გასული თვე ამინდზე დაკვირვების ისტორიაში ყველაზე ცხელი სექტემბერი იყო. ამის შესახებ СNN-ი წერს.
ტელეარხის ცნობით, 2023 წელს ზედიზედ მეოთხე თვეა რეკორდული ტემპერატურა ფიქსირდება, რაც მეცნიერებს საფუძველს აძლევს ივარაუდონ, რომ 2023 ამინდზე დაკვირვების ისტორიაში ყველაზე ცხელი წელი იქნება.
კოპერნიკის კლიმატის ცვლილების სამსახურის მონაცემებით, წლევანდელმა სექტემბერმა 2020 წელს დაფიქსირებულ სიცხის რეკორდს 0,5 გრადუსით გადააჭარბა. თვის საშუალო ტემპერატურამ მსოფლიოს მასშტაბით 16,38 გრადუსი შეადგინა, რაც 0,93 გრადუსით მეტია, ვიდრე 2020 წელს და 1,75 გრადუსით მეტი, ვიდრე პრეინდუსტრიულ ხანაში. ეს ციფრი აღემატება გლობალური ტემპერატურის ზრდის 1,5- გრადუსიან ზღვარს, რომელიც პარიზის კლიმატური შეთანხმებით არის გათვალისწინებული.
ცხელმა სექტემბერმა გავლენა იქონია ამინდზე და სტიქიურ მოვლენებზე მსოფლიოს მასშტაბით. კერძოდ, ლიბიაში, საბერძნეთში, ბულგარეთსა და თურქეთში წყალდიდობებმა ათასობით ადამიანი იმსხვერპლა, კანადაში უპრეცედენტო ტყის ხანძრები დაფიქსირდა, სამხრეთ ამერიკაში რეკორდულად მაღალი ტემპერატურა იყო, ნიუ-იორკში კი რეკორდულად წვიმდა.
მანამდე ცნობილი გახდა, რომ 2023 წლის ზაფხული ამინდზე დაკვირვების ისტორიაში ყველაზე ცხელი აღმოჩნდა.
