პრეზიდენტის საახალწლო გზავნილები დესტრუქციული ფრაზებითა და შეძახილებით იყო დატვირთული – „საქმე ლაპარაკის ნაცვლად“ „ნაციონალური მოძრაობის“ ლოზუნგია და კარგი იქნება თუ ამ ლოზუნგს კოლექტიური „ნაცმოძრაობის“ ერთ-ერთი ფრთის ლიდერი სალომე ზურაბიშვილი გაიხსენებს, – ამის შესახებ ჟურნალისტებს “ქართული ოცნების“ ერთ-ერთმა ლიდერმა გია ვოლსკიმ განუცხადა.

ვოლსკის შეფასებით, სალომე ზურაბიშვილმა საახალწლო მიმართვისას ილაპარაკა არა როგორც პრეზიდენტმა, არამედ როგორც ერთ-ერთმა გაბრაზებულმა პოლიტიკურმა ლიდერმა.

“ძალიან ბევრი რამ, რაც შესაძლებელია, კეთდება იმისთვის, რომ ოკუპირებულ ტერიტორიებზე მცხოვრები ადამიანების ცხოვრება გაიოლდეს – განსაკუთრებით ახალგაზრდებისთვის, მათი სწავლისთვის და გაცილებით მეტი იქნება.

გარდა ამისა, თქვა, რომ ახსოვთ შოვი და გურია, თითქოს შოვისა და გურიის ტრაგედიამ მარტო ეგ და იმ 8 მარტის მონაწილე ადამიანების სული შეძრა – მხედველობაში ის ადამიანები მყავს, ვინც პოლიციას მოლოტოვის კოქტეილი ესროლა.

როდესაც მთავარსარდალი ოპოზიციური აზრისა და პროტესტის ასეთ რადიკალური ფორმით გამოვლინებას უჭერს მხარს, ეს ქვეყნისთვის მისაღები არ არის და ქვეყანას აზიანებს“, – განაცხადა გია ვოლსკიმ.

გადამწყვეტი წელია, არჩევნები მოდის და აქ გასათვალისწინებელია ივანიშვილის ფაქტორი, როგორც მაკონსოლიდირებელი ძალის – ივანიშვილი არის სტაბილურობის ერთ-ერთი მნიშვნელოვანი გარანტი და დამთავრდა, წერტილი , – ამის შესახებ ჟურნალისტებთან პარლამენტის პირველმა ვიცე- სპიკერმა გია ვოლსკიმ განაცხადა, რითაც ბიძინა ივანიშვილის პოლიტიკაში, პარტია “ქართული ოცნების” საპატიო თავმჯდომარის პოსტზე დაბრუნებას გამოეხმაურა.

როგორც ვოლსკიმ აღნიშნა, ოპოზიცია ხავსს ეჭიდება, როცა ივანიშვილის განცხადებებს აფასებს, რომელიც მან “ადამიანურ სისუსტეებზე” გააკეთა.

“ფაქტია, საზოგადოების დიდ ნაწილს, მხარდამჭერები მყავს მხედველობაში და არა მხოლოდ, საკმაოდ პოზიტიურად ეჩვენა ეს ნაბიჯი. გარდა ამისა, ეს არის 2024 წელი, გადამწყვეტი წელი, არჩევნები მოდის და რასაკვირველია, ბიძინა ივანიშვილის ფაქტორი, როგორც მაკონსოლიდირებელი ძალის, აქ არის გასათვალისწინებელი. გარდა ამისა, ოპოზიცია საკმაოდ მოშლილი, მორყეულია და არანაირად არ უნდა გამოვრიცხოთ, რომ სწორედ ასეთ ვითარებაში განსაკუთრებით აგრესიული გახდება მათი ქმედებებიც, საბოტაჟიც უფრო დახვეწილ ფორმებს მიიღებს. არასდროს არანაირი სანქცია არ ყოფილა ივანიშვილის გადაწყვეტილებისთვის ფაქტორი. თუმცა, ასეთი მცდელობები ჩვენი აზრით არსებობდა, თუნდაც, შვეიცარიული ბანკის პრობლემასთან დაკავშირებით კარგად გამოჩნდა. ბიძინა ივანიშვილმა განაცხადა და სწორადაც განაცხადა, რომ არსებობს ადამიანური სისუსტეები, რომელიც შეიძლება გამოვლინდეს ისეთ კრიტიკულ ვითარებაში, როცა წინასაარჩევნო პერიოდია, მსოფლიოში ასეთი პროცესები მიდის და რასაკვირველია წინასაარჩევნო პერიოდში შესაძლოა დაშვებულ იქნას რაღაც ისეთი, რომელიც გუნდს არ ახასიათებდა არასდროს, არ ახასიათებს და არც მომავალში უნდა ახასიათებდეს. ამაზე ილაპარაკა გარკვევით და არ მგონია, ამაში რაიმე ოპოზიციისთვის გადაგდებული რაიმე მაშველი რგოლი არსებობდეს. ოპოზიცია ეპოტინება ხავსს და ხავსიც კი აღარ შერჩა იმ ლოდებს, რომელიც საკმაოდ რთული, მოუხერხებელია ჩამოსაკიდებლად და გასამყარებლად საკუთარი პოზიციის. ქვეყანას სჭირდება სტაბილურობა, ეს არის მთავარი ამოცანა, ბიძინა ივანიშვილი არის ამ სტაბილურობის ერთ-ერთი მნიშვნელოვანი გარანტი და დამთავრდა, სრული წერტილი”, – განაცხადა ვოლსკიმ.

