ევროკავშირის ელჩმა საქართველოში პაველ ჰერჩინსკმა რუსეთთან პირდაპირი ფრენების აღდგენის გამო დემარშის მიზნით, საქართველოს ვიცე-პრემიერ ლევან დავითაშვილთან შეხვედრის შემდეგ მედიასთან კომენტარი გააკეთა.

ჰერჩინსკმა აღნიშნა, რომ ევროკავშირის 27-ვე ქვეყანა რუსეთ-საქართველოს პირდაპირი ფრენების აღდგენის გამო შეშფოთებას გამოთქვამს.

„ჩვენ გვქონდა ძალიან ღია და გულახდილი საუბარი ვიცე-პრემიერ ლევან დავითაშვილთან რუსეთ-საქართველოს შორის პირდაპირ ფრენებზე. მე დავალებული მქონდა, საქართველოს ხელისუფლებისთვის გადამეცა ევროკავშირის პოზიცია, რომელიც შეთანხმებული იყო ევროკავშირის 27 დედაქალაქის მიერ. თან მახლდა თბილისში მყოფი ევროკავშირის ყველა ქვეყნის ელჩი. ჩვენ განვაცხადეთ, რომ ვწუხვართ საქართველოს მთავრობის გადაწყვეტილებაზე რუსეთთან პირდაპირი ფრენების მიღების შესახებ.

ჩვენ განვაცხადეთ, რომ ეს გადაწყვეტილება ეწინააღმდეგება ევროკავშირის წევრი 27-ვე ქვეყნის ერთსულოვან გადაწყვეტილებას, არ ჰქონდეს პირდაპირი ფრენები რუსეთში და რუსეთიდან და არ დაუშვას რუსული თვითმფრინავის ფრენა ევროკავშირის წევრი ქვეყნების ტერიტორიაზე. ჩვენ ასევე გამოვთქვით ჩვენი შეშფოთება, რომ ფრენების აღდგენა ეწინააღმდეგება ჩვენს გადაწყვეტილებას, მოვახდინოთ რუსეთის იზოლაცია და ზეწოლა მათზე, რათა შეცვალოს რუსეთის ქცევა, როდესაც საქმე ეხება სასტიკ, აგრესიულ ომს, რომელსაც რუსეთი უკრაინაში ჯერ კიდევ აგრძელებს. მართალია, საქართველოსთან ფრენების აღდგენა რუსეთის გადაწყვეტილება იყო, მაგრამ ეს მოითხოვდა საქართველოს მთავრობასთან შეთანხმებას“, – განაცხადა ელჩმა.

ჩვენ ისედაც ვიცოდით ევროკავშირის ამ პოზიციის შესახებ, რაც შეეხება დღევანდელ დემარშს, ეს იქნება ძალიან კარგი შესაძლებლობა ჩვენი მთავრობის წარმომადგენლებისთვის, კერძოდ ვიცე-პრემიერისთვის, რომ აუხსნას დაწვრილებით ევროკავშირის ელჩებს იმ პოლიტიკის შესახებ, რომელსაც საქართველო ატარებს და რომელსაც აქამდე ატარებდა, – ამის შესახებ „ქართული ოცნების“ წევრმა, ნიკოლოზ სამხარაძემ განაცხადა.

სამხარაძის თქმით, საქართველო არ ვუწესებს ორმხრივ სანქციებს რუსეთის ფედერაციას და ეს ყველამ იცის.

„ცოტა უცნაურად შეიძლება, ჟღერდეს, მაგრამ რუსეთის ხელისუფლების გადაწყვეტილებასთან დაკავშირებით საქართველოს ხელისუფლებისგან პასუხების მოთხოვნა შეიძლება, რაღაც ლოგიკაში ჯდებოდეს, თუმცა ამ შემთხვევაში, მგონი, პასუხს ასევე რუსეთის ხელისუფლებისგან უნდა ითხოვდეს ევროკავშირი, თუ რატომ მიიღო მან ვიზების გაუქმების გადაწყვეტილება ახლა და რატომ მიიღო ასევე ფრენებზე გადაწყვეტილება ახლა. კიდევ ერთი საკითხი, რომელიც მე პირადად მაინტერესებს, როგორც ამ ქვეყნის მოქალაქეს და კანონმდებელს, არის ის, თუ რატომ არ არის ევროკავშირის მიერ ყველა რუსული ავიაკომპანია დასანქცირებული და ალბათ ამ კითხვასაც დასვამს ჩვენი მთავრობის წარმომადგენელი და საინტერესო იქნება პასუხი. ჩვენ ვაწარმოებთ ძალიან გაცხადებულ პოლიტიკას, რომლის შესახებაც ძალიან დიდი ხანია, ჩვენმა პარტნიორებმა იციან. ჩვენ არ ვუწესებთ ორმხრივ სანქციებს რუსეთის ფედერაციას, ორმხრივ ეკონომიკურ სანქციებს, თუმცა ამავდროულად, ვაკეთებთ ყველაფერს, რათა სანქციების გვერდის ავლა რუსეთის მხრიდან არ მოხდეს საქართველოს ტერიტორიის გავლით. ეს არის უპირველესად ჩვენი ეკონომიკური ინტერესების გატარების პოლიტიკა და ჩვენი უსაფრთხოების გატარების პოლიტიკა“, – განაცხადა სამხარაძემ.

ევროკავშირის ქვეყნების ელჩები ეკონომიკისა და მდგრადი განვითარების მინისტრს, ლევან დავითაშვილს ხვდებიან. საქართველოში ევროკავშირის წარმომადგენლობის ინფორმაციით, ელჩები მინისტრს რუსეთთან ფრენების აღდგენასთან დაკავშირებით დემარშს გადასცემენ.

რეალურად, პრეზიდენტზე ორკესტრირებულ ზეწოლას და შეტევას ახორციელებს რადიკალური ოპოზიცია. ვინც შეუძლიათ, ამ პროცესში ყველა ჩართული ჰყავთ, – ამის შესახებ პარლამენტის ვიცე-სპიკერმა, არჩილ თალაკვაძემ განაცხადა.

მისივე თქმით, რადიკალური ოპოზიცია პრეზიდენტის პოლიტიკური ფონის დაძაბვისთვის გამოყენებას ცდილობს.

„ეს ის ოპოზიციაა, რომელიც სალომე ზურაბიშვილს არალეგიტიმურ, გაყალბებული არჩევნების შედეგად არჩეულ პრეზიდენტად მოიხსენიებდა და მას პიროვნულ შეურაცხყოფას აყენებდა. პოლიტიკური უსინდისობაა, როცა ეს ოპოზიცია საუბრობს, თითქოს პრეზიდენტზე გავლენის მოხდენა გვინდა. ცალსახად ვთქვით, რომ ჩვენთვის ამოსავალი წერტილია ქვეყნის ინტერესები – სახელმწიფო შტოებს შორის ბალანსი არ იყოს დარღვეული. თანმიმდევრული ვართ, რადგან პრეზიდენტის არჩევისას ვთქვით, რომ ზეპარტიული პრეზიდენტი სჭირდებოდა ქვეყანას. რადიკალური ოპოზიცია ფარისევლურად ცდილობს, პრეზიდენტი პოლიტიკური ფონის დაძაბვისთვის და საქართველოს წინააღმდეგ გამოიყენოს“, – განაცხადა არჩილ თალაკვაძემ.