მიხეილ სააკაშვილს არ ვეთანხმები, რადგან ეს ცოტა ძველი ინფორმაციაა. ბოლო ვიზიტების შემდეგ ქართულ ოპოზიციაზე წარმოდგენა აბსოლუტურად შეცვლილია. არ ვიცოდი, თუ მასთან ძველი ინფორმაცია იყო შერჩენილი, – ამის შესახებ „სტრატეგია აღმაშენებლის“ ლიდერმა, გიორგი ვაშაძემ განაცხადა.

ვაშაძე გამოეხმაურა საქართველოს ყოფილი პრეზიდენტის, მიხეილ სააკაშვილის ინტერვიუს იმ ნაწილს, სადაც სააკაშვილმა განაცხადა: „ევროპულ და ამერიკულ გულშემატკივრებში ყალიბდება აზრი, რომ ქართულ ოპოზიციას არ შესწევს ერთიანობის უნარი და ასეთი სუსტი ოპოზიციის ხმამაღალი მხარდაჭერა აზრს მოკლებულია“

ვაშაძის თქმით, მიხეილ სააკაშვილს დამატებით ინფორმაციას მიაწოდებენ.

„გამარჯვების“ პლატფორმა არის ყველაზე ძლიერი, თუ რამე არსებობს ოპოზიციურ ფლანგზე. ჩვენ გამარჯვებისთვის ვიბრძვით და ამ გამარჯვებას მოვიტანთ“, – აღნიშნა გიორგი ვაშაძემ.

თბილისის მერის, კახა კალაძის განცხადებით, პოლიტიკოსს და პოლიტიკურ პარტიას პირველ რიგში ქართველი ამომრჩეველის მხარდაჭერა უნდა ჰქონდეს და არა უცხოელი პარტნიორების.

ამის შესახებ მან საქართველოს ყოფილი პრეზიდენტის, მიხეილ სააკაშვილის მიერ დასავლეთის მხრიდან ოპოზიციის მხარდაჭერასთან დაკავშირებით გაკეთებული განცხადების საპასუხოდ ისაუბრა.

„არ დავიწყებ რამის სწავლებას, ეს მათი არჩევანია, თუმცა ნახეთ, რამხელა უბედურების წინაშე დგანან ეს ადამიანები: ჯერ კიდევ ვერ გაუაზრებიათ და გაუანალიზებიათ, რომ მაშინ, როდესაც ქვეყნის ხელისუფლებაში იყვნენ, რა გაუკეთეს ქვეყანას და ამ ქვეყანაში მცხოვრებ მოქალაქეებს. არც იმის ჩამოთვლას დავიწყებ, როგორი მმართველობა იყო. ეს დღესაც ვერ გაუაზრებიათ. ნახეთ თუნდაც მათი განცხადებები – „მხარს არ დაუჭერს დასავლეთიო“. დასავლეთმა კი არა, ქვეყნის მოსახლეობამ უნდა დაგიჭიროს მხარი, პოლიტიკოსი რომ ხარ და პოლიტიკური პარტია რომ გაქვს. ეს არის მიმანიშნებელი იმისა, რომ ამ ადამიანებს ვერ წარმოუდგენიათ რა ხდება ქვეყანაში, ქართულ პოლიტიკაში და დამოკიდებული არიან ჩვენს ე.წ. მეგობრებზე, უცხოელ პარტნიორებზე და რა ამით? ვიღაც უცხოელი კუბილიუსი თუ ვინმე მისი მსგავსი, ევროპაში დაუჭერს მხარს „ნაციონალურ მოძრაობას“ ან ე.წ. პოლიტიკურ პარტიებს, რომლებიც დღეს ქართულ ოპოზიციაში არიან, ამით გამარჯვებას მიაღწევენ თუ რა მოხდება? რისი მანიშნებელია?“, – აღნიშნა კახა კალაძემ.

მისივე თქმით, ქვეყნის ხელისუფლებაში წარმოდგენილ გუნდს მოსახლეობის უმრავლესობის მხარდაჭერა აქვს, რომელიც პოლიტიკური პარტიის წარმატების განმსაზღვრელი უპირველესი ნიშანია.

„კიდევ ერთხელ ვიმეორებ, ქართველი ხალხის და ამ ქვეყანაში მცხოვრები ადამიანების მხარდაჭერაა პირველი. დღეს „ქართული ოცნება“ რატომ არის ასე ძლიერად წარმოდგენილი? იმიტომ, რომ ჩვენი ქვეყნის მოსახლეობის უმრავლესობა უჭერს მხარს იმ გუნდს, რომელიც ხელისუფლებაშია – გუნდი, რომელიც ატარებს ამ ქვეყნის და ამ ქვეყანაში მცხოვრები მოქალაქეების ინტერესებს“, – განაცხადა თბილისის მერმა.

თბილისის მერი კახა კალაძე გამოეხმაურა მედიაში გავრცელებულ ინფორმაციას იმის თაობაზე, რომ საქართველოს ყოფილი პრეზიდენტის, მიხეილ სააკაშვილის პირადი ფრენებისთვის მილიონობით საბიუჯეტო თანხა იხარჯებოდა. კახა კალაძე მიიჩნევს, რომ გამოძიება უნდა დაინტერესდეს მიხეილ სააკაშვილის პირადი მიზნებისთვის განხორციელებული ფრენებისთვის ბიუჯეტიდან გამოყოფილი თანხების მიზანშეწონილობით.

