ომის შემსწავლელი ინსტიტუტის (ISW) შეფასებით, მიუხედავად იმისა, რომ ევგენი პრიგოჟინმა აჯანყება ბოლომდე არ მიიყვანა, კრემლი ახლა „ღრმად არასტაბილურ“ სიტუაციაშია.

ISW-ის ექსპერტები წერენ, რომ ბელარუსის პრეზიდენტის ალექსანდრ ლუკაშენკოს შუამავლობით მიღწეული შეთანხმება მოკლევადიანი გამოსავალია და პრიგოჟინის აჯანყებამ ნათლად აჩვენა სისუსტეები კრემლსა და რუსეთის თავდაცვის სამინისტროში.

ანალიტიკოსები ასევე აღნიშნავენ, რომ წარუმატებელი აჯანყება და მოკლევადიანი შეთანხმება სავარაუდოდ, არსებითად დააზარალებს რუსეთის ომის ძალისხმევას უკრაინაში.

„აჯანყებამ გამოავლინა რუსეთის უშიშროების ძალების სისუსტე, აჩვენა პუტინის უუნარობა გამოიყენოს თავისი ძალები დროულად შიდა საფრთხის მოსაგერიებლად და კიდევ უფრო გაანადგურა მისი მონოპოლია ძალაზე“, – ნათქვამია ISW-ის ყოველდღიურ ანგარიშში.

რუსული კერძო სამხედრო კომპანია „ვაგნერის“ დამფუძნებლის, ევგენი პრიგოჟინის წინააღმდეგ რუსეთში აღძრული სისხლის სამართლის საქმე შეწყდება.

ამის შესახებ კრემლის პრესმდივანმა, დიმიტრი პესკოვმა განაცხადა, რომელმაც ევგენი პრიგოჟინსა და ბელარუსის პრეზიდენტ ალექსანდრ ლუკაშენკოს შორის გამართული მოლაპარაკებების დეტალებზე რუსულ მედიასთან ისაუბრა.

პესკოვის თქმით, თავად პრიგოჟინი ბელარუსში გადავა.

ამასთან, კრემლის პრესმდივანმა აღნიშნა, რომ არ დაიწყება ამბოხში მონაწილე „ვაგნერის“ მებრძოლების სისხლის სამართლებრივი დევნა, „მათი საბრძოლო დამსახურებების გათვალისწინებით“.

მებრძოლების ნაწილი, რომლებიც არ მონაწილეობდნენ ამბოხში, თავდაცვის სამინისტროსთან კონტრაქტებს მოაწერენ ხელს.

პესკოვის თქმით, ლუკაშენკო თავად გამოვიდა შუამავლობის ინიციატივით, რადგან პრიგოჟნს 20 წელზე მეტია, იცნობს.

სამხედრო ამბოხებისკენ მოწოდების ბრალდებით, რუსეთის უსაფრთხოების სამსახურმა ევგენი პრიგოჟინის წინააღმდეგ სისხლის სამართლის საქმე გუშინ აღძრა.

ვტრიალდებით და საპირისპირო მიმართულებით საველე ბანაკებში ვბრუნდებით, ამის შესახებ “ვაგნერის” დაჯგუფების ლიდერმა ევგენი პრიგოჟინმა განაცხადა.

“ვაგნერის” კერძო სამხედრო კომპანიის დაშლა სურდათ. 23 ივნისს სამართლიანობის მარშზე გამოვედით. ერთი დღის განმავლობაში იმდენი გავიარეთ, რომ მოსკოვამდე 200 კილომეტრში ვართ. ამ დროის განმავლობაში ჩვენ ჩვენი მებრძოლების სისხლის ერთი წვეთის არ დავღვარეთ.ახლა ისეთი მომენტი დადგა, როდესაც სისხლი შესაძლოა დაიღვაროს. ამიტომ, ვინაიდან სრული პასუხისმგებლობა გვესმის იმისთვის, რომ რუსული სისხლი დაიღვრება ერთ-ერთი მხრიდან, ჩვენ ვტრიალდებით და საპირისპირო მიმართულებით საველე ბანაკებში ვბრუნდებით გეგმის შესაბამისად,” – განაცხადა პრიგოჟინმა.

სახელმწიფო საზღვარი ყველა ადგილას გადავკვეთეთ. მესაზღვრეები ჩაეხუტნენ ჩვენს მებრძოლებს. ახლა როსტოვში შევდივართ, – ამის შესახებ რუსული კერძო სამხედრო კომპანია „ვაგნერის“ ხელმძღვანელმა, ევგენი პრიგოჟინმა მორიგ აუდიომიმართვაში განაცხადა, რომელიც მისმა პრესსამსახურმა ტელეგრამარხში გაავრცელა.

„ჩვენს წინააღმდეგ წვევამდელები მოიყვანეს, რომლებიც განზე გადიან. მივდივართ წინ. ვინმე თუ შეგვიშლის ხელს, ყველას გავანადგურებთ. მივდივართ ბოლომდე“, – აცხადებს „ვაგნერის“ მეთაური.

ვრცელდება ინფორმაცია, რომ რუსმა სამხედროებმა როსტოვში ფედერალური ავტომაგისტრალი გადაკეტეს. რუსეთის გენერალურმა პროკურორმა, იგორ კრასნოვმა რუსეთის პრეზიდენტ ვლადიმერ პუტინს პირადად მოახსენა ევგენი პრიგოჟინის წინააღმდეგ აღძრული სისხლის სამართლის საქმის დეტალები.

