საქართველოს ეროვნული ბანკის მიერ გამოქვეყნებული მონაცემების თანახმად, 13 აპრილისთვის ერთი ამერიკული დოლარი 2.5261 ლარი ეღირება, ევრო – 2.7605 ლარი, ხოლო ბრიტანული გირვანქა სტერლინგი – 3.1374 ლარი.
დღეს კი, ოფიციალური კურსით, ერთი ამერიკული დოლარი 2.5274 ლარი ღირდა, ევრო – 2.7594 ლარი, ხოლო ფუნტი – 3.1461 ლარი.
დღევანდელი ვაჭრობის შედეგად მიღებული კურსი ხვალ, 13 აპრილს ამოქმედდება.
სომხეთის რუსულენოვანი გაზეთ „გოლოს არმენიი“-ში (Голос Армении) დაბეჭდილია სტატია სათაურით „თბილისის სომხური თეატრი: ტკბობა წინასწარ“ (ავტორი – სონია მელოიანი), რომელშიც განხილული და გადმოცემულია თბილისში მდებარე სომხური მნიშვნელოვანი კულტურული დაწესებულების – პეტროს ადამიანის სახელობის სომხური სახელმწიფო დრამატული თეატრის ახალი შენობის მშენებლობის მიმდინარეობა.
„ოდესღაც სომეხმა ისაია პიტოევმა თბილისში ამჟამინდელი შოთა რუსთაველის სახელობის ქართული ეროვნული თეატრის შენობა ააგო, ახლა კი ქართველი ბიძინა ივანიშვილი აშენებს თბილისში სომხურ თეატრს. ყველაფერი სწორია – ვალს გადახდა უნდა“, – ამბობდა დიდი თეატრალური რეჟისორი და შ.რუსთაველის სახელობის ეროვნული სახელმწიფო თეატრის ხელმძღვანელი რობერტ სტურუა.
დიახ, ყველაფერი სწორია: 1898-1901 წლებში ცნობილმა თბილისელმა ვაჭარმა და მეცენატმა, სომეხმა ისაია პიტოევმა თბილისში თეატრის მდიდრული შენობა ააშენა, რომელიც 1,5 მილიონი ოქროს რუბლი დაჯდა. სხვათა შორის, მშენებლობაში ფული ჩადო აგრეთვე ცნობილმა ნავთობმრეწველმა, სომხური წარმომავლობის მქონე ფილანტროპმა ალექსანდრე მანთაშევმაც. რამდენი თანხაა დახარჯული ქართველი ბიზნესმენისა და ფილანტროპის ბიძინა ივანიშვილის მიერ თბილისის სომხური თეატრის ახალი შენობის აგებისათვის, ეს ჯერ-ჯერობით არავინ იცის. თეატრის გახსნამდე უკვე სულ ცოტაღა დარჩა, შენობა მთლიანად აგებულია, რჩება მხოლოდ მცირეოდენი შიდა სამუშაოები, ტექნიკური აღჭურვილობა… როგორც თეატრის ხელმძღვანელი არმენ ბაიანდურიანი აცხადებს, მთელ საქართველოში თეატრის ასეთი დიდებული შენობა მეორე არსად არ არის. იგი მართალს ამბობს“, – წერს სტატიის ავტორი.
ძველი შენობისაგან დიდებული ისტორიის მქონე თეატრს მხოლოდ პორტიკი და ცენტრალური შესასვლელის სვეტები შემორჩა. დახეთქილი და ბათქაშაცვენილი კედლების, გაცვეთილი კიბეების, დაზიანებული სახურავის ნაცვლად ჩვენ ვხედავთ მარმარილოს კიბეებს, დიდ თანამედროვე სცენას, დიდებულ დარბაზს, რომელშიც მაყურებლისთვის 120 სავარძელი უნდა დაიდგას…. შენობას აქვს ღი დიდი ბალუსტრადიანი ბალკონი, საიდანაც თბილისის ხედი იშლება.
„ჩვენს თეატრში თაობათა ცვლა მიმდინარეობს. დასში ბევრი ახალგაზრდაა, რომლებიც მშობლიური თეატრის სცენაზე ჯერ არც გასულან. საბედნიეროდ, ეს პერიოდი უკვე მთავრდება. მე უსაზღვროდ მადლობელი ვარ არა მხოლოდ ბიძინა ივანიშვილისა, არამედ მთელი საქართველოსი, რომელიც ასეთ დიდ ყურადღებას იჩენს სომხური თეატრის მიმართ“, – ამბობს არმენ ბაიანდურიანი „გოლოს არმენიის“ კორესპონდენტთან საუბარში.
სტატიაში საკმაოდ ფართოდაა გადმოცემული თეატრის ისტორია, შემოქმედებითი მიღწევები, საქართველოში მცხოვრები სომხური საზოგადოების ძალისხმევა კულტურის ამ მნიშვნელოვანი კერის განვითარების მიზნით – როგორც წარსულში, მე-20 საუკუნეში, ისე დღევანდელ პირობებში.
„სომხური თეატრის ადმინისტრაცია უკვე გადავიდა ახალ შენობაში. კიდევ ცოტაც და დასი მუშაობას დაიწყებს… ჩვენ იმედით ველოდებით შემოსდგომას, რათათბილისში ისევ გავემგზავროთ და მონაწილეობა მივიღოთ სომხური თეატრის ახალი შენობის საზეიმო გახსნაში, რომელიც საქართველოში უნიკალური და განუმეორებელია. ეს არა მარტო სიხარულს გვანიჭებს, არამედ გლობალურ ოპტიმიზმს გვისახავს – ჩვენს ახლოს არის ქვეყანა, სადაც თეატრები კი არ იხურება, არამედ იხსნება…“, – წერს ავტორი.
წყარო
თავდაცვის ყოფილი მინისტრი დავით კეზერაშვილი მისი თაღლითური სქემის შესახებ BBC-ის საგამოძიებო რეპორტაჟს გამოეხმაურა.
როგორც კეზერაშვილი აცხადებს, არ აქვს და არც არასდროს ჰქონია კავშირი BBC-ის პლატფორმაზე გამოქვეყნებულ საგამოძიებო მასალაში აღწერილ ე.წ. ქოლ ცენტრების საკითხთან.
