საგამოძიებო სამსახურმა ყალბი ერთლარიანი მონეტების გასაღების ფაქტზე ორი პირი დააკავა

09:50 - 02/08/2023

საქართველოს ფინანსთა სამინისტროს საგამოძიებო სამსახურის თანამშრომლების მიერ, გატარებული ოპერატიულ-სამძებრო ღონისძიებებისა და საგამოძიებო მოქმედებების შედეგად, წინასწარი შეთანხმებით ჯგუფის მიერ, ყალბი ფულის გასაღების ფაქტზე, დაკავებულ იქნა ორი პირი.

„გამოძიებით დადგინდა, რომ ბრალდებულები, უკანონო მატერიალური სარგებლის მიღების მიზნით, შიდა ქართლის რეგიონში, 2022 წლის დეკემბრიდან მიმდინარე წლის ივლისის პერიოდში, სისტემატურად ასაღებდნენ ყალბ ერთლარიან მონეტებს. საგამოძიებო მოქმედებების შედეგად, ჯამში ამოღებულ იქნა 524 ცალი ყალბი ერთლარიანი მონეტა.

გამოძიება მიმდინარეობს საქართველოს სისხლის სამართლის კოდექსის 212-ე მუხლის მეორე ნაწილით, რაც სასჯელის სახით ითვალისწინებს თავისუფლების აღკვეთას 7-დან 10-წლამდე ვადით.

ტარდება შესაბამისი ღონისძიებები ყალბი მონეტების დამამზადებლისა და აღნიშნული დანაშაულის ჩამდენი სხვა პირების დადგენა-მხილების მიზნით“, – ნათქვამია გავრცელებულ განცხადებაში.

“პოლონეთის ელჩი უკრაინის საგარეო უწყებაში არ უნდა გამოეძახათ”-მატეუშ მორავიეცკი

09:40 - 02/08/2023

პოლონეთის პრემიერ-მინისტრმა, მატეუშ მორავიეცკიმ მკაცრად დაგმო პოლონეთის ელჩის უკრაინის საგარეო საქმეთა სამინისტროში დაბარება.

„ქვეყნის წარმომადგენელი, რომელიც ერთადერთია, ვინც დარჩა კიევში უკრაინაში რუსეთის შემოჭრის დღიდან, არ უნდა გამოეძახათ. ეს არ უნდა მომხდარიყო. საერთაშორისო პოლიტიკაში, მიმდინარე ომის პირობებში, იმ უზარმაზარი მხარდაჭერის გათვალისწინებით, რომელსაც პოლონეთი უკრაინას უწევს, ასეთი შეცდომები დაუშვებელია“, – წერს მატეუშ მორავიეცკი.

მისივე თქმით, პოლონეთისთვის სხვა სახელმწიფოს ინტერესები არასდროს დადგება მათი ქვეყნის ინტერესებზე მაღლა.

პოლონეთის სახელმწიფო მდივანმა და პრეზიდენტის ადმინისტრაციაში საგარეო პოლიტიკის საკითხებზე მომუშავე ოფისის ხელმძღვანელმა, მარჩინ პშიდიჩმა უკრაინული მარცვლეულის ექსპორტის ბლოკირების საკითხზე საუბრისას განაცხადა, რომ კარგი იქნება, თუ კიევი პოლონეთის დახმარების როლს დააფასებს. აღნიშნულ განცხადებას უკრაინის პრეზიდენტის ოფისში უსაფუძვლო უწოდეს და უკრაინის საგარეო საქმეთა სამინისტროში პოლონეთის ელჩი ბარტოშ ციხოცკი დაიბარეს.

ამასთან, უკრაინის საგარეო უწყებაში პოლონეთის ელჩის დაბარების შემდეგ, პოლონეთის საგარეო საქმეთა სამინისტროში უკრაინის ელჩი დაიბარეს.

ოკუპანტები ძალიან მალე იგრძნობენ ჩვენი მუშაობის შედეგებს -ზელენსკი

09:00 - 02/08/2023

ოკუპანტები ძალიან მალე იგრძნობენ ჩვენი მუშაობის შედეგებს, – ამის შესახებ უკრაინის პრეზიდენტმა, ვოლოდიმირ ზელენსკიმ ყოველდღიური მიმართვისას განაცხადა.

ზელენსკიმ აღნიშნა, რომ უკრაინა ამზადებს არაერთ საერთაშორისო ღონისძიებას და ეს კვირა ამ კუთხით ძალიან მნიშვნელოვანი იყო.

„ჩვენ პარტნიორ ქვეყნებში ახალი პოლიტიკური სეზონის დაწყებამდე ერთი თვე რჩება. ყველაფერს გავაკეთებთ იმისთვის, რომ ეს სეზონი მაქსიმალურად იყოს ხელსაყრელი ჩვენი წინსვლისთვის, გამარჯვებისთვის, სურვილის ასრულებისთვის, აღვადგინოთ მშვიდობა მთელ უკრაინაში, გამონაკლისის გარეშე. მეტი პოლიტიკური მხარდაჭერა უკრაინის მიმართ, მეტი იარაღი ჩვენი მეომრებისთვის. ტერორისტული სახელმწიფოს სრული პასუხისმგებლობა ყველაფერზე, რაც მან გააკეთა უკრაინის, ჩვენი ქალაქების, სოფლებისა და ხალხის წინააღმდეგ“, – განაცხადა ზელენსკიმ.

