„ნაცმოძრაობა“ სრულიად ჩამოშლილია უკვე და პატრონი აღარ ჰყავს. ბევრი პატრონი გამოუჩნდათ და ამასობაში პატრონი აღარ დარჩათ, როგორც უნდათ ისე გაიგონ, რადგან მართლა ასეა, – ამის შესახებ ფრაქცია „ქართული ოცნების“ თავმჯდომარემ მამუკა მდინარაძემ განაცხადა.

მისივე თქმით, არანაირი ღირებული და ღირსეული „ნაციონალურ მოძრაობაში“ აღარ არსებობს.

ჟურნალისტის კითხვაზე, დაუჭერს თუ არა მმართველი გუნდი ვიცე-სპიკერად ლევან ბეჟაშვილის არჩევას მხარს, მამუკა მდინარაძემ აღნიშნა, რომ შეიძლება ლევან ბეჟაშვილი არჩეული არ იქნეს.

„რეალურად მათი ტელევიზიები, მათი მოპარული ფულით დაფინანსებული ტელევიზიები რომ არ არსებობდნენ „ნაცმოძრაობა“ ბუნებაში არ იარსებებს. ამას დაემატა ევროპელი პენსიონერების ძარცვით მიღებული შემოსავალი და მათი ტელევიზიები კვლავ არსებობენ და განაგრძობენ „ნაცმოძრაობის“ პროპაგანდირებას. არანაირი ღირებული და ღირსეული ამ პარტიაში აღარ არსებობს, არც ამ პარტიაში და არც მის კლასტერებში დანამატების სახით რომ ჰყავთ წარმოდგენილი. (ლევან ბეჟაშვილს) ავირჩევთ თუ არა ეს გარკვეულწილად ყოველთვის მიიჩნეოდა ფორმალურ საკითხად, მაგრამ უკვე ისე იქცევიან, ისე მტრულად არიან საკუთარი ქვეყნის წინაშე განწყობილები, რომ შეიძლება თავი შევიკავოთ, იმაზეც კი რაც აქამდე ფორმალურ საკითხად მოიაზრებოდა ხოლმე. ჩვენ წარსულში ყოველთვის ვცდილობდით, რომ ნაბიჯები გადაგვედგა, ფორმალიზმთან დაკავშირებით პრობლემები არ შეგვექმნა, მაგრამ ასე მარტივად აღარ არის. დღეს ისინი როგორც იქცევიან, უკვე მათი კლასტერის წარმომადგენლები როგორც იქცევიან, ჟურნალისტებიც კივილს და შეურაცხყოფის მიყენებას არ ერიდებიან საქართველოს პარლამენტში დეპუტატების მიმართ, ალბათ ფორმალიზმზეც უარი უნდა ითქვას და სავარაუდოდ, უფრო მეტად მე ვუშვებ, რომ შეიძლება არ იქნეს არჩეული“, – განაცხადა მდინარაძემ.

გუშინ, იუსტიციის უმაღლესი საბჭოს წევრობის კანდიდატებს, კენჭისყრის დროს, მხარი ხუთმა ოპოზიციონერმა დეპუტატმა – ნიკა მაჭუტაძემ, ბაჩუკი ქარდავამ, ნატო და როსტომ ჩხეიძეებმა და დილარ ხაბულიანმა დაუჭირა.

დეპუტატები, რომლებიც მმართველ პარტიას იუსტიციის უმაღლესი საბჭოს არამოსამართლე წევრების არჩევაში დაეხმარნენ, „ნაციონალურ მოძრაობის” მიერ შექმნილი ბლოკით მოხვდნენ პარლამენტში. სამი მათგანი ნატო და როსტომ ჩხეიძეები, ნიკა მაჭუტაძე არჩეული წევრებისთვის ხმის მიცემას ადასტურებს. ბაჩუკი ქარდავა ამბობს, რომ რამდენიმე კანდიდატს მისცა ხმა, თუმცა მათ ვინაობას არ აზუსტებს. ქარდავა ასევე, უარყოფს „ქართულ ოცნებასთან” გარიგებას და აღნიშნავს, რომ შეგნებული პოლიტიკური საქმიანობა მიუძღვნა ბრძოლას იმასთან, ვინც საქართველოში რუსულ საქმეს აკეთებს. ამავე ბლოკით არჩეული დეპუტატი დილარ ხაბულიანი, რომელმაც მედიაში გავრცელებული ცნობით, მხარი დაუჭირა იუსტიციის საბჭოს არჩეულ არამოსამართლე წევრებს, ჯერჯერობით მედიასთან არ გამოჩენილა.

ამასთან, გუშინვე ფრაქცია „ნაციონალური მოძრაობა“ დატოვეს ბაჩუკი ქარდავამ, ნიკა მაჭუტაძემ, ნატო და როსტომ ჩხეიძეებმა.