სამხედრო ამბოხებისკენ მოწოდების ბრალდებით, სისხლის სამართლის საქმე ევგენი პრიგოჟინის წინააღმდეგ რუსეთის უსაფრთხოების სამსახურმა აღძრა.

მანამდე, „ვაგნერის“ ხელმძღვანელის, ევგენი პრიგოჟინის პრესსამსახურმა ტელეგრამარხში გაავრცელა აუდიოჩანაწერი, რომელშიც პრიგოჟინმა რუსეთის თავდაცვის სამინისტრო „ვაგნერის“ სამხედრო ბანაკებზე სარაკეტო თავდასხმაში დაადანაშაულა. როგორც მან აღნიშნა, ამას მათი მხრიდან საპასუხო მოქმედებები მოჰყვება. პრიგოჟინის ბრალდება უარყო რუსეთის თავდაცვის სამინისტრომ. უწყების მიერ გავრცელებულ განცხადებაში აღნიშნულია: „ინფორმაცია კერძო სამხედრო კომპანია „ვაგნერის“ ბანაკებზე რუსეთის თავდაცვის სამინისტროს მხრიდან „დარტყმის“ შესახებ სიმართლეს არ შეესაბამება. პრიგოჟინის სახელით გავრცელებული ინფორმაცია და აუდიომასალა კი, ინფორმაციული პროვოკაციაა“.

რუსეთის უსაფრთხოების სამსახურმა კი „ვაგნერის“ მებრძოლებს მოუწოდა, არ შეასრულონ ევგენი პრიგოჟინის დანაშაულებრივი და მოღალატეობრივი ბრძანებები.

გარდა ამისა, გავრცელა ინფორმაცია, რომ მოსკოვში სამხედრო ტექნიკა გამოჩნდა. როსტოვში სპეცდანიშნულების დანაყოფები რამდენიმე ათეული ბორტით გაუშვეს.

https://t.me/concordgroup_official/1291

ინფორმაცია კერძო სამხედრო კომპანია „ვაგნერის“ ბანაკებზე რუსეთის თავდაცვის სამინისტროს მხრიდან „დარტყმის“ შესახებ სიმართლეს არ შეესაბამება, – ამის შესახებ ნათქვამია რუსეთის თავდაცვის სამინისტროს განცხადებაში.

რუსეთის თავდაცვის უწყების ინფორმაციით, ევგენი პრიგოჟინის სახელით გავრცელებული ინფორმაცია და აუდიომასალა ინფორმაციული პროვოკაციაა.

„რუსეთის ფედერაციის შეიარაღებული ძალები აგრძელებენ საბრძოლო მისიების შესრულებას უკრაინის შეიარაღებულ ძალებთან შეხების ხაზზე, სპეცოპერაციის ზონაში“, – აღნიშნულია რუსეთის თავდაცვის სამინისტროს განცხადებაში.

მანამდე გავრცელდა აუდიოჩანაწერი, რომლის მიხედვითაც, „ვაგნერის“ ხელმძღვანელმა, ევგენი პრიგოჟინმა განაცხადა, რომ სამხედრო ჯგუფის ბანაკებზე რუსეთის თავდაცვის სამინისტრომ სარაკეტო თავდასხმა განახორციელა, რის შედეგადაც არიან დაღუპულები.

„ჩვენი მებრძოლების, ჩვენი თანამებრძოლების დიდი რაოდენობა დაიღუპა“, – აღნიშნა ევგენი პრიგოჟინმა და საპასუხო მოქმედების პირობა დადო.

პრიგოჟინმა განაცხადა, რომ აპირებს, შეაჩეროს „ბოროტება, რომელსაც ატარებს ქვეყნის სამხედრო ხელმძღვანელობა“. მისი თქმით, „გაანადგურებს ნებისმიერ თვითმფრინავს და ყველა ბლოკპოსტს, რომელიც გზაზე გადაეღობება“.

„ვაგნერის“ ხელმძღვანელი პირობას დებს, რომ „სამართლიანობის აღდგენის“ შემდეგ გასამხედროებულ ჯგუფს უკრაინის ფრონტზე დააბრუნებს. პრიგოჟინის განცხადებით, მის განკარგულებაში 25 000 მებრძოლი იმყოფება და მოუწოდებს ყველა რუსს, ვისაც მათთან შეერთება სურს, მათ შორის, რეგულარული არმიის სამხედრო მოსამსახურეებს.

ევგენი პრიგოჟინმა გამოცხადებული კამპანიის მიზნად თავდაცვის სამინისტროს ხელმძღვანელობის გასამართლება დაასახელა. ამასთან, „ვაგნერის“ ხელმძღვანელმა აღნიშნა, რომ „საპრეზიდენტო ხელისუფლება, მთავრობა, შინაგან საქმეთა სამინისტრო და სხვა სტრუქტურები ჩვეულ რეჟიმში გააგრძელებენ მუშაობას“.

„ეს არ არის სამხედრო გადატრიალება, ეს არის სამართლიანობის მარში“, – აღნიშნა ევგენი პრიგოჟინმა.