ამასთან, უკრაინის პრეზიდენტმა კიდევ ერთხელ განსაკუთრებული მადლობა გადაუხადა მეომრებს და აღნიშნა, რომ თითოეული მებრძოლის ისტორია ნამდვილი გმირობაა.

,,უკრაინის დროშის წართმევას ცდილობდნენ და წინააღმდეგობა გავუწიე”- მარინა ჩობანიანი ( ვიდეო)

23:43 - 01/08/2023

ბათუმის ნავსადგურში, საპროტესტო აქციაზე დაკავებული უკრაინის ორივე მოქალაქე თავისუფალია, მათი სასამართლო პროცესი გადაიდო.

როგორც „რადიო თავისუფლებას“ ერთ-ერთმა დაკავებულმა მარინა ჩობანიანმა განუცხადა, მისთვის უკრაინის დროშის წართმევას ცდილობდნენ, რა დროსაც, ნამდვილად გაუწია პოლიციას წინააღმდეგობა და ცდილობდა, დროშა არ დაეთმო.

„პირველად აღმოვჩნდი ასეთ სიტუაციაში. არ ვიცი საკუთარი უფლებები. მოვითხოვე განემარტათ ჩემი უფლებები, როდის შემეძლო ადვოკატის აყვანა. მინიმალური განმარტებებიც არ გაუკეთებიათ“, – ამბობს მარინა ჩობანიანი.

უკრაინის მოქალაქეს გამოძიება ადმინისტრაციულ სამართალდარღვევათა კოდექსის 166-ე (წვრილმანი ხულიგნობა) და 173-ე (პოლიციელის კანონიერი მოთხოვნისადმი დაუმორჩილებლობა) მუხლების დარღვევას ედავება.

2 აგვისტოს ასტროლოგიური პროგნოზი

23:25 - 01/08/2023

ვერძი

მიზნის მისაღწევად ბევრი ბრძოლა მოგიწევთ. წარმატება თქვენს ამტანობაზეა დამოკიდებული. პლანეტების გავლენა პირად ურთიერთობაში წარმატებულ დღეს გპირდებათ. ეცადეთ ისარგებლოთ – ამ დღეს მარტოხელა ვერძს ხიბლს ვერავინ გაუძლებს.

კურო

მშვიდი დღეა, მოულოდნელობების გარეშე. ცვლილებები, რომლებსაც დიდი ხანია ელით, უახლოეს ხანებში მოხდება, თანაც იმაზე უკეთ, ვიდრე ელოდით.
ბოლო დროს ემოციების მოთოკვა გიჭირთ. თუ სახლში კონფლიქტები არ გსურთ, მეტი დიპლომატია უნდა გამოიჩინოთ.

ტყუპები

თუ კარიერულ წინსვლას გეგმავთ, ყურადღება მიმდინარე პროექტების დეტალებზე უნდა გაამახვილოთ. ეცადეთ, საკუთარი ძალა და შესაძლებლობები გააცნობიეროთ და ეს ენერგია მიზნების მისაღწევად მიმართოთ. არც ოჯახთან ერთად დასვენების შესახებ დაივიწყოთ – ეცადეთ, საყვარელ ადამიანთან ჰარმონიული ურთიერთობა აღადგინოთ.

კირჩხიბი

სანამ პარტნიორებს ამა თუ იმ საქმის დაწყებას შესთავაზებთ, ეცადეთ გეგმა და არგუმენტები შეაგროვოთ. წინააღმდეგ შემთხვევაში მათი დარწმუნება გაგიჭირდებათ. პლანეტების გავლენა მნიშვნელოვან ოპერაციებში დაგეხმარებათ, თუმცა, ამჟამად მთელი ყურადღება ოჯახის საქმეებზე გაქვთ გადატანილი, რამაც შეიძლება განწყობა გაგიფუჭოთ.

ლომი

თქვენი ძალისხმევა ჯილდოს იმსახურებს! გირჩევთ საკუთარი გადაწყვეტილება პარტნიორს გაუზიაროთ და ერთად იპოვით საუკეთესო გადაწყვეტილებას, რომელიც პრობლემასთან გამკლავებაში დაგეხმარებათ.
მარტოხელა ლომებს დღის მეორე ნახევარში ერთი ნახვით სიყვარული ელით. დროა, თქვენი გული დიდი გრძნობისთვს მოამზადოთ.

ქალწული

ამ დღეს მენეჯმენტთან ან ადმინისტრაციასთან კამათი და დაპირისპირება გელით. ეცადეთ კომპრომისი დროულად იპოვოთ და შეჩერდეთ. ოჯახის და მეგობრების რჩევა სწორი გადაწყვეტილების მიღებაში დაგეხმარებათ.
მოულოდნელი შემოსავალი საშუალებას მოგცემთ, რომ ვალდებულებები შეასრულოთ.

სასწორი

სამსახურში ეცადეთ ემოციები გამუდმებით აკონტროლოთ და აგრესიის გამოვლინება არ დაუშვათ. ოჯახურ ურთიერთობებში კი მეტი გულწრფელობა უნდა გამოიჩინოთ და ძველებური ოპტიმიზმი დაგიბრუნდებათ. მარტოხელა სასწორებისთვის ეს დღე შეიძლება ცხოვრების მნიშვნელოვან ეტაპად იქცეს.

