ევროპული საბჭოს პრეზიდენტი შარლ მიშელი უკრაინას დამოუკიდებლობის დღეს ულოცავს და მხარდაჭერას უცხადებს. “ევროკავშირი უკრაინის გვერდით დგას. მხარს დაგიჭერთ იმდენ ხანს, რამდენ ხანსაც საჭირო იქნება. თქვენ ჩვენი ევროპული ოჯახის წევრი ხართ და თქვენი მომავალი ჩვენთან ერთადაა. ევროკავშირის დროშის ვარსკვლავები თქვენი თავისუფალი და სუვერენული ქვეყნის თავზე იფრიალებს”, – აცხადებს შარლ მიშელი.

უკრაინის პრეზიდენტსა და უკრაინელ ხალხს დამოუკიდებლობის დღეს ულოცავს ევროკომისიის პრეზიდენტი, ურსულა ფონ დერ ლაიენიც.

“უკრაინის ძალა მის ხალხში, გამბედაობასა და ძალაშია. თქვენ ყველა ევროპელისთვის სტიმულის მიმცემი ხართ და ჩვენ თქვენს გვერდით ვიდგებით იმდენ ხანს, რამდენ ხანსაც საჭირო იქნება იმისთვის, რომ უკრაინა თავისუფალი იყოს. ერთად, ჩვენ მოვიპოვებთ სამართლიან, ხანგრძლივ მშვიდობას”, – აცხადებს ევროკომისიის პრეზიდენტი.

არ არის დღეს უკრაინის ხელისუფლების მხრიდან ისეთი დამოკიდებულება საქართველოსთან მიმართებით, რომლის ქონასაც ვისურვებდით – საქართველო ცალმხრივი მეგობრობის რეჟიმში რჩება, – ამის შესახებ ადამიანის უფლებათა კომიტეტის თავმჯდომარე მიხეილ სარჯველაძემ განაცხადა.

მან უკრაინას დამოუკიდებლობის დღე მიულოცა. რაც შეეხება საკითხს იმასთან დაკავშირებით, თუ რატომ არ არის საქართველოდან დელეგაცია ღონისძიებაზე და მიიღეს თუ არა მიწვევა, სარჯველაძე აცხადებს, რომ ბრალდებების წაყენება უკრაინის მიმართ ან მათი მხრიდან არასწორი ბრალდებების მოსმენა არ შეესაბამება ქართულ – უკრაინულ ურთიერთობების ინტერესს და ამ საკითხზე პასუხის გაცემისგან თავს შეიკავებს.

„პირდაპირ ვამბობთ, რომ კონკრეტული პირების იქ ყოფნა-არყოფნის საკითხი სასურველია სხვა კონტექსტში გავაანალიზოთ. არ არის დღეს უკრაინის ხელისუფლების მხრიდან ისეთი დამოკიდებულება საქართველოსთან მიმართებით, რომლის ქონასაც ვისურვებდით ნებისმიერი ადამიანი, ვინც გულშემატკივარია და პრიორიტეტად აცხადებს ქართულ- უკრაინულ ურთიერთობებს. სამწუხაროდ ასეთი რეალობაა. რაც შეეხება თვითონ ღონისძიებას, როგორც ირკვევა, პრეზიდენტები არიან მიწვეული, ასე დაიგეგმა, რამ განაპირობა, გამოიწვია კონკრეტული შემადგენლობის, კონკრეტული პირების მიწვევა -არ მიწვევა ალბათ, მეორეხარისხოვანი უნდა იყოს. რაც შეეხება შინაარსს, ყველაზე მთავარი გახლავთ ის, რომ მთელი სულით და გულით ვულოცავთ მთელ უკრაინას დამოუკიდებლობის დღეს და ვუსურვებთ, რაც შეიძლება სწრაფად შეძლოს და გაანეიტრალოს ყველა ის რისკი, რომელიც მის სუვერენიტეტს და დამოუკიდებლობას ემუქრება. ეს არის მნიშვნელოვანი ამოცანა, პრიორიტეტი და რჩება მნიშვნელოვან ამბად საქართველოსთვისაც. საქართველო როგორც ჩანს კვლავ ცალმხრივი მეგობრობის რეჟიმში რჩება, როგორც ამას დაერქვა თავის დროზე,”- განაცხადა სარჯველაძემ.

ამერიკელი სენატორის, ლინდსი გრემის განცხადებით, მომდევნო წელს უკრაინაში არჩევნები უნდა ჩატარდეს – რუსეთის შეჭრის მიუხედავად.