კითხვაზე, ხომ არ შეიცვლება პრემიერ-მინისტრი და ან ხომ არ იქნება რაიმე ცვლილებები მინისტრთა კაბინეტში, ვოლსკი აცხადებს, რომ ასეთი რამ გათვალისწინებული არ არის და “შავი კატის ძებნა ბნელ ოთახში” მედიაში არსებული ტრადიციაა.

“ცვლილებები გათვალისწინებული არ არის. პრინციპში მოვდივართ კარგად ამ ურთულეს ვითარებაში, შედარებითია ყველაფერი და ბიძინა ივანიშვილის მოსვლა “ქართული ოცნების” გუნდის კონსოლიდაციას გულისხმობს და არა დაშლას და იქ ისეთი ცვლილებების მოხდენას, რომელსაც არანაირი საფუძველი არ გააჩნია.

მე არ ჩავიდოდი ეგეთ დეტალებში, მთავრობის საქმიანობა საკმაოდ კარგად იქნა შეფასებული. შავი კატის ძებნა ბნელ ოთახში არის ტრადიცია, რომელიც შეინარჩუნა სამწუხაროდ, მედიის გარკვეულმა ნაწილმა”, – განაცხადა ვოლსკიმ.

არ მგონია, არსებობდეს მიზეზი იმისა, რომ ვინმემ პოლიტიკაში დაბრუნების თაობაზე ბიძინა ივანიშვილის გადაწვეტილებაში განსხვავებული ქვეტექსტის ძიება და საზოგოებისთვის სპეკულაციური ინტერპრეტაციების შეთავაზება დაიწყოს – ბიძინა ივანიშვილის ავტორიტეტის გამოყენება იმ შესაძლო რისკების დამზღვევად, რასაც ქვეყანაში არსებული პოლიტიკური კონფიგურაცია შეიძლება აჩენდეს, მხოლოდ აპლოდისმენტებს იმსახურებს! – ეს განცხადება პარლამენტში “ქართული ოცნების“ დეპუტატმა მიხეილ სარჯველაძემ გააკეთა.

როგორც ამ კონტექსტში სარჯველაძემ აღნიშნა, “შესაძლო სირთულეების დასაზღვევად, რომლის წინაშეც სახელისუფლო პარტია ჭარბი ძალაუფლების შემთხვევაში შეიძლება აღმოჩნდეს, ივანიშვილის პოლიტიკაში დაბრუნების გადაწყვეტილება ლეგიტიმური და მისასალმებელია“.

ამასთან, სარჯველაძის აზრით, პოლიტიკიდან წასვლის თაობაზე ბიძინა ივანიშვილის მიერ 2021 წელს მიღებული გადაწყვეტილების 2023 წლის გადაწყვეტილებასთან შეპირისპირება, “ნონსენსი და აბსურდულია, რადგან 2021 წელს მსოფლიო და მოცემულობა თვისობრივად განსხვავებული იყო, ხოლო ახლა თვისობრივად განსხვავებული მდგომარეობაა“.

“ყველასთვის, ვინც სახელისუფლო პარტიის გულშემატკივარია, ბიძინა ივანიშვილის გადაწყვეტილება პოლიტიკაში დაბრუნების შესახებ, გასახარი ამბავია.

როდესაც ბიძინა ივანიშვილი პოლიტიკიდან წავიდა, მისი გადაწყვეტილება საზოგადოებისთვის დეტალურად იყო ახსნილი. პოლიტიკაში დაბრუნების დროსაც მკაფიოდ და ცხადად განმარტა მიზეზები, რის გამოც მან ასეთი გადაწყვეტილება მიიღო.

ბიძინა ივანიშვილის გადაწყვეტილება ერთმნიშვნელოვნად გულისხმობს იმას, რომ რა საჭიროებებიც ქვეყანას უდგას – უპირველეს ყოვლისა, გამომდინარე იქედან, რომ ძალიან დიდია მმართველ პოლიტიკურ პარტიაზე დაკისრებული პასუხისმგებლობა – ბუნებრივია, რომ ეს სწორი არგუმენტაციაა.

ბიძინა ივანიშვილს კითხვის ნიშნები არ დაუტოვებია, როდესაც ის პოლიტიკაში დაბრუნდა. პირველ რიგში, მე ამ ამბავს ჩვენს გუნდს ვულოცავ – ეს მთელი ქვეყნის ინტერესებისთვის მხოლოდ და მხოლოდ სასარგებლო იქნება.

რაც შეეხება ოპოზიციის უსუსურ მცდელობებს, რომ დასახელებული არგუმენტების მიღმა საზოგადოებას არასწორ ინტერპრეტაციები შესთავაზონ და განსხვავებული მიზეზები დაანახონ, არც ერთი მათგანი სერიოზულად განსახილველად არ ღირს“, – განაცხადა მიხეილ სარჯველაძემ.