მორიელი

წინ მნიშვნელოვანი ცვლილებები გელით და ყურადღებით უნდა იყოთ, რომ შანსი ხელიდან არ გაუშვათ. ფინანსური თვალსაზრისით მეტი წინდახედულობა გმართებთ.
მოულოდნელმა შემთხვევამ შეიძლება თქვენს სამომავლო გეგმებზე გავლენა მოახდინოს. მიზეზი გამოჩნდება, რომ შეჩერებული პროექტის განხორციელებას დაუბრუნდეთ.

მშვილდოსანი

ხელსაყრელი დღეა, რომ საკუთარი შესაძლებლობები სრულად გამოავლინოთ და კოლეგებს შესანიშნავი ინიციატივები შესთავაზოთ. მოერიდეთ სკეპტიკოსებს, რომლებიც ხელის შეშლას ცდილობენ. ასევე, ნუ ეცდებით ყველაფრის დამოუკიდებლად მოგვარებას და საჭიროების შემთხვევაში რჩევა გამოცდილ ადამიანებს სთხოვეთ.
მარტოხელა მშვილდოსნებო, ამ დღეს ინსტინქტებს მიჰყვებით, თუმცა შეიძლება მან თქვენთვის შეუფერებელ ადამიანებთან მიგიყვანოთ. გახსოვდეთ, რომ ზოგჯერ პირველი შთაბეჭდილება მცდარია.

თხის რქა

ბოლო დროს თქვენს თავში ჩაიკეტეთ და ეს თქვენი დიდი შეცდომაა. ეცადეთ, სხვა ადამიანებისთვის უფრო ღია და ხელმისაწვდომი გახდეთ.
პირად ურთიერთობებში დიმინირებას ცდილობთ, მაგრამ კარგი იქნება, ინიციატივის უფლება პარტნიორს მისცეთ. თქვენი ურთიერთობა ბევრად უფრო სასიამოვნო იქნება, თუ ცოტა მოდუნდებით.

მერწყული

ეცადეთ, მეტი მოთმინება გამოიჩინოთ და ენერგია ტყუილად არ დახარჯოთ. თქვენი შრომა აუცილებლად დაფასდება – წარმატება უკვე ახლოსაა, ცოტა მეტი მოთმინება უნდა გამოიჩინოთ.
რაც შეეხება ფინანსურ სექტორს, წინ დაუგეგმავი ხარჯები გელით, ამიტომ ეცადეთ „ქამარი მოიჭიროთ“.

თევზები

მიზნამდე მისვლისთვის შეიძლება ზოგი მოვლენის ან ადამიანის მიმართ დამოკიდებულების შეცვლა მოგიწიოთ. მუშაობის დროს სირთულეებმა და დაბრკოლებებმა არ შეგაშინონ – მათ გადალახვას ადვილად შეძლებთ.
მარტოხელა თევზებს შეიძლება ნამდვილი სიყვარული ეწვიოთ. თუ დროებითი გაუგებრობების მოგვარებას შეძლებთ, ამ ურთიერთობას ბედნიერი დასასრული ექნება.

ბათუმის პორტთან აქციაზე დაკავებული 15 პირი გაათავისუფლეს

23:04 - 01/08/2023

ბათუმის საქალაქო სასამართლომ, პორტთან აქციაზე დაკავებული 23 პირიდან 15 -ის საქმე განიხილა. დაკავებულები სხდომის დარბაზიდან ხელწერილის საფუძველზე გათავისუფლდნენ. დღევანდელ პროცესზე მოსამართლემ მხარეებს მტკიცებულებათა მოსაპოვებლად დამატებით დრო მისცა.ამასთან, ბრალდებულები აცხადებდნენ, რომ ბათუმის პორტთან აქციაზე, დაკავებისას სამართალდამცავების მხრიდან ძალის გადამეტებას ჰქონდა ადგილი. დაკავებულთა ნაწილმა ჟურნალისტებს განუცხადეს, რომ სამართალდამცავებმა დაზიანებები ფეხისა და მუცლის არეში მიაყენეს. ნაწილის სასამართლო პროცესი ხვალ გაიმართება.ცნობისთვის, სოჭიდან წამოსული საკრუიზო ლაინერის ბათუმის პორტში შემოსვლას მოქალაქეების მხრიდან პროტესტი მოჰყვა. სამართალდამცავებსა და აქციის მონაწილეთა შორის რამდენჯერმე ფიზიკური და სიტყვიერი დაპირისპირება მოხდა, რის შედეგად შინაგან საქმეთა სამინისტროს თანამშრომლებმა 23 პირი დააკავეს.

