დღეს ჩვენ განვიხილავთ მიმდინარე წლის ბიუჯეტში ცვლილებებს, თითქმის ნახევარი მილიარდი ლარით იზრდება ხარჯვით ნაწილი, რაც ნიშნავს, რომ მიმდინარე ეკონომიკური ზრდის ფონზე, ჩვენს ქვეყანას მიეცა საშუალება, წელსვე გაზარდოს ხარჯვითი ნაწილი შემოსავლების გამო და გადაანაწილოს ის ყველაზე მნიშვნელოვან პრიორიტეტებზე, – განაცხადა პარლამენტის ვიცე-სპიკერმა, არჩილ თალაკვაძემ საქართველოს 2023 წლის სახელმწიფო ბიუჯეტში ცვლილებაზე საუბრისას.

არჩილ თალაკვაძემ გამოსვლისას ოპოზიციას მიმართა და მათ განცხადებებს პოპულისტური უწოდა.

„კარგია, რომ დღეს ასე ენერგიულად არის ზოგიერთი ოპოზიციონერი მოსული. მთელი ოპოზიცია, რომ ასე მუშაობდეს მთელი წლის განმავლობაში უფრო კარგი იქნებოდა ჩვენი ქვეყნისთვის. დავიწყოთ იმით, რომ თქვენ ხართ ის ოპოზიცია, რომელიც ამ დარბაზში, დარბაზს გარეთ, ქუჩაში თუ ტელევიზიაში თვეების განმავლობაში საუბრობდით, რომ „ქართული ოცნების“ ხელისუფლების პირობებში ქვეყანა ჩამოინგრა, თითქოს ყოველდღიურად საქართველო მიდის უკან, ღარიბდება, დემოკრატია სუსტდება და ქვეყანა შორდება ევროპას. ხომ ეს ხალხი ხართ? თუ თქვენ მართლა გჯერათ რასაც ამბობთ და თქვენი განცხადებები თუ სიმართლეა, მაშინ ამიხსენით როგორ ხდება, რომ განვიხილავთ მიმდინარე წლის ბიუჯეტში ნახევარმილიარდიანი ზრდის ცვლილებას და თქვენ ამ ტრიბუნასთან გამოდიხართ და აქტიურად მსჯელობთ ვის გადავუნაწილოთ ეს ფული და სად მივმართოთ. თუნდაც თქვენი პოპულისტური და პოლიტიკური გეგმებისთვის როგორ გამოიყენოთ ეს ფული. თუ ქვეყანა უკან მიდის, თუ ქვეყანა ღარიბდება, მაშინ აქედან ხმამაღლა რაღას ლაპარაკობთ მომატებული ბიუჯეტი რაში უნდა გადაანაწილოს საქართველომ? როდის ხართ გულწრფელები, როცა ამბობთ ქვეყანა გაღარიბდა, უკან-უკან მიდის, თუ აქ რომ გამოდიხართ და პოპულისტურ განცხადებებს აკეთებთ, სად უნდა დავხარჯოთ ეს გაზრდილი ბიუჯეტი?“, –  განაცხადა არჩილ თალაკვაძემ.

11 წლის განმავლობაში, უმძიმესი გამოწვევების მიუხედავად, ჩვენ მოვახერხეთ საქართველოში მშვიდობის შენარჩუნება, ამიტომ, გვაცადეთ და შეინარჩუნეთ ნდობა ხელისუფლების მიმართ, რომ მე-12 წელსაც მოვახერხებთ მშვიდობის შენარჩუნებას, -ამის შესახებ პარტია „ქართული ოცნების“ თავმჯდომარე ირაკლი კობახიძემ ჟურნალისტებს განუცხადა.

როგორც კობახიძემ აღნიშნა, „ქართული ოცნებაა“ პირველი ხელისუფლება, რომლის მმართველობის პირობებშიც ომი არ ყოფილა.