„არაერთხელ გვსმენია, რომ წინა ხელისუფლების პირობებში, მაღალი თანამდებობის პირების ოჯახებისთვის ბიუჯეტიდან იხარჯებოდა თანხები. პირადად მიხეილ სააკაშვილი ხარჯავდა ბიუჯეტიდან თანხებს საყვარლებისთვის, შვილების სწავლის დაფინანსებისთვის, ბოლო პერიოდში კი გამოიკვეთა, რომ მის ფრენებზეც არის დახარჯული თანხა. ვფიქრობ, გამოძიება უნდა დაინტერესდეს ამით. ყველაფერს უნდა გაეცეს შესაბამისი პასუხი“, – განაცხადა კახა კალაძემ.

მე ვიცი, რამდენად მნიშვნელვანია ევროპული პერსპექტივა საქართველოში ძალიან ბევრი ადამიანისთვის, – ამის შესახებ ევროკომისიის პრეზიდენტმა, ურსულა ფონ დერ ლაიენმა ევროპარლამენტში სიტყვით გამოსვლისას განაცხადა.

ამასთან, ფონ დერ ლაიენმა აღნიშნა, რომ უკრაინის, დასავლეთ ბალკანეთის ქვეყნებისა და მოლდოვის ადგილი ევროკავირშია, რასაც დარბაზში აპლოდისმენტები მოჰყვა.

„ამ პარლამენტში ხმამაღლა ითქვა, რომ უკრაინის მომავალი ჩვენს კავშირშია, რომ დასავლეთ ბალკანეთის ადგილი ევროკავშირშია, მოლდოვის მომავალი ჩვენს კავშირშია. და მე ვიცი, რამდენად მნიშვნელოვანია ევროპული პერსპექტივა საქართველოში ბევრი ადამიანისთვის“, – განაცხადა ურსულა ფონ დერ ლაიენმა.

არავითარი ბაზა ზოგადად არ არის უსაფრთხოების გარანტია, – ასე უპასუხა „ქართული ოცნების“ თავმჯდომარემ ირაკლი კობახიძემ ჟურნალისტის მიერ დასმულ კითხვას, რატომ უთხრა უარი 2 წლის წინ საქართველოს ხელისუფლებამ საქართველოში ჩამოსულ აშშ-ის თავდაცვის მდივანს საქართველოში ამერიკული ბაზის გახსნაზე. აქვე კობახიძემ აღნიშნა, რომ ამ ინფორმაციის გამავრცელებელი წყარო, სასაცილოა, რაც ამ საკითხს არასერიოზულს ხდის.

„ლიკა ვიღაც გვარი ეწერა, რომელიც არის ამ ამბის გამავრცელებელი, ეს ხომ არასერიოზულია. მეორე, ერთადერთი, რამაც საქართველოს შეიძლება მისცეს უსაფრთხოების გარანტია, არსებულ ვითარებაში, ეს არის ნატო-ს წევრობა. თქვენ იცით, რომ მაგალითად, ბალტიისპირეთის ქვეყნებს, ცენტრალური ევროპის ქვეყნებს იცავს სწორედ ნატო-ს ქოლგა. რა თქმა უნდა, არავითარი ბაზა, ზოგადად, არ არის უსაფრთხოების გარანტია. რაც შეეხება ამ ინფორმაციას, წყარო არის სასაცილო, დანარჩენზე კომენტარის გაკეთება არ ღირს. ბაზამ როგორ უნდა დაგიცვას შენ? ნატო-ს ქოლგა არის ერთადერთი გარანტი, ამიტომ არის ეს ყველაფერი აბსოლუტურად არასერიოზული“,- განაცხადა კობახიძემ.

მიხეილ სააკაშვილი ალბათ საკუთარ პარტიაზე, „ნაციონალური მოძრაობის“ სისუსტეზე საუბრობს, რამდენ ნაწილად არიან დაშლილები, აღარ ვიცი, – ამის შესახებ „საქართველოსთვის“ წევრმა, ანა ბუჩუკურმა განაცხადა.

მისი თქმით, ბოლო კვლევებით, ამომრჩეველი ამბობს, რომ მათთვის „ქართული ოცნება“ და „ნაციონალური მოძრაობა“ ერთი და იგივეა.

„რა თქმა უნდა, გამოწვევები ჩემს გუნდს ბევრი აქვს, მაგრამ ბევრი ზეწოლისა და დაშინების მიუხედავად, რამდენიმე თვის დაფუძნებულმა პარტიამ ბოლო არჩევნებზე დიდი წარმატების მიღწევა შეძლო. ზოგიერთ საკრებულოში „ქართული ოცნება“ ოპოზიციაში გავუშვით, „ნაციონალურ მოძრაობას“ კი ერთპიროვნულად რევანშის უფლება არ მივეცით. რაც შეეხება სისუსტეს, ამ ყველაფერს მის პარტიაზე უნდა ამბობდეს. „ნაციონალურ მოძრაობაში“ არსებული დაპირისპირება გარეთ გამოიტანეს და ამას ვხედავთ. ბოლო კვლევებით, ამომრჩეველი ამბობს, რომ მათთვის „ქართული ოცნება“ და „ნაციონალური მოძრაობა“ ერთი და იმავეა, – განაცხადა ბუჩუკურმა.

საქართველოს ყოფილმა პრეზიდენტმა, მიხეილ სააკაშვილმა განაცხადა: „ევროპულ და ამერიკულ გულშემატკივრებში ყალიბდება აზრი, რომ ქართულ ოპოზიციას არ შესწევს ერთიანობის უნარი და ასეთი სუსტი ოპოზიციის ხმამაღალი მხარდაჭერა აზრს მოკლებულია“.