,,მათ უნდათ, რომ ერთ ადგილზე შეუძვრენენ ჩინეთ-რუსეთის ვერ შემდგარ ბლოკს”- ვაშაძე

22:23 - 01/08/2023

აბსოლუტური ბლეფი მგონია „ქართული ოცნებისგან“ იმაზე საუბარი, რომ ახლა დაიწყებს ანაკლიის პორტის მშენებლობას ჩინელებთან ერთად , – ამის შესახებ „სტრატეგია აღმაშენებლის“ ლიდერმა, გიორგი ვაშაძემ მედიასთან განაცხადა. გიორგი ვაშაძის განცხადებით, „ქართული ოცნება“ ჩინეთის რეგიონში გააქტიურებას ცდილობს, რადგან მისი მიზანი რუსეთ-თურქეთის ბლოკთან გაერთიანებაა. „ეს არის ბლეფი და ტყუილი იმიტომ, რომ ესენი მხოლოდ და მხოლოდ რუსეთთან არიან ანგარიშვალდებული და პუტინის დავალებას ასრულებენ. რა არის ჩინეთთან სტრატეგიული პარტნიორობა? მათ უნდათ, რომ ერთ ადგილზე შეუძვრენენ ჩინეთ-რუსეთის ვერ შემდგარ ბლოკს. ესაა რეალური შინაარსი ამ ყველაფრის. ფიქრობენ, რომ მხოლოდ რუსეთზე ჩამოკიდება საკმარისი არ არის და იქნებ ჩინეთი როგორმე გააქტიურონ რეგიონში. პოლიტიკური თანამშრომლობა ჩინეთთან ხომ გამორიცხულია. დემოკრატიული წესწყობილება არ არის ჩინეთში და რას ნიშნავს პოლიტიკური თანამშრომლობა? რას ნიშნავს მმართველობის პრინციპების გადმოღება საქართველოში. ჩვენ რა, ბიძინა ივანიშვილს მაო ძედუნად არჩევას ვაპირებთ? „ქართული ოცნების“ კომუნისტური პარტიის სტილში გარდაქმნას ფიქრობს ვინმე საქართველოში?“, – განაცხადა გრიგოლ ვაშაძემ. გიორგი ვაშაძის თქმით, რეალურად ანაკლიის პორტის მშენებლობას ჩინეთის საფარ ქვეშ მყოფი რუსული კომპანია დაიწყებს, რომელიც პროცესს იქამდე გააჭიანურებს, სანამ რუსეთი ევროპას ნოვოროსიისკის პორტისთვის სანქციების მოხსნას არ აიძულებს.

,,ჩინეთში ღარიბაშვილის ვიზიტს რუსეთმა შეუწყო ხელი” – სამადაშვილი

22:03 - 01/08/2023

დანამდვილებით შემიძლია ვთქვა, რომ ჩინეთში ვიზიტის ხელშეწყობა, რა თქმა უნდა, იქნებოდა რუსეთის მხრიდანაც. ჩინეთისთვის მნიშვნელოვანი იქნებოდა რუსეთის აზრი , – ამის შესახებ „ლელოს“ ერთ-ერთი ლიდერმა, სალომე სამადაშვილმა მედიასთან განაცხადა, რითაც საქართველოსა და ჩინეთს შორის სტრატეგიული ურთიერთობის შესახებ ხელშეკრულების გაფორმებას გამოეხმაურა. მისი თქმით, ჩინეთთან სტრატეგიული ურთიერთობის შესახებ ხელშეკრულების გაფორმება ევროკავშირისთვის და დასავლეთისთვის არის „მესიჯი“ იმისა, რომ „მე ჩემი გზა მაქვს“. „მიუხედავად იმისა, რომ ევროკავშირის არც ერთი მოთხოვნა არ არის შესრულებული, ევროკავშირი მაინც ფიქრობს, თუ როგორ მოგვანიჭოს კანდიდატის სტატუსი, იმიტომ რომ ეს არის ქართველი ხალხის არჩევანი და სურს, რომ ამ არჩევანს პატივი სცეს. მაგრამ საქართველოს ჰყავს ხელისუფლება, რომელიც ამას ხელს უშლის, მათ შორის, იმით რომ არ ასრულებს მოთხოვნებს, ასევე, გზავნილი, რომ მე ახლა სტრატეგიულ ურთიერთობებს ვავითარებ ქვეყანასთან, რომელიც პოზიციონირებს დამოუკიდებელ მოთამაშედ, რომელიც ანტაგონისტურ ურთიერთობებშია დასავლეთთან. ეს არის იმის „მესიჯი“, რომ მე, ჩემი გზა მაქვს. ჩინეთის საგარეო პოლიტიკის მიმართ, დასავლეთში ფრთხილი დამოკიდებულებაა. იმიტომ რომ ჩინეთის საგარეო პოლიტიკური ამოცანა უკავშირდება მისი რეჟიმის ინტერესებს. ჩინეთი არის ერთპარტიული, ტოტალიტარული სახელმწიფო, რომელიც ამბობს, რომ მე ჩემი განვითარების გზა მაქვს, რომელიც არ აღირებს იმ ღირებულებებს, რომელზეც დასავლეთია დაყრდნობილი“,- განაცხადა სამადაშვილმა. მისივე შეფასებით, მას არ უკვირს „ქართული ოცნების“ ეს ნაბიჯი, რადგან მისი თქმით, მმართველი პარტიის ბუნებრივი პარტნიორია ყველა ავტოკრატიული რეჟიმი. „საქართველოს ხელისუფლება, რომელიც ამბობს, რომ არჩეული აქვს ევროკავშირი და ნატო, ჩინეთს ეუბნება, რომ შენი პარტნიორი ვარ იმაში, რომ მსოფლიოში ჩინური განვითარების მოდელს ხელი შევუწყო. საერთოდ არ მიკვირს ამას „ქართული ოცნება“ რომ აკეთებს, იმიტომ რომ „ქართული ოცნების“ ბუნებრივი პარტნიორია ყველა ავტოკრატიული რეჟიმი. დანამდვილებით შემიძლია ვთქვა, რომ ჩინეთში ვიზიტის ხელშეწყობა, რა თქმა უნდა, იქნებოდა რუსეთის მხრიდანაც. ჩინეთისთვის მნიშვნელოვანი იქნებოდა რუსეთის აზრი. ჩინეთი და რუსეთი ხშირად არიან კონკურენტები, მაგრამ საკითხი, როდესაც ეხება დასავლეთის ინტერესების შევიწროებას, ხშირად პარტნიორები არიან“,- განაცხადა სამადაშვილმა. გადაცემაში სამადაშვილმა ასევე შეაფასა „ქართული ოცნების“ თავმჯდომარის, ირაკლი კობახიძის განცხადება -„როცა შემოდის რუსეთიდან ადამიანი, დასდევს ჟურნალისტი და კითხვას უსვამს ამ თემაზე, უკვე პროვოკაციაა. სერბეთში რომ ჩავიდნენ, მაგალითად ფრანგი, გერმანელი და ამერიკელი ტურისტები, მათ რომ გაეკიდოს ჟურნალისტი და კითხოს კოსოვოსთან დაკავშირებით, ნახევარზე მეტი გეტყვით, რომ კოსოვო არის დამოუკიდებელი სახელმწიფო და არ არის სერბეთის ნაწილი“. სამადაშვილის თქმით, კოსოვოსთან პარალელის გავლება ქვეყნის ღალატად უნდა შეფასდეს.