„მიუხედავად იმისა, რომ ბრიტანეთის საზოგადოებრივი მაუწყებელი მიმაჩნია მაღალი ჟურნალისტური სტანდარტის მედიასაშუალებად, ეს ის შემთხვევაა, როდესაც ჩემთან დაკავშირებულ საკითხებზე გამოცემასთან მაქვს ბევრი შეკითხვა. აბსოლუტური პასუხისმგებლობით ვაცხადებ, რომ არასდროს მიმიღია მონაწილეობა მსგავს სქემებში, ამიტომ არ ვაპირებ, უყურადღებოდ დავტოვო ის ზიანი, რასაც ეს მასალა მე მაყენებს, მითუმეტეს იმ ფონზე, როდესაც ჩემ წინააღმდეგ საქართველოს ხელისუფლების მხრიდან ხორციელდება პოლიტიზირებული მართლმსაჯულება, ჩემი მონაწილეობით შექმნილ ტელეკომპანია „ფორმულას“ წინააღმდეგ კი მმართველი პარტიის მხრიდან კამპანიური ხასიათის შეტევაა, რაც აღიარებულია არაერთი საერთაშორისო ორგანიზაციის მიერ და აშშ-ის სახელმწიფო დეპარტამენტის ანგარიშებში. გამოვიყენებ ყველა სამართლებრივ ბერკეტს, რომ ბრიტანეთის საზოგადოებრივი მაუწყებლის პლატფორმაზე გასულ მასალაში ჩემთან დაკავშირებული როგორც ფაქტების უზუსტობა, ასევე მათი არასწორი ინტერპრეტაციის შედეგად მიღებული დაშვებების სიმცდარე დავადასტურო და ამას დიდი დრო არ დასჭირდება. ასევე ყოველთვის გამოვთქვამდი მზადყოფნას და დღესაც მზად ვარ, ე.წ. ქოლ ცენტრების თემაზე ევროპული ქვეყნების საგამოძიებო სტრუქტურებთან თანამშრომლობისთვის, მით უმეტეს, რომ ჩემი, როგორც პოლიტიკურ დევნილობაში მყოფი პირის, საცხოვრებელი ადგილი სწორედ დიდი ბრიტანეთია, რომლის მართლმსაჯულების სისტემის სანდოობაში ეჭვი არავის ეპარება”, – ნათქვამია კეზერაშვილის განცხადებაში.
რიკოთი სატვირთო მანქანებისთვის დღეს, ხოლო მსუბუქი ტრანსპორტისთვის 13 აპრილიდან გაიხსნება. ამის შესახებ ინფორმაციას საქართველოს რეგიონული განვითარებისა და ინფრასტრუქტურის სამინისტროს, საავტომობილო გზების დეპარტამენტი ავრცელებს.
მათი თქმით, თბილისი–სენაკი–ლესელიძის საავტომობილო გზის 147-ე კილომეტრთან (ჩუმათელეთი-ხევის მონაკვეთზე) განვითარებული ქვათა ცვენის გამო, ფერდის ჩამოწმენდის, გზის სავალი ნაწილის გაწმენდისა და გაფართოების სამუშაოები მთელი ღამის განმავლობაში მიმდინარეობდა.
რამ გამოიწვია აღნიშნულ მონაკვეთზე ქვათა ცვენა და შეიძლება ველოდეთ კიდევ მსგავს ფაქტებს?
ამ საკითხზე „ჯორჯიან თაიმსს“ გეოლოგი არჩილ მაღალაშვილი ესაუბრა.
მისი თქმით, რიკოთის მონაკვეთი, ყველაზე რთული მონაკვეთია, ახლად მშენებარე ავტობანის გასწვრივ და შესაბამისად საკმაოდ რთული კვლევები იყო ჩატარებული.
„ნაწილობრივ ვიცნობ ამ კვლევებს. უნდა გითხრათ, რომ იმ კვლევების თანახმად, პრინციპში, სწორი სტრატეგია იყო არჩეული, რომელიც გულისხმობდა გარკვეული რაოდენობის სტანდარტული გადაწყვეტილებების შემუშავებას ამა თუ იმ სირთულის მონაკვეთებისათვის. მაგრამ ეს არ გამორიცხავს გარკვეულ მოულოდნელობებს. შესაძლებელია იყოს ისეთი რამ, რაც ამ კვლევებში ბოლომდე გათვალისწინებული არ არის. ასეთ შემთხვევაში ჩასატარებელია დამატებითი კვლევები და იმ კონკრეტული მონაკვეთისთვის უნდა შემუშავდეს რეკომენდაციები.
როგორც ჩანს, რაღაც მონაკვეთებისთვის, რიკოთის შემთხვევაში, კვლევა ბოლომდე კარგად არ არის გაკეთებული, ან რაღაც სხვა მიზეზია. ფაქტი სახეზეა, რომ გაუთვალისწინებელ ფაქტორებთან გვაქვს საქმე. მიზეზი ბევრი შეიძლება იყოს; მაგალითად, მოვლენების გაუთვალისწინებლობა, ან მასალების ხარისხის შეუსაბამობა და ა.შ. ერთი რამ ცხადია, რომ ეს ძალიან რთული მონაკვეთია, რომელსაც სერიოზული კვლევები სჭირდება, მშენებლობის პროცესში კი აუცილებალია მონიტორინგი,“– აცხადებს ჩვენთან საუბარში გეოლოგი.
როგორც ის განმარტავს, მსგავს მეწყრულ პროცესებს გაზაფხულის პერიოდში წვიმები და თოვლის დნობა იწვევს.
„კარგი იქნებოდა, რომ ეს გათვალისწინებული და წინასწარ დაგეგმილი ყოფილიყო. არსებობს წინასწარ დაგეგმილი მეთოდოლოგია, ვთქვათ, სპეციალურად იწვევ ქვათა ცვენას, ან – ააქტიურებენ მეწყერს. ასეთი პრაქტიკა არსებობს, მაგრამ რამდენადაც ვიცი, ჩვენს შემთხვევაში ასე არ არის. ვფიქრობ, გარკვეული ფაქტორები ბოლომდე არ იყო გათვალისწინებული.
ეს რა თქმა უნდა, გამოიწვევს გარკვეული ხარჯების მომატებას, რისი გათვალისწინებაც მომავალში აუცილებელია.
