სენატის ყოფილი თანამშრომელი ტარა რედი ჯო ბაიდენი სექსუალურ ძალადობაში ადანაშაულებს.
მისი თქმით ძალადობის ფაქტი 1993 წელს მოხდა. 2020 წელს არჩევნების დროს ეს ფაქტი ამოტივტივდა და მაშინ ბაიდენმა ძალადობა უარყო. როგორც რედი ამბობს, ახლა კვლავ დაიწყო მუქარები და ის იძულებული გახდა მოსკოვში წამოსულიყო და თავშესაფარი რუსეთის მთავრობისათვის ეთხოვა.
მისი თქმით, ის თავს დაცულად აღარ გრძნობს ამერიკაში.
პარლამენტის პლენარულ სხდომაზე მესამე მოსმენით განიხილეს და 81 ხმით დაუჭირეს მხარი საქართველოს მთავრობის მიერ ინიცირებულ კანონპროექტს „იარაღის შესახებ კანონში“ ცვლილებების შეტანის თაობაზე.
პროექტით ახლებურად გაიწერა იარაღთან დაკავშირებული რეგულაციები; კერძოდ: თავდაცვის იარაღად ჩაითვლება ცეცხლსასროლი იარაღი, რომლის საერთო სიგრძე 55 სანტიმეტრზე ნაკლებია, ხოლო ყველა სხვა იარაღი, რომლის სიგრძე აღემატება 55 სანტიმეტრს ჩაითვლება სანადირო იარაღად. ასევე პოლიციას ექნება უფლებამოსილება ადგილზე მივიდეს და შეამოწმოს რამდენად იცავს იარაღის მფლობელი იმ წესებს, რაც დადგენილია იარაღის შენახვისთვის და თუკი სახლში არ მოხდება პოლიციელის დაშვება, ამ შემთხვევაში, ეს ადამიანი ვალდებული იქნება 7 დღის ვადაში თავად წარადგინოს პოლიციაში მის საკუთრებაში არსებული იარაღები.
პარლამენტის წევრების, რომან გოცირიძის და ხატია დეკანოიძის მიერ საკანონმდებლო ინიციატივის წესით წარმოდგენილ კანონპროექტს „საქართველოს პარლამენტის რეგლამენტში ცვლილების შეტანის შესახებ“, პარლამენტმა მესამე მოსმენით, 89 ხმით მხარი დაუჭირა.
წარმოდგენილი პროექტის მიხედვით, რეგლამენტში ცვლილების შედეგად პოლიტიკური ჯგუფის შექმნის შესაძლებლობა ექნებათ უფრაქციო პარლამენტის წევრებს, რომლებმაც დატოვეს შესაბამისი პოლიტიკური პარტიის ან საარჩევნო ბლოკში შემავალი პარტიის წევრობა, რის საფუძველზეც, ისინი შეძლებენ უკეთ განახორციელონ საპარლამენტო საქმიანობა და 2024 წლის არჩევნებში არჩეული პარლამენტის უფლებამოსილების ცნობამდე, ისარგებლონ პარლამენტის პოლიტიკური ჯგუფისთვის რეგლამენტის შესაბამისად მინიჭებული უფლებამოსილებებით.
„სამწუხაროდ, რასაც საჭიროდ მიიჩნევს, იმას ამბობს, მისი განცხადებები კი საერთოდ აცდენილია იმ რეალობას, რომელშიც ქართული პოლიტიკა და საზოგადოებაა დღესდღეობით. მას თავისი დღის წესრიგი აქვს და ცდილობს, თავი ზე პოლიტიკოსად წარმოაჩინოს, თუმცა რამდენად გამოსდის, ეს უკვე მეორე საკითხია“, – ამის შესახებ „ხალხის ძალის“ წევრმა ზურაბ ქადაგიძემ რადიო ფორტუნას ეთერში ისაუბრა.
მისი თქმით, სალომე ზურაბიშვილის განცხადებები აცდენილია ქართულ რეალობას, ეს დამოკიდებულება კი პრეზიდენტის მხრიდან საკმაოდ მიუღებელია.
