ბელგიის საგარეო უწყების ძალიან ღია რეკომენდაცია და პოზიცია არის დადებითი, რომ საქართველო უნდა იყოს უსაფრთხო ქვეყნების სიაში, შესაბამისად ჩვენ გავაგრძელებთ კონსულტაციებს და დავაზუსტებთ თუ რა კონკრეტული მიზეზი შეიძლება ყოფილიყო, – ამის შესახებ ევროკავშირთან საქართველოს წარმომადგენლობის ხელმძღვანელმა, ბელგიის სამეფოსა და ლუქსემბურგის დიდ საჰერცოგოში საქართველოს ელჩმა ვახტანგ მახარობლიშვილმა განაცხადა.

„ეს არის ძალიან ცვალებადი, ნებისმიერი სახელმწიფო, ნებისმიერ წელს შეიძლება იყოს სხვადასხვა მიზეზით უსაფრთხო ქვეყნების სიიდან ამოღებული, ან დამატებული და მიზეზი შეიძლება იყოს ძალიან მრავალფეროვანი. მინდა ხაზგასმით აღვნიშნო, რომ ჩვენი კონსულტაციები, რაც გავმართეთ ბელგიის საგარეო საქმეთა სამინისტროსთან, მათი ძალიან ღია რეკომენდაცია და პოზიცია არის დადებითი, რომ საქართველო უნდა იყოს უსაფრთხო ქვეყნების სიაში, შესაბამისად, ჩვენ გავაგრძელებთ კონსულტაციებს და დავაზუსტებთ თუ რა კონკრეტული მიზეზი შეიძლება ყოფილიყო. ის, რომ ეს იმოქმედებს ევროკავშირის გადაწყვეტილებაზე უვიზო რეჟიმთან დაკავშირებით, ამაზე ფიქრის საფუძველი არ გვაქვს. მსგავსი მინიშნება ევროკავშირის მხრიდან არ განხორციელებულა“, – აღნიშნა მახარობლიშვილმა.

ბელგიამ საქართველო უსაფრთხო ქვეყნების სიიდან ამოიღო. ბელგიის მოქალაქეობის არმქონე პირთა გენერალური კომისრის ვებგვერდზე განახლებულ სიაში საქართველო აღარ არის და განმარტებულია, რომ გადაწყვეტილება კომისრის მოსაზრებას ეფუძნება.

საქართველოს პრემიერ-მინისტრმა ირაკლი ღარიბაშვილმა უზბეკეთის რესპუბლიკის პრემიერ-მინისტრს აბდულა არიპოვს აჭარაში უმასპინძლა. უზბეკეთის რესპუბლიკის პრემიერ-მინისტრის პატივსაცემად სამუშაო სადილი გაიმართა, სადაც საქართველოს და უზბეკეთის რესპუბლიკის პრემიერ-მინისტრებმა ორ ქვეყანას შორის არსებული ურთიერთობები განიხილეს და თანამშრომლობის სამომავლო პერსპექტივებზე იმსჯელეს.

დღესვე, აბდულა არიპოვს და საქართველოში ვიზიტად მყოფ უზბეკეთის რესპუბლიკის დელეგაციას ეკონომიკისა და მდგრადი განვითარების მინისტრმა ლევან დავითაშვილმა საქართველოს პორტები, საზღვაო ინფრასტრუქტურა და ამ სექტორში მიმდინარე და დაგეგმილი პროექტები გააცნო.
დელეგაციას ბათუმსა და ფოთში ლევან დავითაშვილთან ერთად აჭარის მთავრობის ხელმძღვანელმა თორნიკე რიჟვაძემ, ეკონომიკისა და მდგრადი განვითარების მინისტრის მოადგილემ გურამ გურამიშვილმა და სსიპ საზღვაო ტრანსპორტის სააგენტოს დირექტორმა ალექსი ახვლედიანმა უმასპინძლეს. მათ უზბეკ სტუმრებთან ერთად დაათვალიერეს ფოთის საზღვაო პორტი და აკვატორია სანაპირო დაცვის გემით, ასევე გაეცნენ ბათუმის პორტის ინფრასტრუქტურას და მუშაობას და ანაკლიის ღრმაწყლოვანი პორტის პროექტი.

უზბეკეთის რესპუბლიკის პრემიერ-მინისტრის საქართველოში ვიზიტი დღეს დასრულდა. აბდულა არიპოვი ბათუმის საერთაშორისო აეროპორტიდან საქართველოს პრემიერ-მინისტრმა ირაკლი ღარიბაშვილმა გააცილა.

უზბეკეთის რესპუბლიკის პრემიერ-მინისტრი სამთავრობო დელეგაციასთან ერთად, საქართველოს 17 ივლისს ეწვია. ვიზიტის ფარგლებში, გაიმართა საქართველოსა და უზბეკეთის რესპუბლიკის პრემიერ-მინისტრების პირისპირ და გაფართოებულ ფორმატში შეხვედრები, რის შემდეგაც
საქართველოსა და უზბეკეთის რესპუბლიკის პრემიერ-მინისტრებმა ხელი მოაწერეს საქართველოსა და უზბეკეთის რესპუბლიკას შორის ორმხრივი თანამშრომლობის განვითარების ერთობლივი პრაქტიკული ღონისძიებების 2023-2024 წლების სამოქმედო გეგმას.

„ერთიანი ნაციონალური მოძრაობის“ ერთ-ერთი ლიდერის, პარლამენტის დეპუტატ დავით კირკიტაძის განცხადებით, უნდა შეიქმნას „საქართველოს გამარჯვების პლატფორმა“, სადაც ყველა თაობის ადამიანისთვის კარი ღია იქნება.

