რა უცნაურია, ეს ჩვენი ოპოზიცია! მათი მოსაწონი ჩვენ და ქართველმა ხალხმა ვერაფერი გავაკეთეთ – ჩვენ ვმუშაობთ, ევროპელ პარტნიორებთან სამუშაო გეგმას ვათანხმებთ, ხოლო ეს ხელმოცარულები მხოლოდ იმით არიან დაკავებული, როგორმე ნეგატივი შემოიტანონ და საზოგადოება შეცდომაში შეიყვანონ, – ამის შესახებ უმრავლესობის დეპუტატმა ირაკლი ზარქუამ განაცხადა.

ზარქუას თქმით, “ხელმოცარულ ოპოზიციას” სტატუსის მიღებამდე სიცრუეზე აგებული კამპანია ჰქონდა და ახლაც იგივეს აგრძელებენ.

“მათი შეგონებები გახსოვთ, რომ კანდიდატის სტატუსის მიღება გამორიცხული იყო, ფსევდო რეფორმები ტარდებოდა. მაშინ, პრეზიდენტთან შეხმატკბილებული იყვნენ და ასეთ განცხადებებს აკეთებდნენ. ქართველი ხალხის ნდობით და ერთობლივი ძალისხმევით შედეგი დავდეთ – საქართველო, როგორც არასდროს ახლოსაა ევროკავშირში გაწევრიანებასთან.

ეს დალოცვილები, ყვავებივით რომ დაგვჩხავიან, არ სჯობს, რომ სამუშაო ჯგუფებს შემოუერთდნენ, თუ შნო და ერთი ადგილი აქვთ? – იქ შემოვიდნენ და სამუშაო ჯგუფებში ჩაერთონ. იქ გვაჩვენონ და აზრი წარმოადგინონ. თუ რევოლუციის იქით მიდიან, სამუშაო პროცესში ჩაერთონ. როგორც მაშინ, ახლაც ვეპატიჟებით”, – განაცხადა ირაკლი ზარქუამ.

ოპოზიციონერი დეპუტატი თეონა აქუბარდია აცხადებს, რომ ევრკავშირის რეკომენდაციების შესრულების პროცესში მმართველ გუნდთან ერთად მუშაობას აპირებს.

„გეგმა არ არის იმედის მომცემი. გეგმიდან მცირედი ჩამონათვალი სამუშაო ჯგუფების შექმნასთან დაკავშირებით, რომელიც შეიქმნება პარლამენტში, ჩემი მიმართულებით, ვაპირებ მუშაობას “ქართულ ოცნებასთან”, არა იმიტომ, რომ “ქართული ოცნების” მჯერა, არამედ იმიტომ, რომ ეს არის ჩვენი ვალდებულება. ამ პროცესში უნდა ვაჩვენოთ განსხვავება და შედეგის კუთხით ალტერნატივა, რომელიც აუცილებელია ამ ცხრა რეკომენდაციის შესასრულებლად“, – განაცხადა თეონა აქუბარდიამ.

შარშან საქართველოს პრეზიდენტი იყო მოწვეული ელჩების კონფერენციაზე, მაგრამ მონაწილეობა არ მიიღო, წლევანდელი ფორმატი კი აეწყო იმ ლოგიკით, რომ შედეგისთვის აღმასრულებელი და საპარლამენტო ხელისუფლება მუშაობდა, – ამის შესახებ საქართველოს საგარეო საქმეთა მინისტრმა, ილია დარჩიაშვილმა განაცხადა.

მისივე თქმით, კონფერენცია მიძღვნილია კონკრეტულ ქმედებებზე, რომლებიც საქართველოს მთავრობამ და პარლამენტმა განახორციელეს.

