დედაქალაქის მერის, კახა კალაძის განცხადებით, მერია აღმაშენებლის გამზირზე მდებარე კაფე-ბარების მეპატრონეებს გონივრულ ვადას აძლევს, რათა გარეთ მოწყობილი დასაჯდომი სივრცეები მოაწესრიგონ.

კალაძის განმარტებით, წინააღმდეგ შემთხვევაში, მერიას რეაგირება და საკითხში მუნიციპალური ინსპექციის ჩართვა მოუწევს.

„აღმაშენებლის გამზირზე, ჭოროხის ქუჩის კვეთიდან ზაარბრიუკენის კვეთამდე ყოველგვარი სანებართვო დოკუმენტაციის გარეშე განთავსებულია 40-მდე ღია კაფე. ქაოსურად განთავსებული ღია კაფეები პრობლემას უქმნის გადაადგილებისას, როგორც ადგილობრივ მოსახლეობას, ასევე, ყველა იმ პირს, ვინც ამ ქუჩაზე დღის განმავლობაში გადაადგილდება. ჩვენ ბიზნესს რატომ უნდა შევუშალოთ ხელი, რატომ უნდა შევეწინააღმდეგოთ? მაგრამ ამგვარი მიდგომები კატეგორიულად მიუღებელია. დავით ნარმანიას მერობის პერიოდში აღნიშნული სივრცე განახლდა და ერთი სიამოვნება იყო იქ გასეირნება. დღეს ვხედავთ გარე კაფეებს ყოველგვარი ნებართვის გარეშე. პანდემიის პერიოდში ყველანაირად გვერდში დაგიდექით, რომ აღნიშნული სივრცეები მოგეწყოთ გარეთ, რადგან შიგნით შეზღუდვა იყო. იმისთვის, რომ ბიზნესის თვალსაზრისით პრობლემები არ შეგქმნოდათ, მოგეცით შესაძლებლობა, გარე სივრცეები გამოგეყენებინათ. თუმცა, მძიმე მდგომარეობაა ვიზუალური თვალსაზრისითაც, გემოვნების თვალსაზრისითაც, ასევე, ორივე მხარეს იმდენადაა გამოწეული დასაჯდომი სივრცეები, გავლა შეუძლებელია; ამასთან, სახანძრო საჭიროების ან სასწრაფო დახმარების თვალსაზრისითაც პრობლემაა. შესაბამისად, ეს ყველაფერი უნდა მოვაწესრიგოთ. გეძლევათ ვადა, რომ მოაწესრიგოთ აღნიშნული პრობლემა – როგორც ვიზუალური მხარე, ასევე, ნებართვების თვალსაზრისით, წინააღმდეგ შემთხვევაში რეაგირება მოგვიწევს და ჩართული იქნება მუნიციპალური ინსპექცია. გაქვთ დრო, რათა აღნიშნული პრობლემა მოგვარებული იყოს. ვიზუალური მხარესაც დიდი მნიშვნელობა აქვს, პირველ რიგში, თქვენთვის“, – განაცხადა კახა კალაძემ.

მეტროსადგურ „ვარკეთილის“ ჩაკეტვა ჯერჯერობით არ დაგვჭირდება – ის ჩვეულებრივად მოემსახურება მგზავრებს, – ამის შესახებ თბილისის მერმა, კახა კალაძემ დედაქალაქის მთავრობის სხდომაზე განაცხადა.

მისივე თქმით, მეტროსადგურ „ვარკეთილის“ რეაბილიტაცია ძალიან გაჭიანურდა და გეგმის მიხედვით, მეტროს რეაბილიტაცია 2024 წლის ზაფხულში უნდა დასრულდეს.

კალაძემ რეაბილიტაციის პროცესში განხორციელებულ და ასევე, დაგეგმილ სამუშაოებზე ისაუბრა.

„სიმართლე უნდა ვთქვათ, აღნიშნული მეტროსადგურის რეაბილიტაცია ძალიან გაჭიანურდა. ჯერ იყო გამარჯვებული კომპანია „მამისონი“, რომელმაც ხელშეკრულებით ნაკისრი ვალდებულებები ვერ და არ შეასრულა. შესაბამისად, მოგვიწია აღნიშნული კომპანიის გაშვება და დღეს ამ სამუშაოებს ახორციელებს „ბადა კონსტრაქშენი“.