„გვაცადეთ სწორი პოლიტიკის წარმოება. წინა ხელისუფლებამ თავისი „სწორი“ პოლიტიკით მიგვიყვანა ქვეყნის ტერიტორიების 20 პროცენტის ოკუპაციამდე და ათას უბედურებამდე. 400 კაცზე მეტი დაიღუპა, 30 ათასი დევნილი და ა.შ. ეს იყო წინა ხელისუფლების პოლიტიკის შედეგი. ჩვენ 11 წლის მანძილზე მოვახერხეთ ამ ქვეყანაში მშვიდობის შენარჩუნება და პირველი ხელისუფლება ვართ, რომლის პირობებშიც ომი არ ყოფილა, რუსეთს ტერიტორიული წინსვლა არ ჰქონია. ჩვენ ვართ პირველი ხელისუფლება. კეთილი ინებონ და გვაცადონ“-განაცხადა ირაკლი კობახიძემ.

იმპიჩმენტი პარლამენტში დამოკიდებულია იმაზე, „ქოცები“ რამდენს გადაიხდიან, მაგრამ ვუყურე კობახიძის შემაჯამებელ სიტყვას, მომეჩვენა, რომ მონდომებული არ არიან, ბევრი ფული გადაიხადონ, – ამის შესახებ პარტია „გირჩის“ ლიდერმა, იაგო ხვიჩიამ განაცხადა.

ხვიჩიას თქმით, შეიძლება, „ქართულ ოცნებაში“ საქმის შენარჩუნება ასეც ურჩევნიათ.

„მჯერა ჩემი კოლეგების, რომ „ქართულ ოცნებაში“ საჯაროდ არ გადახტებიან და იმპიჩმენტი არ შედგება. ჩემი აზრით, საკონსტიტუციო სასამართლოს გადაწყვეტილება ისეთი იქნება, როგორიც „ქართულ ოცნებას“ უნდა, რათა ამ პროცესის დასრულების შემდეგ პრეზიდენტზე ისაუბრონ, როგორც კონსტიტუციის დამრღვევზე. მგონი, ეს საქმე იმპიჩმენტამდე არ მივა. ეს დისკუსია იმხელა დონეზე აიწია, რომ ჩემი ნებისმიერი კოლეგისთვის იაფად გაყიდვა უხერხული იქნება. „ქოცები“ კიდევ ამ ყველაფერში ძალიან ძვირს არ გადაიხდიან. საკმაოდ რთული იქნება, რომ ამხელა ყურადღებისა და ბულინგის ფონზე უმრავლესობის მხარეს 12 დეპუტატი გადახტეს, თუმცა არაფერს გამოვრიცხავ. ეს დამოკიდებულია იმაზე, „ქოცები“ რამდენს გადაიხდიან, მაგრამ ვუყურე კობახიძის შემაჯამებელ სიტყვას და მომეჩვენა, რომ მონდომებული არ არიან, ბევრი ფული გადაიხადონ. შეიძლება, საქმის შენარჩუნება ასეც ურჩევნიათ“, – განაცხადა იაგო ხვიჩიამ.

გაფართოება ნიშნავს, რომ კანდიდატმა ქვეყნებმა უნდა განახორციელონ რეფორმები. მათ იციან, რა არის გასაკეთებელი, – ამის შესახებ ევროპული საბჭოს პრეზიდენტმა, შარლ მიშელმა ესპანეთის ქალაქ გრანადაში ჟურნალისტებს განუცხადა, სადაც ევროპული საბჭოს არაფორმალური შეხვედრა მიმდინარეობს.

მისი თქმით, ევროკავშირის მხრიდან საჭიროა გაფართოებისთვის მომზადება.

„ჩვენი მხრიდან, ევროკავშირის მხრივ კი, ჩვენ გვჭირდება მოვემზადოთ. ბევრი წლის განმავლობაში პირველად ხდება, რომ გვაქვს ასეთი მაღალი დონის დებატები ფუნდამენტურ საკითხებზე. ეს იქნება ევროკავშირის საბჭოს ძალიან მნიშვნელოვანი შეხვედრა, რადგან ეს არის სტრატეგიულ დღის წესრიგზე დებატების დაწყების საწყისი ეტაპი. უნდა გავარკვიოთ რამდენიმე საკითხი: პირველი, რა გვსურს ერთობლივად მომავალში, რა არის ჩვენი პრიორიტეტები, საერთო პოლიტიკა, გაფართოების პერსპექტივიდან გამომდინარე. მეორე, როგორ ვწყვეტთ საკითხებს ერთად და მესამე, როგორ ვაფინანსებთ ჩვენ პრიორიტეტებსა და ინიციატივებს მომავალში“, – აღნიშნა შარლ მიშელმა.