ნებისმიერი, მითუმეტეს ასეთი სახის ნაგებობები, გვირაბები, კაშხლები და ა.შ. მუდმივი მონიტორინგის ქვეშ უნდა იყოს. ყოველთვის უნდა ხდებოდეს შემოწმება, ბზარების დადგენა და ა.შ. დარწმუნებული ვარ, ასეთი ღონისძიებების გატარება პროექტში ჩადებულია. ეს არის ძალიან საპასუხისმგებლო მაგისტრალი მთელი საქართველოსთვის და რეგიონისთვის. ჩემი აზრით, მისდამი ყურადღება კიდევ უფრო გაიზრდება,“- აღნიშნავს არჩილ მაღალაშვილი.
/ ნინო ოთარაშვილი /
კეზერაშვილი საქართველოში ჯარს ძარცვავდა, ევროპაში წავიდა და ევროპელი პენსიონრების ძარცვა დაიწყო. ახლა მაინც დაიჭირონ. „ბიბისი“ პროკურატურა არ არის, მაგრამ მისი გამოძიება რეპუტაციულად დამანგრეველია, – ამის შესახებ პარტია „მოქალაქეების“ ლიდერმა, ალეკო ელისაშვილმა განაცხადა.
ელისაშვილის თქმით, „დავით კეზერაშვილი არის იშვიათი გარეწარი“.
„ამ ადამიანმა საქართველოში გაძარცვა ჯარი, მოიპარა ფული და შემდეგ ქვეყნიდან გაიქცა. შემდეგ „ქართულ ოცნებას“ გაურიგდა „ნაციონალური მოძრაობის“ დაშლის საფასურად. ვიცით, რომ მათი გარიგების საფუძველი პარტიიდან ბოკერიას ჯგუფის გამოყოფა იყო. ამიტომ „ქართულმა ოცნებამ“ თვალი დახუჭა და მას ზრდილობისთვის ეძებდნენ, ასე იყო ძებნა გამოცხადებული. სინამდვილეში მშვიდად და ბედნიერად ცხოვრობდა.
იშვიათი გარეწარი კეზერაშვილი საქართველოში ჯარს ძარცვავდა, ევროპაში წავიდა და ევროპელი პენსიონრების ძარცვა დაიწყო. ახლა მაინც დაიჭირონ. „ბიბისი“ პროკურატურა არ არის, მაგრამ მისი გამოძიება რეპუტაციულად დამანგრეველია. რა თქმა უნდა, ეს გამოძიება საფუძვლად დაედება გამოძიებას ევროპულ ქვეყნებში კეზერაშვილის წინააღმდეგ. კეზერაშვილისნაირი გათახსირებული ხალხის ადგილი ციხეშია. ჩემი ნება რომ იყოს, რაც ჯარს მოპარა, ვარწყევინებდი ბოლო თეთრამდე. ახლა ევროპელებმა უნდა დაიჭირონ“, – აღნიშნა ელისაშვილმა.
როგორც ელისაშვილმა განაცხადა, „სამარცხვინო დღეშია კეზერაშვილის მიერ დაფინანსებული ის ოპოზიცია, რომელიც კურტუმოგაბზეკილი დადიოდა და აქეთ ჭკუას გვარიგებდა“.
„კეზერაშვილისნაირი ამაზრზენი კაცით ბიძინა ივანიშვილს ვერ დაამარცხებ. მით უმეტეს, ისეთ კაცზეა ლაპარაკი, ვინც ბიძინა ივანიშვილს ნებისმიერ დროს გაურიგდება და გაყიდის კურტუმოგაბზეკილ ოპოზიციას. დადგნენ და იმართლონ თავი, გრძელი ენები რომ ჰქონდათ. არ რცხვენიათ, ჯარისა და პენსიონრების ქურდისგან ფულს რომ იღებენ? „ბიბისი“ არ არის არც „ფორმულა“, არც „ტვ პირველი“ და არც „იმედი“, „პოსტივი“. „ქართული ოცნება“ კეზერაშვილს თავზე ხელს 11 წელი რატომ უსვამდა? ვიდრე ევროპარლამენტს ვედავებით, კეზერაშვილი ასე და ისე რატომ არის მოხსენიებული, ხელისუფლება რას აკეთებდა? კეზერაშვილი 18-მილიონიან ბინაში რომ ცხოვრობს, არ იცოდნენ? თარგამაძემ ინტერვიუ თუ ჩაწერა, „ქართული ოცნების“ დაგეშილმა პროკურატურამ ვერ იპოვა? მათთან მაქვს პრეტენზია, თავზე ხელს რატომ უსვამდნენ. ადრე თუ რეზოლუციებში კეზერაშვილი მედიამაგნატი ეგონათ, ახლა ნახავენ, რომ პენსიონრების ქურდია“, – განაცხადა ალეკო ელისაშვილმა.
თურქეთის სახელმწიფო ტელერადიოკომპანიის TRT-ის (Türkiye Radyo Televizyon Kurumu) ვებ-გვერდზე გამოქვეყნებულია სტატია სათაურით „მაჭახელი – იუნესკოს დაცვის ქვეშ მყოფი ბიოსფერული ნაკრძალი“, რომელშიც საუბარია საქართველოს მოსაზღვრე თურქეთის ართვინის პროვინციაში არსებულ ბუნებრივ ეკოსისტემაზე და მის ისტორიულ წარსულზე, რომელიც 1921 წლის რუსეთ-თურქეთის ხელშეკრულებასთან არის დაკავშირებული.
გთავაზობთ პუბლიკაციას:
ბიოსფერული რეზერვატები წარმოადგენენ ტერიტორიებს ხმელეთის ან სანაპირო ეკოსისტემებით, სადაც დამყარებულია ეკოლოგიურად, ეკონომიკურად, კულტურულად და სოციალურად დაბალანსებული და მდგრადი ურთიერთობები ადამიანსა და ბუნებას შორის. 2021 წლის მონაცემებით, იუნესკოს ბიოსფერული რეზერვატების მსოფლიო ქსელში არის 714 ბიოსფერული რეზერვი 129 ქვეყნიდან. თურქეთის პირველი და ერთადერთი ბიოსფერული ნაკრძალი არის ართვინის პროვინციის ბორჩხას რაიონის საზღვრებში მდებარე „ჯამილი“, რომელიც უფრო ცნობილია სახელით „მაჭახელი“. ამ რეგიონს აქვს მომხიბლავი სილამაზე თავისი ბუნებრივი ძველი ტყეებით, ენდემური მცენარეებით, ისტორიული მეჩეთებით, სუფთა კავკასიური ფუტკრით და თავისი უნიკალური კულტურით და ხელუხლებელი პლატოებით.
