მიხეილ სააკაშვილის სიცოცხლე ახლა დამოკიდებულია არა პოლიტიკურ, არა რაიმე პირადულ, არამედ სრულიად ეთიკურ გადაწყვეტილებაზე, – ამის შესახებ უკრაინის პრეზიდენტმა, ვოლოდიმირ ზელენსკიმ ვიდეომიმართვაში განაცხადა.

უკრაინის პრეზიდენტი ვიდეომიმართვაში ადამიანის უფლებათა ევროპულ სასამართლოში მიხეილ სააკაშვილის ადვოკატების სარჩელს გამოეხმაურა.

„კიდევ ერთი საკითხი, რომელიც დიდი ხანია, გადაწყვეტილებას საჭიროებს. მიხეილ სააკაშვილის სიცოცხლე ახლა დამოკიდებულია არა პოლიტიკურ, არა რაიმე პირადულ, არამედ სრულიად ეთიკურ გადაწყვეტილებაზე, რომელსაც აქვს სუფთა და წონიანი იურიდიული საფუძველი. ადამიანი თუ სამედიცინო დახმარებას საჭიროებს, თუ ამაზე დამოკიდებულია მისი სიცოცხლე, ეს ნიშნავს, რომ ეს ნაბიჯი აუცილებელია. ვიცი, რომ მიხეილის ადვოკატებმა ადამიანის უფლებათა ევროპულ სასამართლოში სასწრაფო მიმართვა წარადგინეს, რათა უზრუნველყონ ის შესაბამისი მკურნალობით. და როგორც ჩანს, ეს არის მისთვის სიცოცხლის შენარჩუნების ერთადერთი გზა”, – აცხადებს ვოლოდიმირ ზელენსკი.

პრეზიდენტი ერთი ერთში იმეორებს იმ რადიკალური ოპოზიციის მესიჯებს, რომლებიც აქვთ ლევან ხაბეიშვილს და მასთან დაკავშირებული პარტიების ლიდერებს, – ამის შესახებ პარლამენტის პირველმა ვიცე-სპიკერმა გია ვოლსკიმ განაცხადა.

ვოლსკი გამოეხმაურა პრეზიდენტის ადმინისტრაციის განცხადებას, რომ მთავრობამ სტრასბურგში ვიზიტზე თანხმობა ხელოვნურად გააჭიანურა და აღნიშნა, რომ მთავრობამ ოპერატიულად მისცა მას თანხმობა და ამას მოწმობს დოკუმენტები.