სადგურის ჩაკეტვა ჯერჯერობით არ დაგვჭირდება, ისე ჩატარდება და განხორციელდება სამუშაოები. სამუშაოების შესრულების ჯამური ვადა შეადგენს 18 თვეს და გეგმის მიხედვით, უნდა დასრულდეს მომდევნო წლის ზაფხულში.

ამ ეტაპზე სამშენებლო კომპანიის მიერ შესრულებულ სამუშაოებს გეტყვით – შემუშავდა სამუშაოთა წარმოების პროექტი, მეტროსადგურის დაბლა, ბაქანზე განხორციელდა აზბესტის ჭერის დემონტაჟი, სრულად მიმდინარეობს ბაქნის ქვედა სამეურნეო სივრცეების სარემონტო სამუშაოები. განხორციელდა ბაქნის სივრცის დეტალური სკანირება, რაც, რა თქმა უნდა, აუცილებელია ჭერის მოპირკეთების პროექტის საბოლოო დაზუსტებისთვის.

უახლოეს პერიოდში, მომდევნო დღეების განმავლობაში დაგეგმილი შემდეგი სამუშაოები – ესკალატორის დახრილ გვირაბში აზბესტის ჭერის დემონტაჟი, ბაქნის იატაკზე არსებული ფილების დემონტაჟი, მოჭიმვის მოწყობა და პროექტით გათვალისწინებული ფილების მონტაჟი. როგორც გითხარით, სამუშოები არ საჭიროებს მეტროსადგურის დროებით დახურვას და ჩვეულებრივად მოემსახურება მგზავრებს. გარკვეულ არეალებში იქნება შეზღუდვები, როდესაც უშუალოდ ბაქნის მოპირკეთების სამუშაოები წარიმართება, თუმცა ამის შესახებ ეტაპობრივად მივაწვდით ინფორმაციას მოსახლეობას,“ – განაცხადა კალაძემ.

გადაჭარბებულ ხმაურის რეგულაციაზე სანქციები მკაცრდება. ამის შესახებ თბილისის მერმა კახა კალაძემ თბილისის მთავრობის სხდომაზე ისაუბრა.

„ტურისტული სეზონის გააქტიურებასთან ერთად, თქვენ იცით როგორ აქტუალური ხდება ხმაურის დონის გადამეტების პრობლემა კერძო თუ საზოგადოებრივ სივრცეებში.

არსებული რეგულაციების მიხედვით, ზოგ ადგილებში და ზოგ ობიექტებზე დასაშვებია ხმაურის გარკვეული დონე დილის 08:00-დან ღამის 11:00 საათამდე, ხოლო ღამის 11:00-დან დილის 08:00 საათამდე ან საერთოდ აკრძალულია ხმაური ან კიდევ დაშვებულია ხმაურის დაბალი დონე.

რაც შეეხება რესტორნებს, ბარებსა და კაფეებს, როგორც ტურისტული ქალაქისათვის აქტუალურ ობიექტებს, აქ ხმაურის დასაშვები დონე დღე-ღამის ყველა მონაკვეთში, დილით, შუადღით, საღამოს თუ ღამით არის ერთნაირად შეზღუდული და არ უნდა აღემატებოდეს 50 დეციბელს.

რამდენიმე კვირის წინ, მთავრობის სხდომაზე მოვუწოდე და ვთხოვე ყველა მსგავს ობიექტს, დაიცვან ხმაურთან დაკავშირებით კანონმდებლობით განსაზღვრული ნორმები, ასევე დავავალე მუნიციპალური ინსპექციის უფროსს, რომ ამ მიმართულებით გაემკაცრებინა მონიტორინგი.

ფაქტია, რომ ხმაურის დასაშვები ნორმების გადამეტებისათვის დადგენილი სანქციები პრაქტიკულად უშედეგოა და არ წარმოადგენს არანაირ ბერკეტს, რათა კანონდამრღვევმა თავი შეიკავოს განმეორებითი დარღვევებისგან. ხშირ შემთხვევაში ეს ობიექტები კვლავ უგულებელყოფენ კანონს და საზოგადოების ინტერესებს.

სწორედ იმ ადამიანების უფლებების დაცვის მიზნით, რომლებზეც ზეგავლენას ახდენს გადაჭარბებული ხმაური, მოვამზადეთ შესაბამისი საკანონმდებლო ცვლილებები, რომელიც ითვალისწინებს სანქციების გამკაცრებას და დარღვევების პრევენციას.

