მგონია, რომ სრულიად რაციონალურად წავიდნენ პოლონეთში, იმ თვალსაზრისით, რომ მურუსიძის საქმის გარჩევა შინაარსობრივად არის „ნაციონალური მოძრაობის“ საქმის გარჩევა, – ამის შესახებ „გირჩის“ ლიდერმა იაგო ხვიჩიამ „პალიტრანიუსის“ გადაცემა „რეზიუმეში“ განაცხადა, რითაც საგამოძიებო კომისიის საკითხზე რიგგარეშე პლენარული სხდომის გადადებას და ანა წითლიძისა და ლევან ხაბეიშვილის პოლონეთში ვიტიტს გამოეხმაურა.

მისივე შეფასებით, „ნაციონალური მოძრაობა“ არის პარტია, რომელსაც არ შეუძლია თავის პოლიტიკურ მოწინააღმდეგეს საგამოძიებო კომისია შეუქმნას.

„უნდა გავიაზროთ, რომ „ნაცების“ „ვერხუშკა” „ქოცების“ ხელშია. კანონი უნდა მიგვეღო დღეს. აქ უნდა ყოფილიყვნენ, კენჭი უნდა ეყარათ და წავიდნენ პოლონეთში. როდის ყოფილა აქამდე, რომ ამერიკელებს დაესანქცირებინოთ საქართველოს მოსამართლეები და როდის ყოფილა შანსი, რომ ოპოზიციას ამაზე საგამოძიებო კომისია შეექმნა, ეს უბრალოდ არასერიოზულია. მე მგონია, რომ არსებობს შეთანხმება მიშას გამოშვებაზე და თუ არ არსებობს შეთანხმება, მაშინ უფასოდ უჩუქებიათ „ნაცები“ „ქოცებისთვის“, რადგან მეტს რას ნიშნავს ის, რომ ფაქტობრივად „ქოცების“ საქმეს აკეთებ ღიად?

ნაცვლად იმისა, რომ ყურადღება კონცენტრირებული ყოფილიყო საგამოძიებო კომისიაზე და მთელი შტურმი ამაზე წასულიყო, წავიდნენ პოლონეთში. რა შუაშია საერთოდ. მე მგონია, რომ სრულიად რაციონალურად ქნეს ეს, იმ თვალსაზრისით, რომ მურუსიძის საქმის გარჩევა შინაარსობრივად არის მისი („ნაციონალური მოძრაობის“) საქმის გარჩევა. წარმოიდგინეთ ჩვენ გვყავს პოლიტიკური პარტია, რომელსაც არ შეუძლია თავის პოლიტიკურ მოწინააღმდეგეს შეუქმნას საგამოძიებო კომისია იმ მოტივით, რომ ვაი, თუ ჩემი საქმეებიც გამოიძიონო. ამით კობახიძე ღიად დაემუქრა.

მურუსიძის სასამართლოს გასამართლება სინამდვილეში არის „ქოცების“ და „ნაცების“ გასამართლება ერთად. შინაარსობრივად ეს ერთი და იგივე რეჟიმია. გასაგებია, რომ ბიძინას ნაკლებად უყვარს ძალადობა და ერიდება ამას, მაგრამ ნებისმიერი ტიპის რეპრესიული ქმედებები პოლიტიკური მოწინააღმდეგეებთან და ოპონენტებთან ორივემ ამ სასამართლოში გააკეთა და ეს სასამართლო ამაშია სპეციალიზებული. სხვა რითია უნიკალური მურუსიძის სასამართლო გარდა იმისა, რომ იცის მმართველი პარტიის ოპონენტებთან ბრძოლა, ამაშია გამობრძმედილი“, – განაცხადა იაგო ხვიჩიამ.

ინფორმაციისთვის, ოპოზიციონერმა დეპუტატებმა პრეზიდენტს 11 აპრილს რიგგარეშე სხდომის მოწვევის მოთხოვნით მიმართეს. მოგვიანებით, ანა წითლიძისა და ლევან ხაბეიშვილის პოლონეთში გამგზავრების გამო, მათ განმეორებით მიმართეს პრეზიდენტს, რომ მათივე მოთხოვნილი რიგგარეშე სხდომა 11 აპრილს არ ჩანიშნოს. პარლამენტის რიგგარეშე სხდომის დღის წესრიგის ერთადერთი საკითხი „რეფორმების ჯგუფის” მიერ ინიცირებული დადგენილების პროექტის მიღება უნდა ყოფილიყო, რომელიც სასამართლოს სისტემაში კორუფციულ და სხვა კანონსაწინააღმდეგო ქმედებათა შემსწავლელი დროებითი საგამოძიებო კომისიის შექმნას ითვალისწინებს. კომისიის შექმნას მინიმუმ 50 დეპუტატის მხარდაჭერა სჭირდება.

