როგორ შეიძლება, ესენი ხელისუფლებიდან გავუშვათ – ერთი გზაა, რომ მიაღწიო რიგგარეშე არჩევნებს და გაყარო, მეორე გზაა, რაღაცნაირად მიდიხარ რეგულარულ არჩევნებამდე, რომელიც არის მომავალ წელს ოქტომბერში, შემდეგ არჩევნებზე უგებ და თუ მაინც არ გაძლევენ საშუალებას, ისევ ქუჩიდან გაყარო, გულწრფელები თუ ვიქნებით, ალბათ ყველაზე რეალისტური სცენარი ეს არის, – ამის შესახებ „გირჩი მეტი თავისუფლების“ წევრმა, ზურაბ ჯაფარიძემ „ფორმულას“ ეთერში განაცხადა.

მისი თქმით, სჯერა, რომ ქუჩის გზა გარდაუვალია.

„არის ხალხი, ვისაც სჯერა, რომ მაგის გარეშეც შესაძლებელია, არჩევნებით მოგება. მე მაგ ხალხს და მაგ ჯგუფს არ მივეკუთვნები, მაგრამ სხვა გზა არ არის, ხომ? რიგგარეშე არჩევნები არ გამოდის. რამდენიმე თვე დავხარჯეთ ჩვენ, „გირჩი მეტი თავისუფლებამ“ ჯერ ცალკე, შემდეგ „დროასთან“ ერთად, რომ მოგვეძებნა ის ხალხი, ვისაც იგივე განწყობა აქვს და ვინც მზადაა, გამოვიდეს ქუჩაში, პროტესტის გზით სცადოს, ამათ დაათმობინოს და დანიშნოს რიგგარეშე არჩევნები. არ გამოვიდა, რადგან ამ იდეის გარშემო კონსოლიდაცია ვერ ხერხდება. მთავარი მიზეზი არის ის, რომ პოლიტიკური სპექტრის ნაწილი, ის ხალხი, რომლებიც დღეს, პარლამენტს რომ ვეძახით, ამ შენობაში სხედან, ჩემი აზრით, დღემდე აგრძელებენ პარლამენტარობანას თამაშს და გულწრფელი სურვილი აქვთ, ეს პარლამენტი მიიყვანონ ბოლომდე. შესაბამისად, ამ საკითხის გარშემო პოლიტიკური სპექტრის კონსოლიდირება ვერ ხდება. ამ საკითხს ვერასდროს ღიად მხარს ვერ დაუჭერენ ვერც ჩვენი დასავლელი პარტნიორები, მათ შორის არც სამოქალაქო სექტორში არ არის ამ საკითხში ერთიანობა“, – განაცხადა ზურაბ ჯაფარიძემ.

ყველა საპარლამენტო ბერკეტს გამოვიყენებთ, რათა შოვის ტრაგედიასთან დაკავშირებით კითხვებს პასუხი გაეცეს. შინაგან საქმეთა მინისტრი არის ერთ-ერთი მაღალი თანამდებობის პირი, რომლის პირდაპირი პასუხისმგებლობაა, კითხვებზე პასუხი გასცეს, – ამის შესახებ „ნაციონალური მოძრაობის“ წევრმა, ანი წითლიძემ განაცხადა.

მისივე თქმით, ვახტანგ გომელაურს მოუწევს, პარლამენტში, ინტერპელაციის ფორმატში კითხვებს პასუხი გასცეს.

„იცით, რომ საგამოძიებო კომისიის შექმნა გვაქვს დაანონსებული. ხელისუფლების წარმომადგენლები კატეგორიულად ეწინააღმდეგებიან საგამოძიებო კომისიის შექმნას, რაც კიდევ ერთხელ მეტყველებს, რომ შოვის ტრაგედიასთან დაკავშირებით ხელისუფლებას რაღაც აქვს დასამალი. შინაგან საქმეთა მინისტრი არის ერთ-ერთი მაღალი თანამდებობის პირი, რომლის პირდაპირი პასუხისმგებლობა, მოვალეობაა, რომ ამ კითხვებზე პასუხი გასცეს, განსაკუთრებით მას შემდეგ, რაც შემთხვევის ადგილზე განცხადებები გააკეთა. საზოგადოება და დაღუპულების ოჯახები იმსახურებენ პასუხებს კონკრეტულ კითხვებზე, რამდენად იყო შესაძლებელი ამ ტრაგედიის თავიდან აცილება. სტიქიური უბედურებებისგან დაზღვეული არავინ არის, თუმცა სტიქიური უბედურებების დროს სახელმწიფოს მთავარი პრიორიტეტი, საქმე  არის რისკის მინიმუმამდე დაყვანა. ჩვენ უნდა მივიღოთ პასუხი კითხვაზე, რამდენად შესაძლებელი იყო ჯერ პრევენციული სამუშაოები, რათა სახელმწიფოს წინასწარ სცოდნოდა სტიქიასთან დაკავშირებით, ასევე რამდენად დაგვიანებული იყო სამაშველო სამუშაოები, რატომ დაიწყო ის სამი საათის დაგვიანებით, რატომ ჩათვალა ხელისუფლებამ, რომ აუცილებელი არ იყო მეზობელი ქვეყნებისთვის დახმარებისთვის მიემართა, რატომ შეწყვიტეს ღამე ვერტმფრენით სამუშაოები მაშინ, როდესაც ყველაზე მნიშვნელოვანი, სასიცოცხლოდ მნიშვნელოვანი იყო პირველი ღამე იმ ადამიანებისთვის, რომლებიც დაიღუპნენ და რამდენად არის სახელმწიფო მზად, კიდევ მსგავსი რამე თუ დამუქრება საქართველოს მოქალაქეებს, შესაბამისი პრევენცია მოახდინოს. ეს არის კითხვები, რომლებსაც დავუსვამთ შინაგან საქმეთა მინისტრს. შინაგან საქმეთა მინისტრს მოუწევს, ინტერპელაციზე გვიპასუხოს ამ კითხვებზე“, – განაცხადა ანი წითლიძემ.

სტიქიიდან მეცამეტე დღეს, რაჭაში დატრიალებული ტრაგედიის განხილვა კვლავ აქტუალურია პოლიტიკურ სპექტრში. ოპოზიცია ისევ ხელისუფლებას აკრიტიკებს, მმართველი პარტია კი ოპონენტებს სპეკულაციებში სდებს ბრალს. სახელისუფლებო გუნდში განმამარტავენ, რომ ოპოზიცია დღის წესრიგს არ ცვლის და საზოგადოების შეცდომაში შეყვანის გზით პოლიტიკური ქულების ჩაწერას ცდილობს.

„კონტექსტიდან გლეჯენ ცალკეულ წინადადებებს და ამ წინადადებებზე აბამენ კონსპირაციის თეორიებს. სინამდვილეში, საქმე გვაქვს მორიგ მცდელობასთან, რომ იქ, სადაც უბრალოდ არ არსებობს მიზეზი ხელისუფლების ბრალდებისთვის, გააჩინონ რაღაც მიზეზი და ვერსია ააწყონ, რომლის მეშვეობითაც შეძლებენ ტალახი ესროლონ ხელისუფლებას. ამაში არ არის პრობლემა რასაკვირველია, პრობლემა არის იმაში, რომ მართლაც ამორალურია, როდესაც უზარმაზარი, მთელი ერის ტრაგედია უნდათ, რომ გადააქციონ სასპეკულაციო თემად“, – აცხადებს ადამიანის უფლებათა დაცვის კომიტეტის თავმჯდომარე, მიხეილ სარჯველაძე.