მიუღებელია, რომ ფრენის უფლება მისცეს კომპანიას, რომელიც აფხაზეთს და ცხინვალის რეგიონს სახელმწიფოებად აღიარებდა – დავიწყეთ პროცედურები, რომელიც „ესენგეს“ წევრობას წააგავს,- ამის შესახებ პარტია საქართველოსთვის წევრმა, დეპუტატმა მიხეილ დაუშვილმა განაცხადა.

მისი თქმით, საქართველო დასავლეთს შორდება და რუსეთს უახლოვდება.

„მიუღებელია, რომ იმ კომპანიას მისცეს ფრენების უფლება, რომელიც ჩვენს ტერიტორიებს აფხაზეთს და ცხინვალის რეგიონს აღიარებდა დამოუკიდებელ სახელმწიფოებად. ეს სრულიად მიუღებელი ფაქტია, რომ ხელისუფლებამ ასეთ კომპანიას მისცა ფრენის უფლება. ზოგადად ფრენების აღდგენა დღევანდელ კონტექსტში უდიდესი რისკია, დიდ სურათში რომ დავხედოთ, მთავრობის „დამსახურებით“ ყოველდღიურად ვშორდებით დასავლელ პარტნიორებს და ვუახლოვდებით რუსეთს. წარმოიდგინეთ მოლდოვა აპირებს დატოვოს ე.წ. ესენგე და ჩვენ დავიწყეთ პროცედურები რომელიც „ესენგეს“ წევრობას წააგავს“, – განაცხადა დაუშვილმა.

საქართველოს ხელისუფლება მზად არის საქართველო დააბრუნოს რუსეთის ორბიტაზე, ჩაკეტოს ევროპისკენ მიმავალი კარი და აქციოს საქართველო მსოფლიოსგან უკვე აღიარებულ ტერორისტულ და გენოციდის მომწყობ სახელმწიფოს ჩრდილქვეშ დასაბრუნებლად, – ამის შესახებ „ლელო საქართველოსთვის“ წევრმა ანა ნაცვლიშვილმა განაცხადა.

„ეს არის მთავარი პრობლემა. ამ დიდი პრობლემის ნაწილია პირდაპირი ფრენებიც, ამ პრობლემის ნაწილია ჟრიამული უვიზო მიმოსვლაზეც და ა.შ.“, – განაცხადა ნაცვლიშვილმა.

მმართველ გუნდში აცხადებენ, რომ რუსეთის გადაწყვეტილება ცალმხრივია და ამასთან საქართველოს ხელისუფლებას არანაირი კავშირი არ აქვს. თუმცა მოსალოდნელ საფრთხეებზე საუბრობენ ოპოზიციაში და განმარტავენ , რომ მოსკოვმა საქართველოს ხელისუფლება საგარეო პოლიტიკური კურსის გამო დაასაჩუქრა.

ამ პროცესებმა ლუსტრაცია მოახდინა, ვისაც ნიღაბი ჰქონდა, ყველას ჩამოძვრა – საზოგადოებამ დაინახა, ვინ ვინ არის, – ამის შესახებ საპარლამენტო უმრავლესობის წევრმა ალუდა ღუდუშაურმა რუსეთსა და საქართველოს შორის პირდაპირი ფრენების საკითხზე პარლამენტთან გამართული საპროტესტო აქციის კომენტირებისას განაცხადა.

ის ასევე გამოეხმაურა ელენე ხოშტარიას მიერ ამ საკითხზე აქციის დაანონსებას და აღნიშნა, რომ „პირველი ალბათ ეგ იქნება, ვინც ჩაფრინდება და პირდაპირ „ქეშად“ აიღებს რუსეთის ფედერაციიდან რუბლებს“.

„ელენე ხოშტარია რომ რუბლებს რუსეთის ფედერაციიდან იღებს, როგორც ჩანს, კურსთან დაკავშირებით ნერვიულობს, დამშვიდდეს, დაწყნარდეს, თუ ფრენები იქნება აღდგენილი, პირველი ალბათ ეგ იქნება ვინც ჩაფრინდება და პირდაპირ “ქეშად” აიღებს რუსეთის ფედერაციიდან რუბლებს.

იმ ჯგუფების მხრიდან რაიმეს გაპროტესტება, რომლებიც რეალობას აცდენილები არიან და პირდაპირ რადიკალურ პოლიტიკური ჯგუფების ბანაკში არიან, თვალი მოვკარი პარლამენტთან (აქციაზე) იმ ადამიანებს, ვინც სხვადასხვა კონკურსში იღებდა მონაწილეობას და ცდილობდა პარლამენტისთვის ობიექტურობა დაემტკიცებინა, თქვენ ხედავთ ამ ადამიანებს ყველა პოლიტიკურ აქციაზე. ამ პროცესებმა კიდევ უფრო მეტი ლუსტრაცია მოახდინა და ვისაც ნიღაბი ჰქონდა, ყველას ჩამოძვრა, საზოგადოებამ დაინახა, ვინ ვინ არის.

საქართველოს მოსახლეობას რუსეთის ფედერაციისგან ცალმხრივად დადებული სანქციები ჰქონდა და ცალმხრივად მოეხსნა. ასეთ შემთხვევაში საქართველოს ალბათ, ერთადერთი გზა რჩება, რომ აეროპორტებში უნდა ჩავაყენოთ ალბათ, საპოლიციო დანაყოფები და ჩვენი ქვეყნის მოსახლეობის იმ ნაწილს, ვინც რაიმე ფორმით, ოჯახით არის დაკავშირებული და უნდა რუსეთის ფედერაციაში წავიდეს გამარტივებულად, ამ პირებს უნდა ავუკრძალოთ ეს და ვუთხრათ, რომ მესამე ქვეყნის გავლით უნდა წავიდნენ, ეს არის საფუძველს მოკლებული. გიორგი ვაშაძე რომ ჩვენი ქვეყნის მოსახლეობას მოუწოდებდა ბინა არ გაექირავებინათ რუსეთის მოქალაქეებზე, თავად იყო ჩართული ამ პროცესებში. თუ ვინმე რაიმეს აპროტესტებს, უნდა გესმოდეთ, რომ ასეთი პირები არიან ხოლმე სწორედ ამ ყველაფერში ჩართული,”- განაცხადა ღუდუშაურმა.