„ცოტა არაადეკვატურად ჩანს ჩვენი პრეზიდენტის ბავშვური დამოკიდებულება და „ფეხების ბაკუნი“. თითქოს ცდილობს, იმის დემონსტრირება მოახდინოს, რომ ზე პოლიტიკოსია, რომელიც ყველა პოლიტიკოსზე მაღლა დგას და დამოუკიდებელი ფიგურაა. დღეს ისე ჩანდა, რომ თითქოს თავი დაიცვა, იჩივლა, ცალი ხელით კი დაემუქრა ხელისუფლებას, რასაც ჩავთვლი საჭიროდ, იმას გავაკეთებო. სამწუხაროდ, რასაც საჭიროდ მიიჩნევს, იმას ამბობს, მისი განცხადებები კი საერთოდ აცდენილია იმ რეალობას, რომელშიც ქართული პოლიტიკა და საზოგადოებაა დღესდღეობით. სამწუხაროა, როდესაც პრეზიდენტის მხრიდან ვხედავთ ასეთ არაადეკვატურ დამოკიდებულებას. მას თავისი დღის წესრიგი აქვს და ცდილობს, თავი ზე პოლიტიკოსად წარმოაჩინოს, თუმცა რამდენად გამოსდის, ეს უკვე მეორე საკითხია“, – განაცხადა ზურაბ ქადაგიძემ.
„თუკი სალომე ზურაბიშვილს შეუძლია შედარებით დაბალანსებულად ისაუბროს და შემდეგ შეიძლება სამართლიანადაც თქვას, რომ ეს ქვეყნის ინტერესებიდან გამომდინარეა, მოვუწოდებთ, საქართველოშიც შეიძლება იგივე გააკეთოს. ამის საპირისპირო გააკეთა მან საქართველოს პარლამენტის ტრიბუნიდან, 26 მაისის ღონისძიებაზე. ეს იყო ძალიან ცუდი, მაგრამ დღეს იყო გაცილებით დარბილებული ტონი, შედარებით დაბალანსებული, რაც ხალხის რეაქციამ უზრუნველყო“, – ამის შესახებ „ქართული ოცნების“ აღმასრულებელმა მდივანმა მამუკა მდინარაძემ ჟურნალისტებს განუცხადა.
მისივე თქმით, ქალბატონ სალომეს ალბათ უნდა ავუხსნათ, რომ როდესაც გამოდის საქართველოს პარლამენტში, 26 მაისის ღონისძიებაზე, ეს ყველაფერიც გადის ქვეყნის ფარგლებს გარეთ.
„2023 წელია და ამ საუკუნეში თანამედროვე ტექნოლოგიები იძლევა იმის საშუალებას, რომ საქართველოში გამოსვლებიც გაიგონ უცხოელებმა, ამიტომ, აქ სხვანაირი ლაპარაკი, იქ შედარებით დაბალანსებული ლაპარაკი ერთი და იგივეა. მნიშვნელობა არ აქვს საქართველოს პარლამენტში გამოვა, თუ სხვა ღონისძიებაზე, მათ შორის დამოუკიდებლობის დღისადმი მიძღვნილ ღონისძიებაზე. ჩვენი უცხოელი პარტნიორები ამ ყველაფერს ისმენენ. აქედან გამომდინარე, უნდა ვთხოვოთ, რომ თუკი შეუძლია მას შედარებით, (გასაგებია, რაღაც პატარ-პატარა არაობიექტური ამბებიც იყო), მაგრამ, შედარებით დაბალანსებულად ისაუბროს და შემდეგ შეიძლება სამართლიანადაც თქვას, რომ ეს ქვეყნის ინტერესებიდან გამომდინარეა, მოვუწოდებთ, რომ საქართველოშიც შეიძლება იგივე გააკეთოს. ამის საპირისპირო გააკეთა მან საქართველოს პარლამენტის ტრიბუნიდან, 26 მაისის ღონისძიებაზე და ეს იყო ძალიან ცუდი, მაგრამ დღეს იყო გაცილებით დარბილებული ტონი, შედარებით დაბალანსებული, რაც ხალხის რეაქციამ უზრუნველყო“, – განაცხადა მამუკა მდინარაძემ.
მისივე თქმით, გარკვეული მესიჯბოქსის ნაწილია ის, რომ სალომე ზურაბიშვილი ქართველ ხალხზე აქცენტირებას აკეთებდა, მაგრამ მთავარია ყველა უმაღლესი ტრიბუნიდან ისმოდეს, რომ საქართველო იმსახურებს კანდიდატის სტატუსს.
