თიბისის Meliora 2022-ის ჯილდო გამჭვირვალობა და ანგარიშგება კორპორაციული პასუხისმგებლობისა და მდგრადობის საკითხებში გადაეცა

12:47 - 08/06/2023

თიბისიმ „საქართველოს პასუხისმგებელი ბიზნესის კონკურსის Meliora 2022″-ის ჯილდო მიიღო კატეგორიაში „გამჭვირვალობა და ანგარიშგება კორპორაციული პასუხისმგებლობისა და მდგრადობის საკითხებზე“. აღნიშნული ჯილდო თიბისის პროექტისთვის „2021 წლის მდგრადი განვითარების ანგარიში“ გადაეცა.

კონკურსი Meliora, რომელიც პროექტ „სამოქალაქო საზოგადოების ინიციატივის“ ფარგლებში ტარდება, ყოველწლიურად ავლენს და აჯილდოებს საქართველოში მოქმედ სამაგალითო კომპანიებს კორპორაციული სოციალური პასუხისმგებლობის მიმართულებით განხორციელებული პროექტებისთვის. თიბისი კონკურსის არაერთგზის გამარჯვებულია. ბანკი სხვადასხვა კატეგორიის ჯილდოს მფლობელად 2018 და 2019 წლებშიც დასახელდა.

ჯილდო ექვს თემატურ კატეგორიაში გაიცემა, რომლებიც მოიცავს კორპორაციული სოციალური პასუხისმგებლობის ყველა ძირითად სფეროს: მწვანე ინიციატივა, პასუხისმგებელი დამსაქმებელი, კეთილსინდისიერი საქმიანობა ბაზარზე, საზოგადოების მხარდაჭერა, სექტორთა პარტნიორობა – გაზიარებული პასუხისმგებლობა, გამჭვირვალობა და ანგარიშგება კორპორაციული პასუხისმგებლობის და მდგრადობის საკითხებზე. გამარჯვებულები უცხოელმა და ქართველმა ექსპერტებმა, საერთაშორისო და ადგილობრივმა საზოგადოებრივმა ორგანიზაციებმა გამოავლინეს.

„ჩვენთვის ძალიან მნიშვნელოვანია საზოგადოებისთვის გამჭვირვალე ინფორმაციისა და ობიექტური მაჩვენებლების მიწოდება. ამიტომ 2019 წლიდან ვაქვეყნებთ თიბისის წლიურ მდგრადი განვითარების ანგარიშს. ანგარიშში ინფორმაცია საერთაშორისო ანგარიშგების ინიციატივის (GRI) სტანდარტების მიხედვით არის წარმოდგენილი და, ამავდროულად, გაეროს ქალთა გაძლიერების პრინციპების (WEPs) შესაბამის ანგარიშგებას წარმოადგენს. ეს ანგარიში არის იმ პასუხისმგებლობის დასტური და განაცხადი, რომელიც თიბისის 30 წელზე მეტია, აღებული აქვს და მომავალში კიდევ უფრო აქტიურად გააგრძელებს ამ მიმართულებით მომხმარებლების, თანამშრომლების, გარემოსა და საზოგადოების გაძლიერებას“. – მაკა ბოჭორიშვილი, გარემოს დაცვის, სოციალური და მმართველობის საკითხების კოორდინატორი.

თიბისი მრავალწლიანი არსებობის მანძილზე აქტიურად ახორციელებს ინიციატივებს კორპორაციული სოციალური პასუხისმგებლობის მიმართულებით, რასაც არაერთხელ მოუპოვებია საერთაშორისო აღიარება. გარემოსა და საზოგადოების გასაძლიერებლად მომავალში კიდევ უფრო მეტი სამაგალითო პროექტი განხორციელდება.

(R)

“ალიანსის ზოგიერთი წევრი, შესაძლოა, უკრაინაში ჯარების გაგზავნაზე დათანხმდეს” – ანდერს ფოგ რასმუსენი

12:31 - 08/06/2023

ალიანსის ზოგიერთი წევრი, შესაძლოა, უკრაინაში ჯარების გაგზავნაზე დათანხმდეს, – ამის შესახებ ნატო-ს ყოფილი გენერალური მდივანი, ანდერს ფოგ რასმუსენი აცხადებს.

რასმუსენის თქმით, თუ ნატო ვილნიუსის სამიტზე ვერ გადაწყვეტს უკრაინის გაწევრიანების ნაბიჯებს ან უსაფრთხოების გარანტიას, „არსებობს აშკარა შესაძლებლობა, რომ ზოგიერთმა ქვეყანამ ინდივიდუალური ზომები მიიღოს“.

„ცნობილია, რომ პოლონეთი ძალიან ჩართულია უკრაინისთვის კონკრეტული დახმარების გაწევაში და არ გამოვრიცხავ, რომ პოლონეთი კიდევ უფრო მეტად ჩაერთოს და მას ბალტიისპირეთის ქვეყნებიც მიჰყვნენ“, – განაცხადა რასმუსენმა.

