სულ ცოტა მოთმინება იქონიეთ, რამდენიმე დღე დაიცადეთ და რუსეთის ტერიტორიაზე ისევ გვიხილავთ, – ამის შესახებ „რუსეთის მოხალისეთა კორპუსის“ ლიდერმა, „უაით რექსის“ სახელით ცნობილმა დენის კაპუსტინმა განაცხადა. „მოხალისეთა კორპუსის“ ლიდერმა საერთაშორისო მედიის წარმომადგენლების შეკითხვებს რუსეთის საზღვართან, უკრაინის ტერიტორიაზე უპასუხა.

მისი თქმით, „რუსეთის მოხალისეთა კორპუსი“ ოპერაციის გაფართოებას აპირებს. ამასთან, მას სამომავლო მოქმედების დეტალებზე არ უსაუბრია.

შეკითხვაზე, ჰქონდათ თუ არა მათ ბელგოროდზე თავდასხმისას ამერიკული ტანკები, კაპუსტინმა უპასუხა, რომ კარგი იქნებოდა, მათ ამერიკული ტანკები ჰქონოდათ, თუმცა, მისივე თქმით, სამწუხაროდ, ასე არ არის.

კაპუსტინმა განაცხადა, რომ „მოხალისეთა კორპუსი“ რუსებისგან შედგება. ამასთან, მისი თქმით, რუსეთის ტერიტორიაზე მოქმედებების შესახებ გადაწყვეტილებებს ისინი დამოუკიდებლად იღებენ. რაც შეეხება უკრაინის ტერიტორიაზე მოქმედებებს, „რუსეთის მოხალისეთა კორპუსის“ ლიდერის თქმით, ისინი უკრაინის შეიარაღებულ ძალებთან კოორდინაციაში არიან და საჭიროების შემთხვევაში ეხმარებიან მათ.

„რუსეთის თავისუფლების ლეგიონისა“ და „რუსეთის მოხალისეთა კორპუსის“ წევრებმა მედიასთან შეხვედრა ერთობლივად გამართეს და ჟურნალისტებს წარუდგინეს ბელგოროდის ოლქში შეჭრისას ხელში ჩაგდებული ტექნიკა, კერძოდ, ჯავშანტრანსპორტიორი, ასევე განაცხადეს, რომ ჰყავთ ერთი ტყვე. ასევე, თქვეს, რომ მათ რიგებში არიან დაჭრილები.

რუსეთის სასტიკი შეჭრის მიუხედავად, რომელსაც ათიათასობით უკრაინელი ჯარისკაცი და მშვიდობიანი მოქალაქე შეეწირა, უკრაინა განაგრძობს რუსული ნავთობისა და გაზის თავის ტერიტორიაზე გატარებას, რასაც კიევისა და მოსკოვისთვის შემოსავალი მოაქვს და იმის ილუსტრაციაა, თუ რამდენად რთულია სასტიკი მტრებისთვის კავშირების გაწყვეტა, – წერს გაზეთი The Washington Post-ი სტატიაში სათაურით ომის მიუხედავად, უკრაინა რუსული ნავთობისა და გაზის თავის ტერიტორიაზე გატარებას უშვებს. სტატიის ავტორი აღნიშნავს, რომ „უკრაინის მაღალი რანგის ოფიციალური პირები დასავლელი პარტნიორებისგან უფრო მკაცრი სანქციების დაწესებასა და რუსეთთან პრაქტიკულად ყველა ეკონომიკური კავშირის გაწყვეტას ითხოვენ და ამბობენ, რომ „მეტი უნდა გაკეთდეს“ რუსეთის ომის მანქანის მწყობრიდან გამოსაყვანად, თუმცა რამდენად სურეალისტურად არ უნდა ჩანდეს, უკრაინა ამტკიცებს, რომ მას პრაქტიკულად სხვა არჩევანი არ აქვს, გარდა საკუთარი კომერციული გარიგებების შენარჩუნებისა და აცხადებს, რომ ისინი გარკვეულ ბერკეტს აძლევენ კრემლთან მიმართებით და ამცირებენ რუსული სამხედროების მხრიდან საჰაერო თავდასხმების სიხშირეს“. ნაფტოგაზი [უკრაინის სახელმწიფო ენერგეტიკული კომპანია] და პოლიტიკური ლიდერები ამტკიცებენ, რომ უკრაინას არ შეუძლია და არ უნდა დახუროს მილსადენები, მათ შორის იმის გამო, რომ კიევის ზოგიერთი ევროპელი მხარდამჭერი ჯერ კიდევ დამოკიდებულია რუსულ ნავთობსა და გაზზე. რუსეთის შემოსავალი და კიევის იმედგაცრუება ახლახან გამოიკვეთა პენტაგონის საიდუმლო დოკუმენტებში, რომელშიც ნათქვამია, რომ უკრაინის პრეზიდენტი, ვოლოდიმირ ზელენსკი მიმდინარე წლის დასაწყისში ფიქრობდა „დრუჟბას“ ნავთობსადენის აფეთქებაზე. გასულ წელს, რუსეთი დღეში დაახლოებით 300 000 ბარელ ნავთობს გზავნიდა „დრუჟბას“ მილსადენით, რომელიც კვეთს უკრაინას. გარდა ამისა, რუსეთი, ხელშეკრულებით, რომელიც ომამდე გაფორმდა, ასევე ვალდებულია, ყოველწლიურად გადაიტანოს დაახლოებით 40 მილიარდი კუბური მეტრი გაზი უკრაინის გაზის სატრანზიტო სისტემით. „უკრაინის ოფიციალური პირები აცხადებენ, რომ ისინი რთულ მდგომარეობაში არიან. რუსულ ნახშირწყალბადებს, რომლებიც კვეთენ უკრაინის ტერიტორიას, კრემლისთვის მილიონობით დოლარი მოაქვს და ხელს უწყობს კრემლის ომის მანქანის დაფინანსებას. მაგრამ კიევს ასევე სჭირდება ფული, რომელსაც ის შოულობს ტრანზიტით და სურს იყოს საიმედო ეკონომიკური პარტნიორი ევროპული ქვეყნებისთვის, რომელთაგან ზოგიერთს შეიძლება დაემუქროს ფასების დესტაბილიზაცია, თუ რუსეთის ენერგომომარაგება მოულოდნელად შეწყდება“, – ნათქვამია სტატიაში. სტატიაში ასევე აღნიშნულია, რომ რუსეთის სანქციებზე მომუშავე ჯგუფმა, რომელსაც უკრაინის პრეზიდენტის ოფისის ხელმძღვანელი, ანდრეი ერმაკი და რუსეთში აშშ-ის ყოფილი ელჩი მაიკლ მაკფოლი ხელმძღვანელობენ, გამოაქვეყნა სამოქმედო გეგმა, რომელშიც ასახულია დამატებითი ნაბიჯები, რომელიც უნდა გადაიდგას რუსეთის დასასჯელად, თუმცა გეგმა აშკარად ითვალისწინებს უკრაინის გავლით რუსული ენერგიის ტრანზიტის შენარჩუნებას.