საპარლამენტო უმრავლესობის წევრის, გიორგი კახიანის განცხადებით, ადამიანის უფლებების მიმართულებით მიხეილ სააკაშვილისთვის ჯილდოს მინიჭება შეურაცხმყოფელია იმ ადამიანებისთვის, ვინც თავის თავზე გამოსცადა სააკაშვილის მიერ შექმნილი სისტემის მძიმე წნეხი.

კახიანის თქმით, მიხეილ სააკაშვილს გარკვეული ძალები ლობირებენ.

„მიხეილ სააკაშვილი არის სისტემის ერთ-ერთი შემქმნელი, ვინც უამრავი ადამიანის უფლება დაარღვია. „ნაციონალური მოძრაობის“ დროს უფლებების დარღვევას ტოტალური სახე ჰქონდა ყველა მიმართულებით. თუ საუბარია სააკაშვილისთვის ჯილდოს მინიჭებაზე ადამიანის უფლებების მიმართულებით, რაც ნორვეგიაში მოხდა, ეს აბსურდია. თუ უფრო შორს წავალთ, ეს შეურაცხმყოფელია იმ ადამიანებისთვის, ვინც თავის თავზე გამოსცადა ამ სისტემის ძალიან მძიმე წნეხი. ვხედავთ, რომ მიხეილ სააკაშვილს გარკვეული ძალები ლობირებენ. ალბათ, ამასაც გარკვეული წინაპირობები აქვს. ალბათ, ეს ჯილდოებიც იმ ლობირებიდან მოდის, რასაც მთელი ეს პერიოდი ვხედავთ“, – განუცხადა გიორგი კახიანმა საქართველოს პირველ არხს.

საქართველოს ყოფილმა პრეზიდენტმა, მიხეილ სააკაშვილმა სოციალურ ქსელში დაწერა, რომ თავისუფლებისთვის ბრძოლაში შეტანილი წვლილისთვის პოლონეთის ერთ-ერთი უმაღლესი ჯილდო – „პრომეთეს ჯილდო“ გადაეცემა.

„პარტნიორმა, ამ შემთხვევაში აშშ-მა, თამაშის წესები არ დაიცვა და მიიღო გადაწყვეტილება, რომლის გამამართლებელ არგუმენტებსაც არ გვეუბნებიან. უფრო მეტიც, ამბობენ, რომ ამ არგუმენტებს არასდროს გვეტყვიან. ამით ისინი პირდაპირ აცხადებენ, რომ უნდათ, კონტროლი დააწესონ ქართულ მართლმსაჯულებაზე, რადგან ეს არ გამოუვიდათ პარლამენტში, მთავრობასა და ქუჩის პროცესებში“, – ამის შესახებ „ხალხის ძალის“ ერთ-ერთმა ლიდერმა, გურამ მაჭარაშვილმა, „პოსტივის“ ეთერში განაცხადა.

მისი თქმით, აშშ უარს აცხადებს, რომ არგუმენტები წარმოადგინოს სამი მოქმედი და ერთი ყოფილი მოსამართლისთვის სანქციების დაწესების ფაქტზე, რაც იმაზე მიანიშნებს, რომ ამერიკა ქართულ მართლმსაჯულებაზე კონტროლის დამყარებას ცდილობს.

„ვიდრე გადავალთ მოსამართლის გადაწყვეტილებაზე, გაასაჩივროს სანქციების დაწესების ფაქტი თავად შეერთებულ შტატებში, გავიხსენოთ ის, რასაც „ხალხის ძალა“ პირველივე განცხადებიდან ვამბობდით, რომ ჩვენ გვინდა ამერიკასთან და ევროპასთან პარტნიორობა, მაგრამ თამაშის გარკვეული წესები უნდა ვიცოდეთ და, რაც ყველაზე მთავარია, უნდა დავიცვათ. პარტნიორმა, ამ შემთხვევაში აშშ-მა, თამაშის წესები არ დაიცვა და მიიღო გადაწყვეტილება, რომლის გამამართლებელ არგუმენტებსაც არ გვეუბნებიან. უფრო მეტიც, ამბობენ, რომ ამ არგუმენტებს არასდროს გვეტყვიან. ამით ისინი პირდაპირ აცხადებენ, რომ უნდათ, კონტროლი დააწესონ ქართულ მართლმსაჯულებაზე, რადგან ეს არ გამოუვიდათ პარლამენტში, მთავრობასა და ქუჩის პროცესებში. უკვე დიდი ხანია, ამბობენ, რომ რაღაც კორპორაცია და კლანი არსებობს, მაგრამ ვერ დაამტკიცეს.