შეგახსენებთ, ალიანსისა და დასავლეთის სახელმწიფოების ოფიციალურმა წარმომადგენლებმა არაერთხელ კატეგორიულად უარყვეს უკრაინაში საკუთარი ჯარების შეყვანის შესაძლებლობა, ამტკიცებენ, რომ ეს საფუძველს ჩაუყრის ნატო-სა და რუსეთს შორის პირდაპირ დაპირისპირებას.

არასრულწლოვანი გოგონას ცოლად შერთვის მიზნით თავისუფლების აღკვეთის ფაქტზე ორი პირი დააკავეს

12:19 - 08/06/2023

შინაგან საქმეთა სამინისტროს ქვემო ქართლის პოლიციის დეპარტამენტის მარნეულის რაიონული სამმართველოს თანამშრომლებმა, ცხელ კვალზე ჩატარებული ოპერატიულ-სამძებრო ღონისძიებებისა და საგამოძიებო მოქმედებების შედეგად, 1994 წელს დაბადებული ჯ.ჰ. და 1981 წელს დაბადებული გ.ა. არასრულწლოვნის მიმართ ჯგუფურად ჩადენილი თავისუფლების უკანონო აღკვეთის ბრალდებით დააკავეს.

როგორც შსს-ის მიერ გავრცელებულ ინფორმაციაშია ნათქვამი, დანაშაული 7-დან 10 წლამდე ვადით თავისუფლების აღკვეთას ითვალისწინებს.

„გამოძიებით დადგინდა, რომ მიმდინარე წლის 7 ივნისს, მარნეულის მუნიციპალიტეტის ერთ-ერთ სოფელში, ჯ. ჰ.- მ ცოლად შერთვის მიზნით, 2007 წელს დაბადებულ ს.კ. – ს თავისუფლება უკანონოდ აღუკვეთა. აღნიშნულ დანაშაულებრივ ქმედებაში მონაწილეობდა ამჟამად ბრალდებულის სახით დაკავებული გ.ა. -ც. პოლიციამ, ცხელ კვალზე ჩატარებული ინტენსიური ოპერატიულ-სამძებრო და საგამოძიებო ღონისძიებების შედეგად, გატაცებული გოგონას ადგილსამყოფელი დაადგინა. სამართალდამცველებმა ჯ.ჰ. და გ.ა. ბრალდებულის სახით დააკავეს.

წინასწარი შეთანხმებით ჯგუფის მიერ არასრულწლოვნისთვის თავისუფლების უკანონო აღკვეთის ფაქტზე გამოძიება საქართველოს სისხლის სამართლის კოდექსის 143-ე მუხლის მე-3 ნაწილის „ა“ და „დ“ ქვეპუნქტებით მიმდინარეობს”, – ნათქვამია ინფორმაციაში.

მსოფლიო ბანკის შეფასებით, საქართველოს ეკონომიკა წელს ოთხი პროცენტით გაიზრდება

12:18 - 08/06/2023

მსოფლიო ბანკმა გლობალური ეკონომიკის პერსპექტივების მორიგი ანგარიში გამოაქვეყნა.

2023 წელს საქართველოს რეალური ეკონომიკის ზრდის ტემპი გაზრდილია 0,4 პროცენტული პუნქტით. ბანკის მიერ გამოკვლეულ ქვეყნებს შორის საქართველოს წამყვანი პოზიცია უკავია ევროპის მასშტაბით ეკონომიკური ზრდით, როგორც 2023 წელს, ისე 2023-2025 წლების პროგნოზით.

მსოფლიო ბანკის შეფასებით, საქართველოს ეკონომიკა წელს გაიზრდება 4,4%-ით, ხოლო მომდევნო ორ წელიწადში სტაბილურად 5%-იან ზრდას აჩვენებს.

„მსოფლიო ბანკის შეფასებით საქართველოს ეკონომიკა წელს 4,4%-ით გაიზრდება, ხოლო მომავალ წელსა და 2025 წელს ეს ზრდა იქნება 5%-ის დონეზე. საქართველო ამ თვალსაზრისით გამორჩეულია. მშვიდობაზე დაფუძნებული, კერძო სექტორის მხარდაჭერაზე დაფუძნებული ეკონომიკური პოლიტიკა ქვეყანას სწორი მიმართულებით განვითარების საშუალებას აძლევს და, დარწმუნებული ვარ, უფრო მაღალი ეკონომიკური ზრდის ტემპები დაფიქსირდება“, – აღნიშნა ფინანსთა მინისტრის მოადგილემ მიხეილ დონდუამ.

“ასეთ ვითარებაშიც კი ურდო ცეცხლს უხსნის სამოქალაქო მაშველებს” – ალექსი პეტრიაშვილი

12:15 - 08/06/2023

ალექსი პეტრიაშვილი სოციალურ ქსელში უკრაინაში მიმდინარე მოვლენებს ეხმაურება:

“კიდევ ერთი ქართველი მებრძოლი ზურაბ მუშუქია დაგვეღუპა რუსი ოკუპანტების წინააღმდეგ ბრძოლაში, დიდება გმირებს და მარადიული ხსოვნა მათ!