ქარჩალის მთების კალთებზე, რომლის სიმაღლეც 3450 მეტრს აღწევს, საქართველოს საზღვარზე 3100 მეტრის სიმაღლეზე მდებარე იალაღი, რთული სატრანსპორტო პირობების მიუხედავად, ერთ-ერთი ყველაზე სასურველი ადგილია ფოტოგრაფებისა და ბუნების მოყვარულთათვის.
რეგიონმა დღევანდელი ფორმა მიიღო 1921 წელს რუსეთსა და თურქეთს შორის სასაზღვრო შეთანხმებით. ხელშეკრულების თანახმად, ხეობის 18 სოფლიდან 12 საქართველოს საზღვრებში, 6 თურქეთის საზღვრებში დარჩა. საქართველოს საზღვარი სოფელ ჯამილის ქვემოთ გადის. ზამთარში და გაზაფხულზე მაჭახელის სოფლებში თურქულ დასახლებამდე მისვლა თითქმის შეუძლებელია, რადგან 4-6 თვე თოვლითაა ჩაკეტილი გზები. ზამთრის ამ მკაცრი პირობების გამო, სოფლებში საგანგებო სიტუაციებში ადგილობრივი მოსახლეობა ბორჩხას ან ართვინის ნაცვლად საქართველოში გადადის. სატრანსპორტო მოძრაობის სირთულემ ასევე დიდი უპირატესობა შეუქმნა რეგიონს; ამ გზით მაჭახელმა ადგილობრივი მოსახლეობის დაცვით შეძლო შეენარჩუნებინა თავისი ბუნება, ტრადიციები და წეს-ჩვეულებები.
2006 წელს იუნესკოს მიერ „მსოფლიო ბიოსფერული ნაკრძალის ზონად“ გამოცხადებულ მაჭახელში მეფუტკრეობა და თაფლის წარმოება ადგილობრივების ყველაზე მნიშვნელოვანი საარსებო წყაროა. სიმაღლის სხვაობის გამო წარმოქმნილი მდიდარი მცენარეული საფარი “სუფთა კავკასიურ ფუტკარს” მასპინძლობს. ყოველწლიურად, აგვისტოს შუა რიცხვებში, მაჭახელში იმართება „თაფლის ფესტივალი“. რეგიონის მოსახლეობა საკმარისად გამოცდილია, რათა საერთაშორისო პლატფორმებზე გაუზიარონ თავიანთი გამოცდილება და ცოდნა მეფუტკრეობის სფეროში.
წყარო
თურქეთის ინგლისურენოვან გაზეთ „დეილი საბაჰში“ (Daily Sabah) გამოქვეყნებულია სტატია სათაურით „თურქეთ-საქართველოს ვაჭრობა რეკორდულ 3 მილიარდ დოლარს მიუახლოვდა“ (ავტორი – დილარა ასლან ოზერი), რომელშიც გადმოცემულია საქართველოს ელჩის გიორგი ჯანჯღავას საუბარი თურქ ჟურნალისტთან, ორი მეზობელი ქვეყნის ეკონომიკური ურთიერთობის შესახებ.
„დეილი საბაჰისადმი“ მიცემულ ექსკლუზიურ ინტერვიუში ქართველმა დიპლომატმა გიორგი ჯანჯღავამ აღნიშნა, რომ 2022 წლის შედეგებით, თურქეთი საქართველოსთვის უმსხვილესი სავაჭრო პარტნიორი იყო – სტატისტიკის მიხედვით, საქონელბრუნვამ 2,81 მილიარდი დოლარი შეადგინა“. ამრიგად, მოცულობა რეკორდულს მიუახლოვდა
ელჩის თქმით, მოსალოდნელია, რომ მიმდინარე 2023 წლის განმავლობაში ვაჭრობის მოცულობა კიდევ უფრო გაიზრდება – „პრემიერ-მინისტრ ირაკლი ღარიბაშვილის ინიციატივით ქართული ბაზარი მთლიანად გაიხსნა GMP-ის სტანდარტული, მაღალხარისხიანი თურქული წამლებისათვის“, – ხაზს უსვამს ელჩი ინტერვიუში და ორი ქვეყნის ვაჭრობის სტატისტიკური მონაცემებს ასახელებს. პოზიტიურია აგრეთვე თურქული ინვესტიციების დაბანდების პროცესიც ქართულ ეკონომიკაში. როგორც ცნობილია, საქართველო თურქი ინვესტორებისათვის ხელსაყრელი საინვესტიციო კლიმატით გამოირჩევა.
სტატიაში საუბარია აგრეთვე იმ ენერგეტიკულ კომუნიკაციებზე, რომლებიც კასპიის ზღვის ენერგორესურსების ევროპისაკენ გადაზიდვას ემსახურება (გაზ- და ნავთობსადენებზე). ასევე ბაქო-თბილისი-ყარსის რკინიგზის პოტენციალზე – 2022 წელს ამ რკინიგზით 435 ათასი ტონა ტვირთი იქნა გადატანილი
ქართველი დიპლომატი ყურადღებას უთმობს აგრეთვე ტურიზმის გაფართოების მნიშვნელობას საქართველოსა და თურქეთისათვის. როგორც ცნობილია, თურქეთის მოქალაქეებს საქართველოში უვიზოდ ყოფნა ერთი წლის განმავლობაში შეუძლიათ. „2022 წლის შედეგებით, საქართველოში შემოსული თურქი ტურისტების რაოდენობით, თურქეთმა მეორე ადგილი დაიკავა. თურქული ავიაკომპანიები „თურქიშ ეირლაინზი“, „ანადოლუჯეტი“ და „პეგასუსი“ (Turkish Airlines -THY, Anadolujet, Pegasus) ყოველკვირეულად 72 რეისს ასრულებენ ანკარიდან, სტამბოლიდან და ანტალიიდან თბილისსა და ბათუმში“, – ამბობს გიორგი ჯანჯღავა.