„საქართველო ამ მოცემულობით, სხვაზე მეტად და ამას ევროკავშირიც და მისი კრიტერიუმებიც ადასტურებს, იმსახურებს კანდიდატის სტატუსს, ყველა დანარჩენი არის დეტალები, რომელსაც შეიძლება მნიშვნელობაც შედარებით აღარ მივანიჭოთ, მაგრამ შედარებით დაბალანსებული, ობიექტური გამოსვლები შეიძლება მისასალმებელიც იყოს“, – განაცხადა მამუკა მდინარაძემ.
15 წელია, რუსეთი ყველაფერს აკეთებს, რათა შეარყიოს ევროპის უსაფრთხოება და შეცვალოს ის საკუთარი პირობების მიხედვით. ეს ეტაპები ცნობილია, აგრესია საქართველოს წინააღმდეგ 2008-ში, მოვლენები უკრაინაში 2014 წელს და მორიგ ჯერზე 2022-ში, – ამის შესახებ საფრანგეთის პრეზიდენტმა, ემანუელ მაკრონმა ბრატისლავაში, გლობალური უსაფრთხოების ფორუმზე განაცხადა.
მან აღნიშნა, რომ უკრაინაში აგრესია ყველაზე ბოლო და უკიდურესი გამოვლენაა რუსეთის მცდელობის, შეარყიოს ევროპული ერთიანობა. ამასთან, მაკრონი აღნიშნავს, რომ ნატომ შესთავაზა პერსპექტივა უკრაინასა და საქართველოს მათი დაცვის გარეშე, რამაც ეს ორი ქვეყანა რუსეთის შურისძიების სამიზნედ აქცია.
„ფსონები მაღალია, რადგან ომი ჩვენს საზღვრებთანაა. უკრაინაში აგრესია ყველაზე ბოლო და უკიდურესი გამოვლენაა რუსეთის მცდელობის, შეარყიოს ევროპული ერთიანობა. ეს არის ის, რასაც რუსეთი ცდილობს, 15 წელია, რუსეთი ყველაფერს აკეთებს, რათა შეარყიოს ევროპის უსაფრთხოება და შეცვალოს ის საკუთარი პირობების მიხედვით. ეს ეტაპები ცნობილია. ვლადიმერ პუტინის მიუნხენში სიტყვით გამოსვლა 2007 წელს, აგრესია საქართველოს წინააღმდეგ 2008-ში, შემდეგ მოვლენები უკრაინაში 2014 წელს და მორიგ ჯერზე – 2022-ში. ის, რასაც რუსეთი ომის დაწყების წინა დღეს ითხოვდა და გაწერილი იყო ხელშეკრულებების პროექტებში, მიუღებელი იყო. ეს იყო ვალდებულებები, რომელთა შესრულებაც შეუძლებელი იქნებოდა. ნატომ შესთავაზა პერსპექტივა უკრაინასა და საქართველოს მათი დაცვის გარეშე, რამაც ეს ორი ქვეყანა რუსეთის შურისძიების სამიზნედ აქცია. თითოეულ ქვეყანას უნდა ჰქონდეს უფლება თავად აირჩიოს მოკავშირეები. როდესაც ქვეყანა ირჩევს დემოკრატიას, გამჭვირვალობასა და თავისუფლებას, ის არასდროს წარმოადგენს საფრთხეს თავისი მეზობლისთვის“, – განაცხადა მაკრონმა.
უკრაინაში “ქართული ლეგიონის” მებრძოლი ზვიად გიგანი დაიღუპა.
არსებული ცნობით, ის ის უკრაინაში 2022 წლის მაისიდან იბრძოდა.
„უკრაინაში საქართველოს საკონსულო ინფორმირებულია აღნიშნული ფაქტის შესახებ და განხორციელდება საჭირო პროცედურები“, – აცხადებენ უწყებაში.
შეგახსენებთ, სამხედრო აგრესიის დაწყებიდან დღემდე ოკუპანტებთან ბრძოლას უკრაინაში საქართველოს 43 მოქალაქის სიცოცხლე ემსხვერპლა.
“რუსეთთან დაკავშირებით, ცოტა გადამეტებული იყო… ვერსად წაიღებ რუსეთს, ჩვენი მეზობელია”, – ასე ეხმაურება “ქართული ოცნების” წევრი ბეჟან წაქაძე სალომე ზურაბიშვილის ევროპარლამენტში გამოსვლას.
