„ნაციონალური მოძრაობა“ უნდა გასამართლდეს. ჩვენ დარწმუნებულები ვართ, რომ 2024 წლის არჩევნებით დაიწყება გასამართლების პროცესი, – ამის შესახებ „ხალხის ძალის“ წევრმა გურამ მაჭარაშვილმა განაცხადა.

„მაშინ როდესაც ჰააგის და სტრასბურგის საერთაშორისო სასამართლოებმა გაამართლეს ქართული სახელმწიფო და ჯარი, „ნაციონალურმა მოძრაობამ“ ევროსაბჭოს რეზოლუციაზე ხელი მოაწერა, რომ „ისკანდერები“ გამოიყენეს, ანუ ომის დანაშაული ჩაიდინა ქართულმა ჯარმა და საქართველომ დაიწყო ომი. ბუნებრივია, რომ მანამ, სანამ ასეთი ომისა და ღალატის პარტია არსებობს ქართულ პოლიტიკურ სივრცეში, ყოველთვის იქნება კრიზისები და პრობლემის შექმნის მცდელობა მაინც. ამიტომაცაა ჩვენი პოზიცია ის, რომ „ნაციონალური მოძრაობა“ უნდა გასამართლდეს. ჩვენ დარწმუნებულები ვართ, რომ 2024 წლის არჩევნებით დაიწყება ამ გასამართლების პროცესი“, – განაცხადა მაჭარაშვილმა.

საზოგადოებრივი მოძრაობა „ხალხის ძალა“ „ნაციონალური მოძრაობის“ გასამართლების აუცილებლობის შესახებ კიდევ ერთ განცხადებას ავრცელებს.

ნიკა მელია, როგორც ჩანს, პარტიის დატოვების შემდეგ ღიად განიხილავს გარკვეულ პოლიტიკურ გაერთიანებას, – ამის შესახებ ფრაქცია „ნაციონალური მოძრაობის“ თავმჯდომარე თინა ბოკუჩავამ განაცხადა.

ბოკუჩავას კითხვა დაუსვეს „ლელოს“ ლიდერის, მამუკა ხაზარაძის განცხადებაზე, სადაც მან აღნიშნა: „მე და ნიკა მელია ვიქნებით სტრატეგიული პარტნიორები. როგორ იქნება ეს, უპირველესად, ამომრჩეველს ვკითხავთ“.

თინა ბოკუჩავას თქმით, შესაძლებელია, ისინი ფორმალურად გაერთიანდნენ კოალიციურ რეჟიმში.

„არ მინდა, სხვა პოლიტიკური პარტიების გეგმებზე სპეკულაციური განცხადება გავაკეთო. შესაძლებელია, ისინი ფორმალურად კოალიციურ რეჟიმში გაერთიანდნენ. ეს მნიშვნელოვანია იმის გათვალისწინებით, რომ ხუთპროცენტიანი საარჩევნო ბარიერი არსებობს და არ გვსურს, ოპოზიციურად განწყობილი ადამიანების ხმები დაიკარგოს. ამიტომ გამსხვილება უფრო კარგი იქნება. ალბათ, ამ გაერთიანებამ ნათელი მოჰფინა იმ მრავალთვიან პროცესს, როდესაც „ნაციონალური მოძრაობის“ ყოფილი თავმჯდომარე გადაწყვეტილებას ვერ იღებდა. როგორც ჩანს, პარტიის დატოვების შემდეგ ღიად განიხილავს გარკვეულ პოლიტიკურ გაერთიანებას. ამან შეიძლება, ცხადყოს ფაქტი, რომ ეს ადამიანი გარკვეული პოლიტიკური ობციების შერჩევის პროცესში იყო, მის ნაცვლად ვერ ვისაუბრებ. პრეტენზია ალტერნატივაზე ბევრს ჰქონდა წარსულშიც, თუმცა შემდეგ მათი საარჩევნო შედეგები გვინახავს. ჩემი მიზანი ვინმეს დაკნინება არ არის, რადგან ეს დიდ ოპოზიციურ მიზნებს ეწინააღმდეგება, თუმცა ვისურვებდი, ადამიანები ახლო წარსულის მაგალითებზე იღებდნენ გაკვეთილებს იმ წარმატებისთვის, როცა ოპოზიციამ ხალხთან ერთად, ხელისუფლების შეცვლა უნდა შეძლოს“, – განაცხადა თინა ბოკუჩავამ.

დღეს ბიჭვინთის ფაქტობრივი ანექსია გაფორმდა – აღნიშნულ პროცესზე „ქართული ოცნების“ ხელისუფლების დუმილმა რუსეთს ანექსიის დასრულებაში ხელი არ შეუშალა, – ასეთია პარლამენტის ოპოზიციონერი დეპუტატის თეონა აქუბარდიას შეფასება.

მისივე თქმით, ეს იყო ხარკი, რომელიც ვლადიმერ პუტინმა აფხაზური საზოგადოებისგან მოითხოვა, რაც ბოლო ფაქტობრივი ანექსია არ იქნება.

„2020-2021 წელს განხორციელდა სოფელ აიბგას ფაქტობრივი ანექსია, როდესაც ის კრასნოდარის ოლქს შეუერთეს. ახლა არის ბიჭვინთა და ეს პროცესი შეუქცევადად გრძელდება. ამ ფონზე ჩვენ ვხედავთ როგორი არაადეკვატურია „ქართული ოცნების“ მთავრობის დამოკიდებულება ტერიტორიული მთლიანობის და სუვერენიტეტის საკითხის მიმართ. წელიწადნახევარია ვცდილობ ხელისუფლებამ ბიჭვინთის ანექსიის პროცესზე რეაგირება მოახდინოს, რაც გასულ წელს დაიწყო და დღეს დასრულდა. მივმართე მთავრობას და საგარეო საქმეთა სამინისტროს, რომ აღნიშნული ფაქტი განცხადებითაც შეემჩნიათ და პარტნიორებისთვის ადეკვატური რეაგირების მოთხოვნით მიემართათ. სად არის მთავრობა, როცა შეგვეძლო აფხაზური საზოგადოების პროტესტთან ერთად და დასავლელ პარტნიორებთან კოორდინაციის მეშვეობით ფაქტი შეგვეფასებინა?!“ – განაცხადა თეონა აქუბარდიამ.