ბოლო ათწლეულში საქართველომ და თურქეთმა დიდი ნაბიჯები გადადგეს ორმხრივი კავშირების განმტკიცებისათვის, რომელიც განსაკუთრებით გაფართოვდა მას შემდეგ, რაც მაღალი დონის სტრატეგიული თანამშრომლობის საბჭოს ჩამოყალიბდა.
თურქეთი, როგორც საქართველოს სტრატეგიული პარტნიორი, მტკიცედ უჭერს მხარს მეზობელი ქვეყნის ტერიტორიულ ერთიანობას და სუვერენიტეტს. ანკარა ასევე მიესალმება საქართველოს ევროატლანტიკურ სწრაფვას და ხელს უწყობს მისი ასეთი გეგმების რეალიზებას. ორი მეგობარი ქვეყნის დინამიური პოლიტიკური ურთიერთობების გაღრმავებას განაპირობებს ორმხრივი მაღალი დონის კონტაქტები და ვიზიტები, მრავალი წლის განმავლობაში.
თურქეთში მომხდარი დამანგრეველი მიწისძვრის შემდეგ საქართველოს პრემიერ-მინისტრი ირაკლი ღარიბაშვილი თურქეთს ეწვია და განაცხადა, რომ მზად არის ყოველგვარი აუცილებელი დახმარების გაწევისათვის. მიწისძვრის შედეგების ლიკვიდაციასა და საძიებო-სამაშველო ოპერაციებში 200 ქართველი მაშველი მონაწილეობდა, ქალაქ ადამიანში, რომელიც ერთ-ერთ ყველაზე დაზარალებულ დასახლებულ პუნქტს წარმოადგენს. როტაციის შემდეგ ქართველებმა სამაშველო სამუშაოები ჰატაის პროვინციის ქალაქ ანტაკიაშიც გააგრძელეს“, – აღნიშნულია პუბლიკაციაში.
უკრაინის პრეზიდენტი ვოლოდიმირ ზელენსკი ეხმიანება რუსების მიერ უკრაინელი სამხედრო ტყვის სიკვდილით დასჯის კადრებს და ამბობს, რომ მსოფლიოს უნდა ჰქონდეს რეაგირება. „არის რაღაც, რასაც მსოფლიო ვერ უგულებელყოფს: როგორ მარტივად კლავენ ეს მხეცები. ეს ვიდეო… უკრაინელი სამხედროს მკვლელობა… მსოფლიომ უნდა ნახოს. ეს ვიდეო აჩვენებს რუსეთის სახეს, როგორიც ის არის. მათთვის არ არსებობენ ადამიანები, შვილი, ძმა, ქმარი.. ვიღაცის შვილი…“
ეს შემთხვევითობა არ არის, ეს ეპიზოდი არ არის, ასე იყო ადრეც, ასე იყო ბუჩაში. ათასჯერ. ყველას უნდა ჰქონდეს რეაქცია, ყველა ლიდერს. არ ჰქონდეთ მოლოდინი, რომ ეს დავიწყებას მიეცემა, რომ დრო გავა“, – განაცხადა ზელენსკიმ.
უკრაინის პრეზიდენტმა აღნიშნა, რომ უკრაინა არაფერს დაივიწყებს და მკვლელებს არ აპატიებს.
“ყველაფრისთვის კანონიერი პასუხისმგებლობა დადგება. ტერორი უნდა დამარცხდეს. ვერავინ გაიგებს, თუ ლიდერებს რეაგირება არ ექნებათ, ახლა უნდა ვიმოქმედოთ! ჩვენ უკრაინაში მაქსიმალურად კონცენტრირებულნი უნდა ვიყოთ ფრონტზე. მაქსიმალურად დავეხმაროთ. გავდევნოთ ოკუპანტები ჩვენი მიწიდან. მთავარი მიზანი- გამარჯვების მოპოვებაა. მთავარი მიზანი – უკრაინას სჭირდება სიძლიერე, რომ გაიმარჯვოს. ოკუპანტების განადგურება, მკვლელების დასჯა, ბოროტი სახელმწიფის ტრიბუნალი“, – განაცხადა ზელენსკიმ.
11 აპრილს სოციალურ ქსელებში გავრცელდა ვიდეო, რომელშიც რუსი სამხედროები დანით თავს კვეთენ უკრაინელ ჯარისკაცს. ვიდეოში ჩანს, რომ სამხედრო ჯერ კიდევ ცოცხალია, როდესაც ოკუპანტებმა მისთვის თავის მოჭრა დაიწყეს.
ვურჩევ მათ, ვინც “გამოსავალსა” და “ახსნას” ეძებს: მონსტრთან ბრძოლაში, მონსტრს არ უნდა დაემსგავსო. ორმაგი სტანდარტებით მორალური უპირატესობა არ მოიპოვება, – ამის შესახებ „ნაციონალური მოძრაობის“ ყოფილი თავმჯდომარე ნიკა მელია სოციალურ ქსელში წერს, რითაც BBC-ის მიერ გამოქვეყნებულ საგამოძიებო სტატიას ეხმაურება.
როგორც მელია აცხადებს, გამარჯვებას სჭირდება მართალი ხალხი, რომელიც სიტუაციას აფასებს ფაქტობრივი მოცემულობიდან და არა “დავალებიდან” გამომდინარე.
„ადამიანი არაა დამნაშავე, სანამ არ დაადგენს სასამართლო. ეს უდანაშაულობის პრეზუმფციის ანბანია. ბრიტანეთის სასამართლო არაა თბილისის საქალაქო სასამართლო, რომ ჭეშმარიტება არ დაადგინოს, თუმცა არც BBC არის PosTV.
მოკლე კომენტარს გავაკეთებ BBC-ზე გამოქვეყნებულ საგამოძიებო რეპორტაჟთან დაკავშირებით, ვრცლად მოგვიანებით.