კახოვკის ჰესის აფეთქებაზე პასუხისმგებლობის აღება არ უნდა ცოცხალი თავით ტერორისტ რუსეთს! პრეზიდენტი ერდოღანი ესაუბრა ტერორისტ პუტინს და ამ უტიფარმა ნაძირალამ ეს ტერორისტული აქტი უკრაინელების ბარბაროსულ ქმედებად შეაფასა! უფრო მეტიც, საგანგებო სიტუაციების სამსახურს დაავალა მოსახლეობის ევაკუაცია.

თეთრი სახლის პრეს-სპიკერმა დააკისრა სამაგიეროდ პასუხისმგებლობა რუსეთს! რუსეთი აკონტროლებდა კახოვკის ჰეს-ს, რუსეთმა წამოიწყო სრულმასშტაბიანი აგრესია და რუსეთია პასუხისმგებელი იმ კატასტროფაზე, რაც მოხდა კახხოვკის წყალსაცავზე!

წყლის დონემ დაიწყო ნელ-ნელა კლება! როცა დაიწევს საფუძვლიანად, იქ კი გამოჩნდება, სად და როგორ მოხდა აფეთქება, მაგრამ ამ უტიფარი რუსების ატანა მართლა ძალიან ძნელია და ტაკერ კარლსონის მსგავსი რუპორები რომ ჰყავთ კიდევ, ეს უფრო ამძიმებს ვითარებას! როდის რა უღიარებია რუსეთს თავისით, რომ ეს ეკოციდი აღიაროს!

უბრალოდ მე მგონია, რომ როდესაც უტყუარი ფაქტები დაიდება, აშშ-ს და სხვა ქვეყნებსაც მაინც მოუწევთ ოფიციალურად რუსეთის ტერორიზმის სპონსორ სახელმწიფოდ აღიარება და შესაბამისად სრულიად ახალ დონეზე ავა რუსეთთან კონტაქტებში შეზღუდვა!

გაერო და წითელ ჯვარზე კი თქვა ზელენსკიმ ბილდთან ინტერვიუში, შოკში ვარ, 2 დღე გავიდა და არცერთი გამოჩენილა სტიქიური უბედურების ზონაში და არც პასუხი გაუცია ჩვენს მოთხოვნებზეო!

წყლის დონის კლება შეიძლება საფრთხე იყოს ზაპოროჟიეს ატომური ელექტროსადგურისთვის, გააჩნია დაიწევს თუ არა 12.7 მეტრს ქვემოთ! ალტერნატიული ვარიანტებიც განიხილება!

სრული ზარალის და კატასტროფის მასშტაბების შეფასება ჯერ კიდევ ნაადრევია. დრო დაჭირდება სრული სურათის შექმნას. ფაქტია, რომ უკრაინის ხელისუფლება ყველაფერს აკეთებს ხალხის და ცხოველების ევაკუაციისთვის, მიუხედავად იმისა, რომ ასეთ ვითარებაშიც კი ურდო ცეცხლს უხსნის სამოქალაქო მაშველებს.

ფრონტის ხაზზე გუშინ სერიოზული ღამე იყო: ჩვენი არტილერია და ჰაიმარსერია, ზაპოროჟიეს მიმართულებაზე ამუშავდა მთელი დატვირთვით. გარდა ამისა, ოკუპირებულ ზაპოროჟიეს ტოკმაკში 30-მდე აფეთქების ხმას თავად ურდოსებიც ადასტურებენ! პანიკა იყო ძალიან სერიოზული ურდოს პროპაგანძიაში, დაიძრა სატანკო კოლონებიო! დღეს დილიდან გულს იმაგრებდნენ, მაგარი ღამე გადავაგორეთ, მაგრამ ტალღებად გაგრძელდება უკრაინელების შეტევებიო, თუმცა ეგენიც კი აღიარებენ ფრონტის ცალკეულ მონაკვეთებზე გარღვევებს. დილიდან ურდო წერს, ჯავშანტექნიკის დახმარებით ორეხოვო-ტოკმაკის მიმართულებაზე უკრაინელებმა ჩვენს წინა პოზიციებზე დამაგრება შეძლესო, არაბიჯო და მოსკოვს დაეკითხებოდნენ!

ჩვენი მხრიდან დუმილია! ასეც უნდა იყოს! ლაივში ვერ მოხდება მოსამზადებელი ფაზის რეპორტაჟი! ვიმეორებ, ეს არის ძირითადად დაზვერვა ბრძოლით სუსტი ადგილების გამოსავლენად. მართალია, პრეზიდენტმა ზელენსკიმ დანაყოფების გადაადგილების გრაფიკები დაამტკიცა, მაგრამ ნურავინ იჩქარებს რაიმეს გამოცხადებას. იგრძნობს ურდო და დანარჩენი მსოფლიოც, როდესაც მართლა დაიწყება სრულმასშტაბიანი კონტრიერიში!

ბახმუტის ფლანგებზე კი აკეთებენ ჩვენები თავის საქმეს! ჩრდილოეთით ბერხივკასკენ, სამხრეთით კი კლეშჩეევკასკენ მიიწევენ მედგრად და სტაბილურად!