„რადიო თავისუფლების“ უკრაინული ბიუროს ცნობით, ამის შესახებ რესპუბლიკელმა სენატორმა კიევში გამართულ პრესკონფერენციაზე განაცხადა.

„პრეზიდენტ ზელენსკისადმი ჩემი მიმართვა ასეთია: გაოცებული ვარ იმით, რაც თქვენმა ხალხმა და ქვეყანამ გააკეთა. გავაგრძელებთ ბრძოლას იმისთვის, რომ თქვენ შეიარაღება მიიღოთ და გაიმარჯვოთ ომში, რომელშიც დამარცხების უფლება არ გვაქვს. ამასთანავე, თქვენ ერთდროულად ორი საქმე უნდა შეასრულოთ – მომდევნო წელს უკრაინაში არჩევნები უნდა გაიმართოს. მე მინდა, რომ ამ ქვეყანაში ჩატარდეს თავისუფალი და სამართლიანი არჩევნები, რუსეთის შეჭრის დროსაც კი. ამერიკელმა ხალხმა უნდა იცოდეს, რომ უკრაინა შეიცვალა. წარსულში ეს ძალიან კორუმპირებული ქვეყანა იყო“, – აცხადებს ლინდსი გრემი.

მისივე თქმით, ახლა ამერიკელები ყურადღებით აკონტროლებენ შეიარაღებასა და სახსრებს, რომელსაც უკრაინა აშშ-ისგან იღებს და მომდევნო ნაბიჯად დემოკრატიის ჩამოყალიბებაში არჩევნები უნდა იქცეს.

ამ ქალაქს თავისი ხასიათი, ისტორია და ზომა-წონა აქვს, მის დარღვევას არ გაპატიებთ თბილისი! – ამის შესახებ „ლელოს“ ერთ-ერთმა ლიდერმა მამუკა ხაზარაძემ განცხადება სოციალურ ქსელში გაავრცელა, რითაც გამოეხმაურა საკრებულოში „ლაგუნას ვერეს“ ტერიტორიაზე ცათამბჯენების მშენებლობის პროექტის შეტანას.

მისი შეფასებით, აღნიშნული ცათამბჯენები ძველი თბილისის ქსოვილის მორღვევას და თბილისის ურბანულ გენოციდს გამოიწვევს.

„თბილისის მერია, საკრებულო, რას ერჩით თბილისს? “ოცნება”, რა დაგიშავათ ამ ქალაქმა? –

დღეს “ლაგუნა ვერეს” და ფიზკულტურის ინსტიტუტის საკითხი გავა “ოცნების საკრებულოზე” და ოფიციალურად მწვანე შუქს აუნთებენ გმირთა მოედნის ცათამბჯენებით განაშენიანებას, ძველი თბილისის ქსოვილის მორღვევას და თბილისის ურბანულ გენოციდს!

ამ ქალაქს თავისი ხასიათი, ისტორია და ზომა-წონა აქვს, მის დარღვევას არ გაპატიებთ თბილისი!“, – განაცხადა ხაზარაძემ.

თბილისის საკრებულოში, ფრაქცია „ერთიანი ნაციონალური მოძრაობის“ წევრები თბილისის მერს, კახა კალაძეს საკრებულოს ხვალ დაგეგმილ სხდომაზე მისვლას და მწვავე კითხვებზე პასუხის გაცემას სთხოვს.

როგორც „ნაციონალური მოძრაობის“ საკრებულოს წევრმა, ანა გოგოლაძემ განაცხადა, თბილისის მერიამ საკრებულოს დასამტკიცებლად ის პროექტები წარუდგინა, რომელიც ქალაქის გენერალურ გეგმას არღვევს.

“როგორც საზოგადოებისთვის ბოლო დღეებში ცნობილი გახდა, თბილისის მერიამ აგვისტოს თვეში საკრებულოს დასამტკიცებლად წარუდგინა სადაო პროექტების მთელი კასკადი, რომელსაც თავისუფლად შეგვიძლია ვუწოდოთ ურბანული ნაღმები. საუბარია თბილისში, ჯამში 2 მლნ. კვადრატული მეტრის განაშენიანებაზე, რა დროსაც “ქართულმა ოცნებამ” უხეშად გადაუხვია გენერალური გეგმიდან და აბსოლუტურად მოახდინა ქალაქის ინტერესების და უსაფრთხოების საკითხების უგულებელყოფა. მნიშვნელოვანია ისიც, რომ მშენებლობების უკან დგანან თავად “ქართული ოცნების” მაღალჩინოსნები და მათთან დაახლოებული პირები, რაც აჩენს ლეგიტიმურ შეკითხვებს შესაძლო პოლიტიკურ კორუფციასთან დაკავშირებით. მოვითხოვთ საკრებულოს ხვალინდელ სხდომაზე თავად თბილისის მერი გამოცხადდეს და როგორც ამ ქალაქის, მის უსაფრთხოებაზე და სწორ განვითარებაზე პასუხისმგებელმა პირმა წარადგინოს პროექტები და კრიტიკულ შეკითხვებს უპასუხოს”, – განაცხადა ანა გოგოლაძემ.