ერთი წუთით წარმოვიდგინოთ, რომ მსგავსი რეპორტაჟი გაკეთდა ბიძინა ივანიშვილზე, რა იქნებოდა იმ ადამიანების კომენტარები, რომლებიც დღეს “გამოსავალს”, “ახსნასა” და “განმარტებას” ეძებენ… შედიან დეტალებში, როდესაც პრობლემა არა დეტალებში, არამედ არსშია.
მე დავით კეზერაშვილს ვურჩიე, რომ მისი პოლიტიკიდან შორს ყოფნა, კარგი იყო როგორც მისთვის, ისე ქვეყნის მომავლისთვის, ქვეყანაში ავტოკრატიის დემოკრატიით შეცვლისათვის. ახლა კი ვურჩევ მათ, ვინც “გამოსავალსა” და “ახსნას” ეძებს: მონსტრთან ბრძოლაში, მონსტრს არ უნდა დაემსგავსო. ორმაგი სტანდარტებით მორალური უპირატესობა არ მოიპოვება.
ამ ქვეყანაში აუცილებლად გაიმარჯვებს ღირსება და სიმართლე, ამ გამარჯვებას კი სჭირდება მართალი ხალხი, რომელიც სიტუაციას აფასებს ფაქტობრივი მოცემულობიდან და არა “დავალებიდან” გამომდინარე.
თუ „ქართული ოცნების“ დეპუტატებს ვთხოვთ, ან ვთხოვდით ჰქონოდათ სწორი რეაქცია და ამოსავალი წერტილი ყოფილიყო სწორი და არა “მოსახერხებელი” პოზიცია, ამ შემთხვევაში იმავეს ვისურვებდი ნებისმიერისაგან, ჰქონდეთ ისეთივე რეაქცია, როგორიც ექნებოდათ, ეს რეპორტაჟი, რომ ნებისმიერ სხვას შეხებოდა“, – წერს ნიკა მელია.
„საერთაშორისო სავალუტო ფონდის 2023 წლის აპრილის მსოფლიო ეკონომიკური მიმოხილვის თანახმად, 2023 – 2028 წლებში საქართველოს საშუალო ეკონომიკური ზრდა 5%-ს შეადგენს. უნდა აღინიშნოს, რომ ამ მაჩვენებლით საქართველო ლიდერია როგორც ფართო რეგიონის, ისე ევროპის ქვეყნებს შორის“, – აცხადებს ეკონომიკისა და მდგრადი განვითარების მინისტრის მოადგილე, ვახტანგ ცინცაძე.
როგორც მინისტრის მოადგილე აღნიშნავს, ფონდის პროგნოზით, საქართველოში ერთ სულ მოსახლეზე მთლიანი შიდა პროდუქტის მაჩვენებელი 2023 წელს 7600 აშშ დოლარს, ხოლო 2028 წლისთვის 11300 აშშ დოლარს გაუტოლდება. ამასთან, 2021 წელს მსყიდველუნარიანობის პარიტეტზე დაყრდნობით საქართველოს ერთ სულ მოსახლეზე მშპ-ს მაჩვენებელი ევროკავშირის მაჩვენებლის 34.5%-ს შეადგენდა, 2022 წელს 37.1%-მდე გაიზარდა, ხოლო 2028 წლისთვის 46%-ს მიაღწევს, მაშინ როცა ევროკავშირის კანდიდატი ჩრდილოეთ მაკედონიის ანალოგიური მაჩვენებელი 40.8%, ხოლო მოლდოვის 37.6% იქნება.
„საქართველოს მთავრობის ძირითად პრიორიტეტს ეკონომიკური ზრდის უფრო მეტად დაჩქარება წარმოადგენს, მათ შორის იმაზე მეტად, ვიდრე ეს საერთაშორისო საფინანსო ინსტიტუტების მიერ არის პროგნოზირებული. აღნიშნული მიმართულებით მთავრობა აქტიურად მუშაობს ერთის მხრივ, როგორც ინფრასტრუქტურული პროექტების დაჩქარების კუთხით, ისე სტრუქტურული ეკონომიკური პროექტების განხორციელების მიმართულებით, რაც, მათ შორის, გულისხმობს ეკონომიკის სტრუქტურის გაუმჯობესებას და ზოგადად, ეკონომიკაში პროდუქტიულობის ზრდას. ეს, რა თქმა უნდა, საშუალებას მოგვცემს, უფრო მაღალი ტემპებით მოვახდინოთ ეკონომიკის შემდგომი ზრდა“, – აღნიშნავს ვახტანგ ცინცაძე.
ამასთან, ეკონომიკის მინისტრის მოადგილის განცხადებით, საქართველოს მთავრობის ძირითადი პრიორიტეტია ქვეყანაში ასევე საინვესტიციო და ბიზნეს-კლიმატის გაუმჯობესება, რაზეც პერმანენტულად მიმდინარეობს მუშაობა.
„ეს საშუალებას მოგვცემს, მეტი ინვესტიციები მოვიზიდოთ და უფრო მეტად გავააქტიუროთ ბიზნესსაქმიანობა ქვეყანაში, რაც პირდაპირპროპორციულად ნიშნავს მეტ დასაქმებას, ეკონომიკაში ტექნოლოგიების, ინოვაციების და ცოდნის მეტ ტრანსფერს და პირდაპირპროპორციულად აისახება მოსახლეობასა და მისი კეთილდღეობის ზრდაზე“, – აცხადებს ვახტანგ ცინცაძე.
ინფორმაციას ეკონომიკისა და მდგრადი განვითარების სამინისტრო ავრცელებს.
რეჟისორი გოგა ხაინდრავა „ტვიტერში“ ამერიკის შეერთებული შტატების ელჩს საქართველოში, კელი დეგნანს მიმართავს და წერს, რომ მას პენსიონერებისა და საზოგადოების წინაშე ბოდიში აქვს მოსახდელი, რადგან ღიად უწევდა ლობირებას თაღლით დავით კეზერაშვილს მის მიერ დაფინანსებულ ტელეკომპანიების ეთერებიდან.
„ელჩო დეგნან, არ ფიქრობთ, რომ სულ ცოტა ბოდიში გაქვთ მოსახდელი პენსიონერების და საზოგადოების წინაშე იმ სამარცხვინო ლობირების გამო, რომელსაც ღიად უწევდით თაღლით კეზერაშვილს მის მიერ დაფინანსებული ტელებუნაგების ეთერებიდან! არა არს დაფარული რომ არ გაცხადდეს!