მშვენივრად უჭირავთ ვითარება ანტიპუტინისტურ ძალებს ბელგოროდის ნოვა ტავოლჟანკაში! მე-7 დღეა უკვე ეს დასახლებული პუნქტი მათი კონტროლის ქვეშ არის, მიუხედავად ურდოს მხრიდან დაბომბვებისა! კიდე ამბობენ ამაზე გაჩერებას არ ვაპირებთ, 2024 წელს სხვანაირ ქვეყანაში უნდა შევხვდეთო! ღმერთმა ხელი მოუმართოთ!

ახლა საერთაშორისო ამბები:

ნატოს ყოფილმა გენერალურმა მდივანმა ანდერს ფოგ რასმუსენმა განაცხადა, რომ თუ უკრაინა კონკრეტულ უსაფრთხოების გარანტიებს არ მიიღებს ნატოს ვილნიუსის სამიტზე, შესაძლოა, რამდენიმე ევროპულმა ქვეყანამ ინდივიდუალურად მიიღოს გადაწყვეტილება უკრაინაში ჯარების გაგზავნის შესახებ. ცხადია ამ ქვეყნებს შორის პირველი პოლონეთი მოიაზრება და მასთან ერთად ბალტიის ქვეყნები.

შვეიცარიის სენატმა მიიღო გადაწყვეტილება, რომლის თანახმად შვეიცარიულ კომპანიებს ექნებათ უკრაინისთვის შეიარაღების და ამუნიციის მიყიდვის უფლება;

გერმანიამ კიდევ ახალი სამხედრო დახმარება გადასცა უკრაინას, მათ შორის 8 ერთეული ყველგანმავალი ჯავშანტრანსპორტიორი, ამუნიცია, სარადარო სისტემები და სხვა ტიპის შეიარაღება;

სულ უფრო საინტერესო ხდება სერბეთის პრეზიდენტის განცხადებები. აშშ-ს ეროვნული გვარდიის ხელმძღვანელთან გენერალ დენიელ ჰოკანსონთან შეხვედრის შემდეგ ვუჩიჩმა განაცხადა, რომ მართალია სერბეთი ინარჩუნებს სამხედრო ნეიტრალიტეტს, ის მზად არის გააუმჯობესოს თანამშრომლობა ამერიკულ არმიასთან ბალკანეთის რეგიონში სტაბილურობის უზრუნველყოფის მიზნით! გამოვარდა ეგრევე ალკო სპიკერი მარია ზახაროვა, არიქა სერბეთში კაი არაფერი მოხდებაო. არსად კარგი არაფერი გელოდებათ ურდოს და მის მაქებრებს!

უკრაინა გაიმარჯვებს 2023-ში! საქართველო არ გარუსდება 2023-ში! პუტლერის ბოროტების იმპერია გრუხუნით ჩამოინგრევა 2023-ში!
დიდება უკრაინას!
დიდება გმირებს!
დიდება ერს!
სიკვდილი მტერს!” – წერს ალექსი პეტრიაშვილი.

“ივნისის ბოლომდე ჩინეთში კორონავირუსით 65 მილიონზე მეტი ადამიანი დაინფიცირდება” – ჯანდაცვის ექსპერტები

11:42 - 08/06/2023

სიეტლის ვაშინგტონის უნივერსიტეტის ჯანმრთელობის შეფასების ინსტიტუტის ეპიდემიოლოგი ალი მოქადი აცხადებს, რომ ჩინეთში კორონავირუსის შემთხვევების ზრდა გასაკვირი არ არის და ქვეყანაში ვირუსის ახალი ტალღები დიდი ალბათობით ყოველ ექვს თვეში ერთხელ გაჩნდება.

ამასთან, ექსპერტი ვარაუდობს, რომ უახლოეს მომავალში შესაძლოა ვირუსის ახალი ვარიანტები გავრცელდეს.

მედიის ინფორმაციით, უკვე რამდენიმე კვირაა, რაც ჩინეთში კორონავირუსით დაინფიცირების შემთხვევები კვლავ გაიზარდა.

ექსპერტები ვარაუდობენ, რომ გასულ წელს კოვიდ-რეგულაციების მოხსნის შემდეგ ეს ჩინეთში ინფექციის გავრცელების ყველაზე დიდი ტალღა იქნება. მათი პროგნოზით, ივნისის ბოლომდე ქვეყანაში კორონავირუსით 65 მილიონზე მეტი ადამიანი დაინფიცირდება.

“არავის მივცემთ საშუალებას, რომელიმე ინსტიტუტის ფუნქციონირებას რამე ფორმით ხელი შეეშალოს” – თეა წულუკიანი

11:42 - 08/06/2023

საქართველოს ვიცე-პრემიერის, თეა წულუკიანის განცხადებით, არავის მისცემენ საშუალებას, რომ რომელიმე ინსტიტუტის ფუნქციონირებას რამე ფორმით ხელი შეეშალოს.

