„ბუნდესვერი დღეს უფრო უარესად არის შეიარაღებული, ვიდრე ორი წლის წინათ, როცა უკრაინაში რუსეთმა საომარი მოქმედებები დაიწყო“, – ნათქვამია გერმანული ჟურნალ „ფოკუსში“ (Focus) გამოქვეყნებულ სტატიაში სათაურით „უკრაინაზე რუსეთის თავდასხმის დასაწყისში ბუნდესვერის არსენალი უკვე ცარიელდებოდა, დღეს კი სიტუაცია უფრო უარესადაა“ (ავტორი – თომას საბინი). „გერმანიის არმია ზარალდება არამარტო კადრების უკმარისობით, არამედ ადმინისტრაციული და პოლიტიკური პრობლემებით“.
თუ გერმანელი პოლიტიკოსების პოპულარობის რეიტინგებს დავუჯერებთ, მაშინ გამოდის, რომ თავდაცვის მინისტრი ბორის პისტორიუსი მშვენივრად აკეთებს თავის საქმეს, რადგან ბევრი მას მხარს უჭერს, თუმცა სინამდვილეში მან ვერ მიაღწია „ეპოქათა ცვლას“, რომელსაც კანცლერი ოლაფ შოლცი გერმანულ საზოგადოებას პირდებოდა. ვერ მიაღწია, მაგრამ, როგორც ჩანს, ეს ფაქტორი მინისტრისადმი გამოხატულ სიმპათიებზე გავლენას ვერ ახდენს.
როცა რუსეთ-უკრაინის ომი დაიწყო, გერმანიის მთავრობამ ბუნდესვერისათვის 100 მილიარდევროიანი „სპეციალური ფონდი“ შექმნა, მაგრამ თანხა ისე დაიხარჯა, რომ ბუნდესვერის გადაიარაღება არ მომხდარა. პირიქით – თუ უკრაინაში სამხედრო მოქმედებების დაწყებამდე გერმანული არმია „ნახევრადშიშველი იყო“, დღეს ის მთლიანად „შიშველია“: ექსპერტები ადრე ამბობდნენ, რომ ომის შემთხვევაში გერმანიის არმიის საწყობებში არსებული შეიარაღება ბერლინს მხოლოდ სამდღიანი ბრძოლისათვის ეყოფოდა, დღეს კი ირკვევა, რომ სამი დღე კი არა, სამ საათსაც არ ეყოფა.
ბუნდესვერს სხვა პრობლემებიც ბევრი აქვს: კერძოდ, კადრების დეფიციტი, რომელსაც კიდევ უფრო ამძიმებს ქვეყნის არასახარბიელო დემოგრაფიული მდგომარეობა. ასევე პრობლემურია ახალწვეულთა ჯარში რეკრუტირების მეთოდები. თავდაცვის სამინისტროს არ აქვს მკაფიო სტრატეგია თანამედროვე სამხედრო ტექნოლოგიების ათვისება-დანერგვის სფეროში, ხელოვნური ინტელექტით სარგებლობის საკითხებში… ეს ეხება დრონებით, კოსმოსური თანამგზავრებით და კიბერშესაძლობებით სარგებლობასაც. ამ სფეროში ბუნდესვერი დროს კვალდაკვალ ვერ მიჰყვება და ათწლეულებით ჩამორჩება.
არმიის აღჭურვა უკიდურესად დაყოვნებით მიმდინარეობს. შესაცვლელია სახელმწიფო შესყიდვების სისტემა. ამასწინანდელი ე.წ. „რეფორმებით“ ამ მიმართულებით არაფერი შეცვლილა.
რა თქმა უნდა, ამ ყველაფერზე პასუხისმგებელ უწყებას თავდაცვის სამინისტრო წარმოადგენს. გასაგებია, რომ ბორის პოსტორიუსის მინისტრობის პერიოდში ბუნდესვერისადმი პოლიტიკური ხელმძღვანელობის დონე გაუმჯობესდა. ის ფაქტი, რომ კანცლერი და თავდაცვის მინისტრი ერთმანეთთან სინქრონში მუშაობენ, მისასალმებელია და გერმანიის ისტორიაში იშვიათ მოვლენას წარმოადგნეს. მაგრამ ეს არასაკმარისია. რეალური შედეგების მისაღწევად მეტი მუშაობაა საჭირო.