God Blees America!“ – წერს ხაინდრავა.
BBC-მ გამოაქვეყნა ჟურნალისტური გამოძიება, სადაც გაშიფრულია ევროპელი პენსიონრების გაძარცვის სქემა, ხოლო თაღლითური სქემის ორგანიზატორად დავით კეზერაშვილია დასახელებული.
2023 წლის 10 აპრილს სოხუმის სახელმწიფო უნივერსიტეტში პროფესიული გადამზადების პროგრამის „ლაბორატორიის სამედიცინო ტექნიკური ასისტენტი“ კურსდამთავრებულებს განათლების დამადასტურებელი სერტიფიკატები გადაეცათ.
აღნიშნული სასწავლო პროგრამა შეიქმნა ფოლკსვაგენის ფონდის გრანტის: „სოხუმის სახელმწიფო უნივერსიტეტში (თბილისი) საბუნებისმეტყველო მეცნიერებებში პრაქტიკული სწავლება – სტუდენტებისათვის ლაბორატორიის დაფუძნება და მასთან დაკავშირებული სასწავლო კურსი „მოლეკულური მეთოდები ბიოსამედიცინო მეცნიერებებში““ ფარგლებში.
პროგრამის მონაწილეებსა და კურსდამთავრებულებს მიესალმა სოხუმის სახელმწიფო უნივერსიტეტის რექტორი, პროფესორი ზურაბ ხონელიძე, რომელმაც ხაზი გაუსვა აღნიშნული პროფესიული სასწავლო პროგრამის მნიშვნელოვან მიზნებსა და ამოცანებს. სწორედ სოხუმის სახელმწიფო უნივერსიტეტი აღმოჩნდა ის უმაღლესი სასწავლებელი, რომელმაც შეიმუშავა და დანერგა აღნიშნული პროექტი, რითაც მან კიდევ უფრო განიმტკიცა მისი მოწინავე და გამორჩეული ადგილი ქართულ საგანმანათლებლო სივრცეში. სოხუმის სახელმწიფო უნივერსიტეტი ცოცხალი ხიდია ქართველებსა და აფხაზებს შორის, თბილისსა და სოხუმს შორის. აქედან გამომდინარე, ჩვენი უნივერსიტეტი მზადაა ამ პროექტისა და პროგრამის განხორციელებაში ჩართოს ჩვენი თანამოქალაქეები აფხაზეთიდან. ეს იქნება კიდევ ერთი მნიშვნელოვანი გზა, რომელიც ქართველებსა და აფხაზებს ერთმანეთთან დააახლოვებს, – აღნიშნა პროფესორმა ზ. ხონელიძემ.
2015 წლის დეკემბერში სოხუმის სახელმწიფო უნივერსიტეტის მოლეკულური დიაგნოსტიკის და ბიოტექნოლოგიების ცენტრმა (www.cmdb.sou.edu-ge) მოიპოვა ფოლკსვაგენის ფონდის გრანტი: „სოხუმის სახელმწიფო უნივერსიტეტში (თბილისი) საბუნებისმეტყველო მეცნიერებებში პრაქტიკული სწავლება – სტუდენტებისათვის ლაბორატორიის დაფუძნება და მასთან დაკავშირებული სასწავლო კურსი“ მოლეკულური მეთოდები ბიოსამედიცინო მეცნიერებებში“ ინიციატივის: „Between Europe and the Orient – A Focus on Research and Higher Education in/on Central Asian and the Caucasus” ფარგლებში (საერთო რაოდენობით 141 000 ევრო).
გრანტის განმახორციელებლები იყვნენ სოხუმის სახელმწიფო უნივერსიტეტი და ჰანოვერის სამედიცინო უნივერსიტეტი.
ამ გრანტის ფარგლებში დაგეგმილი იყო ახალი სასწავლო კურსის დანერგვა „მოლეკულური მეთოდები ბიოსამედიცინო მეცნიერებებში“-ში, რომელიც შეთავაზებული იყო ბიოლოგიის და მედიცინის ფაკულტეტის შერჩეული სტუდენტებისთვის.
პროექტის ფარგლებში DACUM მეთოდოლოგიით შემუშავდა პროფესიის სტანდარტი, პროფესიული საგანმანათლებლო სტანდარტი ლაბორატორიული მედიცინის სფეროში, ასევე პროფესიული საგანმანათლებლო სტანდარტი (ჩარჩო დოკუმენტი) და მოდულები.
თუმცა „პროფესიული განათლების შესახებ“ კანონის დამტკიცებამ შეცვალა ფაქტობრივი მდგომარეობა, რის შემდეგაც გადაწყდა პროფესიული გადამზადების პროგრამის შემუშავება.
შესწავლილი იქნა არსებული სიტუაცია ამ სფეროში დასაქმების კუთხით, რის შედეგადაც გამოიკვეთა საშუალო რგოლის, პროფესიულ განათლებაში მომზადებული კვალიფიციური კადრების ნაკლებობა შრომის ბაზარზე.
2021 წლის ზაფხულში სოხუმის უნივერსიტეტს მიენიჭა პროფესიული გადამზადების პროგრამის „ლაბორატორიის სამედიცინო ტექნიკური ასისტენტი“ განხორციელების უფლება. პირველი კურსდამთავრებულები – 19 მსმენელი – უკვე 2022 წელს სოხუმის სახელმწიფო უნივერსიტეტმა.
პროფესიული გადამზადების პროგრამაზე დაშვების წინაპირობაა ბაკალავრის ხარისხი საბუნებისმეტყველო მეცნიერებაში, ასევე მედიცინის ბაკალავრის და ფარმაციის ბაკალავრის აკადემიური ხარისხი
პროგრამის მიზანია გადაამზადოს ბაკალავრები, ადგილობრივ და საერთაშორისო ბაზარზე კონკურენტუნარიანი, ლაბორატორიული მედიცინის კვალიფიციური კადრები, რომლებიც ეფექტურად დასაქმდებიან შრომის ბაზარზე.