მისივე განმარტებით, ეროვნული ბანკის ფუნქციონირებაზე ამ ქვეყანაში ეკონომიკური და ფინანსური სტაბილურობის მხრივ, ძალიან ბევრი რამ არის დამოკიდებული.

„არავის მივცემთ საშუალებას, რომ რომელიმე ინსტიტუტის, მითუმეტეს, იმ ინსტიტუტის, რომელზეც ძალიან ბევრი რამ არის ამ ქვეყანაში ეკონომიკური და ფინანსური სტაბილურობის მხრივ დამოკიდებული, ეს გახლავთ ეროვნული ბანკი, რომ ამ ინსტიტუტის ფუნქციონირებას რამე ფორმით ხელი შეეშალოს. რა თქმა უნდა, ეს არ არის კონკრეტული პრეზიდენტის წინააღმდეგ მიმართული“, – აღნიშნა თეა წულუკიანმა.

პარტია „ქართული ოცნების“ განცხადებით, იკვეთება აშკარა ნიშნები იმისა, რომ პრეზიდენტი სალომე ზურაბიშვილი თავისი ქმედებებით მიზანმიმართულად უქმნის დაბრკოლებას საქართველოს ეროვნული ბანკის ჯეროვან საქმიანობას.

1 ოქტომბერს საქართველო, თიბისისა და Visa-სთან პარნიორობით, „Starring Georgia-ს“ ფარგლებში, ბრუნო მარსს უმასპინძლებს

11:24 - 08/06/2023

1 ოქტომბერს ქართველ მსმენელს დაუვიწყარი გამოცდილება ელოდება – ბრუნო მარსი „Starring Georgia-ს“ ფარგლებში თბილისში კონცერტს გამართავს. მსოფლიო ვარსკვლავი მსმენელის წინაშე „დინამო არენაზე“ წარდგება. ბრუნო მარსის კონცერტის მთავარი პარტნიორები არიან თიბისი და VISA.

კონცერტის ბილეთების გაყიდვა 20 ივნისს დაიწყება. ბილეთების შეძენა შესაძლებელია tkt.ge-ზე და superapp-ში.

15 გრემის ჯილდოს, 4 Brit Awards-ის, 4 გინესის რეკორდისა და უამრავი მუსიკალური პრიზის მფლობელი ბრუნო მარსი თანამედროვე შემოქმედებითი ინდუსტრიის ერთ-ერთ მნიშვნელოვან და გავლენიან არტისტად მიიჩნევა. ამერიკელი მუსიკოსის, მომღერლისა და მულტინსტრუმენტალისტის სადებიუტო ალბომი „Doo-Wops & Hooligans“ მაშინვე ნამდვილი სენსაციად, ბრუნო მარსი კი, გლობალურ სუპერვარსკვლავად იქცა, რაც მის მომდევნო ტურნეებზეც დადასტურდა. სტუდიური მუშაობის პარალელურად, ნათელი გახდა, რომ ბრუნო მარსი ახალი თაობის ფავორიტ „ლაივ“ შემსრულებლად იქცა, რომელსაც საკონცერტო და საფესტივალო სივრცეებში ახლებური ენერგიის აკუმულირება შეეძლო. შესაბამისად, მოულოდნელი არ ყოფილა გრემის დაჯილდოებაზე შემდეგი ტრიუმფიც.

ბრუნო მარსის ვარსკვლავური სტატუსი კიდევ ერთხელ დამტკიცდა მომდევნო ალბომებში, სადაც, R&B და ჰიპ-ჰოპის პარალელურად, ბრუნო მარსი საცეკვაო მუსიკის ტენდენციებსაც არ ივიწყებდა.

სხვადასხვა მასშტაბური ფესტივალის, ტურნესა თუ ცალკეული ჰიტის დამსახურებით, ამერიკელი მუსიკოსი დღემდე რჩება სხვადასხვა თაობის საყვარელ შემოქმედად.

ქართველ მსმენელს მისი მოსმენის საშუალება პირველად 1-ელ ოქტომბერს, „Starring Georgia- ს“ ფარგლებში, ბორის პაიჭაძის სახელობის ეროვნულ სტადიონზე ექნება.

პირი, რომელმაც მეგობარს დანით სხეულზე დაზიანებები მიაყენა და ნაგვის ურნასთან დატოვა, დამნაშავედ ცნეს

11:24 - 08/06/2023

ნაფიცმა მსჯულებმა განსაკუთრებული სისასტიკით ჩადენილი მკვლელობის ფაქტზე, რომელიც 2022 წლის 30 სექტემბერს მოხდა, ბრალდებული დამნაშავედ ცნეს.

ამის შესახებ ინფორმაციას საქართველოს პროკურატურა ავრცელებს.

მათივე ცნობით, სასამართლომ ბრალდებულს სასჯელის სახით 20 წლით თავისუფლების აღკვეთა შეუფარდა.