ევროკავშირის ელჩს თუ აქვს რესურსი, მაშინ ააღებინოს ხელი პრეზიდენტს კონსტიტუციის უხეშ დარღვევაზე, ვფიქრობ, არ აქვს ამის რესურსი, ასეთ პირობებში ყველამ გვაცალოს, რომ ჩვენ დავიცვათ სამართლის უზენაესობა, – ასე უპასუხა პარტია „ქართული ოცნების“ თავმჯდომარემ, ირაკლი კობახიძემ ჟურნალისტების კითხვას, რომელიც საქართველოში ევროკავშირის ელჩის, პაველ ჰერჩინსკის დღევანდელ განცხადებასთან დაკავშირებით დაუსვეს.

კერძოდ, ჟურნალისტებმა კობახიძეს ჰკითხეს ელჩის იმ განცხადებაზე, სადაც ის ამბობს: „საქართველოს პრეზიდენტის წინააღმდეგ იმპიჩმენტის პროცედურა არ უწყობს ხელს დეპოლარიზაციას, პირიქით, აძლიერებს მას“.

კობახიძის თქმით, სამართლის უზენაესობის დაცვაზე საქართველოში პასუხისმგებელია არა რომელიმე ელჩი, არამედ საქართველოს ხელისუფლება და შესაბამისი კონსტიტუციური ორგანოები.

„მე მახსოვს თავის დროზე კარლ ჰარცელის განცხადება მელიას დაჭერასთან დაკავშირებით. მან განაცხადა, საჯაროდაც და მეც მქონდა მასთან საუბარი, რომ მელიას დაჭერა ხელს არ შეუწყობდა რაღაც პროცესების სწორად განვითარებას. მაშინ მე ვუთხარი მარტივი რამ, მაშინ გადაახდევინეთ მელიას გირაო. ჩვენ რა უნდა გაგვეკეთებინა, ხომ ვერ ჩავერეოდით სასამართლოს საქმიანობაში. ძალიან მარტივი იყო მისთვის მელიას დარწმუნება იმაში, რომ გადაეხადა გირაო, რაზეც მითხრა, რომ ის არ გეგმავდა ამის გაკეთებას, მელიას დარწმუნებას, გადაეხადა გირაო.

შემდეგ გახსოვთ თქვენ სტრასბურგის სასამართლოს გადაწყვეტილება იმასთან დაკავშირებით, რომ სასამართლოს გადაწყვეტილება საქართველოში იყო სწორი, მელიას დაჭერა იყო სწორი და ლეგიტიმური, დარჩა ისტორიას კარლ ჰარცელის არასწორი განცხადება და ისტორიას დარჩა ასევე სტრასბურგის სამართლებრივი შეფასება, რომ ხელისუფლების თითოეული მოქმედება ეფუძნებოდა სამართლის უზენაესობის პრინციპს და სამართლის განუყრელ დაცვას.

მე ძალიან დიდ პატივს ვცემ ევროკავშირის მოქმედ ელჩს ყველაფრის გამო, თუმცა, მინდა, აქ ერთი რამ აღვნიშნო. მას თუ აქვს რესურსი, მაშინ ააღებინოს ხელი საქართველოს პრეზიდენტს კონსტიტუციის უხეშ დარღვევაზე. მგონია, რომ მას არ აქვს ამის რესურსი. ასეთ პირობებში ყველამ უნდა გვაცალოს ჩვენ, რომ ჩვენ დავიცვათ სამართლის უზენაესობა. თუ ევროკავშირის ელჩს არ აქვს იმის რესურსი, მან ააღებინოს ხელი სალომე ზურაბიშვილს კონსტიტუციის უხეშ დარღვევაზე, ასეთ შემთხვევაში ჩვენ უნდა გვქონდეს საშუალება, სათანადო სამართლებრივი ინსტრუმენტებით ავაღებინოთ ხელი სალომე ზურაბიშვილს კონსტიტუციის უხეშ დარღვევაზე, რადგან სამართლის უზენაესობის დაცვაზე საქართველოში პასუხისმგებელია არა რომელიმე ელჩი, არამედ საქართველოს ხელისუფლება და შესაბამისი კონსტიტუციური ორგანოები“, – განაცხადა ირაკლი კობახიძემ.