„ყველამ ვიხილეთ დასტური იმისა, რომ მთავრობას არანაირი ბრალი არ მიუძღვის იმაში, რომ პრეზიდენტმა ვერ შეძლო სტრასბურგში გამგზავრება. არსებობს დოკუმენტაცია და გამოქვეყნებული ინფორმაცია ამასთან დაკავშირებით. საკითხი, რომელიც მე პირადად მგონია, რომ საგანგებოდ არის მნიშვნელოვანი, ეხება პრეზიდენტის დამოკიდებულებას თავის ქვეყნის მიმართ. იგი სულ ახლახან იყო პარლამენტში და აბსოლუტურად რეალობას მოწყვეტილი განცხადება გააკეთა საქართველოს ხელისუფლების საგარეო კურსთან დაკავშირებით. იგი ვალდებულია, ნებისმიერ თემასთან მიმართებით გაიაროს წინასწარი კონსულტაციები მთავრობასთან, ჩამოაყალიბოს პოზიცია და თუკი რაიმე ფორუმზე მისი დასწრება არის აუცილებელი, სავალდებულო, საჭირო, რასაკვირველია, მთავრობაც არ უნდა იყოს წინააღმდეგი და ამ შემთხვევაში, მთავრობამ დაშვება გააკეთა, მაგრამ მე ვფიქრობ, არ გაითვალისწინა ის პოზიცია, რომელიც მე ვფიქრობ, კიდევ ერთხელ შეიძლება გაჟღერებული ყოფილიყო სტრასბურგის ტრიბუნიდან, რომელიც აბსოლუტურად სიცრუეზეა აგებული და ეხება საქართველოს საგარეო კურსს, რომ თითქოსდა ქვეყანამ ევროინტეგრაციის პროცესს არათუ დღეს გადაუხვია, არამედ არასდროს ჰქონია გათვალისწინებული და მუდმივად არღვევდა კონსტიტუციის იმ მოთხოვნას, რომელიც თვითონ “ქართული ოცნების” ინიციატივით იქნა შეტანილი მასში. ეს რეალობა არსებობს და ამასთან დაკავშირებით, ნებისმიერი პრეტენზია განხილული უნდა იყოს ტექნიკური მხრიდანაც, რომ საქართველოს მთავრობა არანაირად არ არის დამნაშავე და უნდა იყოს განხილული შინაარსობრივადაც. სტრასბურგის ტრიბუნა პრეზიდენტისთვის, რომელიც არ ათანხმებს პოზიციას ხელისუფლებასთან, არ აქვს მიზნად დასახული, რომ ქვეყანაში შეიქმნას სწორი ბალანსი პოლიტიკურ ძალებს შორის, რომ თვითონ მოქმედებდეს ქვეყნის ინტერესებიდან გამომდინარე არათუ მხოლოდ დამაბალანსებელი, არამედ ადამიანი, რომელიც დეპოლარიზაციას დაუპირისპირდება და არა პოლარიზაციისთვის შექმნის წინაპირობებს. აქედან გამომდინარე, ვფიქრობ, მსჯელობა მხოლოდ ტექნიკურ ნაწილზე არ უნდა იყოს და ამასაც საგანგებოდ უნდა მიაქციონ ყურადღება, როგორც საზოგადოებაში ასევე საინფორმაციო სივრცეში.
ალბათ, პრეზიდენტის ადმინისტრაცია თვითონ გააკეთებს განცხადებას, ახალ მიზეზს მოიგონებს იმისათვის, რათა კიდევ ერთხელ ეცადოს დისკრედიტაცია მოახდინოს ხელისუფლების, რასაც ბოლო პერიოდში ინტენსიურად აკეთებს, მაგრამ ვფიქრობ, ამასთან ერთად, ჩვენ ყველამ, როგორ პოლიტიკურ პლატფორმაზეც არ უნდა ვიდგეთ, ობიექტურად უნდა შევაფასოთ ვითარება. პირველი – საქართველოს საგარეო პოლიტიკური კურსი არც ადრე და, მით უმეტეს, არც ახლა არ შეუცვლია, მეორე – პრეზიდენტი ამასთან დაკავშირებით ავრცელებს ცრუ ინფორმაციას, უსაფუძვლო ინფორმაციას, რის მომსწრენიც პარლამენტში გავხდით და მესამე – როცა პრეზიდენტი მიემგზავრება საერთაშორისო ფორუმზე, ამ ფორუმზე მისი წარმომადგენლობა არის სიმბოლური, მაგრამ ამ სიმბოლიზმს თან უნდა ახლდეს პოზიტივი, იგი უნდა იღწვოდეს თავის ქვეყნისთვის”, – განაცხადა ვოლსკიმ.

ტელეკომპანია „იმედი“ ავრცელებს ფოტოს, რომელზეც ასახულია დავით კეზერაშვილის შეხვედრა ზურაბ ადეიშვილის ყოფილ მოადგილესთან, თინა ბურჯალიანთან.

შეხვედრა პირველ სექტემბერს შედგა ლონდონში, აზიურ რესტორან „ნოვიკოვში“ (Novikov), სადაც, „ქრონიკის“ ინფორმაციით, კეზერაშვილი ბურჯალიანს ქოლცენტრების თაღლითური სქემის იურიდიულ საკითხებზე ესაუბრებოდა.

„ფოტო სწორედ მაშინ არის გადაღებული, როდესაც BBC თაღლითური სქემის შესახებ თავის ფილმს ამზადებდა. სავარაუდოდ, მაღალი ანაზღაურების სანაცვლოდ სწორედ ბურჯალიანი აგვარებდა თაღლითური სქემის იურიდიულ ნიუანსებს“, – აღნიშნულია „იმედის“ ინფორმაციაში.

დავით კეზერაშვილი საკუთარ სოციალურ მედიაზე ხშირად არეკლამებდა თაღლითურ სავაჭრო პლატფორმებს. სოციალურ ქსელ LinkedIn-ზე ის საკუთარ ანგარიშს თითქმის ექსკლუზიურად იყენებდა Milton Group-თან დაკავშირებული კომპანიების სამუშაოების რეკლამირებისთვის და აზიარებდა მათ პოსტებს, – ამის შესახებ საუბარია BBC-ის საგამოძიებო ფილმში, რომელიც დავით კეზერაშვილის თაღლითურ სქემას ეძღვნება.

როგორც გამომძიებელი ჟურნალისტები აცხადებენ, არსებობს რამდენიმე სხვა სამხილიც, რომელიც საქართველოს თავდაცვის ყოფილ მინისტრს Milton-ის ბრენდებთან აკავშირებს.