,,ირაკლი კობახიძე „რუსულ ინსტრუქციებს“ ასრულებს” – ხაბეიშვილი

21:40 - 01/08/2023

„ერთიანი ნაციონალური მოძრაობის“ თავმჯდომარე ლევან ხაბეიშვილი აცხადებს, რომ ქვეყნის „მთავარი პროვოკაცია და ქაჯობა“ „ქართული ოცნების“ თავმჯდომარე ირაკლი კობახიძე და „რუსული რეჟიმია“.

ამით ხაბეიშვილმა უპასუხა ჟურნალისტის კითხვას, რომელიც „ქართული ოცნების” თავმჯდომარე ირაკლი კობახიძის დღეს გაკეთებულ განცხადებას ეხებოდა, რომელმაც თქვა, რომ „რუსეთიდან ჩამოსულს ჟურნალისტი ოკუპაციაზე რომ ეკითხება, უკვე პროვოკაციაა“.

ხაბეიშვილის განცხადებით, ირაკლი კობახიძე „რუსულ ინსტრუქციებს“ ასრულებს.

„თუ რამე არის პროვოკაცია და თუ რამე არის ქაჯობა, თუ ვინმეა ქაჯი და პროვოკატორი, არის „კაკებეშნიკის“ ოჯახში გამოწრთობილი ირაკლი კობახიძე, რომელიც კარგად ასრულებს რუსულ ინსტრუქციებს. ცხადია, მისთვის პროვოკაციული შეკითხვაა. „არის თუ არა აფხაზეთი საქართველო“ – ეს კითხვაც არ უნდა ისმებოდეს, მაგრამ ოკუპანტის, პუტინისტის მიმართ კითხვა ლოგიკურია. რომ გეუბნებიან, სტუმრები არიან და ამასობაში არ აღიარებენ ჩვენს ტერიტორიულ მთლიანობას, ცხადია, ვერ ჩაითვლებიან ჩვენს ტურისტებად და კეთილმოსურნეებად. ამიტომ მთავარი პროვოკაცია ამ ქვეყნის, ქაჯობა და ქაჯი არის ივანიშვილის მიერ ხელდასმული რუსული რეჟიმი“, – განაცხადა ხაბეიშვილმა.

ინფორმაციისთვის, “ქართული ოცნების” თავმჯდომარე, ირაკლი კობახიძე გამოეხმაურა სოჭიდან წამოსული საკრუიზო ლაინერის, “ასტორია გრანდეს” გარშემო, ბათუმში განვითარებულ მოვლენებს და განაცხადა, რომ “კოლექტიურმა „ნაცმოძრაობამ“ ანუ „ნაციონალურმა მოძრაობამ“, „ლელომ“, გახარიას პარტიამ, „ევროპულმა საქართველომ“ ბათუმში ხალხი მთელი საქართველოდან ჩაიყვანა და 150 კაცი ძლივს მოაგროვა – რუსეთიდან ჩამოსულს ჟურნალისტი ოკუპაციაზე რომ ეკითხება, უკვე პროვოკაციაა”.