ეს ვენეციის კომისიამაც კი ვერ ჩაწერა ეს დასკვნაში. მან თქვა, რომ არასამთავრობო სექტორი საუბრობს კორპორაციების არსებობის შესახებ, მაგრამ რადგან სამართლებრივად არ იქნებოდა გამყარებული, ვენეციის კომისიამაც კი ვერ თქვა [დაზუსტებით]. ამ ფონზე აშშ-ის ელჩი ამბობს, რომ მისი კანონმდებლობა ავალდებულებს, პარტნიორი ქვეყნის მოსამართლეებს სანქციები დაუწესოს. ეს შეურაცხმყოფელიცაა, დაცინვაც და საკუთარი თავის კონფლიქტურ სიტუაციაში ჩაყენებაც. ტელეკომპანია „იმედზე“ ვნახეთ, რომ ელჩმა ვერცერთ კითხვას ვერ უპასუხა. ვერც უპასუხებდა, რადგან არგუმენტები არ არსებობს.

ჟურნალისტის კითხვაზე, ჰქონდა თუ არა მტკიცებულება, მისი პასუხი იყო, რომ მტკიცებულება აქვს, მაგრამ არ გვეტყვის. სანქციების დაწესებიდან მეორე დღესვე, როდესაც საზოგადოების რეაქცია ნახეს, თვითონაც მიხვდნენ, რომ ძალიან დიდი შეცდომა დაუშვეს და არასწორი ნაბიჯი გადადგეს. ეს ხომ მხოლოდ პოლიტიკური პროცესი არ არის. ხელისუფლების მესამე შტოში ერევიან, რითაც არღვევენ სუვერენიტეტს. აქედან გამომდინარეობდა საზოგადოების რეაქციაც და სწორედ ამიტომ თქვეს შემდეგ, რომ ეს არის არა ფინანსური, არამედ მხოლოდ სავიზო სანქცია. თუკი ქართული მართლმსაჯულების რეიტინგი გვაინტერესებს, გადავხედოთ „იფსოსის“ საერთაშორისო ინსტიტუტის, ამერიკის ინსტიტუტებისა და ევროკომისიის კვლევას.

სულ ახლახან მსოფლიოს კვლევითმა ცენტრმაც – „დემოკრატიის მრავალფეროვნებამ“, მეცხრე ჯერზე, ქართული მართლმსაჯულების კვლევის შედეგად, მოგვანიჭა პოზიტიური ქულა. გამოდის, რომ ქართულ მართლმსაჯულებას, რომელსაც ევროპის ინსტიტუტებიდან დაწყებული, ამერიკის ინსტიტუტებით დამთავრებული, ყველა პოზიტიურ ქულას ანიჭებს, სანქციებს უწესებენ, ხოლო პატიმარ სააკაშვილს, რომელიც საერთაშორისო სასამართლომ დამნაშავე სისტემის შემქმნელად გამოაცხადა, აჯილდოებენ. ამას საზოგადოება ხედავს და ასეთ დიდ უსამართლობას ვერ მიიღებს! აბსოლუტური უმრავლესობა თანხმდება იმაზე, რომ აშშ-ის მხრიდან სამი მოქმედი და ერთი ყოფილი ქართველი მოსამართლისთვის სანქციების დაწესება ყველა შემთხვევაში იყო ძალიან მცდარი ნაბიჯი და დიდი პოლიტიკური ფასის გადახდა მოუწევთ. ამას ჩვენ ვნახავთ. როდესაც ქვეყანა გვიმტკიცებს, რომ ჩვენი პარტნიორია, ამ დროს კი სანქციებისა და ომის გაჩაღების ენით გვესაუბრება – მოსამართლეში ფული გადავიხადე და რომ დავიბარო, რა მოხდაო, ბუნებრივია, ამას ქართული საზოგადოება არ მიიღებს!“, – განაცხადა გურამ მაჭარაშვილმა.