„ელჩების კონფერენციას აქვს სხვადასხვა ფორმატი, სხვადასხვა სამუშაო სივრცე. წლევანდელი კონფერენცია მიძღვნილია იმ კონკრეტულ ქმედებებზე, რომლებიც ჩვენ, საქართველოს მთავრობამ, აღმასრულებელმა ხელისუფლებამ და საქართველოს პარლამენტმა განვახორციელეთ. პრაქტიკულად, ხელისუფლების ეს ორი შტო იყო პასუხისმგებელი ამ მნიშვნელოვან მიმართულებებზე. ჩვენ მოვისმინეთ საქართველოს პრემიერ-მინისტრის მიმართვა, რომელიც უშუალოდ, პირადად ხელმძღვანელობდა ამ პროცესს, ასევე მოვისმინეთ საქართველოს პარლამენტის სპიკერის მიმართვა, რომელიც მმართველ გუნდთან ერთად, პირადად იყო ჩართული იმ უზარმაზარი საკანონმდებლო აქტივობების განხორციელებაში, რომელიც გასულ წელს, მიმდინარე წელს იყო. შესაბამისად, წლევანდელი ელჩების კონფერენცია ამ მოტივით და ამ ლოგიკით იყო აწყობილი. ჩვენ გავაგრძელებთ მუშაობას სამუშაო რეჟიმში.

რაც შეეხება საქართველოს პრეზიდენტის მოწვევას, შარშან საქართველოს პრეზიდენტი იყო მოწვეული. სამწუხაროდ, თავისი გადაწყვეტილებით, მონაწილეობა არ მიიღო ელჩების კონფერენციაში. რაც შეეხება დღევანდელ კონფერენციას, მთელი წლის განმავლობაში საქართველოს აღმასრულებელი ხელისუფლება, საპარლამენტო განზომილება, ხელისუფლების ორი მთავარი შტო მუშაობდა ამ შედეგის მისაღწევად და სწორედ ამის გათვალისწინებით, ამ ლოგიკით იყო ფორმატი აწყობილი. წელს პრეზიდენტი არ იყო მოწვეული. ხელისუფლების ორი შტო, საქართველოს მთავრობა, საქართველოს პარლამენტი ფიზიკურად და პრაქტიკულად მუშაობდა ამ შედეგის მისაღწევად. შესაბამისად, ორივე ხელისუფლების ხელმძღვანელი პირი დღეს ბრძანდებოდა და მიმართეს ელჩებს“, – განაცხადა ილია დარჩიაშვილმა.

საგარეო საქმეთა სამინისტროს ორგანიზებით, საზღვარგარეთ საქართველოს დიპლომატიური წარმომადგენლობებისა და საკონსულო დაწესებულებების ხელმძღვანელთა ყოველწლიური შეკრება – „ელჩების კონფერენცია 2023, საქართველო – ევროკავშირის კანდიდატი ქვეყანა“ იმართება. კონფერენცია საქართველოს საგარეო უწყების ხელმძღვანელმა, ილია დარჩიაშვილმა გახსნა. კონფერენციაზე სიტყვით გამოვიდნენ საქართველოს პრემიერ-მინისტრი ირაკლი ღარიბაშვილი და პარლამენტის თავმჯდომარე შალვა პაპუაშვილი. კონფერენციას არ ესწრებოდა სალომე ზურაბიშვილი. როგორც პრეზიდენტის ადმინისტრაციაში განაცხადეს, ელჩების კონფერენციაზე სალომე ზურაბიშვილს მიწვევა არ მიუღია.

„ლელო“ ვერასდროს გახდება ალტერნატიული ძალა, ვიდრე ითამაშებს იმ სცენარით, რა სცენარსაც მას „ნაციონალური მოძრაობა“ უწერს, – ამის შესახებ პარლამენტის საგარეო ურთიერთობათა კომიტეტის თავმჯდომარე ნიკოლოზ სამხარაძემ განაცხადა.

სამხარაძის თქმით, ყველასთვის ცხადია, რომ ისინი ერთ მოედანზე არიან, ერთ მოედანზე თამაშობენ და საერთო მიზნები აქვთ.