„ოპოზიციაში დოკუმენტებს კითხვა რომ არ იციან, ეს ახალი არ არის”-სამხარაძე

21:08 - 01/08/2023

მნიშვნელოვანია ჩინეთის პოლიტიკური მხარდაჭერა საქართველოს მიმართ, განსაკუთრებით საქართველოს ტერიტორიული მთლიანობის მიმართ, გამომდინარე იქიდან, რომ ჩინეთი არის უშიშროების საბჭოს მუდმივმოქმედი წევრი, – ამის შესახებ პარლამენტის საგარეო ურთიერთობათა კომიტეტის თავმჯდომარე ნიკოლოზ სამხარაძემ პრემიერის ჩინეთში ვიზიტის შეფასებისას განაცხადა.

„ოპოზიციაში დოკუმენტებს კითხვა რომ არ იციან, ეს ახალი არ არის; ცოტა ხნის წინ თქვეს, რომ პარლამენტის დაუკითხავად მოახდინა მთავრობამ ჩინეთთან ურთიერთობების დონის ამაღლება, თუმცა, თუ გადახედავენ პარლამენტის 2020 წლის რეზოლუციას და წაიკითხავენ, დაინახავენ რომ იქ პირდაპირი დავალებაა პარლამენტის მთავრობისადმი, რომ ჩინეთთან და არა მარტო ჩინეთთან, მთავრობამ უნდა იმუშაოს აქტიურად, რომ ურთიერთობები კიდევ უფრო გაღრმავდეს“, – აღნიშნა ნიკოლოზ სამხარაძემ.

,,საქართველოში ადამიანის უფლებათა მყარი სისტემა არსებობს”- ევროკავშირის ანგარიში

20:45 - 01/08/2023

ევროკავშირი მსოფლიოში ადამიანის უფლებებისა და დემოკრატიის მდგომარეობის შესახებ 2022 წლის ანგარიშს აქვეყნებს.

ანგარიშის თანახმად, ზოგადად, საქართველოში ადამიანის უფლებათა მყარი სისტემა არსებობს, რომელიც საერთაშორისო და ევროპულ სტანდარტებთან შესაბამის კანონებსა და პოლიტიკას მოიცავს, თუმცა, მათი აღსრულება / განხორციელება რამდენიმე მიმართულებით უნდა გაძლიერდეს.

ამასთან, ანგარიშში აღნიშნულია, რომ შემდგომი ძალისხმევა საჭიროა სასამართლო რეფორმების, კორუფციასთან ბრძოლის და სახელმწიფო ინსტიტუტების დამოუკიდებლობის გაძლიერების სფეროებში.

„ადამიანის უფლებებისა და დემოკრატიის მდგომარეობის მიმოხილვა: საქართველომ ევროკავშირში გაწევრიანებაზე განაცხადი 2022 წლის მარტში შეიტანა. 2022 წლის ივნისში ევროპულმა საბჭომ საქართველოს ევროპული პერსპექტივა აღიარა და გამოაცხადა მზადყოფნა საქართველოსთვის კანდიდატი ქვეყნის სტატუსის მინიჭების შესახებ მას შემდეგ, რაც ევროკომისიის დასკვნაში მითითებული პრიორიტეტები შესრულდება. ეს პრიორიტეტები დემოკრატიული პრინციპების განმტკიცების, კანონის უზენაესობისა და ადამიანის უფლებებთან დაკავშირებული ვალდებულებების საკითხებს მოიცავს.

ზოგადად, საქართველოში ადამიანის უფლებათა მყარი სისტემა არსებობს, რომელიც საერთაშორისო და ევროპულ სტანდარტებთან შესაბამის კანონებსა და პოლიტიკას მოიცავს. თუმცა, მათი აღსრულება / განხორციელება რამდენიმე მიმართულებით უნდა გაძლიერდეს. 2022 წელს არის წინსვლა საარჩევნო სისტემის, საჯარო მმართველობის რეფორმების, გენდერული თანასწორობის, ბავშვთა უფლებებისა და შეზღუდული შესაძლებლობის მქონე პირთა უფლებების კუთხით. შემდგომი ძალისხმევა საჭიროა სასამართლო რეფორმების, კორუფციასთან ბრძოლის და სახელმწიფო ინსტიტუტების დამოუკიდებლობის გაძლიერების სფეროებში. კვლავ შემაშფოთებელია ადამიანის უფლებების მდგომარეობა საქართველოს თვითგამოცხადებულ რეგიონებში – აფხაზეთსა და სამხრეთ ოსეთში“, – აღნიშნულია ანგარიშში.

ამასთან, დოკუმნენტში საუბარია ევროკავშირის საქმიანობის ძირითად მიმართულებებზე.

„ ევროკავშირის მოქმედება – საქმიანობის ძირითადი მიმართულებები: ევროკავშირი საქართველოში სამუშაოდ ხელმძღვანელობს ასოცირების შესახებ შეთანხმებითა და ადამიანის უფლებებისა და დემოკრატიის სფეროში ევროკავშირის სამოქმედო გეგმით 2020-2024 წლებისთვის. 2022 წელს ევროკავშირმა ყურადღება გაამახვილა სასამართლო სისტემის დამოუკიდებლობისა და ანგარიშვალდებულების გაძლიერებაზე, უთანასწორობის შემცირებაზე, დისკრიმინაციის წინააღმდეგ ბრძოლის მხარდაჭერასა და სამოქალაქო საზოგადოების გაძლიერებაზე, რომ მან თავისი სამოქალაქო უფლებების წინ წამოწევა და დაცვა შეძლოს. ევროკავშირი ადვოკატირებას უწევდა და ხელს უწყობდა ბავშვთა და შეზღუდული შესაძლებლობის მქონე პირთა უფლებების განხორციელებას, გენდერული თანასწორობის წინ წამოწევას და გენდერული და ოჯახური ძალადობის წინააღმდეგ ბრძოლას. ევროკავშირმა ასევე ყურადღება გაამახვილა ლგბტი თემის უფლებების, მათ შორის გაერთიანების თავისუფლების უფლების დაცვის ადვოკატირებაზე“, – ნათქვამია ანგარიშში.