აღნიშნულ ფაქტს „ჯორჯიან თაიმსთან“ საუბარში პოლიტოლოგი ვახტანგ ძაბირაძე გამოეხმაურა. მისი თქმით, ეს პირველი შემთხვევა არაა, მანამდე ფრაქცია და პარტია რომან გოცირიძემ და ხატია დეკანოიძემ დატოვა.

„დუღილის პროცესი მიდის, ნიკა მელიას განცხადებები ვნახეთ, საპირისპირო განცხადებებიც მოვისმინეთ, მაგრამ ეს თანაფარდი ნამდვილად არ არის. ამიტომ, შეიძლება ითქვას, რომ ეს პროცესი რაც დაიწყო, ჯერჯერობით გრძელდება. სადამდე მივა საქმე რთული სათქმელია, მაგრამ პროცესი რომ ჯერ არ დასრულებულა, ეს ნამდვილად ჩანს. მაჭუტაძე, ქარდავა და ჩხეიძეები პარტიის წევრები არ ყოფილან, ისინი ფრაქციის წევრები იყვნენ. ფრაქცია კი ისე არ დაიშლება, რომ “ნაციონალური მოძრაობის” ჯგუფი არ დარჩეს. როგორც ჩანს გადინება კიდევ იქნება ფრაქციიდანაც და ალბათ პარტიიდანაც,“– განაცხადა ჩვენთან საუბარში პოლიტოლოგმა.

როგორც ვახტანგ ძაბირაძე ჩვენთან საუბარში განმარტავს, „ნაციონალური მოძრაობის“ მხარდამჭერების დაკარგვა ან შენარჩუნება დამოკიდებული იქნება იმაზე, თუ რამდენად მასშტაბური იქნება ეს პროცესი და შეიქმნება თუ არა ცალკე პოლიტიკური ძალა.

„ამ ოთხ ადამიანს დიდი მხარდაჭერა არ ჰქონდა. ისინი ხომ „ნაციონალური მოძრაობის“ წევრები არ ყოფილან, მაგრამ პარლამენტში მათი ელექტორატის ხარჯზე შევიდნენ. დამოუკიდებლად რომ ეყარათ კენჭი, პარლამენტში ვერცერთი ვერ მოხვდებოდა. ამიტომაც ვამბობ, რომ ამ დეპუტატების გასვლა ფრაქციიდან ელექტორატზე ნაკლებად იმოქმედებს. მაგრამ, თუ პროცესი გაგრძელდა და პარტიის გახლეჩამდე მივიდა საქმე, ეს, რა თქმა უნდა, იმოქმედებს ელექტორატზე,” – აღნიშნა ვახტანგ ძაბირაძემ.

შეგახსენებთ, რომ პარლამენტმა იუსტიციის უმაღლესი საბჭოს სამი არამოსამართლე წევრი აირჩია. გუშინ კენჭისყრის შედეგად, ხმების საჭირო რაოდენობა მოაგროვეს ტრისტან ბენაშვილმა (93 მომხრე – ნული წინააღმდეგი), გიორგი გზობავამ (91 მომხრე, ნული წინააღმდეგი) და ზურაბ გურასპაშვილმა (93 მომხრე, ნული წინააღმდეგი).

პარლამენტის დღევანდელ პლენარულ სხდომაზე კი იუსტიციის უმაღლესი საბჭოს არამოსამართლე წევრის ორ ვაკანტურ თანამდებობაზე ასარჩევად ოთხ კანდიდატს ხელახლა ეყარა კენჭი.

კერძოდ, მეორე ტურში კენჭი უყარეს რუსუდან კვინიკაძის, გოგა კიკალაშვილის, ლევან ნემსაძისა და ნინო ნიშნიანიძის კანდიდატურებს, რომლებმაც გუშინდელი კენჭისყრის დროს სხვებთან შედარებით მეტი ხმა მიიღეს.

ვერცერთმა კანდიდატმა ასარჩევად საჭირო 90 ხმა ვერ მიიღო, რის გამოც მესამე ტური გაიმართება.

საქართველოს ხელისუფლება არ უერთდება სანქციებს, არაერთხელ გაგვიკეთებია განცხადება, არ მივიღებთ გადაწყვეტილებას, რომელიც დამაზიანებელი იქნება ჩვენი ქვეყნისთვის და დამაზიანებელი იქნება ამ ქვეყანაში მცხოვრები ადამიანებისთვის, – ამის შესახებ დედაქალაქის მერმა, კახა კალაძემ ჟურნალისტებთან საუბრისას განაცხადა.

მისი თქმით, რუსეთის მხრიდან შეზღუდვები დაწესებული იყო ცალმხრივად.