კანონპროექტის მიხედვით:

ა) აკუსტიკური ხმაურის დასაშვები ნორმების გადამეტება პირველ შემთხვევაში გამოიწვევს ფიზიკური პირის დაჯარიმებას 150 ლარის ოდენობით, ხოლო იურიდიული პირის დაჯარიმებას 1500 ლარის ოდენობით;

ბ) იგივე ქმედების განმეორებით ჩადენის შემთხვევაში ფიზიკური პირი დაჯარიმდება 500 ლარის ოდენობით, ხოლო იურიდიული პირი დაჯარიმდება 5000 ლარის ოდენობით;

გ) მესამედ და შემდგომ ყველა დარღვევაზე, ფიზიკური პირი დაჯარიმდება 1000 ლარის ოდენობით, ხოლო იურიდიული პირი 10000 ლარის ოდენობით.

აღნიშნულ კანონპროექტს ჩვენ უახლოეს მომავალში მივაწვდით საქართველოს პარლამენტს და იმედი გვაქვს რომ ისინი მხარს დაუჭერენ ამ ინიციატივას“,- აღნიშნა კალაძემ.

საქართველოს სახელმწიფო უსაფრთხოების სამსახურის კონტრტერორისტულმა ცენტრმა, გატარებული ოპერატიული და საგამოძიებო მოქმედებების შედეგად, ტერორისტულ დანაშაულზე მიმდინარე გამოძიების ფარგლებში, საქართველოს ორი მოქალაქე დააკავა.

უწყების ცნობით, სახელმწიფო უსაფრთხოების სამსახურმა სპეციალური ოპერაცია საქართველოს ორ რეგიონში ოთხ ლოკაციაზე ერთდროულად ჩაატარა. საგამოძიებო მოქმედებების შედეგად ამოღებულია დროშები ტერორისტული ორგანიზაცია „ისლამური სახელმწიფოს“ სიმბოლიკით და სხვადასხვა სახის ელექტრონული ინფორმაციის მატარებელი მოწყობილობა.

ამასთან, დაკავებულების საცხოვრებელი სახლებიდან ამოღებულია საბრძოლო მასალა, ასაფეთქებელი მოწყობილობა და ფეთქებადი ნივთიერებები.

სახელმწიფო უსაფრთხოების სამსახურის კონტრტერორისტული ცენტრი გამოძიებას სისხლის სამართლის კოდექსის 327-ე და 236-ე მუხლებით აწარმოებს. გრძელდება აქტიური ოპერატიულ-საგამოძიებო მოქმედებები როგორც დაკავებული პირების ტერორისტული ორგანიზაცია „ისლამური სახელმწიფოს“ საქმიანობაში მონაწილეობის ხასიათის გამოვლენისთვის, ისე დანაშაულთან შემხებლობაში მყოფი სხვა პირების იდენტიფიცირების მიზნით.

საქართველოს სახელმწიფო უსაფრთხოების სამსახური მადლობას უხდის გენერალურ პროკურატურას და შინაგან საქმეთა სამინისტროს აღნიშნულ საქმეში თანამშრომლობისთვის.

26 ივლისს ქუთაისში +33 გრადუსი და მზიანი დღეა მოსალოდნელი, ღამით კი +21 გრადუსი იქნება. ოზურგეთში უნალექო დღეა. დღისით +33 გრადუსი დაფიქსირდება, ღამით კი +20 გრადუსია ნავარაუდევი. ბათუმში დღისით ჰაერი +30 გრადუსამდე გათბება, ღამით კი +22 გრადუსი დაფიქსირდება.

ფოთში დღისით +31 გრადუსი დაფიქსირდება, ღამით კი +22 გრადუსია მოსალოდნელი. უნალექო დღეა მოსალოდნელი ზუგდიდშიც, სადაც დღისით ტემპერატურა +32 გრადუსს მიაღწევს, ღამით კი +20 გრადუსია ნავარაუდევი. +30 გრადუსი და მზიანი დღეა მოსალოდნელი სოხუმშიც, ღამით +22 გრადუსი დაფიქსირდება.

მესტიაში დღისით +20 გრადუსი, ღამით კი +12 გრადუსი დაფიქსირდება. ამბროლაურში ჰაერი დღისით +32 გრადუსამდე გათბება, ღამით კი +18 გრადუსი დაფიქსირდება.