„სასამართლო პროცესზე დადგინდა, რომ დაზარალებულს ბრალდებულთან დიდი ხნის ურთიერთობა აკავშირებდა. 2022 წლის 30 სექტემბერს, მათ ბრალდებულის სახლში იჩხუბეს, რა დროსაც ბრალდებულმა მსხვერპლს დანით სხეულზე დაზიანებები მიაყენა, შემდეგ კი კვალის დაფარვის მიზნით, გვამი სახლიდან გარეთ გაიტანა და ნაგვის ურნასთან დატოვა.

სასამართლო პროცესზე ბრალდების მხარემ წარადგინა მტკიცებულებები, რომელთა ერთობლიობა ბრალდებულის მიერ დანაშაულის ჩადენასა და პასუხისმგებლობისგან თავის დაღწევის მიზნით მის შემდგომ მოქმედებას ადასტურებდა.

ნაფიცი მსაჯულები, საქმის გარემოებებისა და მტკიცებულებების დეტალურად შესწავლის შემდეგ, დარწმუნდნენ პროკურატურის პოზიციის მართებულობაში და ბრალდებული სისხლის სამართლის კოდექსის 109-ე მუხლის ,,მ“ ქვეპუნქტით (განსაკუთრებული სისასტიკით ჩადენილი განზრახი მკვლელობა) დამნაშავედ ცნეს.

სასამართლომ ბრალდებულს სასჯელის სახით 20 წლით თავისუფლების აღკვეთა შეუფარდა“,- ნათქვამია პროკურატურის ინფორმაციაში.

“რუსები ახლა უკრაინელთა პოზიციების დაბომბვას ვერ ახერხებენ” – ბოლო ცნობები ცხელი წერტილიდან

11:19 - 08/06/2023

რუსეთ-უკრაინის ომის 470-ე დღე

რუსეთის მიერ ოკუპირებულ ხერსონში 14 000 სახლი დაიტბორა, ევაკუირებულია 4 300-მდე ადამიანი, – ინფორმაციას რუსული მედია ოკუპირებული ხერსონის ოლქის სამხრეთ ნაწილის ე.წ. საგანგებო სიტუაციების სამსახურებზე დაყრდნობით ავრცელებს.

„კახოვკას ჰიდროელექტროსადგურის განადგურების შემდეგ 14 000-მდე სახლი დაიტბორა და თითქმის 4 300 ადამიანი ევაკუირებულია,“ – აცხადებენ ე.წ. საგანგებო სიტუაციების სამსახურებში.

ამასთან, სამედიცინო სამსახურების ცნობით, მედიკოსებს დახმარების აღმოჩენის მიზნით 23-მა ადამიანმა მიმართა, ჰოსპიტალიზებულია 21 ადამიანი.

კახოვკას ჰიდროელექტროსადგურის კაშხლის ნგრევის შედეგად ოკუპანტებმა ცოცხალი ძალის, საბრძოლო მასალისა და აღჭურვილობის მნიშვნელოვანი დანაკარგი განიცადეს.

„ოკუპანტები არ იყვნენ მზად კახოვკას ჰიდროელექტროსადგურის კაშხლის აფეთქების შედეგებისთვის, მათ ცოცხალი ძალის, იარაღისა და სამხედრო ტექნიკის ზარალი განიცადეს“, – აცხადებენ გენშტაბში.

უწყების ცნობით, მე-7 საჰაერო სადესანტო თავდასხმის დივიზიისა და რუსეთის შეიარაღებული ძალების 22-ე არმიის კორპუსის ქვედანაყოფებში არიან დაშავებულები, გარდაცვლილები და დაკარგულები. ასევე, ამ შენაერთებმა დაკარგეს რამდენიმე საველე საცავი საბრძოლო მასალით, მანქანებით, ჯავშანტექნიკითა და სხვა სამხედრო ტექნიკით.

გენერალური შტაბის ინფორმაციით, 6 ივნისს, როდესაც მშვიდობიანმა მოსახლეობამ საკუთარი ავტომობილებით ხერსონის ოლქის ოკუპირებული ქალაქი კახოვკა მასობრივად დატოვა, ოკუპანტებმა ადგილობრივი მოსახლეობა „ცოცხალ ფარად“ გამოიყენეს.

უკრაინის შეიარაღებულმა ძალებმა 730 რუსი ოკუპანტი და თითქმის 30 საარტილერიო სისტემა გაანადგურეს. ამის შესახებ ინფორმაციას უკრაინის გენერალური შტაბი ავრცელებს.

უკრაინული მხარის ცნობით, 2022 წლის 24 თებერვლიდან მიმდინარე წლის 8 ივნისის ჩათვლით, მტრის პირადი შემადგენლობიდან დაახლოებით 212 760 ადამიანია ლიკვიდირებული.

„კახოვკას ჰიდროელექტროსადგურის კაშხლის ნგრევის შედეგად, დნეპრის მარცხენა სანაპიროზე რუსების პირველი თავდაცვის ხაზის მრავალი სიმაგრე განადგურდა“, – ამის შესახებ ომის შესწავლის ინსტიტუტის (ISW) ანგარიშშია აღნიშნული.