„საფრანგეთის პრეზიდენტი ემანუელ მაკრონი ღიად აცხადებს, რომ ამერიკის მხრიდან ზეწოლას უნდა გაუძლონ და ამ კონკრეტულ შემთხვევაში, ჩინეთ-ტაივანის ომის თემაში ამერიკის მიმდევრები არ უნდა გახდნენ, ანუ, ევროკავშირის ლიდერები გამოდიან და ამბობენ, რომ ამერიკის ზეწოლის ქვეშ არიან. შესაბამისად, შეგვიძლია ვივარაუდოთ, რომ ერთი წლის წინ, როდესაც ევროკავშირის კანდიდატობის სტატუსი არ მოგვცეს, ესეც სწორედ ამერიკის ზეწოლის შედეგი იყო“, – ამის შესახებ გადაცემაში „პოლიტიკური პოსტი“ „ხალხის ძალის“ წევრმა თამარ ჩიბურდანიძემ განაცხადა.

მან სამი მოქმედი და ერთი ყოფილი ქართველი მოსამართლისთვის აშშ-ის მხრიდან ფაქტების გარეშე კორუმპირებულის წოდებასა და მათთვის სანქციების დაწესებაზე ისაუბრა. ჩიბურდანიძემ ამას აშშ-ის მხრიდან მართლმსაჯულებისთვის თვალების ახვევა უწოდა.

„სამი მოქმედი და ერთი ყოფილი ქართველი მოსამართლისთვის სანქციების დაწესება ამერიკისთვის ბოლო პერიოდში პირველი უსუსტესი პოლიტიკის გატარების ღია ფაქტი იყო, იმიტომ, რომ ამერიკის განცხადება ყოველთვის გამყარებული იყო ფაქტებითა და არგუმენტებით. რა დონეზე დავიდა მათი დამოკიდებულება საქართველოს მიმართ, რომ უარგუმენტოდ, ფაქტების გარეშე გამოიტანეს გადაწყვეტილება და სამ მოქმედ და ერთ ყოფილ მოსამართლეს სანქციები დაუწესეს. სასამართლო – ეს არის ხელშეუხებელი სისტემა. სასამართლო არ არის პოლიტიკური ხელისუფლება – მათ ეს ძალიან კარგად იციან. მაგალითად, ევროპულ სახელმწიფოებში, ასევე ამერიკაში, მოსამართლე ბევრად უფრო მაღალი სტატუსია, ვიდრე ნებისმიერი პოლიტიკური თანამდებობა. წარმოიდგინეთ, რა დონეზე გაილაშქრეს სასამართლოს წინააღმდეგ, რომ ეს აბსოლუტურად უკანონო გადაწყვეტილება მიიღეს.

მე კონკრეტულ მოსამართლეებზე არ ვსაუბრობ. ჩემთვის არ აქვს მნიშვნელობა, იმ მოსამართლეს რა ერქმეოდა. ჩემთვის მთავარია, რომ ამერიკის სახელმწიფო დეპარტამენტმა სანქცია დაუწესა (მართალია, დღეს ამ სიტყვის ხსენება აღარ სურთ და უნდათ, ძალიან რბილად თქვან, რომ სავიზო მიმოსვლა შეეზღუდათ, მაგრამ არა – სანქცია დაუწესა!) ჩვენს მოსამართლეებს. ამერიკელებმა იმ დღეს მართლმსაჯულებას ნამდვილად აუხვიეს თვალები. ამან კიდევ ერთხელ ცხადყო დღევანდელი ამერიკული პოლიტიკის დამოკიდებულება საქართველოს მიმართ. როდესაც დასავლეთის დღევანდელ პოლიტიკას ვაკრიტიკებთ, ვიღაცას ჰგონია, რომ ჩვენ სახელმწიფოებს ვებრძვით. არა, ჩვენ გვსურს პარტნიორობა ამერიკასთან, ევროპულ სახელმწიფოებთან – ეს კურსი არის ჩვენი არჩევანი. მაგრამ, ჩვენ არ გვსურს თანამშრომლობა ასეთ პოლიტიკასთან. ეს არის ის ვასალური პოლიტიკა, რომელსაც დღეს ამერიკა საქართველოს მიმართ აწარმოებს და რომლის წინააღმდეგაც პირადად ჩვენ გამოვდივართ“, – განაცხადა თამარ ჩიბურდანიძემ.