ჭიათურაშიც მზიანი დღეა. დღისით +32 გრადუსია მოსალოდნელი, ღამით კი +19 გრადუსი. ახალციხეში დღისით ჰაერი 31 გრადუსამდე გათბება, ღამით კი ტემპერატურა +15 გრადუსამდე დაიწევს.

ბორჯომშიც მზიანი დღეა. დღისით +31, ღამის ღამით კი +16 გრადუსი დაფიქსირდება. ბაკურიანში დღისით +27 გრადუსია მოსალოდნელი, ღამით +12 გრადუსი დაფიქსირდება.

გორში დღისით +33 გრადუსია მოსალოდნელი, ღამის განმავლობაში კი +18 გრადუსი დაფიქსირდება. ცხინვალში დღისით ჰაერს ტემპერატურა +32 გრადუსი იქნება, ღამით კი +17 გრადუსი დაფიქსირდება.

გუდაურშიც მზიან დღეს ვარაუდობენ. დღისით +21 გრადუსია ნავარაუდევი, ღამით კი ჰაერის ტემპერატურა +10 გრადუსი იქნება. ომალოში წვიმაა ნავარაუდები. დღისით +19, ღამით კი +11 გრადუსი დაფიქსირდება.

ლაგოდეხში ჰაერის ტემპერატურა დღის განმავლობაში +31 გრადუსი იქნება, ღამით კი +23 გრადუსი დაფიქსირდება. თელავში დღისით +30 გრადუსი დაფიქსირდება, ღამით კი +20 გრადუსია ნავარაუდევი. მოსალოდნელია წვიმა.

გურჯაანში დღისით +30 გრადუსი, ღამით კი +21 გრადუსი დაფიქსირდება. იწვიმებს. სიღნაღში დღისით +29 გრადუსი მოსალოდნელი, ღამით +21 გრადუსი დაფიქსირდება. მოსალოდნელია წვიმა.

რუსთავში დღისით +32 გრადუსია მოსალოდნელი, ღამით კი +22 გრადუსი დაფიქსირდება. იწვიმებს.

თბილისში ჰაერის ტემპერატურა დღისით +32 გრადუსს მიაღწევს, ღამით კი +23 გრადუსი იქნება. მოსალოდნელია ნალექი.

ვერძი

ხელსაყრელი დღეა, განსაკუთრებით – მამაკაცებისთვის. მოსალოდნელია მოღვაწეობის ახალ სფეროზე ან განვითარების ახალ ეტაპზე გადასვლა. ხელიდან ნუ გაუშვებთ საკუთარ შანსს და პრინციპულობა გამოიჩინეთ. საშუალება გექნებათ, საკუთარ გამოცდილებას თვალი გადაავლოთ და სამომავლო გეგმები დასახოთ. მოთმინება გამოიჩინეთ, ნუ მისცემთ ნეგატიურ ემოციებს უფლებას, რომ პირად ურთიერთობებზე იმოქმედოს. მოსალოდნელია ფინანსური შემოსავალი, საჩუქარი ან მაცდური წინადადება.

კურო

კარგი იქნება, თუ ამ დღეს სახლში გაატარებთ. ყურადღება მიაქციეთ ახლობელ ადამიანებს, ბავშვებს და ნათესავებს. სასიყვარულო ურთიერთობებისთვის არახელსაყრელი დღეა. შესაძლოა, სიტუაცია იმდენად გამწვავდეს, რომ მისი დალაგება ვეღარ შეძლოთ. თავი შეიკავეთ კომერციულ ოპერაციებში მონაწილეობისა და გაუმართლებელი რისკისგან.

ტყუპები

ხელსაყრელი დღეა, განსაკუთრებით – შემოქმედებითი პროფესიის ტყუპებისთვის. მოსალოდნელია ფინანსური შემოსავალი. თამამად დაიწყეთ ნებისმიერი საქმე, რადგან ყველგან და ყველაფერში წარმატება გელით. ეცადეთ, რეალობის გრძნობა არ დაკარგოთ და მეტი პრაქტიკულობა გამოავლინოთ.