გარდა ამისა, ანგარიშში საუბარია ევროკავშირის ორმხრივი პოლიტიკური ჩართულობაზე და ნათქვამია, რომ 2022 წლის განმავლობაში ევროკავშირი ჩართული იყო რეგულარულ პოლიტიკურ დიალოგში საქართველოსთან, მათ შორის ადამიანის უფლებების საკითხებზე.

„ევროკავშირი-საქართველოს ასოცირების საბჭო 2022 წლის სექტემბერში, ხოლო ადამიანის უფლებების დაცვის საკითხებზე ევროკავშირი-საქართველოს ყოველწლიური დიალოგი 2022 წლის ივნისში გაიმართა. ევროკავშირმა მნიშვნელოვანი ძალისხმევა მიმართა საქართველოს წახალისების მიზნით, შეემუშავებინა ადამიანის უფლებათა დაცვის ეროვნული სტრატეგია 2022-2030 წლებისთვის. ეს მოიცავდა ადამიანის უფლებათა დაცვის საკითხებში პრემიერ-მინისტრის მრჩეველთან რეგულარულ შეხვედრებს გაეროსთან მჭიდრო თანამშრომლობით, მათ შორის ევროკავშირის HumanRights4all პროგრამის ფარგლებში. მთავრობამ სტრატეგია მოიწონა ასოცირების საბჭოს სხდომის წინ და ის პარლამენტმა უნდა მიიღოს. თუმცა, ამ პროცესს აკლდა საფუძვლიანი კონსულტაციები საერთაშორისო პარტნიორებთან და სამოქალაქო საზოგადოებასთან. ეროვნული სტრატეგიის განსახორციელებლად ყოვლისმომცველი სამოქმედო გეგმების შემუშავების თაობაზე დიალოგი გრძელდება. ევროკავშირმა შემოიტანა წინადადებები, რომლებიც მიზნად ისახავს ისეთი საკითხების ინტეგრირებას, რომლებსაც სტრატეგია არ ითვალისწინებდა, როგორიცაა სექსუალური ორიენტაციისა და გენდერული იდენტობის საფუძველზე დისკრიმინაციის, სიძულვილით მოტივირებული დანაშაულების წინააღმდეგ ზომების მიღება და მართლმსაჯულებასთან დაკავშირებული საკითხების მოგვარება“, – აღნიშნულია დოკუმენტში.

დოკუმენტში აღნიშნულია ევროკავშირის ფინანსურ ჩართულობაზეც.

„ევროკავშირის წარმომადგენლობა საქართველოში ადამიანის უფლებების დაცვისა და ხელშეწყობის კუთხით კვლავ მოწინავე პოზიციებზე იყო ადამიანის უფლებების სფეროში მასშტაბური პროგრამების განხორციელებისა და სისტემური საინფორმაციო – საგანმანათლებლო ღონისძიებების საშუალებით. ძირითადი დახმარება EU4Human Rights პროგრამის ფარგლებში განხორციელდა (11 მილიონი ევრო). პროგრამის მიზანია ადამიანის უფლებების, მათ შორის უმცირესობებისა და მოწყვლადი ჯგუფების უფლებების დაცვის გაძლიერება, ქალთა მიმართ ძალადობისა და ოჯახში ძალადობის წინააღმდეგ ბრძოლა, სამართალდამცავ ორგანოებზე შიდა და გარე ზედამხედველობა, პირადი ცხოვრების ხელშეუხებლობის დაცვა, ბავშვის უფლებების დაცვა და ოჯახური ძალადობის მსხვერპლთა მხარდაჭერა.

2022 წლის განმავლობაში ევროკავშირის წარმომადგენლობა მხარს უჭერდა სამოქალაქო საზოგადოებას, როგორც კარგი მმართველობისა და სოციალურ-ეკონომიკური ზრდის მძლავრ გამტარებელს. დემოკრატიისა და ადამიანის უფლებების ევროპული ინსტრუმენტის (EIDHR) ქვეყნის მიხედვით მხარდაჭერის სქემების (CBSS) ფარგლებში მიღებული გრანტებით სამოქალაქო საზოგადოების ორგანიზაციები ახორციელებენ პროექტებს, რომლებიც მოიცავს შემდეგ საკითხებს: ეთნიკური უმცირესობების სოციალური და ეკონომიკური უფლებები, შეზღუდული შესაძლებლობის მქონე პირთა უფლებები, ჯანმრთელობის უფლება, სამუშაო ადგილზე გენდერული თანასწორობის წინ წამოწევა და ასევე თანაბარი, თავისუფალი და სამართლიანი არჩევნები საქართველოში.