ბევრი კომენტარი გავაკეთეთ იმპიჩმენტის პროცედურასთან, პროცესთან დაკავშირებით. საზოგადოება ხედავდა ყველაფერს, პრეზიდენტის წარმომადგენლებს როგორ უჭირდათ კითხვებზე პასუხების გაცემა, – ამის შესახებ პარტია „ქართული ოცნების“ თავმჯდომარემ, ირაკლი კობახიძემ განაცხადა.

მისივე თქმით, წარდგინების ავტორებმა ყველა კითხვას ზუსტი პასუხი გასცეს.

„შეგნებულად არ სცემდნენ კითხვებს პასუხს, ერთსა და იმავე თემაზე ათჯერ დასმულ შეკითხვას. როცა ათჯერ ვერ ახერხებ შეკითხვაზე პასუხის გაცემას, ნიშნავს, რომ თავადაც გაქვს გაცნობიერებული, რამდენად სუსტია შენი პოზიციები. ასევე იხილეთ კითხვა-პასუხი ჩვენთან მიმართებით, რამდენი კითხვაც დასვეს, იმდენ კითხვაზე ზუსტი პასუხი გავეცი. მეორე მხრიდან ასე არ იყო, რადგან პასუხები არ აქვთ უამრავ კითხვაზე, იქიდან გამომდინარე, რომ მათი მტკიცება აბსოლუტურად უსაფუძვლო იყო. როცა ამტკიცებ, რომ 49-ე მუხლი ადგენს უფლებამოსილებას, ხოლო თვითონ მუხლის სათაური გეუბნება, რომ სტატუსს ადგენს, რაზეა აქ საუბარი. როცა გეკითხებიან, რა განსხვავებაა წარმოდგენასა და წარმომადგენლობითი უფლებამოსილების განხორციელებას შორის და ამაზე არ გვპასუხობ, ხომ ყველაფერი ცხადია. ეს ყველაფერი საზოგადოებამ ნახა“, – განაცხადა ირაკლი კობახიძემ.

საქართველოს პარლამენტის თავმჯდომარის, შალვა პაპუაშვილის განცხადებით, „შეკრებებისა და მანიფესტაციების შესახებ“ კანონს პრეზიდენტი ვეტოს თუ დაადებს, პარლამენტი დაძლევს.

მისივე თქმით, „ნაციონალურ მოძრაობას“ წამოსცდა, რომ პრეზიდენტი კანონზე ვეტოს დადებას აპირებს.

„ამ დღეებში იყო მცდელობა, გამეორებულიყო მარტის რადიკალური დღის წესრიგი. ზუსტად იგივე აქტორები, „ენჯეოები“, ოპოზიცია იყო ზუსტად იმავე დაბრენდვით, თითქოს ეს იყო რუსული კანონი. ვნახეთ, რომ ეს რადიკალიზმი გუშინ არ შედგა. მადლობას ვუხდი უცხოელ აქტორებს, რომ არ ჩაერივნენ ამ პროცესში და ჰქონდათ კონსტრუქციული როლი. ოპოზიციის რადიკალიზმის პოტენციალი ძალიან დაბალია. ვნახეთ ისევ ექსტრემისტული ჯგუფები, „ნაცების“ ყალბი „ენჯეოები“ სხვადასხვა მოქმედებით. გუშინ „ნაცმოძრაობას“ წამოსცდა, რომ პრეზიდენტი კანონს ვეტოს დაადებს. როგორც ჩანს, იციან, უკვე. ვეტო თუ იქნება, პარლამენტი დაძლევს, რადგან მიგვაჩნია, რომ ეს არის სწორი კანონი, პასუხობს უსაფრთხოების იმ გამოწვევებს, რომლებიც საქართველოს აქვს. ვინც ყვირის, ზუსტად ისინი არიან რადიკალური ჯგუფების ნაწილი ან ამ ყველაფრის წამხალისებლები“, – განაცხადა პაპუაშვილმა.

პარლამენტმა „შეკრებებისა და მანიფესტაციების შესახებ“ კანონპროექტი მესამე მოსმენით გუშინ დაამტკიცა. ცვლილებებზე მსჯელობა დაჩქარებული წესით ორი დღის განმავლობაში მიმდინარეობდა.