„რამდენიმე კომპანია, რომელსაც კეზერაშვილი ფლობდა, იყენებდა იმეილის კერძო სერვერს, რომლის სხვა მომხმარებლებიც Milton-ის ჯგუფის კომპანიები იყვნენ. კეზერაშვილს ასევე ეკუთვნის შენობა, რომელიც კიევის ოფისია თაღლითურ ქოლ-ცენტრ „ევერეფიქსისთვის“ და პროგრამების უზრუნველმყოფი ტექნოლოგიური ფირმისთვის. ამ ოფისში პოლიციამ რეიდი ნოემბერში ჩაატარა. მას ასევე თბილისში ეკუთვნის ოფისები, სადაც განთავსებულია ზოგიერთი იგივე ფირმა. როდესაც შევამოწმეთ Milton-ის ჯგუფის მაღალი რანგის წარმომადგენელი ოთხი პირის სოციალური მედიის პროფილები – ქორწილის, წვეულებებისა და სხვა სოციალური ღონისძიებების ფოტოებიდან ცხადი გახდა, რომ ყველა მათგანს ახლო კავშირი აქვს დავით კეზერაშვილთან. კეზერაშვილი არის Milton-ის ჯგუფის თაღლითობასთან დაკავშირებული სულ მცირე 45 ადამიანის ფეისბუქ-მეგობარი, ხოლო ჩვენ მიერ იდენტიფიცირებული 4 მაღალი რანგის პირიდან ერთ-ერთი მისი ბიძაშვილია“, – ვიგებთ ფილმიდან.

აუდიო მასალის შემდეგ, BBC-მ კეზერაშვილის თაღლითური სქემის შესახებ საგამოძიებო ფილმიც გაავრცელა. მასში დეტალურადაა ნაჩვენები და მოყოლილი, თუ როგორ მიდის კვალი დავით კეზერაშვილამდე.

ფილმში დავით კეზერაშვილი „მისტერ ოფშორად“ არის მოხსენიებული. ამასთან, დასახელებულია კონკრეტული სახელები და გვარები, თუ ვისი მეშვეობით მართავს ე.წ. თაღლითურ სქემას საქართველოს თავდაცვის ყოფილი მინისტრი.

მანამდე BBC-მ გამოაქვეყნა ჟურნალისტური გამოძიება, სადაც გაშიფრულია ევროპელი პენსიონერების გაძარცვის სქემა, ხოლო თაღლითური სქემის ორგანიზატორად დავით კეზერაშვილია დასახელებული.

დავით კეზერაშვილის პოლიტიკაში მონაწილეობა დამოკლეს მახვილივით ყველა იმ პირს დაადგა თავს, ვინც სხვადასხვა ფორმით ჩართულია პოლიტიკაში და აფილირებულია დავით კეზერაშვილთან, – ეს განცხადება ჟურნალისტებთან „ქართული ოცნების“ დეპუტატმა მიხეილ სარჯველაძემ გააკეთა.

სარჯველაძის თქმით, ე.წ. ქოლცენტრებთან დაკავშირებით ოპოზიციის საუბარი იმის თაობაზე, თუ სად იყვნენ ქართველი სამართალდამცავები, მათი მხრიდან ყურადღების გადატანის მცდელობაა.

„ქართველი სამართალდამცავები იყვნენ იქ, სადაც უნდა ყოფილიყვნენ და გააკეთეს ზუსტად ის, რაც მათ ევალებოდათ. მათ ამ კუთხით სასაყვედურო არაფერი აქვთ! ადგილი აქვს ყურადღების გადატანის მცდელობას, რათა კრიტიკის მიზეზი მოძებნონ და ამით თავიდან აიცილონ მთავარ კითხვაზე პასუხის გაცემის მოვალეობა, რაც დავით კეზერაშვილზე მათ პოზიციას უკავშირდება – ცდილობენ პირდაპირ პასუხებს თავი აარიდონ, ამისთვის ტაქტიკური ხერხი გამოიყენონ და კრიტიკული პოზიციები ხელისუფლების მიმართ გააჟღერონ. BBC-ის მიერ გავრცელებულ ინფორმაციის მიმართ სანდოობა უაღრესად მაღალია. სავარაუდოა, რომ ამას სამართლებრივი პროცედურების თვალსაზრისით გაგრძელება მოჰყვება. მორალური დილემის წინაშე არიან პოლიტიკოსები, მედიასაშუალებები და ექსპერტები, ვინც კეზერაშვილთან არიან აფილირებული – მათ რომ პოლიტიკაში მოღვაწეობისა და პროდასავლურობაზე საუბრის მორალური უფლება რომ ჰქონდეთ, კეზერაშვილთან დაკავშირებულ კითხვებს პასუხი უნდა გასცენ“, – განაცხადა მიხეილ სარჯველაძემ.

ე.წ. ქოლცენტრების ფინანსურ თაღლითობაზე BBC-ის ჟურნალისტური გამოძიების თანახმად, ყოფილი თავდაცვის მინისტრი და „ფორმულას“ მფლობელი დავით კეზერაშვილი დაკავშირებულია „ასობით სხვადასხვა საინვესტიციო ბრენდის გლობალურ თაღლითურ ქსელთან“, რომელმაც კლიენტთა მოტყუების გზით მილიარდ დოლარზე მეტი გამოიმუშავა.