საქართველოში სერიოზულად ვუდგებით კლიმატურ კრიზისებთან გამკლავების როლს და მნიშვნელოვანი ნაბიჯები გადავდგით ამ მიმართულებით, – ამის შესახებ საქართველოს პრემიერ-მინისტრმა, ირაკლი ღარიბაშვილმა დუბაიში მიმდინარე გაერო-ს კლიმატის ცვლილების 28-ე კონფერენციის მსოფლიო ლიდერთა სამიტზე სიტყვით გამოსვლისას განაცხადა.

მისივე თქმით, გარემოზე ზემოქმედების შერბილებისა და ადაპტაციის ღონისძიებებისთვის წელს საქართველოში სახელმწიფო ბიუჯეტიდან 500 მილიონ აშშ დოლარზე მეტი გამოიყო.

„ჩემთვის დიდი პატივი და პრივილეგიაა, მოგმართოთ საქართველოს მთავრობისა და ხალხის სახელით. მსურს, უღრმესი მადლობა გადავუხადო მის უმაღლესობას, შეიხ მოჰამედ ბიზ ზაიდ ალ ნაჰიანს, არაბთა გაერთიანებული საამიროების პრეზიდენტს გულუხვი სტუმართმოყვარეობისა და დუბაიში ამ მნიშვნელოვანი სამიტის მასპინძლობისთვის.

არაბთა გაერთიანებული საამიროები მართლაც არის ტექნოლოგიური ინოვაციებისა და მოდერნიზაციის, კრეატიულობისა და პროგრესის სამაგალითო ქვეყანა გლობალური მასშტაბით. ახლა ის კლიმატის მდგრადობის ძალისხმევასაც თაოსნობს.

კლიმატის ცვლილების თვალხილული ეფექტი, რომელიც სულ უფრო მძიმდება და დამანგრეველ გავლენას ახდენს როგორც ადამიანებზე, ისე გარემოზე, დაჩქარებულ ძალისხმევას მოითხოვს კლიმატის ცვლილებებისადმი მდგრადობის უზრუნველსაყოფად. ამიტომ, მტკიცედ მწამს, რომ კლიმატურ კრიზისებთან გასამკლავებლად რამდენიმე ძირითადი საერთაშორისო ძალისხმევა უნდა შენარჩუნდეს მთელი მსოფლიოს მასშტაბით. ესენია:

2030 წლისთვის გლობალური ემისიების განახევრება და 1.5°C ზღვრული ოდენობის შენარჩუნება პარიზის შეთანხმების შესაბამისად; ზარალისა და ზიანის ფონდში შენატანების თანამიმდევრული განხორციელება; ​ჩარჩო სისტემის შემუშავება კლიმატის ადაპტაციის გლობალური მიზნის მისაღწევად.

ასევე, უნდა შესრულდეს კლიმატის ცვლილებებთან გამკლავებისთვის ძალისხმევის დაფინანსების დაპირება წელიწადში 100 მილიარდი აშშ დოლარის ოდენობით. კლიმატის ცვლილებებთან ადაპტაციის მიზნით განხორციელებული ძალისხმევის დაფინანსების გაორმაგების თაობაზე ნაკისრი ვალდებულებაც უნდა შესრულდეს.

საქართველოში სერიოზულად ვუდგებით კლიმატურ კრიზისებთან გამკლავების როლს და  მნიშვნელოვანი ნაბიჯები უკვე გადავდგით ამ მიმართულებით. გარემოზე ზემოქმედების შერბილებისა და ადაპტაციის ღონისძიებებისთვის სახელმწიფო ბიუჯეტიდან 500 მილიონ აშშ დოლარზე მეტი გამოიყო წელს საქართველოში. უფრო მეტიც, ეროვნული ინფრასტრუქტურის განვითარება უკვე ითვალისწინებს დაბალი ნახშირბადის და კლიმატის ცვლილებებთან ადაპტაციის ღონისძიებებს, რაც წელიწადში 300 მილიონ აშშ დოლარს შეადგენს.

ჩემი მთავრობა მხარს უჭერს იდეას, რომლის თანახმადაც, ევროპა გახდება პირველი კონტინენტი ატმოსფერული ემისიების ნულოვანი ნაშთით. ყოველივე ამის გათვალისწინებით, გრძელვადიანი სტრატეგია დავამტკიცეთ ქვეყანაში მცირე ემისიების  უზრუნველსაყოფად, ხოლო „ნახშირბადისადმი ნეიტრალიტეტი“ 2050 წლის მნიშვნელოვან სამიზნე ორიენტირად გამოვაცხადეთ. საქართველო ასევე კისრულობს ვალდებულებას გლობალურ ძალისმევაში წვლილის შესატანად 2025 წელს წარმოადგინოს ახალი და უფრო ამბიციური ეროვნული გეგმა.