კირჩხიბი

მოსალოდნელია ახლობელ ადამიანთან ურთიერთობების გარკვევა. წინა დღეების დაღლილობა და დაძაბულობა თავს იჩენს. მეტი ყურადღება გამოიჩინეთ კოლეგების მიმართ, რომ მათი თავმოყვარეობა არ შელახოთ. ეცადეთ, მეტი წინდახედულება გამოიჩინოთ და ნაჩქარევი გადაწყვეტილება არ მიიღოთ.

ლომი

ხელსაყრელი დღეა, განსაკუთრებით – ქალი ლომებისთვის. სავარაუდოდ, განვითარების ახალ ეტაპზე გადახვალთ. ახალი ნაცნობი თქვენს მსოფლმხედველობაზე მნიშვნელოვან გავლენას მოახდენს. მამაკაცებმა მიზნის მიღწევისთვის მეტი პრინციპულობა უნდა გამოავლინონ – იმოიქმედეთ ისე, როგორც საჭიროდ მიიჩნევთ და შედეგებზე არ იფიქროთ.

ქალწული

ხელსაყრელი დღეა. განსაკუთრებით შემოქმედებითი პროფესიის ადამიანებისთვის. შესაძლებლობა გაქვთ საკუთარი გამოცდილება კარგად გაიაზროთ და სამომავლო გეგმები დასახოთ. მოთმინება გამოიჩინეთ და ნეგატიური ემოციები მოთოკეთ. თქვენი აქტიურობა აუცილებლად აისახება პროფესიულ საქმიანობაზე, მეგობრებთან ურთიერთობაზე და მთლიანად, მომავალ ცხოვრებაზე. მოსალოდნელია ფინანსური შემოსავალი ან მაცდური წინადადება.

სასწორი

პასიური დღეა. კომერციული საქმეები უჩვეულოდ გაჭიანურდება და სასურველ შედეგს ვერ მოგიტანთ. მოულოდნელმა ცნობამ შეიძლება ახლობელ ადამიანებთან ურთიერთობა გაგირთულოთ. ამ დღეს თავი შეიკავეთ მგზავრობისა და ღია ცეცხლთან ურთიერთობისგან.

მორიელი

ამ დღეს თქვენი შემოქმედებითი პოტენციალი მიშვნელოვნად მოიმატებს. განსაკუთრებით წარმატებული დღეა შემოქმედებითი პროფესიის მორიელებისთვის. მნიშვნელოვანი გადაწყვეტილების მიღების დროს მხოლოდ საკუთარ ინტუიციას ენდეთ

მშვილდოსანი

არახელსაყრელი დღეა, განსაკუთრებით – ხელოვანი ადამიანებისთვის. სავარაუდოდ, სამომავლო გეგმებში კორექტივების შეტანა მოგიწევთ. მოვლენების არახელსაყრელი განვითარების გამო ნუ ინერვიულებთ – შესაძლოა, ასე უკეთესიც იყოს.

თხის რქა

კრიტიკული დღეა. ახლობელი ადამიანების დახმარებაზე უარს ნუ იტყვით – ერთობლივი მუშაობისა და კოლექტიური ღონისძიებებისთვის ეს დღე ხელსაყრელია. მეტი ყურადღება გამოიჩინეთ ახლობელი ადამიანების მიმართ. მოსალოდნელია უთახმოება, რომელიც შეიძლება ურთიერთობის სრული გაწყვეტით დასრულდეს. მოთმინება გამოიჩინეთ და ნეგატიურ ემოციებს ნუ აჰყვებით.

მერწყული

ინდივიდუალური მუშაობისთვის ხელსაყრელი დღეა. პარტნიორებთან ურთიერთობის ან კომერციული გარიგებების დროს რეალობის გრძნობა არ დაკარგოთ: მოსალოდნელია ტყუილი ან ფინანსური ზარალი. ამ დღეს სექსუალური კონტაქტები უკიდურეს სიფრთხილეს მოითხოვს. გამორიცხული არაა სრული კრახი და იმედგაცრუება.

თევზები

სულის სიღრმეში საკუთარი თავით უკმაყოფილო ხართ, რამაც შეიძლება ნერვიულობა და მასთან დაკავშირებული ავადმყოფობა გამოიწვიოს. ეცადეთ, ძველი შეცდომები არ გაიმეოროთ, რათა სიტუაცია ძირეულად პოზიტიურისკენ შეიცვალოს. თუ თავს დამნაშავედ მიიჩნევთ, ბოდიში მოიხადეთ და აპატიეთ მათ, ვინც პატიებას გთხოვთ.