მის გამოსვლაში ძალიან ბევრი დადებითი იყო, კი, ნამდვილად, ცალსახად ასეა. მაგრამ რაც შეეხება რუსეთთან დაკავშირებით, ცოტა გადამეტებული იყო იმიტომ რომ ღრმად უნდა იცოდე ეკონომიკა და ქვეყნის მდგომარეობა ეკონომიკური კუთხით მინდა ვთქვა, იმიტომ რომ დღეს არც არავის, არც ევროპას და არც არავის მსოფლიოში არ სჭირდება ქვეყანა, რომელიც არ იქნება წარმატებული წარმატებული, როგორც ეკონომიკური, ასევე პოლიტიკური თვალსაზრისით და მან ძალიან ბევრი ისაუბრა ჩვენს მიღწევებზე და ეს ნამდვილად ასეა და რაც შეეხება რუსეთთან დაკავშირებით, მე სულ სხვა შეხედულება მაქვს, იმიტომ რომ მე მიმაჩნია, რომ დღეს ქვეყანას ნამდვილად სჭირდება ის კავშირები ყველა ქვეყანასთან და მათ შორის რუსეთთანაც, იმიტომ რომ, ვერსად ვერ წაიღებ რუსეთს, ჩვენი მეზობელია და აუცილებლად უნდა განვავითაროთ მათთან სავაჭრო ურთიერთობაზეა აქ საუბარი მხოლოდ, – ამბობს წაქაძე.
ოპოზიცია ამბობს, რომ ნატო არაფერ შუაშია და რუსეთის ისედაც ერჩოდა მეზობლებს. კი ბატონო, რუსეთი იმპერია იყო და ერჩოდა მეზობლებს, მაგრამ ნატოს ეგზისტენციალურ საფრთხედ აღქმა აათმაგებს რუსეთის ამ ბუნებას, – ამის შესახებ „ქრონიკის“ ეთერში საზოგადოებრივი ორგანიზაცია „პოლიტიკური არჩევანის“ დამფუძნებელმა, რომან კაკულიამ განაცხადა.
„მსოფლიოში ძალიან ბევრი ანალიტიკოსია, რომლებიც სწორედ ამ ნარატივით საუბრობენ, რასაც ირაკლი ღარიბაშვილი ამბობდა – განმარტავენ რა ომის მიზეზად იმას, რომ რუსეთისათვის უკრაინა იყო ეგზისტენციალური საფრთხე და ის ამას 2008 წლის შემდეგ ამბობდა, და რადგან ვერ გათვალეთ ეს რისკები, ეს არის ერთ-ერთი შეფასების კრიტერიუმი. მათი უმრავლესობა ცდილობს, საზოგადოებას დაანახოს სამომავლო საფრთხეები. ჩვენ ატომური იარაღის გამოყენების საფრთხისკენ მივყავართ ამით. ეგზისტენციალური საფრთხე ნიშნავს საფრთხეს, როდესაც უკან დახევის მექანიზმები აღარ გაქვს. უკრაინის გამარჯვება, ის, რაც იგულისხმება მის 1991 წლის საზღვრებამდე მისვლაში, ეს რომ მოხდეს, ეს ზრდის რუსეთის მიერ სტრატეგიული იარაღის გამოყენების საფრთხეს“, – აცხადებს კაკულია.
კრემლი შეშფოთებულია ბელგოროდში არსებული სიტუაციით, – ამის შესახებ რუსეთის პრეზიდენტის პრეს-მდივანმა დიმიტრი პესკოვმა CNN-ს განუცხადა.
„ჩვენ ნამდვილად შეშფოთებული ვართ ამ სიტუაციის გამო, სამოქალაქო ობიექტების დაბომბვა იქ გრძელდება“, – განაცხადა პესკოვმა.
კრემლის პრეს-სპიკერის თქმითვე, მათ ვინმესგან, „კოლექტიური დასავლეთიდან“ დაგმობის არცერთი სიტყვა ჯერ-ჯერობით არ სმენიათ.
მე თქვენ წინაშე ვარ და გამოვდივარ ამ გზავნილით – ჩვენი ევროპული არჩევანი არა მხოლოდ ლეგიტიმურია, მას ალტერნატივა არ გააჩნია, რადგან ის ემყარება ჩვენს ღირებულებას, ჩვენს ისტორიას, ჩვენს ბრძოლას, შემართებას, ჩვენს ხედვას ევროპული მომავლისთვის, საქართველო კვლავ შეუერთდეს თავის ევროპულ ოჯახს, – ამის შესახებ საქართველოს პრეზიდენტმა, სალომე ზურაბიშვილმა ევროპარლამენტში სიტყვით გამოსვლისას განაცხადა.