„თქვენ იცით, რომ ეს შეზღუდვა ცალმხრივად იყო დაწესებული. მივესალმები აღნიშნულ გადაწყვეტილებას. ის, რომ უვიზოდ მიმოსვლა და ფრენებიც შესაძლებელია, ცუდი ამაში არაფერია. თქვენ იცით, რომ საქართველოს ხელისუფლება არ უერთდება სანქციებს, აღნიშნულზე არაერთხელ გავაკეთეთ განცხადება. ჩვენ არ გავაკეთებთ ისეთ გადაწყვეტილებას, რომელიც ჩვენი ქვეყნისთვის დამაზიანებელი იქნება. სანქციებს არ ვუერთდებით”.

პირდაპირი ფრენები მარტო საქართველოშია? არ გაქვთ ინფორმაცია, რომელ ქვეყნებში დაფრინავს რუსეთიდან თვითმფრინავები? მარტო საქართველოშია ანალოგიური ფრენები?!” – აღნიშნა კალაძემ.

ჟურნალისტების კითხვაზე, კეთდება  განცხადებები, რომ სარკინიგზო მიმოსვლა შეიძლება აღდგეს, წავა თუ არა ხელისუფლება ამ დათმობაზე?  – „პირველად მესმის ამის შესახებ. რა დათმობაზე და საქართველოს ნაბიჯებზეა ზოგადად საუბარი, ეს იყო ცალმხრივი სანქცია, რომელიც იყო რუსეთის მხრიდან დაწესებული, მათ მიიღეს გადაწყვეტილება ამ სანქციის გაუქმებაზე. საქართველოს ხელისუფლება არ უერთდება სანქციებს. ამასთან დაკავშირებით არაერთხელ გაგვიკეთებია განცხადება, ჩვენ არ მივიღებთ გადაწყვეტილებას, რომელიც დამაზიანებელი იქნება ჩვენი ქვეყნისთვის და დამაზიანებელი იქნება ამ ქვეყანაში მცხოვრები ადამიანებისთვის“, – განაცხადა კახა კალაძემ.

გვეშინია, რომ პრეზიდენტის ვიზიტი და მისი განცხადებები დააზიანებს ჩვენს სწრაფვას კანდიდატის სტატუსის მიღებისკენ – უმჯობესია, პრეზიდენტს არ ჰქონდეს ფართო ასპარეზი ასეთი დამაზიანებელი განცხადებების გაკეთების დროს, – ამის შესახებ „ქართული ოცნების“ თავმჯდომარე ირაკლი კობახიძემ ჟურნალისტებს განუცხადა, რითაც გამოეხმაურა პრეზიდენტის ადმინისტრაციის განცხადებას, რომ „15 მაისს ძალში შევიდა პუტინის განკარგულება ფრენების აღდგენაზე და 15 მაისსვე საქართველოს მთავრობამ გასცა თანხმობა, პრეზიდენტის ბრიუსელში ვიზიტზე თანხმობა კი ამ დრომდე არ გაუცია“.

კობახიძე აღნიშნულ განცხადებას სპეკულაციას უწოდებს და ამბობს, რომ თუ მთავრობას მიაჩნია, რომ პრეზიდენტის ვიზიტი არ წაადგება საქართველოს მიერ კანდიდატის სტატუსის მიღებას, კონსტიტუციით მინიჭებული სრული უფლება აქვს, ვიზიტზე თანხმობა არ გასცეს.

„პრეზიდენტი არ უნდა სპეკულირებდეს. რა შუაშია რუსეთის მიერ ფრენების ცალმხრივად აღდგენა და რა შუაშია პრეზიდენტის ვიზიტი უცხო ქვეყანაში? ეს აბსოლუტურად გაუგებარი შედარებაა. ეს ჩვეულებრივი სპეკულაციაა. სამწუხაროა, რომ პრეზიდენტის თანამდებობაზე მყოფი პირი სპეკულირებს. ეს ყველაფერი დასანანია. რაც შეეხება ვიზიტზე თანხმობის გაცემას, ეს საქართველოს მთავრობის ექსკლუზიური უფლებაა. თუ მთავრობას მიაჩნია, რომ პრეზიდენტის ვიზიტი არ წაადგება საქართველოს მიერ კანდიდატის სტატუსის მიღებას, მთავრობას კონსტიტუციით მინიჭებული სრული უფლება აქვს, პრეზიდენტს არ მისცეს ვიზიტზე თანხმობა. ჩვენ გვეშინია, რომ პრეზიდენტის ვიზიტი და მისი განცხადებები დააზიანებს ჩვენს სწრაფვას კანდიდატის სტატუსის მიღებისკენ. მოისმინეთ პრეზიდენტის განცხადებები საქართველოს პარლამენტის შენობაში, როდესაც მოხსენება ჰქონდა და დამეთანხმებით, ეს განცხადებები პირდაპირ ეწინააღმდეგება საქართველოს სურვილს, მიიღოს კანდიდატის სტატუსი დეკემბერში. მთავრობას დღემდე შეიძლება არ გაუცია ნებართვა, შეიძლება მოგვიანებით გასცეს – ეს მთავრობის პრეროგატივაა, მაგრამ ჩემთვის ლოგიკური იქნება, თუ მთავრობას ეშინია (ეშინია პირობითი სიტყვაა) პრეზიდენტის არასწორი განცხადებების. ჩვენ მოვისმინეთ პრეზიდენტის განცხადებები, რომელიც დამაზიანებელია კანდიდატის სტატუსის მიღებისთვის. როდესაც პრეზიდენტი აცხადებს, რომ პარლამენტი მხოლოდ ფორმალურად ასრულებს რეკომენდაციებს და სინამდვილეში ნაბიჯები არ იდგმება, ეს დამაზიანებელია. უმჯობესია, პრეზიდენტს არ ჰქონდეს ფართო ასპარეზი ასეთი დამაზიანებელი განცხადებების გაკეთების დროს იმისთვის, რომ არ დაზიანდეს კანდიდატის მიღების პროცესი“, – განაცხადა ირაკლი კობახიძემ.