ანალიტიკოსების აზრით, კახოვკას ჰიდროელექტროსადგურის კაშხლის განადგურება მნიშვნელოვნად ცვლის ხერსონის ფრონტის სექტორის გეოგრაფიასა და ტოპოგრაფიას. წყალდიდობა სერიოზულად არღვევს რუსეთის მომზადებულ თავდაცვით პოზიციებს დნეპრის აღმოსავლეთ სანაპიროზე, კერძოდ, პირველი ხაზის პოზიციებს გოლა პრისტანსა და ალეშკში.

„კახოვკას ჰიდროელექტროსადგურის ნგრევა გავლენას ახდენს რუსეთის სამხედრო პოზიციებზე დნეპრის აღმოსავლეთ სანაპიროზე. წყალდიდობამ გაანადგურა რუსეთის პირველი ხაზის მრავალი საველე ციხესიმაგრე, რომლის გამოყენებასაც რუსი სამხედროები უკრაინის თავდასხმებისგან დასაცავად აპირებდნენ.

სწრაფმა წყალდიდობამ, სავარაუდოდ, რუსები აიძულა, რომ კონცენტრაციის ძირითადი პუნქტებიდან უკან დაეხიათ. წყალდიდობამ ასევე გაანადგურა რუსული დანაღმული ველები სანაპიროზე და რუსულმა შენაერთებმა ნაჩქარევად დაიხიეს წყალდიდობის ზონებიდან 5-15 კმ-ით. შესაბამისად, რუსები ახლა უკრაინელთა პოზიციების დაბომბვას ვერ ახერხებენ“, – ნათქვამია ანგარიშში.

“მაშინ დავნიშნოთ რომან გოცირიძე და დავუბრუნდეთ ისევ კუპონებს, ის არის „ნაცების“ კლასტერი”-მამუკა მდინარაძე

11:15 - 08/06/2023

პრეზიდენტს ხომ არ წარმოუდგენია (ეროვნული ბანკის საბჭოს წევრის) კანდიდატურა? თავად აღიარეს, განვიხილავდითო. თუ „ქართული ოცნება“ ენდობა ადამიანს, პროფესიონალია, დადებითი რეპუტაცია აქვს, პოზიტიურია, კვალიფიკაციით, ყველანაირად კარგი ადამიანია, ამბობენ, იცით რა, თქვენთან ნამუშევარია. მაშინ დავნიშნოთ რომან გოცირიძე და დავუბრუნდეთ ისევ კუპონებს, ის არის „ნაცების“ კლასტერი, – ამის შესახებ პარტია „ქართული ოცნების“ აღმასრულებელმა მდივანმა, მამუკა მდინარაძემ განაცხადა.

მდინარაძის განცხადებით, ბევრი ვერსია არსებობს იმასთან დაკავშირებით, რა მოტივაცია ამოძრავებდა სალომე ზურაბიშვილს, როდესაც საქართველოს ეროვნული ბანკის გამართული მუშაობა საფრთხის ქვეშ დააყენა.

მისივე თქმით, პრეზიდენტი „ნაციონალური მოძრაობის“ ნარატივს ავითარებს, როდესაც საქართველოს ხელისუფლების პრორუსულობაზე საუბრობს და კარგად ხვდება, რა რისკებთან არის დაკავშირებული იმ მოთხოვნების შესრულება, რაც საქართველოს მიმართ რუსეთ-უკრაინის ომის ფონზე ისმის.

„ათასი ვერსიაა, მათ შორის, გამოითქმის მოსაზრებები, რომ ახლობლების და ოჯახის წევრების დაწინაურების ხარჯზე „იცვალა ფერი“ პრეზიდენტმა, მაგრამ რა არის ფაქტი? ამით ვილაპარაკოთ, რომ საზოგადოება მიხვდეს, ჩვენ მართლები ვართ ამ მსჯელობაში. რამდენი ნაბიჯიც გადადგა, ყველა იყო რეალობის საწინააღმდეგო. 26 მაისს რაც გააკეთა, არ შევყევით სპეციალურად, განცხადებაც გაავრცელა პოლიტსაბჭომ, რომელიც ძალაში რჩება. „ნაცური“ ნარატივი საქართველოს ხელისუფლების პრორუსობის შესახებ, უკიდურესად შეურაცხმყოფელია. სალომე ზურაბიშვილმა თვითონ ხომ ძალიან კარგად იცის, ხომ ვერ დავაბრალებთ, რომ არ იცის და ვერ ხვდება, ასეთი პრეტენზიები ხომ არ გვაქვს ჩვენ მის ინტელექტთან? ხომ ზუსტად იცის, ორი თვითმფრინავით მოხალისეების გაშვება [უკრაინაში] რა რისკებთან იყო დაკავშირებული, ხომ ზუსტად იცის, რასაც ჩვენ მოგვიწოდებენ, საქართველოს ფიზიკური განადგურების რისკებთან მიდის?“, – აღნიშნა მამუკა მდინარაძემ „იმედი ლაივის“ ეთერში.