ასევე, სიამოვნებით აღვნიშნავ, რომ საქართველოში მოხმარებული ელექტროენერგიის თითქმის 85% განახლებადი წყაროებიდან მოდის. თუმცა მისი წილის შემდგომი გაზრდა ჩვენს სტრატეგიულ პრიორიტეტად რჩება და მოხარული ვარ განვაცხადო, რომ საქართველო უერთდება გაერთიანებული ერების კლიმატის ცვლილებებთან გამკლავების 28-ე კონფერენციის გლობალურ დაპირებას განახლებადი რესურსებისა და ენერგოეფექტიანობის შესახებ“, – აღნიშნა ღარიბაშვილმა.

საქართველოს პრემიერ-მინისტრის თქმით, მტკიცედ უჭერს მხარს გაერთიანებული ერების კლიმატის ცვლილებებთან გამკლავების 28-ე კონფერენციის თავმჯდომარე ქვეყნის ხედვას განახლებადი ენერგორესურსების გაზრდის შესახებ, რათა ეტაპობრივად მოხდეს წიაღისეული საწვავის ჩანაცვლება.

„მიმაჩნია, რომ ოფიციალურმა მოლაპარაკებამ შედეგად უნდა მოიტანოს 2030 წლისთვის განახლებადი ენერგორესურსების გასამმაგებისა და ენერგოეფექტიანობის გაორმაგების ვალდებულება, წიაღისეული საწვავის ჩანაცვლების უწყვეტ პროცესთან ერთად.

დაბოლოს, იმედი მაქვს, გაერთიანებული ერების კლიმატის ცვლილებებთან გამკლავების 28-ე კონფერენციის ფარგლებში ჩვენ შევძლებთ, მოვემზადოთ უნიკალური მომენტისთვის და შევასრულოთ ჩვენი დანაპირები – უფრო ნათელი, ჯანმრთელი და მწვანე მომავალი შევუქმნათ მომდევნო თაობებს“, – განაცხადა ირაკლი ღარიბაშვილმა.

ახალქალაქის საკრებულოში „ნაციონალური მოძრაობის“ ფრაქციის წევრები პარტიის თავმჯდომარეს, ლევან ხაბეიშვილს გადადგომისკენ მოუწოდებენ.

როგორც ფრაქციია წევრების განცხადებაშია აღნიშნული, ახალი მენეჯმენტის და პირადად ხაბეიშვილის მცდარმა მიდგომებმა გამოიწვია პარტიის არნახული დასუსტება და ერთგული მომხრეების გარიყვა მოძრაობიდან.

„ჩვენ, „ერთიანი ნაციონალური მოძრაობის“ სიით გასულ, ახალქალაქის მუნიციპალიტეტის საკრებულოს წევრებს და ორგანიზაციის წარმომადგენლებს პარტიის ახალ მენეჯმენტთან შეგვექმნა გადაულახავი პრობლემები, რაც უკავშირდება პოლიტსაბჭოს დაშლის უკანონო გადაწყვეტილებასა და რაიონულ ორგანიზაციებში ფიქტიური არჩევნების ჩატარებას.

ახალი მენეჯმენტის და პირადად ხაბეიშვილის მცდარმა მიდგომებმა გამოიწვია პარტიის არნახული დასუსტება და ერთგული მომხრეების გარიყვა ჩვენი მოძრაობიდან.

ჩამოთვლილ მიზეზთა გამო, ჩვენ ვითხოვთ, გადადგეს პარტიის თავმჯდომარე, რათა დისკუსია ერთობაზე და პარტიის მებრძოლი წევრების რეინტეგრაცია გახდეს შესაძლებელი“, – აღნიშნულია განცხადებაში.

განცხადებას ხელს აწერს „ერთიანი ნაციონალური მოძრაობის“ რვა წევრი: შირვან შირინიანი, არმენ ჰუნანიანი, მელიქ რაისიანი, ანდრანიკ მამულიანი, ვართან ჩოკანდარიანი, არტურ მკოიანი, არმენ ჰაკობიანი, მიშა ჰაკობიანი.

“ყველა ხვდება, პოლიტიკური აგონიაა, რომელშიც ახლა „ნაციონალური მოძრაობა“ იმყოფება”, – ამის შესახებ პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ მიხეილ სარჯველაძემ განაცხადა.

„არ მინდა ცინიკურად გამომივიდეს, მაგრამ ასეთი არგუმენტები, რომ თავმჯდომარე არ ჰყავდეს პარტია, რაღაც ეს უცნაური გადაწყვეტილებები მიიღებოდეს, რაღაც ისტერიკას ემსგავსება. ეს ისტერიკაც გასაგებია, საიდანაა განპირობებული. ვფიქრობ, ყველა ხვდება, პოლიტიკური აგონიაა, რომელშიც ახლა „ნაციონალური მოძრაობა“ იმყოფება. თავიანთი ქმედებებით საქმე იქამდე მიიყვანეს, რომ ჩემი აზრით, ახლა უბრალოდ შეუძლებელია საუბარი და ფიქრი ამ პარტიის გადარჩენაზე“, – განაცხადა სარჯველაძემ.