თეთრი სახლი შეშფოთებულია, რომ უკრაინის კონტრშეტევა არ გაამართლებს მოლოდინს – და განიხილავს ცეცხლის შეწყვეტის ვარიანტს სამშვიდობო მოლაპარაკებების გარეშე, წერს Politico აშშ-ს ადმინისტრაციის წყაროებზე დაყრდნობით. „თეთრი სახლის ბოლო შეფასებით უკრაინამ შესაძლოა გარკვეული პროგრესი მიაღწიოს სამხრეთ და აღმოსავლეთში, მაგრამ ვერ შეძლებს გასული წლის წარმატების გამეორებას“, – ნათქვამია სტატიაში. აშშ-ს ოფიციალური პირები სკეპტიკურად უყურებენ, რომ უკრაინა ყირიმთან სახმელეთო დერეფანს გაწყვეტს. ამავდროულად, პენტაგონში ჯერ კიდევ არსებობს იმედი, რომ უკრაინას შეუძლია მიუახლოვდეს რუსეთის მიწოდების მარშრუტებს სამხრეთში – “მაშინაც კი, თუ სრული გამარჯვება ახლად გაძლიერებულ რუსულ ძალებზე ძალიან რთული აღმოჩნდება”. მაგრამ ზოგადად, აშშ-ს დაზვერვა მიუთითებს, რომ უკრაინას უბრალოდ „არ აქვს უნარი, გაიყვანოს სრულად გაწმინდოს ტერიტორია რუსული ჯარებისგან “. ასე რომ, ბაიდენის ადმინისტრაცია ემზადება კრიტიკის ტალღებისთვის  თეთრ სახლში და საზღვარგარეთ მოკავშირეებისგან, რომ ამერიკამ  ვერ გაამართლა მოლოდინი.

,,ქორები” იტყვიან, რომ უკრაინა წარმატებული იქნებოდა, თუ ბაიდენის ადმინისტრაცია კიევს მისცემდა ყველაფერს,  – უფრო გრძელი რადიუსის რაკეტებს, მოიერიშე თვითმფრინავებს და საჰაერო თავდაცვას. თეთრ სახლში საუბრობენ იმაზეც რომ უკრაინის ბოლო კონტრშეტევიდან გამომდინარე ნათელი გახდა უკრაინული არმია ვერ შეძლებს რუსეთის სრულად განდევნას ტერიტორიიდან. ეს არც კი ითვალისწინებს ამერიკის მოკავშირეების რეაქციას, ძირითადად ევროპაში, რომლებმაც შესაძლოა უკრაინასა და რუსეთს შორის სამშვიდობო მოლაპარაკებები უფრო მიმზიდველ ვარიანტად მიიჩნიონ. გამოცემა წერს, რომ კიევი, რიგი შეფასებების მიხედვით, მზადაა განიხილოს მიზნების კორექტირება, „და უფრო მოკრძალებული მიზანი შეიძლება უფრო ადვილი იყოს გამარჯვებად წარმოაჩინოს“. შეერთებულ შტატებში მიმდინარეობს დისკუსია უკრაინელებისთვის ცეცხლის შეწყვეტის შეთავაზებაზე, მაგრამ რუსეთთან სამშვიდობო მოლაპარაკებების გარეშე – ეს “უტოვებს შესაძლებლობას უკრაინას მომავალში დაუბრუნოს თავისი ტერიტორიის დიდი ნაწილი”. ამ ვარიანტზე დათანხმებისთვის, „კიევს უნდა მიეცეს სტიმული: შესაძლოა უსაფრთხოების გარანტიები, როგორიცაა ნატო, ეკონომიკური დახმარება ევროკავშირისგან, დამატებითი სამხედრო დახმარება უკრაინული ძალების შესავსებად და გასაძლიერებლად და ა.შ. თეთრმა სახლში იმედოვნებენ, ჩინეთი შეეცდება დაითანხმოს პუტინი და დაიწყოს მოლაპარაკებები ცეცხლის შეწყვეტის შესახებ