ცნობისთვის, პრეზიდენტი ბრიუსელში ვიზიტს გეგმავს, რასთან დაკავშირებითაც საქართველოს მთავრობისგან თანხმობას ელოდება.

„15 მაისს ძალში შევიდა პუტინის განკარგულება პირდაპირი ფრენების აღდგენის შესახებ. 15 მაისსვე საქართველოს მთავრობამ დაუყოვნებლივ გასცა თანხმობა.

27 აპრილს მთავრობამ მიიღო მიმართვა 31 მაისს პრეზიდენტის ბრიუსელში ვიზიტთან დაკავშირებით. საქართველოს მთავრობას ამ დრომდე თანხმობა არ გაუცია“, – აცხადებენ პრეზიდენტის ადმინისტრაციაში.

კეზერაშვილი არის ცნობილი ოლიგარქი, ცნობილი ყაჩაღი, შარაგზის ყაჩაღი, რომელიც ძარცვავდა ჯერ ბიზნესმენებს, შემდეგ ჯარს და შემდეგ ევროპელ პენსიონერებს. ახლა გაკადნიერდა და „ბიბისის“ უჩივლა, როცა ის ამხილეს, – ამის შესახებ „ქართული ოცნების“ თავმჯდომარემ, ირაკლი კობახიძემ განაცხადა.

მისი თქმით, კეზერაშვილს იმედი აქვს, რომ ფულით იყიდის იმ სასამართლოს, რომელიც „ბიბისის“ საქმეს განიხილავს.

„კეზერაშვილი თავს დაესხა თავისუფალ მედიას. ადრესატი მისი კუთვნილი ტელევიზია რომ ყოფილიყო, აუცილებლად ასეთ სიტყვებს გამოიყენებდა, რამდენჯერაც სარჩელი შევიტანეთ კონკრეტული მედიასაშუალების მიმართ, როცა საქმე ეხებოდა სიცრუის გავრცელებას და ა.შ., იმდენჯერ კეზერაშვილის ტელევიზიამ ამას უწოდა თავისუფალ მედიაზე თავდასხმა. ამ შემთხვევაში გამოდის, რომ კეზერაშვილი თავს ესხმის თავისუფალ მედიას და ეს არის „ბიბისი“.

კეზერაშვილი არის ცნობილი ოლიგარქი, ცნობილი ყაჩაღი, შარაგზის ყაჩაღი, რომელიც ძარცვავდა ჯერ ბიზნესმენებს, შემდეგ ჯარს და შემდეგ ევროპელ პენსიონერებს. ახლა გაკადნიერდა და „ბიბისის“ უჩივლა, როცა ის ამხილეს. მას იმედი აქვს, რომ ფულით იყიდის იმ სასამართლოს, რომელიც „ბიბისის“ საქმეს განიხილავს. ფული საკმაოდ ბევრი აქვს, მას შეიძლება ჰქონდეს საკუთარი პატრონების იმედი, რომლებიც მას ეხმარებიან თავისუფალ მიმოსვლაში ევროპაში. თუ პატრონებიც დაეხმარებიან და დიდი ფულიც იმოქმედებს, შეიძლება, კეზერაშვილმა „ბიბისიც“ დაამარცხოს, როგორც თავის დროზე ამარცხებდა ბიზნესმენებს, ჯარს ძარცვავდა და ამარცხებდა ევროპელ პენსიონერებს. ვნახოთ, დაამარცხებს თუ არა „ბიბისის“, თავისუფალ მედიას“, – განაცხადა კობახიძემ.