„აქედან გამომდინარე, ძალიან სკეპტიკურად ვარ განწყობილი „ლელოს“ საარჩევნო მიზნების მიმართ. სხვათაშორის, ცოტა ხნის წინ სააკაშვილმაც თქვა, მამუკა ხაზარაძე გავაგზავნე ემიგრანტებთან სალაპარაკოდო. ამის შემდეგ რა წარმატებაზე და რა ალტერნატიულ ძალაზე შეიძლება იყოს საუბარი. დღევანდელი ვითარებით თუ ვიმსჯელებთ, მათ პარლამენტში მოხვედრის შანსიც კი არ აქვთ“, – აღნიშნა ნიკოლოზ სამხარაძემ.

„ლელოს“ ლიდერმა, მამუკა ხაზარაძემ რამდენიმე დღის წინ განაცხადა: „ხელისუფლებაში იმ პოლიტიკოსების მოშვება არ შეიძლება, რომლებმაც უახლოეს წარსულში ადამიანის უფლებები დაარღვიეს. ხვდებით, ვისზეა საუბარი, ორი ძველი პარტია უნდა დამთავრდეს, ალტერნატივა ვართ ჩვენ“.

26-28 დეკემბერს დაგეგმილ ელჩების კონფერენციაზე დასასწრებად საქართველოს პრეზიდენტს, სალომე ზურაბიშვილს მიწვევა არ მიუღია, – ამის შესახებ საქართველოს პრეზიდენტის ადმინისტრაციაში განაცხადეს.

საგარეო საქმეთა სამინისტროს ორგანიზებით საზღვარგარეთ საქართველოს დიპლომატიური წარმომადგენლობებისა და საკონსულო დაწესებულებების ხელმძღვანელთა ყოველწლიური შეკრება- „ელჩების კონფერენცია 2023, საქართველო – ევროკავშირის კანდიდატი ქვეყანა“ საგარეო უწყების ხელმძღვანელმა, ილია დარჩიაშვილმა გახსნა. კონფერენციაზე სიტყვით გამოვიდნენ, საქართველოს პრემიერ-მინისტრი ირაკლი ღარიბაშვილი და პარლამენტის თავმჯდომარე შალვა პაპუაშვილი.

პრეზიდენტს იმ ღონისძიებებზეც არ უშვებენ, სადაც პრეზიდენტი საკუთარი კონსტიტუციური უფლებებით ვალდებულია იყოს – საქართველოს აღმასრულებელი ხელისუფლება კონსტიტუციას არღვევს! – ასე ეხმაურება „ევროოპტიმისტების“ დეპუტატი რომან გოცირიძე “ამბასადორიალის“ ღონისძიებაზე სალომე ზურაბიშვილის არ მიწვევის გადაწყვეტილებას.

გოცირიძე მომხდარს „დანაშაულსა“ და „უზნეობას“ უწოდებს.

„ფაქტობრივად, ეს არის დანაშაული. მთავრობა პრეზიდენტს კონსტიტუციური ვალდებულებების შესრულებას უზღუდავს – ეს არის ევროკავშირის ქვეყნებთან ურთიერთობების აკრძალვა, მისი უცხოეთში არგაშვება. საბჭოთა ტერმინი რომ ვიხმაროთ, „გაუსვლელი“ გახდა და უცხოეთში როგორც კერძო პირი, ასე დადის. ასევე სამარცხვინოდ მოიქცნენ, როდესაც ევროკავშირის კანდიდატის სტატუსის მიღება აღნიშნეს, პრეზიდენტი ტრიბუნაზეც არ აუშვეს და საერთო სახალხო ღონისძიება პარტიულ ღონისძიებად აქციეს. ეს არის უზნეობა და დანაშაული – დანაშაულია იმ კუთხით, რომ „ქართული ოცნების“ ხელისუფლება კონსტიტუციას არღვევს და ისეთ კონსტიტუციურ ორგანოს აკნინებს, როგორიც პრეზიდენტია, რომელიც იმავდროულად, უმაღლესი მთავარსარდალია“, – განაცხადა რომან გოცირიძემ.