ფრაქცია “ერთიანი ნაციონალური მოძრაობის” თავმჯდომარის, ირაკლი ნადირაძის თქმით, თბილისის საკრებულოში დასამტკიცებლად წარდგენილი პროექტების უკან “ქართული ოცნების” მაღალჩინოსნები და მათთან დაახლოებულ პირები დგანან.

“როგორც იცით, კახა კალაძე რამდენიმე დღეა იმალება, არ ჩნდება და კომენტარს არ აკეთებს ამ მავნებლურ პროექტებთან დაკავშირებით. სინამდვილეში, მან ძალიან კარგად იცის, რომ ეს პროექტები არ ემსახურება თბილისელების ინტერესებს, ასევე, კარგად იცის, თუ ვინ დგას ამ პროექტების უკან. ჩვენ მოვითხოვთ თავად თბილისის მერი, კახა კალაძე მობრძანდეს საკრებულოში და გასცეს თბილისელებს პასუხი. გაგვცეს კახი კალაძემ პასუხი, რომ ეს პროექტები კეთდება იმიტომ, რომ თბილისელებისთვის რაიმე კომფორტი იყოს, თუ მხოლოდ იმიტომ, რომ აქ ივანიშვილმა, ჩხარტიშვილმა იშოვოს დამატებითი მილიონები. კახა კალაძე არ შეგეშინდეს, არ დაიმალო, საზოგადოებაში არის მწვავე პროტესტი და არსებობს ძალიან ბევრი კითხვა”,- განაცხადა ნადირაძემ.

მინდოდა, პრიგოჟინს დაენგრია მოსკოვი, დაენგრია კრემლი და ისე წასულიყო კობზონის კონცერტზე, მაგრამ არ გამოუვიდა, – ამის შესახებ „სტრატეგია აღმაშენებლის“ წევრმა, პაატა მანჯგალაძემ განაცხადა.

მისივე თქმით, პუტინმა, თავისი პირადი შეუთავსებლობის გამო, „რუსეთის ფედერაციის ე.წ. ომის გმირების სპეცოპერაცია-ლიკვიდაცია მოახდინა“.

„პრიგოჟინისნაირი კაციჭამია რუსეთში ბევრია, კარგი იქნება, თუ ერთმანეთს დაერევიან. რაც შეეხება ვერსიებს, ვინც პრიგოჟინთან ერთად იმყოფებოდა, იქიდან უმეტესობა რუსეთის ომის გმირი იყო, სახელმწიფო გმირები, რომლებიც ბახმუტის აღების გამო რამდენიმე თვის წინ პუტინმა დააჯილდოვა. ნახეთ, როგორ ექცევა კაციჭამია პუტინი ე.წ. გმირებს და როგორ ექცევიან გმირებს უკრაინაში და მიხვდებით, სად არის სიმართლე, სამართლიანობა. პუტინმა, თავისი პირადი შეუთავსებლობის გამო, ყველანაირი გადაწყვეტილებისა და სასამართლოს გარეშე, რუსეთის ფედერაციის ე.წ. ომის გმირების სპეცოპერაცია-ლიკვიდაცია მოახდინა. ეს მეტყველებს, რა სახელმწიფოსთან გვაქვს საქმე. ეს არის ურდო. რაც შეეხება უკრაინას, იცით, როგორ ექცევიან გმირებს. ვისაც გიყვარდათ და აღფრთოვანებული იყავით პრიგოჟინით, ახლა შეადარეთ აზოვი და „ვაგნერი“ ერთმანეთს. ახლა მოიკითხეთ, პრიგოჟინი სად არის“, – განაცხადა პაატა მანჯგალაძემ.

მედიაში გავრცელდა ინფორმაცია, რომ ტვერის ოლქში ავიაკატასტროფის შედეგად ბორტზე მყოფი ათივე მგზავრი დაიღუპა. „როსავიაციამ“ დაადასტურა, რომ თვითმფრინავის ბორტზე ევგენი პრიგოჟინი იმყოფებოდა. რუსული მედიის ცნობით, ავიაკატასტროფის ადგილზე ათივე ადამიანის ცხედარია ნაპოვნი.