„მინდა მადლობა გადავუხადო თითოეულ პოლიტიკურ ჯგუფს იმისთვის, რომ მომეცა შესაძლებლობა მივმართო ამ ასამბლეას. ეს ჩემთვის დიდი პატივი და დიდი პასუხისმგებლობაა. ქალბატონი პრეზიდენტო, 13 წელი გავიდა მას შემდეგ, რაც საქართველოს პრეზიდენტი იდგა აქ და სიმბოლურია, რომ მე გამოვდივარ იმავე მისწრაფებით, რომელსაც საქართველოს ყველა მოქალაქე იზიარებს, რომ საქართველოს სურს, შეუერთდეს ევროპულ ოჯახს. ეს არის ისტორიული არჩევანი. ეს განსაზღვრავს ჩვენს მომავალს, ჩვენ ასეთ მომენტს ვაწყდებით საქართველოს ისტორიაში, სადაც საქართველოს მთავრობა, სადაც მისი ხალხი და 27 ქვეყანა ერთად უნდა წყვეტდეს საქართველოს ხვალინდელ დღეს. თუმცა, ქართველმა ერმა უკვე გადაწყვიტა ეს საკითხი. მე თქვენ წინაშე ვარ და გამოვდივარ ამ გზავნილით – ჩვენი ევროპული არჩევანი არა მხოლოდ ლეგიტიმურია, მას ალტერნატივა არ გააჩნია, რადგან ის ემყარება ჩვენს ღირებულებას, ჩვენს ისტორიას, ჩვენს ბრძოლას, შემართებას, ჩვენს ხედვას ევროპული მომავლისთვის, საქართველო კვლავ შეუერთდეს თავის ევროპულ ოჯახს. მე ვარ არ, როგორც ქვეყნის ხელმძღვანელი, იმ ქვეყნისა, რომლის კონსტიტუცია ავალდებულებს ყველა სახელმწიფო სტრუქტურას, გადადგას ყველა საჭირო ნაბიჯი, რათა მხარი დაუჭიროს ევროინტეგრაციას. მე ამას გავაკეთებ უწყვეტად და ამას გავაკეთებ არა მხოლოდ იმისთვის, რომ შევასრულო კონსტიტუციის მოთხოვნები, არამედ მორალური პოზიციიდან გამომდინარე“, – განაცხადა სალომე ზურაბიშვილმა.
რუსეთის მოქალაქეების ინციდენტების გარეშე მიღება ქართველების ტოლერანტობაზე მეტყველებს, მაგრამ ამას ნათელი და მკაცრი სახელმწიფო რეგულაციები უნდა ახლდეს თან,- ამის შესახებ საქართველოს პრეზიდენტმა სალომე ზურაბიშვილმა ევროპარლამენტში სიტყვით გამოსვლის დროს განაცხადა.
“როდესაც პოლიტიკურმა პოლარიზაციამ გავლენა იქონია ქართული ტოლერანტობის წარმოსახვაზე, ბოლო მოვლენებმა აჩვენა, რომ იგი ცოცხალია. საქართველომ მიიღო და წელიწად ნახევრის განმავლობაში მასპინძლობს 80 000-ზე მეტ რუსს.
მოდით, დავფიქრდეთ, რას ნიშნავს იმ ქვეყნიდან მოქალაქეების მიღება, რომელსაც შენი ტერიტორიის 20% აქვს ოკუპირებული და მართავს ყველაზე სასტიკ ომს შენი მეგობრის, უკრაინის – წინააღმდეგ. ის, რომ ეს რამე სერიოზული ინციდენტების გარეშე მოხდა, საქართველოს ტოლერანტობაზე მეტყველებს. ამაყები შეგვიძლია და უნდა ვიყოთ, მაგრამ ამას თან უნდა ახლდეს ნათელი და მკაცრი სახელმწიფო რეგულაციები, რათა ტოლერანტობამ გზა არ გაუხსნას ფრუსტრაციასა და ესკალაციას”, – განაცხადა ზურაბიშვილმა.
მის: ქ.თბილისი, მ.კოსტავას 59
ტელ: +995 32 93 44 05
ელ.ფოსტა: editor@geotimes.ge
© Geotimes.ge | By view.ge