ევროკავშირის ორმხრივ დახმარებას ამ სფეროში ავსებს ევროკავშირის მიმდინარე რეგიონული პროგრამა EU4Gender Equality აღმოსავლეთ პარტნიორობის ქვეყნებისთვის, 8 მილიონი ევროს ოდენობის საერთო ბიუჯეტით. სასამართლო სისტემის რეფორმებს მხარს უჭერდა ევროკავშირის მიერ დაფინანსებული პროგრამა კარგი მმართველობისთვის PGG II, რომელსაც ევროპის საბჭო ახორციელებს. საქართველოში განხორციელებული კომპონენტები სასამართლოსა და სასამართლოს ადმინისტრირების, სტატისტიკის შეგროვების, იუსტიციის უმაღლესი სკოლის, უზენაესი სასამართლოს, დამოუკიდებელ ინსპექტორის და სხვების მხარდაჭერას უზრუნველყოფდა, – ნათქვამია ანგარიშში.

ანგარიშის თანახმად, საქართველომ 2022 წლის განმავლობაში მრავალმხრივი ჩართულობა გააგრძელა.

„ მრავალმხრივი კონტექსტი: საქართველომ 2022 წლის განმავლობაში მრავალმხრივი ჩართულობა გააგრძელა. იგი არჩეული იყო გაეროს ადამიანის უფლებათა საბჭოს წევრად 2023-2025 წლებისთვის. 2022 წლის მარტში, ადამიანის უფლებათა საბჭომ მიიღო რეზოლუცია გაეროს ადამიანის უფლებათა უმაღლესი კომისრის მხრიდან ტექნიკური დახმარების გაგრძელების შესახებ, რომელიც მიმართულია ადამიანის უფლებების მდგომარეობაზე აფხაზეთსა და ცხინვალის რეგიონში/სამხრეთ ოსეთში. საქართველოს მიერ წარმოდგენილი რეზოლუციით, ადამიანის უფლებათა კომისარი სთხოვდა უმაღლეს კომისარს წარმოედგინა განახლებული ინფორმაცია (ზეპირი მოხსენების სახით) და წერილობითი ანგარიში ორ თვითგამოცხადებულ რეგიონში ადამიანის უფლებების მდგომარეობასთან დაკავშირებულ მოვლენებთან მიმართებაში.

9 ივნისს გაეროს გენერალურმა ასამბლეამ კენჭისყრის საშუალებით მე-15-ჯერ მიიღო საქართველოს რეზოლუცია „აფხაზეთიდან (საქართველო) და ცხინვალის რეგიონიდან/სამხრეთ ოსეთიდან (საქართველო) იძულებით გადაადგილებულ პირთა და ლტოლვილთა სტატუსის შესახებ“.

წლის განმავლობაში საქართველოს საკითხი ასევე განიხილეს ადამიანის უფლებათა კომიტეტმა, რომელიც სამოქალაქო და პოლიტიკური უფლებების კონვენციის შესრულებას აკვირდება და რასობრივი დისკრიმინაციის აღკვეთის კომიტეტმა. საქართველოსთან ამ დიალოგების დროს გაეროს შესაბამისმა საკონვენციო ორგანოებმა გამოხატეს შეშფოთება საქართველოს თვითგამოცხადებულ რეგიონებში – აფხაზეთსა და სამხრეთ ოსეთში ადამიანის უფლებების მდგომარეობასთან დაკავშირებით, მათ შორის სიცოცხლის, თავისუფლებისა და უსაფრთხოების უფლების, გადაადგილების თავისუფლების დარღვევებთან დაკავშირებით და ასევე სხვა გამოწვევებთან მიმართებაში COVID-19 პანდემიის კონტექსტში“, – ნათქვამია დოკუმენტში.

რუსთავში 38 გველი დაიჭირეს, მათ შორის შხამიანიც

19:48 - 01/08/2023

რუსთავის ადმინისტრაციულ საზღვრებში ივლისის თვეში 48 გველი დაიჭირეს. ამის შესახებ ინფორმაციას “ინფო რუსთავი” ავრცელებს.

რუსთავის საზოგადოებრივი ჯანმრთელობისა და უსაფრთხო გარემოს ცენტრის ხელმძღვანელის, დავით იშხნელის ინფორმაციით, მათთან სულ 80 გამოძახება შევიდა, საიდანაც 48 დადასტურდა, მათ შორის ერთი შხამიან გველზე.

დაჭერილი გველების სახეობები ასე ნაწილდება: წყლის ანკარა – 16, ჩვ. ანკარა – 6, წითელმუცელა მცურავი – 7, წენგოსფერი მცურავი – 6, კატისთვალა – 1, გველხოკერა – 3, წყნარი ეირენისი – 5 გიურზა – 1, თითტიტველა გეკონი – 3.

იშხნელის ინფორმაციით, გასულ თქვეს ქვეწარმავლის მიერ დაკბენის შემთხვევა რუსთავში არ დაფიქსირებულა.

ინფორმაციისთვის, ქვეწარმავლის აღმოჩენის შემთხვევაში, შეგიძლიათ დარეკოთ მერიის ცხელ ხაზზე – 13 00 ან შეგიძლიათ დაუკავშირდეთ ჯანდაცვის ცენტრს ნომერზე – 28 74 75.

1...1,7931,7941,795...2,310 Page 1,794 of 2,310