პროფესიული გადამზადების პროგრამაზე სწავლა შეუძლია შესაბამის სფეროში დასაქმებულ პირს, რომელიც აკმაყოფილებს პროგრამაზე დაშვების წინაპირობებს, პირს, რომელსაც აქვს სურვილი მიიღოს ცოდნა აღნიშნული მიმართულებით, გაიუმჯობესოს პრაქტიკული უნარები და გახდეს კვალიფიციური, კონკურენტუნარიანი კადრი ბაზარზე არსებული მოთხოვნების შესაბამისად.
პროგრამაზე სწავლა ხორციელდება სამუშაოზე დაფუძნებული სწავლების მეთოდოლოგიით მაღალკვალიფიციური სპეციალისტების მიერ, პროგრამის ხანგრძლივობაა 24 კვირა. ურთიერთთანამშრომლობის მემორანდუმების საფუძველზე სწავლება ხორციელდება სოხუმის სახელმწიფო უნივერსიტეტის მოლეკულური დიაგნოსტიკისა და ბიოტექნოლოგიების კვლევით ცენტრში, სსიპ „ევექს ჰოსპიტლების“ , შპს „ავერსისა“ და დაავადებათა კონტროლის ლუგარის ლაბორატორიებში.
პროფესიული გადამზადების პროგრამის ფარგლებში გათვალისწინებული სწავლის შედეგების მიღწევის შემდეგ კურსდამთავრებული იღებს სახელმწიფოს მიერ აღიარებულ სერტიფიკატს დანართთან ერთად, რომელშიც ფიქსირდება პირის მიერ პროგრამის ფარგლებში მიღწეული ცოდნა და უნარები.
ლაბორატორიის სამედიცინო ტექნიკურ ასისტენტი შეიძლება დასაქმდეს ნებისმიერი შემდეგი ტიპის სამედიცინო ლაბორატორიაში: ზოგად კლინიკური, ბიოქიმიური, იმუნოლოგია-სეროლოგიური, მიკრობიოლოგიური, მოლეკულურ-გენეტიკური, (ჰისტოლოგია-ციტოლოგიური). ასევე, შეუძლია დასაქმდეს ექსპერტიზის ლაბორატორიაში, სისხლის ბანკში, ფლებოტომისტად შესაბამის პოზიციებზე.
იმის გათვალისწინებით, რომ დასაქმების მსგავს რეგულაციას არსებული კანონმდებლობა არ ითვალისწინებს, შემდეგ ნაბიჯად გადაწყვეტილია ჯანდაცვის სამინისტროსთან კონსულტაციის გავლა პროფესიათა ჩამონათვალში ამ კატეგორიის დამატების შესახებ.
პროგრამის იდეასა და მიზნებს მაღალი შეფასებები მისცეს განათლების ხარისხის განვითარების ეროვნული ცენტრის დირექტორის მოადგილემ კახაბერ ერაძემ, საქართველოს განათლებისა და მეცნიერების სამინისტროს პროფესიული განათლების განვითარების დეპარტამენტის უფროსის მოადგილემ ნათია გვირჯიშვილმა; ა(ა)იპ პროფესიული უნარების სააგენტო – ზრდასრულთა განათლების მიმართულების მენეჯერმა ანა შენგელიამ; სს „ევექს ჰოსპიტლები“ – სისხლის ბანკისა და ლაბორატორიული სერვისების კომერციულმა მენეჯერმა ნინო აბესაძემ; „ლ. საყვარელიძის სახელობის დაავადებათა კონტროლისა და საზოგადოებრივი ჯანმრთელობის ეროვნული ცენტრის“ მმართველმა მენეჯერმა მაია ალხაზაშვილმა; შპს „ავერსის კლინიკის“ ლაბორატორიული ქსელის ხელმძღვანელმა ნანა ძნელაძემ, სოხუმის სახელმწიფო უნივერსიტეტის საბუნებისმეტყველო მეცნიერებათა, მათემატიკის, ტექნოლოგიებისა და ფარმაციის ფაკულტეტის დეკანმა, ასოცირებულმა პროფესორმა ნესტან კეკელიამ და კურსდამთავრებულმა დარეჯან ირემაშვილმა.
გამოსვლებისას განსაკუთრებული ხაზი გაესვა სოხუმის სახელმწიფო უნივერსიტეტის რექტორის, პროფესორ ზურაბ ხონელიძის გადამწყვეტ როლს ამ პროგრამის წარმატებით განხორციელებაში და სოხუმის სახელმწიფო უნივერსიტეტის განსაკუთრებულ მნიშვნელობას, რომ სწორედ ამ უმაღლეს სასწავლებელში, მის მაღალ კვალიფიცირებულ პროფესურას უნდა წარემართა ეს უნიკალური პროფესიული გადამზადების პროგრამა.
2023 წლის 10 აპრილს სოხუმის სახელმწიფო უნივერსიტეტში პროფესიული გადამზადების პროგრამის „ლაბორატორიის სამედიცინო ტექნიკური ასისტენტი“ კურსდამთავრებულის განათლების დამადასტურებელი სერტიფიკატები გადაეცათ თინათინ გიგაშვილს, მაია ალიბეგაშვილს, ლალი შალიკაშვილს, რუსუდან გობრონიძეს, გაგი ფეიქრიშვილს, ნინო ამირაშვილს, მარი ფანოზიშვილს, გვანცა ივანიძეს, მაგდა დვალიშვილს, მერი ბებიას, მაკა ქააძეს, გიორგი გიგაურს, ელენე პაქსაშვილს, თეონა ბეჟუაშვილს, თეკლე ყალიჩავას, ხათუნა ორმოცაძეს, ნინო უნდილაშვილს, დარეჯან ირემაშვილსა და როზა დარჯანიას.
პროფესიული გადამზადების პროგრამის „ლაბორატორიის სამედიცინო ტექნიკური ასისტენტი“. დაწვრილებითი ინფორმაციისათვის იხილეთ სოხუმის სახელმწიფო უნივერსიტეტის ვებ-გვერდი (https://www.sou.edu.ge/news/cxaddeba-miReba-profesiuli-gadamzadebis-programaze-%E2%80%9Elaboratoriis-samedicino-teqnikuri-asistenti%E2%80%9C/1191).
მის: ქ.თბილისი, მ.კოსტავას 59
ტელ: +995 32 93 44 05
ელ.ფოსტა: editor@geotimes.ge
© Geotimes.ge | By view.ge
