის დაკავება უკავშირდება კონკრეტულ მესიჯს კრემლისთვის, რომ ანტიპუტინისტურ აქციაზე ყოფნა ისჯება.

“ლაზარეს პატიმრობაში ყოფნის არანაირი სამართლებრივი საფუძველი არ არსებობს. ადამიანს წინასწარ პატიმრობაში ტოვებენ მაშინ, როცა მოწმეზე შეუძლია ზეგავლენა, ან რაიმე მტკიცებულების გაქრობა ან გაქცევა. ამ სამიდან ლაზარეს არცერთი შეუძლია. განსაკუთრებულ დავალებათა დეპარტამენტის თანამშრომელს რომ ზეწოლის ქვეშ ვერ ამყოფებს ლაზარე, ამას საზოგადოება კარგად ხვდება. ასევე, რაიმე მტკიცებულების გაქრობაც რომ არ შეუძლია 21 წლის ლაზარეს ესეც კარგად ვიცით და ასევე, ცხადია, საზღვრების კონტროლი შეუძლია ხელისუფლებას, თუ მაინც და მაინც, რაიმე შიშები აქვს. ამიტომ, არანაირი საფუძველი იმისა, რომ ლაზარე წინასწარ პატიმრობაში ჰყავდეთ არ არსებობს გარდა იმისა, რომ კრემლს, რუსეთს გაუგზავნონ გზავნილი, რომ ყველა ადამიანს, მათ შორის ახალგაზრდებს დასჯიან, ვინც ანტიპუტინისტურ აქციაზე იქნება, ვინც ევროპის მხარდამჭერ აქციაზე იქნება და ვინც საქართველოს კონსტიტუციას დაიცავს. ამიტომ, უმნიშვნელოვანესია ლაზარე იყოს თავისუფალი. თუ ვინმემ კანონი, კონსტიტუცია დაარღვია ეს არის რუსული ოცნება. კიდევ ერთხელ მინდა გავიმეორო ჩემი შეთავაზება დაცვის მხარისთვის, მე, როგორც საქართველოს პარლამენტის წევრი მზად ვარ ლაზარე გრიგორიადისს თავდებში დავუდგე იმისთვის, რომ ის წინასწარი პატიმრობიდან გათავისუფლდეს”, – განაცხადა ხაბეიშვილმა.

1...2,3612,3622,363...2,486 Page 2,362 of 2,486