მდინარაძის განცხადებით, არ ისაუბრებს მიზეზებზე, რატომ ჯდება სალომე ზურაბიშვილი საქართველოსთვის საზიანო ნარატივში იმ ფონზე, რომ ყველა რისკის შესახებ კარგად არის ინფორმირებული.

„არსებობს მასთან კომუნიკაციები და როცა აზრი არ აქვს ამ კომუნიკაციებს, მაშინ წყდება ხოლმე პერიოდულად. რეალურად, ამ ადამიანმა, კარგად იცის ყველა რისკის შესახებ და რატომ რისკავს, რატომ ჯდება ამ დიდ, საერთო, საქართველოსთვის დამაზიანებელ ნარატივში – შეიძლება, ბევრი რაღაც ვიცოდე, ერთ ვერსიას ვიზიარებდე, მაგრამ ამაზე საუბარი მიჭირდეს, რომ, ყველაფერს რომ თავი დავანებოთ, არ შევიდეთ ნარატივში, რომელში შესვლასაც გვიბიძგებდა მისი ნაბიჯები“, – განაცხადა მდინარაძემ.

ახალი შესაძლებლობა თიბისის ბიზნეს კლიენტებისთვის – Visa Signature Business ბარათი

10:55 - 08/06/2023

თიბისისა და Visa-ს პარტნიორობის ფარგლებში, თიბისის მსხვილი ბიზნეს კლიენტებისთვის, Visa Signature Business ბარათი შეიქმნა. ასეთი მაღალი კლასის ბიზნეს ბარათის კორპორაციული კლიენტებისთვის გამოშვება, პირველი პრეცედენტია არა მხოლოდ საქართველოში, არამედ კავკასიის რეგიონში.

ახალი ბიზნეს ბარათი კომპანიების მენეჯერების საჭიროებებზეა მორგებული, რაც პირველ რიგში, საქართველოს მასშტაბით, მიმდინარე ხარჯებისთვის ლარის უფასოდ გამოტანას გულისხმობს, დღეში – 30 000 ლარიანი, კვირაში კი 200 000 ლარიანი ლიმიტით.

ახალი ბიზნეს ბარათით გადახდები მაქსიმალურად დაზღვეულია. გადახდისას კორპორაციული დაზღვევა ვრცელდება, რაც თანამშრომლების მიერ ბარათით არამიზნობრივი გადახდის დაფიქსირების შემთხვევაში, წლიურად 25 000 დოლარამდე დანაკარგის ანაზღაურებას უზრუნველყოფს.

Visa Signature Business ბარათი დამატებით უპირატესობას სთავაზობს მენეჯერებს საერთაშორისო მოგზაურობის დროსაც, მათ შორის, Lounge Key პროგრამის ფარგლებში, მსოფლიოს 1200-ზე მეტი აეროპორტის ლაუნჯით, წლის განმავლობაში 6-ჯერ სარგებლობას. ასევე, წელიწადში 10-ჯერ, თურქეთისა და ევროპის სხვადასხვა აეროპორტში Fast Track International-ის სერვისით სარგებლობას, რაც საპასპორტო და უსაფრთხოების კონტროლის რიგის გარეშე, სწრაფად გავლას გულისხმობს.

ბარათი 500 000$-იან სამოგზაურო დაზღვევასაც მოიცავს, რაც სამედიცინო, ასევე ფრენის გადადების, ან ბარგის დაგვიანების შემთხვევაშიც კი, ხარჯების ანაზღაურებას უზრუნველყოფს. Visa Signature Business ბარათით booking.com-ზე გადახდის შემთხვევაში – 6%-მდე ქეშბექი, rentalcars.com-ზე მანქანის დაჯავშნისას კი, 10%-იანი ფასდაკლება მოქმედებს.

ბარათის მფლობელებს შესაძლებლობა აქვთ Visa ბიზნეს კონსიერჟის მომსახურებით ისარგებლონ, რომელიც WhatsApp-ის, Viber-ისა და Telegram-ის აპლიკაციების დახმარებით, 24/7-ზე ხელმისაწვდომია. ბიზნეს კონსიერჟის მომსახურება უფასო იურიდიულ და საბუღალტრო კონსულტაციებს, ასევე 24/7-ზე ავტო ასისტენტის მომსახურებას აერთიანებს.

„Visa-სთან პარტნიორობით შექმნილი Visa Signature Business ბარათი, სრულიად ახალ გამოცდილებას ქმნის საქართველოს ბაზარზე. მისი ფუნქციები ჩვენი კლიენტების საჭიროებების გათვალისწინებით შევქმენით. ახალი პროდუქტი სრულად თანხვედრაშია თიბისის მისიასთან – გავუმარტივოთ მომხმარებლებს ცხოვრება და საქმიანობა. მნიშვნელოვანია ჩვენს პარტნიორებს მუდმივად განვითარებადი, თანამედროვე შესაძლებლობები შევთავაზოთ და დასახული მიზნების ეფექტურად მიღწევაში დავეხმაროთ”, – გიორგი თხელიძე, თიბისის გენერალური დირექტორის მოადგილე.

1...2,0072,0082,009...2,303 Page 2,008 of 2,303