მისივე თქმით, აღნიშნულ პლატფორმაში უნდა გაერთიანდნენ ადამიანები, ვისთვისაც ქვეყნის ევროპული პერსპექტივა მნიშვნელოვანია.

„ნაციონალური მოძრაობის“ პოზიციაა, რომ შეიქმნას „საქართველოს გამარჯვების პლატფორმა“, სადაც არა მხოლოდ პოლიტიკურ პარტიებს და სამოქალაქო ორგანიზაციის წარმომადგენლებისთვის, არამედ ყველა თაობის ადამიანისთვის კარი ღია იქნება. ადამიანებისთვის, რომელთათვისაც მნიშვნელოვანია ჩვენი ქვეყნის ევროპული პერსპექტივა და მნიშვნელოვანია ქვეყნის იმ ვითარებიდან გამოყვანა, სადაც „ქართულმა ოცნებამ“ შეიყვანა ქვეყანა“,- განაცხადა კირკიტაძემ.

ნებისმიერ მართლა ოპოზიციურ პოლიტიკურ ორგანიზაციას ან ინდივიდუალურ სახეს განვიხილავთ პოტენციურ პარტნიორად – ბევრ პარტიასთანაა კონსულტაცია, ასევე არიან ინდივიდუალური პოლიტიკოსებიც, ვისაც ვესაუბრებით,-განუცხადა პოლიტსაბჭოს სხდომის დასრულების შემდეგ „ნაციონალური მოძრაობის“ გენერალურმა მდივანმა პეტრე ცისკარიშვილმა ჟურნალისტებს.

მისი თქმით, პოლიტსაბჭოს სხდომაზე იმსჯელეს ყველაფერზე, “მათ შორის იმაზე, რომ ნებისმიერ ოპოზიციურ პარტიასთან სათანამშრომლოდ მზად არიან”.

“ჩვენ ნებისმიერ მართლა ოპოზიციურ, ბიძინა ივანიშვილთნ დაპირისპირებულ პოლიტიკურ ორგანიზაციას ან ინდივიდუალურ პოლიტიკურ სახეებს განვიხილავთ პოტენციურ პარტნიორად. ასევე ბუნებრივი მოცემულობაა, რომ თუ ივანიშვილთან მართლა დაპირისპირებული ხარ, ნიშნავს იმას, რომ შენი საგარეო ვექტორი ევროინტეგრაციაა. შესაბამისად, ამ ორ მოცემულობას ვინც აკმაყოფილებს, თუ მათი მხრიდანაც იქნება სურვილი და შედგება ორმხრივი მოძრაობა, საერთო ენის გამონახვა და თანამშრომლობა არ გაგვიჭირდება”,- განაცხადა ცისკარიშვილმა.

რაც შეეხება იმას, რომ ზოგიერთი ოპოზიციური პარტია „ნაციონალურ მოძრაობასთან“ თანამშრომლობას არ აპირებს, ცისკარიშვილი ამბობს, რომ თუ აღნიშნული პარტიები ნამდვილად ოპოზიციურად განწყობილები არიან, მხოლოდ წარმატებას და გაძლიერებას უსურვებს.

„თანამშრომლობა და კოორდინაცია რიგ საკითხებთან დაკავშირებით, ორმხრივი მოძრაობაა. თუ მათი მხრიდან შემხვედრი ნაბიჯები არ გადმოიდგმება, მაგრამ ისინი რადიკალური, მართლა ოპოზიციური პროდასავლური პარტიები არიან, მხოლოდ წარმატება შეგვიძლია ვუსურვოთ. ღმერთმა ხელი მოუმართოთ, გაძლიერდნენ. ბარიერის გადალახვის პრობლემა რომ არ ჰქონდეთ, სწორედ ეს გვინდა ჩვენ, რადგან ასეთ პოლიტიკურ პარტიებში ვხედავთ მოკავშირეებს შემდგომ ეტაპზე, როდესაც აუცილებელი იქნება კოალიციური ხელისუფლების ფორმირება და საპარლამენტო უმრავლესობის შექმნა“, – განაცხადა ცისკარიშვილმა.

ყველანაირი სპეკულაციების აგორება ოპოზიციური პარტიების გაერთიანებაზე და მერე იმედგაცრუება, რომ არ შედგა ესა თუ ის გაერთიანება, ივანიშვილის რეჟიმის პროპაგანდას ეხმარება, – ამის შესახებ „ევროპული საქართველოს“ თავმჯდომარემ, გიგა ბოკერიამ წინასაარჩევნოდ ოპოზიციური პარტიების გაერთიანებასთან დაკავშირებით საუბრისას აღნიშნა.

მისივე თქმით, მსგავსი სპეკულაციების ნაცვლად, პოლიტიკურმა პარტიებმა მათ გარშემო რწმენის მქონე ადამიანებისა და მხარდამჭერების რაოდენობა უნდა გაზარდონ.

“მხოლოდ შინაარსზე ბევრი საუბრის შემდეგ, ადამიანთა დარწმუნების შემდეგ, უნდა ვიფიქროთ, თუ რომელ პოლიტიკურ ძალასთან გვაქვს შინაარსობრივი სიახლოვე და ვისთან ღირს პრაგმატულად არჩევნების წინ გაერთიანება, რათა ამომრჩეველთა რაოდენობა გამსხვილდეს ბარიერის გადასალახად. ეს არის სწორი და არა ის მუდმივი სპეკულაციები, რომელიც მიმდინარეობს სხვადასხვა პოლიტიკური ძალების შიგნით”,- განაცხადა ბოკერიამ.