ლევან ხაბეიშვილმა ფოთის საკრებულოში „ნაციონალური მოძრაობის“ ფრაქციის თავმჯდომარე დარეჯან ცხვიტარია და მისი მოადგილე თანამდებობიდან გაათავისუფლა.

ქალბატონო სალომე, მინდა შეგახსენოთ, რა ძალისხმევა გასწია „ქართულმა ოცნებამ“, მისმა წევრებმა და მხარდამჭერებმა რომ თქვენ გაპრეზიდენტებულიყავით, იქნებ რამენაირად ძალა მოვიკრიბოთ და 15 დეკემბრამდე მაინც დავანებოთ თავი ამ უსაგნო მოძრაობას, მივიღოთ კანდიდატის სტატუსი და 2024-ის შემდეგ ყველაფერი გვაჩვენებს, საზოგადოება განსჯის, ჩვენ ვართ მართლები, ქალბატონი სალომე თუ სხვა – ამის შესახებ პარლამენტის დიასპორის კომიტეტის თავმჯდომარემ ბექა ოდიშარიამ POSTV-ის ეთერში განაცხადა.

მისი თქმით, უდიდესი რწმენა ჰქონდა, რომ ეს ევროპელი პოლიტიკოსი საქართველოს წინ წაწევდა.

„ძალიან გული მწყდება სალომე ზურაბიშვილთან დაკავშირებით, არავის არასოდეს არაფერს ვაყვედრი, 54 მუნიციპალიტეტში მყავს წარდგენილი, არა როგორც მომავალი პრეზიდენტი, არამედ პირველი ქალი პრეზიდენტი. უდიდესი რწმენა მქონდა, რომ ეს ევროპელი პოლიტიკოსი, სულით და ხორცით, საქართველოს წინ წაწევდა, ბოლო წუთამდე, ვიდრე არ დაიწყო მისი ვიზიტების კრიტიკა მაგალითად ლატვიის პრეზიდენტმა. ლატვია მათ შორის ბალტებშიც კი გამორჩეული იყო თავისი სიმშვიდით. მე ლატვიის მეგობრობის ჯგუფის ხელმძღვანელი, ლატვიის საპატიო კონსული ვარ და არასოდეს მახსოვს, რომ მათ რაღაც დევიაცია და განსაკუთრებული განცხადება ჰქონოდეთ“, – განაცხადა ბექა ოდიშარიამ.

აშშ-ის სახელმწიფო დეპარტამენტმა ტერორიზმის შესახებ 2022 წლის ანგარიში გამოაქვეყნა, რომელშიც მსოფლიოს სხვადასხვა ქვეყანასთან ერთად, ტერორიზმის წინააღმდეგ ბრძოლის კუთხით საქართველოს მიერ განხორციელებული ღონისძიებებიც არის შეფასებული.

დოკუმენტში ნათქვამია, რომ საქართველომ გააგრძელა ურყევი ჩართულობა კონტრტერორიზმის საკითხებში და დარჩა ამერიკის შეერთებული შტატების მტკიცე პარტნიორად უსაფრთხოების მიმართულებით.

ანგარიშში ხაზგასმითაა აღნიშნული, რომ საქართველოში ტერორიზმთან დაკავშირებული სიტუაცია 2021 წელს იყო მშვიდი და სტაბილური, თუმცა საქართველოს სახელმწიფო უსაფრთხოების სამსახურმა აღკვეთა ისრაელის მოქალაქის მკვლელობის მცდელობა, რომელსაც სავარაუდოდ ხელმძღვანელობდნენ ირანის ისლამური რევოლუციის გუშაგთა კორპუსთან დაკავშირებული პირები.

სახელმწიფო დეპარტამენტის მიერ გამოქვეყნებულ დოკუმენტში ხაზგასმულია, რომ საქართველომ აამოქმედა 2022-2026 წლების ეროვნული კონტრტერორისტული სტრატეგია და სამოქმედო გეგმა, შემოიღო უფრო მკაცრი ზომები ტერორისტული აქტების შესახებ ცრუ შეტყობინებისთვის და გააძლიერა ფულის გათეთრებისა და მასობრივი განადგურების იარაღის წინააღმდეგ ძალისხმევა.

აშშ-ის სახელმწიფო დეპარტამენტი დოკუმენტში აღნიშნავს, რომ საქართველოს, ზოგადად, შესწევს უნარი გამოავლინოს, შეაკავოს და რეაგირება მოახდინოს ტერორიზმის ინციდენტებზე.

“საქართველოს სახელმწიფო უსაფრთხოების სამსახური, ზოგადად, კარგად აღჭურვილი და გაწვრთნილია და მისი კონტრტერორისტული განყოფილება რეგულარულად განაგრძობს წვრთნას და აღჭურვას საერთაშორისო პარტნიორების და შიდა სწავლების მეშვეობით”, – ნათქვამია დოკუმენტში.